Shapita 124

Wapānwa Kebenda Nandi

PILATO watengwa na bukijiba-ntalela bwa Yesu umweshibwa malwa, katompa monka kumukutulula, ino babitobo bakatampe abakalabala byamwiko. I basumininwe, bapela kumona kakintu nansha kamo kavutakanya mpango yabo imbi. Kebatūta monka kyungwe: ‘Mupope! Mupope!’

‘Muselei mukamupope banwe bene,’ ye Pilato ulondolola. (Kudi kwishila na byobadi abanena dibajinji, Bayuda badi na lupusa lwa kwipaya batubwalala bajilwile bijila bikatampe bya kipwilo.) Uno ke musunsa wa butano, Pilato unena’nka kunena’mba Yesu kapilepo mambo, amba: “Nkimwenepo ne mwanda wadi nao, mhm.”

Bayuda pa kumona’mba matope abo a bya mabikavu obatopeka Yesu kealongelepo kintu, abajokela ku matope a myanda ya Leza obadi bamutopeka mu nsaa ya kunyuma pobadi bamwimukija ku meso a Sanhedrini amba utukanga Leza. “Bātwe tudi ne mukanda-wetu-wa-bijila,” bo abo banena, “kadi monka mwendele uno mukanda-wetu-wa-bijila ufwaninwe’tu kufwa yao muntu, ke-muntu wipele aye mwine bu-Mwanā Leza.”

Ano matope i meni kudi Pilato, po pene abamukwatyija moyo. Pano wajingulula’mba Yesu ke muntupo bitupu monka mwalotele’kyo wandi mukaji, kadi mo monka mwikilombwela ne bukomo bwa bumuntu bwa Yesu. Lelo i “Mwanā Leza” binebine? Pilato uyukile amba Yesu i mwine Ngadilea. Le wādi na būmi bukwabo kala’ni? Pilato wamutweja dikwabo mu njibo, kamwipangula’mba: “Le kwenu i kwepi?” (MB)

Yesu waube nyā. Ke mupwe kala kulombola Pilato amba i mulopwe, inoko Bulopwe bwandi ke bwa ino ntandapo. Nanshi kekukidipo bikwabo bya kumushintulwila ebivwane. Yesu pa kupela kulondolola, Pilato wayulwa kibengo ku mutyima, kafunina Yesu amba: “Lelo kunondololapo? Kuyukilepo’mba ami ndi ne lupusa lwa kukulekelela nansha kukupopeja ku [mutyi]?” (MB)

“Abe wadi kukokejapo kwikala ne lupusa kudi ami nansha lutye, shi Leza wadi kakupele’lopo,” ye Yesu ulondolola na bulēme. Wisambila pa lupusa lulekele Leza amba bambikavu bantu baludike myanda ya pano pantanda. Yesu wabweja’ko amba: “O mwanda’o yewa wamfikija kuno kodi wapi mambo kutabuka abe.” (MB) I kyabine, Kaifasa kitobo mukatampe ne bakwabo bobakutyile nabo kitumba ne Yudasa Isakadiota abetwika kiselwa kilēma kupita’ko Pilato kya ano malwa amweshibwa Yesu pakubulwa mwanda.

Pilato watengwa bininge na Yesu, wakwatwa moyo amba padi Yesu i mutambe kwa Leza, washilula kulonga monka buninge bwa kumukutulula. Ino Bayuda abapele binena Pilato. Kebapituluka mu matope abo a bya mabikavu, bamutuyula na manwa’mba: “Wivwane ukutulul[e] uno’u nankyo nanshi kudipo mulunda na Kesala, ke-bantu bonso bakwipa bulopwe babeñanga Kesala.”

Nansha byobatuyula Pilato namino, ino walupula monka Yesu panja. “Monai bidi, Mulopwe wenu yao!” ye aye wibazenza monka.

“Mutwalei! Mutwalei! mukamwipaye ku [mutyi]!” bo abo banena.

“Nemwipaīle mulopwe wenu’ni a?” ye Pilato wipangula na mutyima kanyonga.

Bayuda babinzanga na buludiki bwa bene Loma bwibatādile. Byabine, i bashikwe umbikalo wa Loma! Ino babitobo bakatampe abanena na buzazangi amba: “Bātwe ketudipo ne mulopwe mukwabo poso’nka Kesala.”

Pilato watyina kujimija kitenta kyandi kya mu bubikavu ne ntumbo yandi, watyumuka pa kuningilwa na Bayuda. Webape Yesu. Bashidika abavula Yesu kisandi kityiluluka pyā kyobadi bamuvwikile, abamuvwika mitwelo yandi ya pangala. Kebakamutwala kwa kukamupopela, abamutwika mutyi wa masusu wakapopibwa’ko.

Dyuba dibakile ke misanya milume mu dya Butano mafuku 14 a Nisane, pakwabo kedilumba ku midi. Yesu udi’nka bwimwa tamba lubanga lwa kesha dya Buná, umona onka malwa. Bine, bulēmi bwa mutyi waselele bubamukokeja. Ebiya abakwata mupityeshinda umo witwa dya bu Shimona mwine Saidini wa mu Afrika, abamuseleja’o. Papo bantu bavule benda bebalonda mobenda, ne bana-bakaji, beyaya na mutyima wibapepa ne kuyoyokota pa mwanda wa Yesu.

Yesu waalamukila kudi bana-bakaji, webanena’mba: “Bānwe bāna-bakaji, bāna ba mu Yelusalema, kemukindila ami, mhm, ikalai kwidila bānwe bene ne bāna benu kumo. Ke-pantu myaka īkāyako mukanena’mba: Badyese i bañumba, ne ba mafu ampikwa kubutula bāna, ne ba mabele akubulwa kwamusha bāna. . . . Ke-bantu balongako namino mutyi mubishi, lelo ku mutyi mūmu ke pepi?”

Uno mutyi wisambila’po Yesu i muzo wa Bayuda, ukidi’ko na kabubishi munda mwanda wa aye ukidi’po ne mwanda wa bashele’ko bamwitabije bakidi’ko. Ino kitatyi kyobasa kutalulwa mu uno muzo, kukashala’nka mutyi mūmu kumushipiditu, ko kunena’mba muzo mūmu onso mutuntulu. I bine! kukekalanga miyoa kashāa, pakasalwa muzo wa Bayuda na bibumbo bya bulwi bya Loma bikengidijibwa na Leza! Yoano 19:6-17; 18:31; Luka 23:24-31; Mateo 27:31, 32; Mako 15:20, 21.

▪ I matope’ka atopekwa Yesu na bendeji ba bipwilo pa kumona’mba matope a bya mabikavu obamutopeka abakankalwa?

▪ Mwanda waka Pilato wakwatwa moyo mpata?

▪ I bāni betwikile bubi bukatampe bwa byalongwa Yesu?

▪ Lelo babitobo ababwanya Pilato namani ebape Yesu akepaibwe?

▪ Yesu wanena bika kudi bana-bakaji bamudila, ne i bika byasaka kunena na kino kishima mutyi ukidi “mubishi” usa kwikala ke “mūmu”?