Shapita 115

Kubalupuka Lupata

PAKISHILULA kyolwa, Yesu wadi wafundija bufundiji bulumbuluke bwa kwityepeja pa koija maulu a batumibwa bandi. Kupwa, washilula Kivulukilo kya lufu lwandi lwafwena’lu. Pano kubalupuka mwanda mupwe bunwa, nakampata shi twele milafwe ku bino byamonwa panopano ponka. Batumibwa bandi abashilula kwipatanya, bafwila kuyuka i ani mukatampe umbukata mwabo! Mobimwekela, luno lupata kelushilwilepo dyalelo.

Vuluka, paalamukile Yesu ku lūlu kaeñenya, batumibwa bepatenye mwanda wa kuyuka i ani mukatampe umbukuta mwabo. Kadi ba Yakoba ne Yoano balombele bitenta bya kumeso mu Bulopwe, uno mwanda waleta lupata mu batumibwa. Bine, pano Yesu wakwatwa bulanda bininge pa kwibamona bepotomeja monka buno bufuku bwandi bwa mfulo kwikala nabo! Ino walonga’po namani?

Yesu pa kyaba kya kutopeka batumibwa mwanda wa ngikadila yabo, ino washilula monka kulanguluka nabo na mutyima mutūke amba: “Balopwe babikadilanga bantu babo na lupusa ne boba bebafikijija lupusa nabo batelwa bu ‘Bebalongela biyampe.’ Ino banwe ke nabya po, enhe . . . Lelo mukatampe i wepi? I yewa udya’nyi nansha i yewa umutudila byakudya? I yewa udya. Le ke amo po?” (MB) Kupwa webavuluja kifwa kyandi, amba: “Talai, amiwa ndi umbukata mwenu bwa yewa uleta byakudya!” (MB)

Batumibwa abashikilwa na Yesu mu matompo andi, nansha byobadi bantu bakubulwa kubwaninina. O mwanda webasapwila’mba: ‘Nalonga nenu kipwano, pamo na mulongele Tata kipwano na ami, kya pa bulopwe.’ Kino kipwano kidi pa bukata bwa Yesu ne balondi bandi badikōkeji kibebalunga kudi aye mwa kukabikadila nandi mu bulopwe bwandi. I bantu 144000 kete bo batwejibwe mu kino kipwano kya Bulopwe.

Nansha batumibwa byobapebwa kino kyepelo kilumbuluke kya kukabikala na Kidishitu mu Bulopwe, ino pano bakidi bakōkekōke kumushipiditu. “Bānwe bonso mukankolelwa bufuku bwa dyalelo,” ye Yesu unena. Inoko Yesu wasapwila Petelo amba wamulombelela’ko, kupwa wamusoñanya’mba: ‘Shi ubajoka, kakomeje banabenu pa mutyima.’

“Twanwe twana,” ye Yesu kashintulula, “pabashala patyetye po nkikidi nenu. Mukansakangapo monka mo nanenene [Bayuda] na’mba: Kokwa ko ñenda bānwe kemukafikakopo; ne bānwe nenu mo monka. Mwanda mupya uno o nemulá amba: Mwikale kwisanswa bānwe bene na bene. Po ponka po bakemuyūkila bu-bāna-bami-babwanga ponka pa kwisanswa mo mwikadile bānwe bene.”

“Mfumwami, le usaka kwenda pi?” ye Petelo wipangula.

“Ko ñenda ami kuno abe kuyūkakopo kunonda pano pano, mhm,” ye Yesu ulondolola, “nanshi kunonda ukanonda dingi dikwabo.”

“A Mfumwami, le [i] kika kyo nkikokejejapo kukulonda panopano”? ye Petelo ukimba kuyuka. “Ami nansha lufu lwine nkufwila tu.” (MB)

“Le abe umfwile ami bine?” ye Yesu wipangula. (MB) “I binebine byo nkunena’mba: Bonka bufuku bwa dyalelo dino nzolo pakadidile, kulondakanya dibidi, abe nobe ukantuna disatu.”

“Shi bīkale nankyo amiwa mfwa’tu nobe,” ye Petelo upatanya, “nkikutunepo, mhm.” Batumibwa bakwabo nabo pa kunena namino, po pene Petelo kaeanya’mba: “Nansha bonso bakakukolelwa, ami, mhm, kukukolelwa mpika.”

Yesu wavuluka kitatyi kyaatumine batumibwa mu lwendo lwa kukasapula mu Ngadilea pampikwa ñonga nansha mbukulu wa bidibwa, kaipangula’mba: “Le kyo mwabudilwe i kika?”

“Nansha kamo,” bo abo balondolola.

“Ino pano wa ñonga asele’yo wa kimbukulu nandi monka,” ye Yesu unena, “kadi wampikwa kipete apoteje mutwelo wandi [akapote] kipete. Mwanda nemusapwila’mba: Byobya byansonekelwe bikisaka bimfikilepo’mba: Kadi wadi mubadilwe ku bakujilula bijila ke-pantu bintu bilemenene ami bidi ne po bikapwila.”

Yesu wisambila pa kitatyi kyasa kukobekwa ku mutyi na batubwalāla, bajiludi ba bijila. Kadi walombola’mba kupwa pano, balondi bandi bakatanwa na kupangwapangwa kukomo. “Abe Mfumwetu talapo bipete bibidi bino,” bo abo banena.

“Kubapu,” ye aye ulondolola. Bino bipete byobasela bisa kupa Yesu mukenga’nka panō wa kuleta bufundiji bukwabo bwa mvubu mikatampe, na motusa kwibimwena. Mateo 26:31-35; Mako 14:27-31; Luka 22:24-38; Yoano 13:31-38; Kusokwelwa 14:1-3.

▪ Mwanda waka lupata lwa batumibwa i lupwe bunwa?

▪ Lelo Yesu wapwija lupata muswelo’ka?

▪ Kipwano kyalonga Yesu na bandi bana-babwanga kibafikidija bika?

▪ I lubila’ka lupya lwaleta Yesu, ne ludi na mvubu ya muswelo’ka?

▪ I kwikulupila’ka kupitepite kwaikala na Petelo, ne Yesu wanena’po namani?

▪ Mwanda waka misoñanya ya kusela ñonga ne mbukulu wa bidibwa yaleta Yesu i mishile na yaaletele mafuku a kunyuma?