Dyabola Watompa Yesu

Yesu pa kupwa kubatyijibwa, mushipiditu ujila wāmutwele mu ntanda mutuputupu. Wālongele mafuku 40 pampikwa kudya kantu, nzala yāmukwete bininge. Ebiya Dyabola wāiya kutompa Yesu, kāmunena’mba: ‘Shi bine wi Mwanā Leza, nena ano mabwe alamuke ke mikate.’ Inoko Yesu wāmulondolola na kupituluka mu Bisonekwa amba: ‘I kilembwe amba kusakilwapo’nka byakudya kete pa kwikala mūmi. Usakilwa kuteja kinenwa kyonso kinena Yehova.’

Kupwa, Dyabola wātompa Yesu amba: ‘Shi bine wi Mwanā Leza, wiele panshi kutamba pangala pa tempelo. I kilembwe amba Leza ukatuma bamwikeulu bakukobole.’ Inoko Yesu wāmulondolola monka na kutela Bisonekwa amba: ‘I kilembwe amba kufwaninwepo kutūla Yehova pa ditompo.’

Kupwa, Satana wālombola Yesu malopwe onso a pano pa ntanda ne bupeta ne ntumbo yao, kānena’mba: ‘Nsa kukupa ano malopwe onso’a ne ntumbo yao shi untōte’tu dimo kete.’ Inoko Yesu wāmulondolola’mba: ‘Taluka papo, Satana! I kilembwe amba ufwaninwe kutōta’nka Yehova kete.’

Ebiya Dyabola wātaluka’po, bamwikeulu nabo bāiya kebape Yesu byakudya. Tamba pene’pa, Yesu wāshilula kusapula myanda miyampe ya Bulopwe. O mwingilo mwine obamutumine kwingila pano pa ntanda. Bantu bādi basenswe byādi bifundija Yesu, ne kumulonda konso kwaādi wenda.