Mwanda Waka Yesu Wādi Mufundiji Mukatampe

PANO ke papite myaka tununu tubidi ne musubu, kwābutwilwe mwana umo mwishile na bonso, pa kutama wāikala ke muntu mukatakata kashā. Mu mine myaka’ya, i kutupu muntu wādi na maamviyo nansha na myotoka. Kekwādipo bintu pamo bwa matelevijo, makompyuta, ne Entelenete.

Bāinikile mwana’wa dijina dya bu Yesu. Wāikala ke muntu wa tunangu kupita bonso bekele pano pa ntanda. Kadi Yesu wāikele ke mufundiji muyampe kutabuka. Wādi ushintulula bintu bikomo mu muswelo upēla kwivwana.

Yesu wādi ufundija bantu konso konso kwaādi wibatana. Wādi wibafundija kufulakufula kwa dijiba ne mu mato mwine. Wādi wibafundija mu mobo ne mu lwendo. Yesu kādipo na motoka, kādipo wenda lwa motoka nansha lwa kudiye. Yesu wādi wenda koku ne koku, wenda ufundija bantu.

Tuyukilanga bintu bivule ku bantu bakwabo. Ino kotukokeja kuyukila bintu bya mvubu mpata i kudi Yesu, Mufundiji Mukatampe. Binenwa bya Yesu bitanwa mu Bible. Potwivwana bino binenwa mu Bible, i pamo’nka bwa Yesu mwine witulombola’byo.

Mwanda waka Yesu wādi Mufundiji Mukatampe uno muswelo? Bubinga bubajinji i buno: Yesu nandi wāfundijibwe. Kadi wādi uyukile amba kwivwana kudi na mvubu mpata. Ino le Yesu wādi wivwana ani? I ani wādi umufundija?​—I Shandi wādi umufundija. Shandya Yesu i Leza.

Kumeso kwa Yesu kwiya pano pa ntanda bu muntu, wādi wikele bidi mūlu pamo na Leza. O mwanda Yesu wādi mwishile na bantu bakwabo mwanda kekudipo muntu mukwabo wāikele bidi mūlu kumeso kwa kubutulwa’ye pano pa ntanda. Yesu wādi Mwana muyampe momwa mūlu, Mwana wivwana Shandi. Yesu wādi ubwanya kufundija bantu byobya byaāfundile kudi Leza. Nobe ukeula Yesu shi wivwana shobe ne inobe.

Bubinga bukwabo bwālengeje Yesu ekale Mufundiji Mukatampe i kuswa kwaādi uswele bantu. Wādi uswele kukwasha bantu befunde myanda ya Leza. Yesu wādi uswele bakulu, kadi wādi uswele ne banuke bene. Banuke nabo bādi baswele kwikala pamo na Yesu, mwanda wādi wisamba nabo ne kwibevwana.

Difuku dimo, bambutwile bamo bāletēle Yesu babo bana batyetye. Ino balunda nandi bālanga amba Mufundiji Mukatampe kadipo na kyaba kya kwisamba na bana batyetye. Ebiya bēbanena bajoke nabo. Ulanga Yesu wānene’po namani?​—Yesu wānena’mba: “Mwitulekei bidi twana twiye kwami kemukitukandai.” Bine, Yesu wādi usaka bana batyetye bāye kwadi. Pa kino, Yesu nansha byaādi muntu wa tunangu mpata kadi mupite bulēme, wētūdile’ko kitatyi kya kufundija bana batyetye.​—Mako 10:13, 14.

Lelo uyukile mwanda waka Yesu wādi ufundija bana ne kwibevwana? Bubinga bumo i pa mwanda wādi usaka bekale na nsangaji na kwibasapwila myanda ya Leza, Shandi wa mūlu. Lelo nobe ubwanya namani kuletela bantu nsangaji?​—I na kwibasapwila myanda ya Leza yowifunda.

Kitatyi kimo, Yesu wāfundije balunda nandi baboile ñeni mikatampe ku mwana mutyetye. Wākwete mwana wāmwimika umbukata mwa Bandi bana ba bwanga, ke balondi Bandi kadi. Penepa Yesu wānena amba bano batame bafwaninwe kwalamuna bilongwa byabo bekale pamo bwa uno mwana mutyetye.

Le i kika kyādi kisaka kunena Yesu pano? Le uyukile muswelo ukokeja mukulumpe nansha mwana mutame kwikala pamo bwa mwana mutyetye?​—Biyampe, mwana mutyetye kayukilepo bintu bivule pamo bwa mukulumpe, o mwanda usangelanga kwifunda. Nanshi Yesu wādi unena amba bandi bana ba bwanga bafwaninwe kwityepeja pamo bwa bana batyetye. Bine, batwe bonso tubwanya kuboila ñeni mivule ku bantu bakwabo. Kadi batwe bonso tufwaninwe kuyuka amba bufundiji bwa Yesu budi na bulēme bukatampe kupita’ko milangwe ya batwe bene.​—Mateo 18:1-5.

