Manwa a Kusapula Myanda Miyampe

YESU byaādi musapudi mukankamane wa myanda miyampe, wāshidile balondi bandi kimfwa. Wākwete mulangwe wa kwenda kudi bantu, unena ne kufundija ku mobo abo ne mu bifuko bya bantu bavule. (Mat. 9:35; 13:36; Luka 8:1) Yesu wādi wisamba na muntu ne muntu, ufundija bandi bana ba bwanga kwa bunka bwabo, ne kunena ku meso a bibumbo bya tununu ne tununu twa bantu. (Mako 4:10-13; 6:35-44; Yoa. 3:2-21) Wādi ukwatakanya mukenga o-onso muyampe wa kunena binenwa bikankamika ne bipāna lukulupilo. (Luka 4:16-19) Kādipo upityija mikenga ya kusapula, nansha ke paādi usaka kwitūkija ne kudya twakudya pene. (Mako 6:30-34; Yoa. 4:4-34) Potutanga nsekununi ya ku bukomo bwa mushipiditu ya mwingilo wa Yesu, mwene itutononanga twiule kimfwa kyandi? Bine itutononanga pamo bwa batumibwa.​—Mat. 4:19, 20; Luka 5:27, 28; Yoa. 1:43-45.

² Tala mikenga idi na bene Kidishitu dyalelo ya kwingila mwingilo wāshilwile Yesu Kidishitu pano ke papite kubwipi kwa myaka 2000.

³ Byotudi Batumoni ba Yehova, tuyukile mvubu ya kusapula myanda miyampe ya Bulopwe ku njibo ne njibo mu muswelo mulongololwe senene. Twingidijanga mpata ano manwa mene aikala ke kayukeno ka kwituyukila’po. Kintu kilombola’mba kwingidija ano manwa a kufikila midiyo ya bantu mu kitatyi kityetye kyonka i kwa tunangu i bipa bisangaja bilupuka’ko. (Mat. 11:19; 24:14) Busapudi bwa ku njibo ne njibo i muswelo muyampe wa kulombola buswe botuswele Yehova ne mukwetu.​—Mat. 22:34-40.

⁴ Busapudi bwa ku njibo ne njibo ke mwingilopo ushilwilwe na Batumoni ba Yehova dyalelo. Mutumibwa Polo wisambila patōka pa kufundija kwaādi ufundija ku mobo a bantu. Wālombwele batadi ba mu Efisesa mwingilo wawāingile amba: “Tamba difuku dibajinji dyonanyantyile mu ntanda ya bubikavu ya Azia, . . . Nkyatyininepo kwimusapwila bintu byo-byonso bya kamweno nansha kwimufundija . . . ku njibo ne njibo.” Mu uno muswelo ne mu miswelo mikwabo Polo wāsapwile “bukamoni ne pa mfulo ku Bayuda ne ku Bangidiki myanda ya kwisāsa ku meso a Leza ne ya kwitabija mudi Mfumwetu Yesu.” (Bil. 20:18, 20, 21) Mu kine kitatyi’kya bambikavu ba Loma bādi bakankamika bantu batōte bilezaleza kadi bantu bavule bādi “batyina bavidye bininge.” O mwanda byādi bilomba kupēlakana lubilo mwanda wa bantu bakimbe “Leza mwine wālongele ino ntanda ne bintu byonso bidi’mo,” Mwine wādi “usapwilanga bantu bonso pi na pi amba bafwaninwe kwisāsa.”​—Bil. 17:22-31.

⁵ Dyalelo dyo dine difwaninwe kupēlakana kusapwila bantu myanda miyampe. Mfulo ya ino ngikadilo imbi ya bintu ifwenanga lubilolubilo lonka. Pa kino, tufwaninwe kuvudija’ko bukomo bwetu. I kutupu muswelo mulumbuluke upityile ano manwa a myaka na myaka a kukimba ku njibo ne njibo boba badi na nzala ya bubine. I mayampe dyalelo monka moādi ekadile mu mafuku a Yesu ne a batumibwa.​—Mako 13:10.

⁶ Lelo nobe utambilanga ne pa mfulo mu busapudi bwa ku njibo ne njibo? Shi i amo, yuka’mba Yehova ukusangedile. (Ezk. 9:11; Bil. 20:35) Busapudi bwa ku njibo ne njibo padi kebukupēlelangapo. Padi kudi bikukoleja mu ngitu, nansha padi mu mwaba mobakupele kusapula mudi bantu bavule bapela kwivwana. Kekubulwe padi ulwanga na bijika bitūdile’ko umbikalo. Pakwabo padi udi na moyo, kadi umonanga’mba i bikomo kushilula mīsambo na bantu bokuyukile. Nanshi, ponso patambila mu busapudi bwa ku njibo ne njibo utuyukanga. Kokatyumukwa mutyima. (Div. 4:10-12) Ngikadilo yobe keishidilepo na ya banabenu ba mu bifuko bikwabo bivule.

