Pela Mutōtelo wa Bubela!

Satana ne bademona bandi kebakusakilangapo kwingidila Leza. Basakanga kupalula muntu ye-yense kudi Leza, shi bibwanika. Lelo batompanga kupalula bantu namani? Kintu kimo kyobapalulanga nakyo bantu i mutōtelo wa bubela. (2 Kodinda 11:13-15) Mutōtelo i wa bubela shi keufundijangapo bubinebine budi mu Bible. Mutōtelo wa bubela udi pamo bwa mfalanga ya bubela—umwekanga bu muyampe, ino ao wa bitupu. Ukokeja kukuletela makambakano mavule.

Bubela bwa mitōtelo kebubwanyapo nansha dimo kusangaja Yehova, Leza wa bubinebine. Pākidi Yesu pano pantanda, kwādi bantu ba katango kamo ka mutōtelo bādi basaka kumwipaya. Bādi balanga amba mutōtelo wabo o moloke. Banena amba: “Tata i umo enka Leza.” Lelo Yesu wāitabije’byo? Mhm, kāitabije’byopo! Wēbanene amba: “Bānwe shenu mwine i dyabola.” (Yoano 8:41, 44) Dyalelo i bantu bavule balanga amba batōtanga Leza, abo nanshi obengidila mwine i Satana ne bademona bandi!—1 Kodinda 10:20.

Mutyi mukobakane ulupulanga bipa bibi, ne mutōtelo wa bubela nao mo monka, ulupulanga bantu balonga bibi. Ntanda i miyule kavutakanya mwanda wa bintu bibi bilonga bantu. Kudi busekese, ñuma, bwivi, kususujañana, kwipayañana, ne kusambakena pamo na bantu ku bukomo. Bantu bavule balonga bino bintu bibi badi mu mitōtelo kampanda, ino mitōtelo yabo keibatonwenangapo ku kulonga biyampe. Kebadipo mwa kwikadila balunda na Leza, poso baleke kulonga bibi.—Mateo 7:17, 18.

Mutōtelo wa bubela ufundijanga bantu kulombela ku bankishi. Leza kanenepo amba lombelai ku bankishi. Kino i kyendele’mo. Lelo shi muntu kampanda upela kwisamba nobe ino uneneja’ko foto yobe, ukatōkwa? Le yao muntu ukokeja kwikala mulunda nobe wabine? Mhm, kadipo mwa kwikadila mulunda nobe. Yehova usakanga bantu besambe nandi, baleke kwisamba na nkishi nansha na kifwatulo, mwanda ke kyūmipo.—Divilu 20:4, 5.

Mutōtelo wa bubela ufundijanga amba kwipaya bantu bakwabo mu divita i kwendele’mo. Ino Yesu wānene amba balunda na Leza bakekala na buswe umbukata mwabo. Kekudipo usakanga kwipaya bantu baswele. (Yoano 13:35) Kotudi batwe, kwipaya bantu i kubi, nansha i babi. Balwana na Yesu pobāile kumukwata, Yesu kāsakilepo bandi bana-babwanga balwe nabo mwanda wa kumukinga.—Mateo 26:51, 52.

Mutōtelo wa bubela ufundijanga amba babi bakelwa mu kalunganyembo ka mudilo. Ino Bible aye ufundijanga amba bubi butwalanga ku lufu. (Loma 6:23) Yehova i Leza wa buswe. Ulanga Leza wa buswe ubwanya kususula bantu nyeke ne nyekeke? Mhm! Mu Paladisa mukekala mutōtelo umo kete, owa witabijibwe na Yehova. (Kusokwelwa 15:4) Mitōtelo yonso ilonda bubela bwa Satana ikatukila lonso.