Shapita 130

Ku Dijiba dya Ngadilea

PANO batumibwa abajokela ku Ngadilea mungya mwebasoñaninye Yesu. Ino kebayukilepo kyobafwaninwe kukalonga’ko. Kitatyi kityetye, Petelo wasapwila ba Tomase, Natanela, Yakoba ne mwanabo Yoano, ne batumibwa bakwabo babidi amba: “Ami nakate mwita wa lui.” (MB)

“Nanshi netu twende nobe,” bo bano basamba balondolola. (MB)

Abate bufuku bonso ino kutupu kukwata nansha kamo. Akyo kibanga kitamba momwa pyā, Yesu nandi umweka ku mbadi, ino batumibwa kumujiula amba i Yesu mpika. Webela lubila’mba: “Bānwe bāna le mudi ne byakudya’ni?”

“Ehe!” bo abo nabo bamwela mabila abo pa mema.

“Telai bukonde mutamba wa kuboko kulume kwa bwato, mukwate!” ye aye wibanena. (MB) Abo pa kuta, abakomenwa kwabula bwanda mwanda wa mwita upile’ko kituki.

“E! I Mfumwetu,” ye Yoano unena. (MB)

Petelo pa kwivwana namino, wekumbidija mutwelo wandi wa pangala, mwanda wadi muvule bisandi, wetumpwila pa dijiba. Wasumbe kintu kya metele 90 na ku mbadi. Batumibwa bakwabo kebamulonda na bwato, benda bakoka bwanda bupye mwita bā.

Abo bafika ku kyabu, abatana mudilo wa makala ne mwita wa lui mutenteke’po, ne mikate’po. “Letai’ko mwita umo ku o mubakwata’o,” ye Yesu wibanena. (MB) Petelo waikila mu bwato kakokela bwanda pa ntanda. I kupye mwita mukatampe 153!

“Iyai bidi mudye,” ye Yesu wibeta.

Kekudipo umwipangwile amba, “Le abe wi ani?” mwanda bonso abayuka’tu amba i Yesu. Kuno ko kumweka kwa busamba-bubidi kupwa kusanguka kwandi, ino i kwa busatu kwaamwekela batumibwa bavule pamo. Watūla bidibwa shē, washilula kwibabila mikate ne mwita wa byandi wa byandi.

Abapu kudya, Yesu, mobimwekela watale ku mwita muvule ukwetwe, waipangula Petelo amba: “Abe Shimona, mwana Yona, lelo unsanshilwe byamalwa kutabuka banōba?” Kunena na bubine, usaka kunena’mba, lelo ulamete bininge ku buluwe kupita’ko ku mwingilo onkulongolwedile kwingila?

“Eyo, abe Mfumwami, abe mwine uyūkile mo nkuswelele,” ye Petelo ulondolola.

“Nanshi kadishe twana-twami-twamikōko,” ye Yesu umutentulula.

Kadi wamwipangula musunsa wa bubidi amba: “Abe Shimona, mwana Yona, lelo unsanshilwe byamalwa’ni?”

“Eyo, abe Mfumwami, abe mwine uyūkile mo nkuswelele,” ye Petelo ulondolola musumininwe.

“Kakumbe mikōko yami nanshi,” ye Yesu umusoñanya monka.

Kupwa wamwipangula musunsa wa busatu amba: “Abe Shimona, mwana Yona, lelo unswelele[le]’ni?”

Pano Petelo mutyima ubamufīta. Padi walanga’mba Yesu umwalakana dikōkeji dyandi. Mwanda panopano ponka padi Yesu mu kīmu, Petelo wamutunine misunsa isatu amba kamuyukilepo. O mwanda Petelo wanena’mba: “Abe Mfumwami, abe mwine uyūkile byonsololo, ne mo nkuswelele uyūkidile.”

“Kadishe mikōko yami,” ye Yesu umusoñanya musunsa wa busatu.

Enka namino, Yesu wanena Petelo mwanda wa ne bakwabo nabo baboile’po ñeni, bengile mwingilo waebasakila kwingila. Panopano Yesu usa kutaluka pano pantanda, o mwanda wibasakila balete kifwa mu kwingidila boba basa kupūminwa mu kipombo kya mikōko ya Leza.

Yesu wakutyilwe ne kwipaibwa pa mwanda wa mwingilo wāmupele Leza waadi wingila, o mwanda pano kasapwila Petelo amba nandi ukasusulwa muswelo umo onka. “Po wakidi nsongwalume,” ye Yesu umunena, “wadi wivwika abe mwine, ne kunanga nako monka konso kōswele wakanangako, ino pōkafika ku bununu ukatulula maboko, ungi kakuvwika ke bakuselela ne ko kuswele mutyima obe.” Nansha Petelo byasa kukafwa lwa kwipaibwa, inoko Yesu wamunena’mba: “Nonde.” (MB)

Petelo pa kuvundamuka, wamone Yoano, kaipangula’mba: “Abe Mfumwami! le uno ukēkalanga namani?”

“I mo nsakile ami mwine shi nene na’mba ankungile poso’nka ami ngiye kepadi mwanda”; ye Yesu utentulula, “lelo i mwanda obe’ni? Abewa nonde.” Bino binenwa bya Yesu bibaivwanikwa bingi na bana-babwanga bavule, kebalanga’mba mutumibwa Yoano kakikafupo. Ino enka na musa kwibishintulwila mutumibwa Yoano mwenda mafuku, Yesu kanenepo amba Yoano kakifupo, ino unene’tu amba: “I mo nsakile shi nene’mba: Ankungile poso’nka ngiye kepadi mwanda, le obe mwanda i wepi?”

Muya mafuku, Yoano waletela’ko mulangwe mukwabo mulumbuluke amba: “Kadi kudi ne bikwabo nabyo bivule bīne byālongele aye Yesu, shi ami na’mba nabyo byadi bisonekwe abyo byonso, longa ne panopantanda pēne kepadipo kyaba kya kutūla’yo mikanda misonekwe.” Yoano 21:1-25; Mateo 26:32; 28:7, 10.

▪ I kika kilombola’mba batumibwa kebayukilepo kyobakalonga mu Ngadilea?

▪ Batumibwa abajiula Yesu ku Dijiba dya Ngadilea muswelo’ka?

▪ Yesu wamweka ke misunsa inga tamba kusanguka kwandi?

▪ I muswelo’ka wakoma Yesu mwingilo wasaka batumibwa bandi bengile?

▪ Yesu walombola namani muswelo ukafwa Petelo?

▪ I binenwa’ka byanena Yesu bitala padi Yoano byaivwanikwa bibi na bana-babwanga bavule?