⁷ Yesu wālaile bandi bana ba bwanga’mba: “Kadi talai! Ami ngidi nenu mafuku onso kufika ne ku mvuyo ya ngikadilo ya bintu.” (Mat. 28:20) Uno mulao witukankamikanga mu mwingilo wa kulonga bana ba bwanga. Twiivwanikanga pamo bwa mutumibwa Polo wānenene amba: “Mu byonsololo ngidi na bukomo kupityila kudi yewa unkomeja.” (Fid. 4:13) Mwena bya binebine mu mpangiko ikwete’ko kipwilo ya kusapula ku njibo ne njibo. Shi wingila na bakwenu, ukakankamikwa ne kukwashibwa. Lombela’mba ukwashibwe mwa kunekenenya bijika byotana, ne kwielela’ko na kininga mwa kwikadila musapudi wa myanda miyampe.​—1 Yo. 5:14.

⁸ Ponso posapwila bakwenu myanda miyampe, ukekala na mikenga ya kwibalombola ‘kine kyoikadile na lukulupilo.’ (1 Pe. 3:15) Ukajingulula biyampe kwishila kwishidile bantu badi na lukulupilo lwa Bulopwe na boba kebadipo nalo. (Isa. 65:13, 14) Ukekala na nsangaji pa kuyuka’mba ubakōkela ku musoñanya wa Yesu wa ‘kuleka kitōkeji kyobe kimunike’ kadi ukokeja’nka ne kwikala na dyese dya kukwasha bantu bakwabo bayuke Yehova ne bubine butwala ku būmi bwa nyeke.​—Mat. 5:16; Yoa. 17:3; 1 Tm. 4:16.

⁹ Kukwatwanga mpangiko ya kusapula ku njibo ne njibo ku mfulo kwa yenga ne mu bukata bwa yenga mwine. Mu bifuko mukoma kutana bantu ku mobo kitatyi kya dyuba, bipwilo bimo bitūlanga’ko mpangiko ya kusapula ku kyolwa. Bantu bavudile kutambula beni shi dyuba ke dipūluke bininge nansha ku ngalwilo kwa nsá ya ku kyolwa kupita’ko lubanga.

¹⁰ Yesu wāpele bandi bana ba bwanga bulombodi bwa ‘kukimba’ boba bafwaninwe. (Mat. 10:11) Paādi ukimba boba betaba biyampe, kādipo wibakimba enka mu busapudi bwa ku njibo ne njibo. Na bubine, wādi usapula bukamoni ponso paādi umona mukenga muyampe, mu busapudi buteakanibwe ne bwa kiponka na ponka. (Luka 8:1; Yoa. 4:7-15) Batumibwa nabo bādi basapwila bantu mu bifuko palapala.​—Bil. 17:17; 28:16, 23, 30, 31.

¹¹ Ne dyalelo nadyo mo monka, kitungo kyetu i kya kufikila muntu yense na musapu wa Bulopwe. Ko kunena’mba twiulanga Yesu ne batumibwa bandi mu mwingilo wabo wa kulonga bana ba bwanga ne kuta mutyima ku kushinta kwa bitatyi ne ngikadilo mishileshile yotutana’mo bantu ba mu mwaba wetu. (1 Ko. 7:31) Kimfwa, basapudi bamwenanga byabuyabuya mu kusapwila bantu mu bifuko bya busunga. Busapudi bwa mu bipito bwitabanga bininge mu matanda mavule, pamo’nka bwa busapudi bwa mu biwanza bya mityi, mu bishīko, ne kokwa konso kutanwa bantu. Bipwilo bimo byalanga mameza nansha matempa mu mwaba wabo. Ne kadi, bilo ya musambo ibwanya kukwata’ko mpangiko ya pa bula ya kusapula mu bibundi bikatampe ne bifuko bya mu kibundi byenda’mo bantu bavule lwa nshi, na kwingidija bantu ba mu bipwilo bivule. Enka nenki bantu kebadipo batanwa ku mobo kitatyi kibapempula basapudi bakokeja kufikilwa na myanda miyampe konso kobatanwa.

