KIFUNDWA 15
Lelo Yesu I Ani?
Yesu ubadilwa mu bantu batumbe bininge mu mānga. Ino nansha nankyo, kutalula’mo’tu dijina dyandi, bantu bavule kebayukilepo bivule pādi, kadi bāngi badi na milangwe mishileshile padi Yesu mwine. Lelo Bible unena bika pādi?
1. Lelo Yesu i ani?
Yesu i kipangwa kya ku mushipiditu kikomokomo kidi momwa mūlu. Wāpangilwe na Yehova Leza kumeso kwa bintu bikwabo byonso. O mwanda mwine utelwanga bu “umbedi wa bipangwa byonso.” (Bene Kolose 1:15) Bible utelanga Yesu bu “mwana wa bunka” wa Leza, mwanda Yesu kete ye wāpangilwe na Yehova bunka bwandi. (Yoano 3:16) Yesu wāingile pabwipi na Shandi, Yehova, umukwasha’ko pa kupanga bintu bikwabo byonso. (Tangai Nkindi 8:30.) Ne panenwa pano, Yesu i mupwane bininge na Yehova. Wingilanga na kikōkeji bu “Kinenwa,” musedi wa myanda wa Leza, witusambulwila musapu wandi ne bulombodi bwandi.—Yoano 1:14.
2. I kika kyāidile Yesu pano pa ntanda?
Pano ke padi kintu kya myaka 2 000, Yehova, kupityila ku mushipiditu wandi ujila, wātundulwile mu kingelengele būmi bwa Yesu tamba mulu, wēbutundulwila mu difu dya mujike witwa bu Madia. Mu uno muswelo, Yesu wābutwilwe bu muntu. (Tangai Luka 1:34, 35.) Yesu wāile pano pa ntanda mwanda wa kwikala bu Meshiasa wālailwe, nansha Kidishitu, ne kupandija bantu.a Bupolofeto bonso bwa mu Bible bwisambila padi Meshiasa bwāfikidile pādi, kine kyākweshe bantu bayuke Yesu amba i “Kidishitu, Mwanā Leza mūmi.”—Mateo 16:16.
3. Le pano Yesu udi kwepi?
Būmi bwa Yesu bwa bu muntu pa kufula, wāsangwilwe ke kipangwa kya ku mushipiditu, wājokela momwa mūlu. Mwine’mwa, “Leza wamuzunzwile pa kyaba kya peulu kutabuka.” (Bene Fidipai 2:9) Pano, Yesu udi pa kifuko kya lupusa lukatampe—ye wa bubidi kupwa kwa Yehova mwine.
LANGULUKA BININGE
Wifundile’ko myanda mivule ya mwine mwikadile Yesu, kadi tala mwanda waka kwifunda’yo kudi na mvubu mikatampe.
4. Yesu ke Lezapo Mwinē Bukomo Bonso
Bible ufundija’mba nansha Yesu byadi bu kipangwa kya ku mushipiditu kya bukomo momwa mūlu, ukōkelelelanga Leza wandi kadi Shandi, Yehova. Mwanda waka tubanena namino? Talai VIDEO mumone byobya bifundija Bible pa kifuko kidi’po Yesu ne kyokya kidi’po Leza mwinē bukomo bonso.
Bisonekwa bilonda’ko’bi bitukwasha twivwanije kwishila kudi pa bukata bwa Yehova ne Yesu. Tangai kisonekwa ne kisonekwa ne kwisambila pa bipangujo bilonda’bya:
Tangai Luka 1:30-32.
Lelo mwikeulu wālombwele namani kwishila kudi pa bukata bwa Yesu ne Yehova Leza “Mwine wa Peulu Mwine”?
Tangai Mateo 3:16, 17.
Pābatyijibwe Yesu, le diwi ditamba mūlu dyānenene bika?
Molangila dyādi diwi dya ani?
Tangai Yoano 14:28.
Pa Tata ne mwana, le mukulu i wepi ne udi na lupusa kupita mukwabo i wepi?
Yesu paatela Yehova bu Shandi, le wetufundija bika?
Tangai Yoano 12:49.
Lelo mu milangwe ya Yesu, pa aye ne Shandi kepadipo kwishila? Le abe ulanga’po namani?
5. Yesu wāmwekele amba ye aye Meshiasa
Mu Bible mudi bupolofeto buvule bwādi bwa kukwasha bantu bajingulule Meshiasa—mutongwe wa Leza mwanda wa kunyongolola bantu. Talai VIDEO mwanda wa kumona bupolofeto bumo bwāfikidije Yesu kitatyi kyaādi pano pa ntanda.
Tangai buno bupolofeto bwa mu Bible ne kwisambila pa bipangujo bilonda’bya:
Tangai Mika 5:2 pa kuyuka kokwa kwādi kwa kubutwilwa Meshiasa.b
Lelo Yesu wābutwidilwe bine kokwa kwālaile bupolofeto?—Mateo 2:1.
Tangai Ñimbo ya Mitōto 34:20 ne Zekadia 12:10 pa kuyuka myanda mivule yālailwe itala lufu lwa Meshiasa.
Lelo buno bupolofeto bwāfikidile?—Yoano 19:33-37.
Le ulanga Yesu ye wātonwene bintu amba buno bupolofeto bufikidile?
Le kino kibaleta bukamoni’ka padi Yesu?
6. Tumwenanga’mo mu kwifunda myanda ya Yesu
Bible ukomeneja kamweno ka kwifundila myanda ya Yesu ne mwingilo wandi. Tangai Yoano 14:6 ne 17:3, ne kwisambila pa kino kipangujo:
Mwanda waka kwifunda myanda ya Yesu kudi na kamweno?
Yesu wāshitwidile bantu dishinda dya kupwana na Leza. Wāfundije bubine padi Yehova, kadi tubwanya kumona būmi bwa nyeke kupityila kwadi
BANTU BAMO BANENANGA’MBA: “Batumoni ba Yehova kebetabijepo mudi Yesu.”
Le ubwanya kulondolola’po namani?
MU KĪPI
Yesu i kipangwa kya ku mushipiditu kya bukomo. I Mwanā Leza kadi ye Meshiasa.
Pitulukai’mo
Mwanda waka Yesu witwanga bu “umbedi wa bipangwa byonso”?
Le i bika byādi bilonga Yesu kumeso kwa kwiya’ye pano pa ntanda?
Tubayuka namani amba Yesu ye Meshiasa?
KIMBA
Yukila’ko bivule pa mwingilo wa Yesu wa bu Meshiasa.
“Le Bupolofeto Butala Padi Meshiasa Bulombola’mba Yesu Ye Meshiasa?” (Kishinte kya pa Entelenete)
Kimba utale shi Bible ufundija’mba Leza wābutwile Yesu na mubutwilwanga muntu.
“Mwanda Waka Yesu Witwanga bu Mwanā Leza?” (Kishinte kya pa Entelenete)
Tala umone mwanda waka lufundijo lwa baleza basatu keludipo mu Bible.
Tanga umone mwashintyīle būmi bwa mwana-mukaji umo pawasokwele byobya bifundija Bible padi Yesu.
“Muyuda Mwana-Mukaji Ushintulula Kyaashintyīle Kipwilo” (Langukai!, Kweji 5, 2013)
a Kifundwa 26 ne 27 bikesambila pa kine kisakilwa bantu kunyongololwa ne muswelo witunyongolola Yesu.
b Talai Bilembwa bya ku Mfulo 2 mumone bupolofeto bwālaile kamo ne kamo ka kitatyi kyādi kya kumweka Yesu pano pa ntanda.