Bubinga bukwabo bwālengeje Yesu ekale Mufundiji Mukatampe uno muswelo i mwanda wādi uyukile kufundija bintu bisangaja bantu. Wādi ushintulula bintu mu muneneno upēla, wa patōkelela. Wēsambīle pa toni, pa maluba ne pa bintu bilongekanga mafuku onso amba bantu bemvwanije senene myanda ya Leza.

Difuku dikwabo Yesu wādi ku lūlu, bantu bavule bāiya kwadi. Yesu wāshikata kaebafundija nansha kwibasapwila, enka na momwenine pa kifwatulo. Buno bufundiji butelwanga bu Busapudi bwa ku Lūlu. Yesu wānena’mba: ‘Talai toni twa mūlu. Ato ketukunangapo nkunwa. Kadi ketungwijangapo bidibwa mu bitala. Ino Leza wa mūlu witudishanga. Mwene banwe mutabukile toni bulēme?’

Yesu wānena monka’mba: ‘Boilai ñeni ku maluba a mu ntanda. Atamanga, ino kwingila mpika. Bine, talai moekadile manengele! Nansha Solomone, Mulopwe mpeta, kādipo uvwala binengele kupita ano maluba a mu ntanda. Shi Leza utele ano maluba mutyima amba atame, le abulwe namani kwimuta banwe mutyima?’​—Mateo 6:25-33.

Le ubaivwana kyādi kisaka kufundija Yesu?​—Kādipo usaka tukambakanye mityima amba i kwepi kotukamona byakudya ne byakuvwala. Leza uyukile kala amba tusaka bino bintu byonso’bi. Shako Yesu kānenepo amba ketufwaninwepo kwingidila bidibwa ne bivwalwa. Ino wānene amba tufwaninwe kutūla Leza pa kifuko kibajinji. Shi tulonga namino, Leza ukata’ko mutyima kutyina amba twakabulwa byakudya ne byakuvwala. Le abe nobe ukulupile uno mwanda?​—

Yesu pa kupwa kufundija, le bantu bālangile’po namani?​—Bible unena amba bātendele kufundija kwandi. Bantu bādi basangela mpata kumwivwana. Bintu byaādi unena byākweshe bantu balonge byoloke.​—Mateo 7:28.

O mwanda mwine i kya kamweno tuboile ñeni kudi Yesu. Lelo uyukile motukokeja kuboila ñeni kwadi?​—I nenki, tudi na binenwa byandi mu dibuku. Lelo uyukile i dibuku’ka?​—I Mukanda Ukola. Kino kishintulula amba tubwanya kwivwana Yesu shi tuta matwi ku myanda yotutanga mu Bible. Mu Bible mudi mānga imo ilombola mwānenene Leza aye mwine amba tufwaninwe kwivwana Yesu. Twivwane mobyāpityile.

Difuku dimo Yesu wāselele balunda nandi basatu bākanda pa lūlu lulampe. Majina abo i ba Yakoba, Yoano, ne Petelo. Tusa kuyuka bivule mpata pa bano bana-balume kumeso’ku, mwanda abo bonso basatu bādi balunda ba Yesu ba pa mutyima. Ino pa kino kyaba kya pa bula, mpala ya Yesu yāshilula kukelema bininge. Ne bivwalwa byandi kebyeñenya tō, enka na momwena’byo pa kifwatulo.

Kupwa papo, Yesu ne balunda nandi bāivwana diwi ditamba mūlu. Kedinena’mba: ‘Uno i wami Mwana, muswedibwe, unsangaja pa mutyima; mwikale kumwivwana.’ (Mateo 17:1-5) Lelo uyukile dino diwi dyādi dya ani?​—Bine, dyādi diwi dya Leza! Na bubine, i Leza wānene amba bafwaninwe kwivwana wandi Mwana.

Le batwe netu dyalelo? Lelo tukakōkela Leza ne kwivwana wandi Mwana, Mufundiji Mukatampe?​—Kino kyo kyotufwaninwe kulonga batwe bonso. Lelo uvulukile muswelo otukokeja kumwivwana?​—

Eyo, tubwanya kwivwana Mwanā Leza na kutanga myanda ya mu Bible inenena pa būmi bwandi. Mufundiji Mukatampe udi na bintu bivule bilumbuluke bya kwitusapwila. Kukabulwepo kusangela kuboila ñeni ku bino bintu bilembelwe mu Bible. Kadi shi usapwila bakwenu bintu biyampe byowifunda nabya ukekala na nsangaji.