¹² Shi tubatana bantu basangela musapu wa mu Bible mu bifuku bidi’mo bantu bavule, tubwanya kwibapa dibuku difwaninwe kwibapebwa. Pa kumukwasha asangēle bininge, ubwanya padi kupa muntu usangela nimelo yobe ya telefone ne kwiivwana mwanda wa ukamujokele, mutume pa jw.org, nansha kumulombola kifuko kya kubwipi kipwidilwanga’ko. Pakwabo ukamona’mba kusapwila bantu mu bifuko bidi bantu bavule i muswelo usangaja wa kutandabula mwingilo obe.

¹³ Inoko, kusapula myanda miyampe ke mwingilopo umo kete upelwe bene Kidishitu dyalelo. Shi usaka kukwasha senene bakwenu bayuke bubine butwala ku būmi, i biyampe kupempula misunsa mivule boba basangela musapu amba bendelele kumeso, bekale bene Kidishitu bapye.

¹⁴ Yesu wānenene balondi bandi amba: “Mukekala bami batumoni . . . ne kulakula kwine kwa ntanda.” (Bil. 1:8) Ino wēbanena kadi amba: “Nanshi, endai mukalonge bana ba bwanga mu bantu ba ku mizo yonso, . . . mwibafundijei kulama byonso byonemusoñenye.” (Mat. 28:19, 20) Kulonga kujokela’mo i nsulo ya nsangaji mu mwingilo wa Yehova. Bantu baikele kusangela myanda miyampe powebapempwile musunsa umbajinji kebakabulwepo padi kusangela kukutambula monka. Wivwane wibasapwile myanda mikwabo ya mu Bible, nabya ukaningisha lwitabijo lwabo mudi Leza ne kwibakwasha bayuke byobasakilwa ku mushipiditu. (Mat. 5:3) Shi witeakanye senene ne kukwata mpangiko ya kulonga kujokela’mo pa kitatyi kifwaninwe, nabya ubwanya kushilula kifundwa kya Bible. Divule kino kyo kifwaninwe kwikala kitungo kyobe polonga kujokela’mo. Ketukunangapo enka nkunwa ya bubine kete, ino twiisangilanga ne kwiisangila.​—1 Ko. 3:6.

¹⁵ Ku bamo, kulonga kujokela’mo i bulwi bukatampe. Padi kodi mupotolole biyampe kusapula myanda miyampe mu kīpi, kadi usangelanga bininge uno mwingidilo wa pa bula. Ino shi ulangalanga mwa kujokela mwisambi nobe ne mwa kushilwila nandi mīsambo ya Bible, kino kikakulēmejeja’ko kiselwa. Ukekala na kikulupiji kikatampe shi witeakanya senene. Ingidija madingi mayampe obetupanga ku kupwila kwa mu bukata bwa yenga. Kadi ubwanya kunena musapudi wa bwino buvule akakutūle.

¹⁶ Musapudi Fidipa paādi wisamba na Muyuda mwalamuke wādi utanga Kinenwa kya Leza, wāmwipangwile amba: “Le bine uyukile byotanga’byo?” Nandi walondolola’mba: “Lelo binebine ndyuka’byo namani shi kekudipo muntu wa kunombola?” Kupwa, nsekununi ya mu Bilongwa shapita 8 itulombola’mba Fidipa wāshilwile na myanda ya mu Bisonekwa yādi itanga muntu’wa, penepo “wamusapwila myanda miyampe ya Yesu.” (Bil. 8:26-36) Ketuyukilepo bula bwa kitatyi kyāpityije Fidipa na yewa muntu, inoko Fidipa wāshintulwile myanda miyampe byāfikije ne muntu’wa ku kwitabija ne ku kulomba kubatyijibwa. Penepo wāikala mwanā bwanga wa Yesu Kidishitu.

¹⁷ Bantu bavule dyalelo kebayukilepo Bible, kino kikalomba kwibajokela misunsa mivule ne kwibafundija myanda mishileshile mu mayenga kampanda, myeji, pakwabo ne mwaka umo ne kupita kumeso kwa abo kulombola lwitabijo ne kufikila pa kubatyijibwa. Inoko kitūkijetyima kyobe ne kukwasha kokwasha na buswe bantu ba mutyima wampikwa budimbidimbi nabo bekale bana ba bwanga bidi na mpalo, pamo’nka na mwānenene’kyo Yesu amba: “Nsangaji ya kupāna itabukile ya kupebwa.”​—Bil. 20:35.

¹⁸ Na bubine ukasaka kwendeja kifundwa kya Bible kya ku njibo na kwingidija dibuku kampanda mu mabuku alupwilwe na kino kitungo. Shi wingidije bulombodi bwa ku kupwila kwa mu bukata bwa yenga ne kusapula na bafundiji ba bwino mu kipwilo, nabya ukabwanya kwendeja bifundwa bilupula bipa, ne kukwasha bakwabo nabo bekale bana ba bwanga ba Yesu Kidishitu.

¹⁹ Shi usakilwa bukwashi mwa kuyukila kushilula ne kwendeja kifundwa kya Bible kya ku njibo, kokekaka kwisamba na batadi nansha na Kamoni mukwabo wingilanga senene mwingilo wa kwendeja bifundwa bya Bible. Milangwe ilupulwanga mu Kabuku ka ku Kupwila Būmi ne Mwingilo, iloñwanga mu bya kumwena’ko ku kupwila, nayo ikakukwasha. Kulupila mudi Yehova ne kumulombola byosaka mu milombelo. (1 Yo. 3:22) Nanshi ponso pobibwanika, witungile kitungo kya kwendeja kifundwa kya Bible kya ku njibo kutentekela pa kifundwa kyo-kyonso kyobwanya kwendeja mu kyenu kisaka. Shi wendeja bifundwa bya Bible, ukalundila’ko nsangaji yobe mu mwingilo.

²⁰ Shi tubakwasha bantu abayuka Yehova Leza ne kwikala bana ba bwanga ba Yesu Kidishitu, batwelanga mu kipwilo. Befundi ba Bible bakendelela kumeso kadi bakatama ku mushipiditu shi abayuka bulongolodi bwa Yehova ne kwingidila nabo pamo. Kwibafundija mwa kwingidila nabo kudi na mvubu mikatampe. Mavideo ne boloshile Le I Bāni Balonga Kiswa-Mutyima kya Yehova Dyalelo? i biteakanibwe pa mwanda wa kino kitungo. Myanda imo idi mu Shapita 4 wa dino dibuku ibwanya kukwasha.

²¹ Tamba’tu ku ngalwilo ya mīsambo yenu ya mu Bible, kwasha mwifundi amone amba Yehova udi na bulongolodi bumo bwaingidijanga mwanda wa mwingilo wa busapudi wingilwe pano pa ntanda dyalelo. Lombola mvubu ya mabuku etu akwasha pa kwifunda Bible, kadi shintulula moalupwilwanga ne kwabanibwa pano pa ntanda ponso na bengidi ba kwilanga bepāne kudi Leza. Nena yewa owifunda nandi akakutūle ku kupwila ku Njibo ya Bulopwe. Mushintulwile mwendejibwanga kupwila ne kumuyukanya ku balunda netu kwine’kwa. Mukwashe eyuke na Batumoni bakwabo ku bitango. Mu bino bitatyi ne bikwabo, leka mupya emwene aye mwine muswelo ulombola bantu ba Yehova buswe, kiyukeno kiyukanya bene Kidishitu ba bine. (Yoa. 13:35) Shi muntu usangela musapu watamija mutyima wa kusangela bulongolodi bwa Yehova, nabya ukafwena kudi Yehova.

²² Bene Kidishitu babajinji bāikele basapudi bapyasakane ba Kinenwa kya Leza. Bātentwile Bisonekwa bya kwingidija abo bene ne bya kwifunda mu kipwilo. Bākankamikile bakwabo befunde Kinenwa kya Leza kya bubine. Byobya byobātentwile ku makasa byādi bityetye abyo’ko bilēme mpata. (Kol. 4:16; 2 Tm. 2:15; 3:14-17; 4:13; 1 Pe. 1:1) Dyalelo Batumoni ba Yehova bengidijanga manwa a panopano a mwa kutampila mabuku mwanda wa kulula tutwa na tutwa twa midiyo ya Mabible ne mabuku a kwifunda nao Bible. Mu bino mubadilwa ne matrakte, maboloshile, mabuku, ne mapepala mu ndimi tutwa na tutwa.

²³ Posapwila bakwenu myanda miyampe, yuka kwingidija biyampe mabuku a kwifunda nao Bible alupwilwe na bulongolodi bwa Yehova. Kuyuka bintu byomwenine mu kutanga ne kwifunda mabuku a Batumoni ba Yehova kukakutonona usapwile’byo bantu bakwabo.​—Bah. 13:15, 16.

²⁴ Bantu bavule bengidijanga Entelenete bu kingidilwa kibajinji kya kwisambulwila misapu. O mwanda, kutentekela pa mabuku esambila pa Bible, diteba dyetu jw.org, i kingidilwa kifike’po mu kusambakanya myanda miyampe. Bantu bavule ntanda yonso bengidijanga olodinatele mwanda wa kutanga ne kwivwana butangi bwa Bible bukwate ku mawi ne mabuku esambila pa Bible mu ndimi tutwa na tutwa. Boba bapelanga kwisamba netu nansha bashikete mu myaba mobadi na mikenga mityetye ya kwisamba na Batumoni ba Yehova babwanya kuyuka nkulupilo yetu na kwingidija jw.org ku mobo abo.

²⁵ O mwanda tuyukanyanga jw.org ponso pamweka mukenga mufwaninwe. Shi mwisambi nobe waipangula kipangujo pa nkulupilo yetu, tubwanya kwingidija telefone nansha olodinatele mwa kumulondolwela senene enka pene’pa. Shi tubatana muntu wisamba ludimi lungi, nansha ludimi lwa batumama, tubwanya kumutuma pa diteba dyetu mwanda wa atane Bible ne mabuku esambila pa Bible mu lwandi ludimi. Basapudi bavule baingidije video imo mu mavideo adi pa diteba mwanda wa kushilula mīsambo ya mu Bible.

²⁶ Yesu wālombwele boba bādi bata mutyima ku binenwa byandi amba: “Banwe mwi kitōkeji kya ino ntanda. . . . Lekai kitōkeji kyenu kimunike ku meso a bantu, amba bamone mingilo yenu milumbuluke ne kutumbija Shenu udi mūlu.” (Mat. 5:14-16) Bano bana ba bwanga bāmwekeje mashinda a Leza na kwiula Yesu wānenene amba: “Ami ne kitōkeji kya ino ntanda.” Yesu wāshidile bene Kidishitu kimfwa kya kuleka “kitōkeji kya būmi” kimunike mwanda wa kamweno ka bonso bakevwana.​—Yoa. 8:12.

²⁷ Mutumibwa Polo nandi wētushidile kimfwa kya kulonda. (1 Ko. 4:16; 11:1) Paādi mu Atene, wādi usapwila difuku ne difuku boba bonso bādi batanwa mu nsoko. (Bil. 17:17) Bene Kidishitu ba mu Fidipai bālondele kimfwa kyandi. O mwanda Polo wēbalembēle amba bādi bashikete “mu lukongo lukondame ne lunyengakane” mobādi ‘bamunika pamo bwa bimuni mu ino ntanda.’ (Fid. 2:15) Batwe netu dyalelo tukokeja kumunikila bantu bubine bwa Bulopwe mu binenwa ne bilongwa byetu ponso potumona mukenga wa kusapwila bakwetu myanda miyampe. Bine, kimfwa kyetu kiyampe kya bu bantu bampikwa budimbidimbi kadi boloke kikokeja akyo kine kukoka milangwe ya bantu bajingulule amba twi beshile na ntanda. Inoko, shi twibasapwila myanda miyampe, bakayuka mwanda waka twi beshile.

²⁸ Batumoni ba Yehova bavule basapulanga myanda miyampe ku bantu bobetananga nabo ku kaji, ku masomo, mu byendwa nabyo, nansha pobenda ku mingilo yabo ya difuku ne difuku. Shi tudi mu lwendo, tukokeja kwikala na mukenga wa kwisamba na botwenda nabo. Batwe bonso, tufwaninwe kuta mutyima ku mikenga yotumona ya kushinta mīsambo ya bitupu ke busapudi. Twiteakanyei kusapwila bakwetu ponso potumona mukenga.

²⁹ Tukakankamana kusapwila bakwetu myanda miyampe shi tulamine mu ñeni amba ponso potusapula tutumbijanga Umpangi wetu ne kupeja dijina dyandi bulēme. Ne kadi, tubwanya’nka ne kukwasha bantu ba mityima yampikwa budimbidimbi bayuke Yehova mwanda wa nabo bamwingidile ne kwikala na lukulupilo lwa kukamona būmi pa kwitabija mudi Yesu Kidishitu. Yehova usangelanga kumona bukomo bwa uno muswelo ne kwibumona bu mwingilo ujila.—Bah. 12:28; Kus. 7:9, 10.

³⁰ Yehova usaka’mba musapu wa Bulopwe usapulwe ntanda yonso, mu bibundi bikata ne bityetye. Pa kino, bipwilo ne boba bengidila mu bipindi bitolwele bapebwanga myaba na bilo ya musambo. (1 Ko. 14:40) Kino i kikwatañane na mpangiko yātūdilwe’ko mu myaka katwa kabajinji mungya buludiki bwa Leza. (2 Ko. 10:13; Ngt. 2:9) Mwingilo wa Bulopwe byowenda utandabuka bukidibukidi mu ano mafuku a mfulo, tubwanya kwingila senene shi mwaba wa kipwilo wa kusapula’mo i muteakanibwe senene.

³¹ Ino mpangiko italwanga na mutadi wa mingilo. Mwingidi wa mingilo umo ukokeja kupāna myaba. Kudi miswelo ibidi ya myaba, mwaba wa kisumpi ne mwaba wa muntu ne muntu. Shi mwaba i mutyetye, nabya batadi ba bisumpi bakekala na myaba ya bisumpi byabo mwine mubwanya kusapula basapudi ba mu bisumpi. Ku mutamba mukwabo, shi mwaba i mukatampe musapudi ne musapudi ukapebwa wandi mwaba.

³² Musapudi udi na wandi mwaba ukasapula’mo kitatyi kekidi’kopo mpangiko ya kupwila kwa kwenda mu busapudi nansha mu kitatyi kyakabwanyapo kwitanina pamo na kisumpi. Kimfwa, basapudi bamo bapebwanga mwaba udi kubwipi na kobengidila ne kusapula’mo kitatyi kya kukōkolokwa kwa pa midi nansha pa kupwa kaji. Bisaka bimo bipebwanga mwaba wabyo kubwipi na kobishikatanga, kadi bisapulanga’mo bitatyi bimobimo bya kyolwa. Kwikala na mwaba wa kubwipi biyampe kukakwasha musapudi apityije kitatyi kivule mpata mu mwingilo wa busapudi. Na bubine, myaba ya bantu ibwanya ne kwingidijibwa mu busapudi bwa kisumpi. Shi usaka kwikala na obe mwaba, ubwanya kulomba’o kudi mwingidi utala myaba.

³³ Shi mutadi wa kisumpi wapebwa mwaba wa kisumpi nansha shi musapudi wapebwa mwaba wandi, muntu wapebwa mwaba’wa ukalonga bukomo bufwaninwe mwanda wa kwitana na muntu ense ku njibo ne njibo. Mpangiko ya kusambakanya mwaba ifwaninwe kulondwa mungya bijila bya kukimba basapudi. Mutadi wa kisumpi nansha musapudi ye-yense upebwa mwaba ufwaninwe kulonga bukomo bwa kwiusambakanya mu myeji iná. Shi ubapu’o, ufwaninwe kulombola mwingidi utala myaba. Mungya ngikadilo, mutadi wa kisumpi nansha musapudi ubwanya kuleka kujokeja mwaba mwanda wa kwingila’mo monka nansha kwiujokeja kudi mwingidi utala myaba.

³⁴ Shi bonso mu kipwilo bengidila pamo, mwaba ukokeja kwingilwa onso senene. Kadi i biyampe kwepuka kupa basapudi babidi nansha bavule kwingila mu mwaba umo, mwanda kino kikokeja kulobeja besambi netu. Nanshi kulonga namino kulombolanga’mba tulēmekele banabetu ne bantu ba mu mwaba.

³⁵ Bantu bonso basakilwa kuyuka myanda ya Yehova Leza, ya wandi Mwana, ne ya Bulopwe. (Kus. 14:6, 7) Tusangelanga kukwasha bantu ba ndimi yonso bete dijina dya Yehova mwa kupandila ne kuvwala bumuntu bwa bwine Kidishitu. (Loma 10:12, 13; Kol. 3:10, 11) Le i makambakano’ka amoamo otutanwanga nao potusapula myanda miyampe mu myaba mwisambwa ndimi mivule? Le abwanya kupwijibwa namani mwanda wa bavule bamone mukenga wa kwivwana musapu wa Bulopwe mu ludimi lobevwana biyampe?​—Loma 10:14.

³⁶ Mwaba upānwanga mungya ludimi lwa kipwilo ne kipwilo. Nanshi, mu myaba munenwa ndimi mivule, basapudi ba mu bipwilo palapala basapulanga mu kipindi kimo kyonka. Mu uno muswelo, i biyampe basapudi ba kipwilo ne kipwilo bate mutyima ku kusapwila bantu ba mu lwabo ludimi. Kino kitala ne kitatyi kya kampanye ka kwita bantu kaloñwanga mwaka ne mwaka. Basapudi babwanya kwisamba na muntu ense ne kumupa dibuku dya mu ludimi lo-lonso kitatyi kyobadi mu busapudi bwa bantu bonso ne bwa kiponka na ponka.

³⁷ Pakwabo, bipwilo bya ludimi lungi kebibwanyapo kusambakanya kitatyi ne kitatyi wabo mwaba udi kulampe bininge. Mu uno muswelo, batadi ba mingilo ba pa bipwilo batalwa na uno mwanda bafwaninwe kwisambila pamo mwanda wa kuyuka muswelo wa kusambakanya mwaba. Kino kikapa muntu ense mukenga wa kwivwana musapu wa Bulopwe ne kukankaja baleke kujimija bukomo bya bitupu.​—Nki. 15:22.

³⁸ Le tukalonga namani shi muntu waiya kwitaba pa kibelo wisambanga ludimi lwishile na lwetu? Ketufwaninwepo kunena’mba basapudi besamba lwandi ludimi bakāya kumupempula. Basapudi bamo i befunde musapwilo mwīpi mu ludimi kampanda lobavudile kutana mu wabo mwaba. Tubwanya kulombola muntu’wa muswelo wabwanya kutanga nansha kutentula mabuku mu lwandi ludimi pa diteba dyetu diyukane dya jw.org, nansha padi tubwanya kumuselela mabuku a mu lwandi ludimi.

³⁹ Shi muntu wasangela musapu bya binebine, tufwaninwe kulonga bukomo bwa kusokola muntu ubwanya kumukwasha mu ludimi lwaivwana. Tubwanya ne kumulombola kifuko kampanda kidi kubwipi kilongelwa’mo kupwila mu lwandi ludimi. Shi aye usaka kwitana na muntu wisamba lwandi ludimi, tubwanya kumulombola muswelo wabwanya kutweja adelese yandi pa jw.org. Kupwa bilo ya musambo nayo ikalonga bukomo bwa kutana musapudi udi kubwipi, kisumpi, nansha kipwilo kibwanya kumukwasha senene.

⁴⁰ Tukendelela kupempula muntu usangela musapu’wa kufika’nka ne byaketusapwila’mba wetana na muntu wisamba lwandi ludimi. Kyaba kimo, bilo ya musambo ikayukija bakulumpe amba muntu kampanda wisamba ludimi lwa muntu’wa kabwanyapo kusokolwa. Shi bidi namino, tufwaninwe kulonga bukomo bwetu bonso na kwendelela kutamija mutyima wa kusangela wa mwisambi netu. Shi bibwanika, tubwanya kwifunda nandi Bible, padi kupityila ku dibuku dya mu lwandi ludimi. Shi twingidija biyampe bifwatulo ne kunena muntu atange bisonekwa bitelelwe, ukevwanija’ko myanda kampanda ya mu Bible. Muntu umo wa mu kyabo kisaka uyukile’ko ludimi lwandi ne ludimi lwa mu kibundi ubwanya kwikala mushintuludi.

⁴¹ Pa kusaka kuludikila muntu usangela musapu ku bulongolodi bwa Leza, tufwaninwe kumwita āye ku kupwila kwetu, nansha shi kabwanyapo kwivwana mpangiko senene. Kitatyi kitangwa bisonekwa, tukokeja kumukwasha mwa kwibisokwela mu Bible wa mu lwandi ludimi shi udi’ko. Kwitana pamo na bantu bakwabo mu kipwilo kubwanya kumutamija ne kumukwasha endelele bininge ku mushipiditu.

⁴² Tubisumpi: Kakisumpi i koka kadi na kibalwa kampanda kya basapudi basapula mu ludimi ke lwa kipwilopo nansha shi kekudipo mukulumpe nansha mwingidi wa mingilo mubwanye bisakibwa wa kwendeja kupwila kwa yenga ne yenga mu lwine ludimi’lwa. Bilo ya musambo ibwanya kwitabija kipwilo kikwatakanye kakisumpi shi i kibwanye bino bisakibwa:

1. (1) Shi kudi bantu bavule mu mwaba kebesambengapo ludimi lwa kipwilo.

2. (2) Shi kudi basapudi batyetye bayukile ludimi’lwa nansha basaka kwifunda’lo.

3. (3) Shi kitango kya Bakulumpe kitabije kuteakanya’ko mpangiko ya busapudi mu lwine ludimi’lwa.

Shi kitango kya Bakulumpe kisaka kukwatakanya kakisumpi, nabya bakulumpe bakesamba na mutadi wa kipindi. Padi aye uyukile bipwilo bikwabo bilonga bukomo bwa kusapwila bantu ba lwine ludimi’lwa, kadi ubwanya kwimulombola myanda ya kamweno ikakwasha mwa kuyukila kipwilo kibwanya kukwatakanya kakisumpi biyampe. Shi kipwilo kya kwikakwatakanya kibayukana, bakulumpe bakatuma mukanda ku bilo ya musambo ne kulomba kitabijibwe bu kipwilo kya kukwatakanya kakisumpi.

⁴³ Bisumpi: Bilo ya musambo i bwanya kwitabija kipwilo kikwatakanye kisumpi shi kipwilo i kibwanye bino bisakibwa:

1. (1) Shi kudi bantu bavule basangela ne kwendelela kukatampe mu lwine ludimi’lwa.

2. (2) Shi kudi basapudi batyetye besamba ludimi’lwa nansha befunda’lo.

3. (3) Shi kudi mukulumpe nansha mwingidi wa mingilo mubwanye bisakibwa, wa kwimanina ne kwendeja nansha’tu kupwila kumo kwa mu lwine ludimi’lwa mu yenga ne yenga​—nansha kipindi kimo kya ku kupwila kwa ku mfulo kwa yenga, kimfwa mwisambo wa bantu bonso nansha kifundwa kya Kiteba kya Mulami.

Shi bino bisakibwa bibabwana mu ludingo kampanda, kitango kya bakulumpe kikatuma mukanta ku bilo ya musambo mudi myanda yonso itala kisumpi mwanda wa kulomba kuyukanibwa kwa kipwilo kya kukwatakanya kisumpi. Mukulumpe nansha mwingidi wa mingilo utangidile kisumpi ukamonwa bu “mutadi wa kisumpi” nansha “mwingidi wa kisumpi” wa kukwatakanya kisumpi’kya.

⁴⁴ Shi kubatūlwa kisumpi, kitango kya bakulumpe ba kipwilo kikwatakenye kisumpi’kya kikabandaula shi bilomba kubweja’ko bipindi bikwabo ku kupwila ne kuyaka shi bakapwila misunsa inga mu bula bwa kweji. Kupwila kwa kwenda mu mwingilo wa busapudi nako kukokeja kuteakanibwa na kisumpi. Bonso mu kisumpi bakengila mu lupusa lwa kitango kya bakulumpe kikwatakenye kisumpi. Bakulumpe bakaludika na bujalale ne kwikala na mutyima wa kuvuija bisakibwa bya kisumpi. Kitatyi kingila mutadi wa kipindi na kisumpi mu yenga wapempula kipwilo kikwakatekenye kisumpi, ukalembela bilo ya musambo lapolo mīpi ya kwendelela kwa kisumpi ne bisakibwa byo-byonso bipotoloke. Mwenda mafuku, kisumpi kibwanya kwikala ke kipwilo. Shi bonso balonde buludiki bwa kiteokratike, Yehova ukasangala.​—1 Ko. 1:10; 3:5, 6.

⁴⁵ Bene Kidishitu bepāne badi na kiselwa kya kusapwila bakwabo myanda miyampe. Kudi miswelo mivule ya kusapula’yo, inoko bavule basangelanga kutambila na bakwabo mu mwingilo wa busapudi. (Luka 10:1) O mwanda bipwilo bītananga pamo mwa kwendela mu mwingilo wa busapudi ku mfulo ne mu bukata bwa yenga mwine. Mafuku a mafetyi nao i mikenga milumbuluke ya kwenda mu busapudi bwa kyungwija, mwanda banabetu bavule kebendangapo ku kaji. Komite wa Mingilo wa pa Kipwilo ukateakanya kupwila kwa kwenda mu busapudi pa bitatyi ne bifuko bifwaninwe mu dyuba ne kyolwa.

⁴⁶ Busapudi bwa kyungwija bukwashanga basapudi bengidile pamo ne ‘kwikankamika.’ (Loma 1:12) Basapudi bapya babwanya kwingila pamo na basapudi ba manwa, ba bwino, mwanda wa kufundijibwa. Mu myaba imo, i biyampe basapudi babidi nansha bavule bengidile pamo mwanda wa kutyina byaka. Nansha shi wi mukwate mpangiko ya kwingila bunka mu mwaba, kwitana pamo na kisumpi kubwanya kukankamika bonso. Kuyuka’mba kudi bantu bakwabo batambila mu busapudi, bengila mu mwaba umo onka, kubwanya kukukomeja. Bapania ne bakwabo kebanenwepo’nka kukwatakanya kupwila konso kwa kwenda mu busapudi kuteakanibwe na kipwilo, nakampata shi kulongwa difuku ne difuku. Inoko, babwanya padi kukwatakanya kupwila kumokumo kwa kwenda mu busapudi yenga ne yenga.

⁴⁷ Bine, batwe bonso tulondei kimfwa kyāshile Yesu ne batumibwa bandi! Tukulupilei amba Yehova witweselanga potulonga bukomo bwa kwingila mwingilo wa mvubu wa kusapula myanda miyampe ya Bulopwe.​—Luka 9:57-62.