Kebo Shabo Bakulemeka Bijila!

“Abe Yehova, lelo i ani kakakutyina, ne kutumbija dijina dyobe? Ke-wi-muntu abe enka ye [ulemekanga bijila, “NW”].”​—KUSOKWELWA 15:4.

JOSEPH F. RUTHERFORD, wāpingakene C. T. Russell bu mwimaniji wa Sosiete Watch Tower mu mwaka wa 1917, wāvulwije ngikadila milumbuluke yādi na Russell kumeso kwa kumujīka na kunena’mba: “Charles Taze Russell wādi muntu ulemekele bijila bya Leza, wādi ulemekele bijila bya Kristu Yesu, ne wādi ubingija bulopwe bwa Meshiasa na kikōkeji kikatampe. Wādi ulemekele bijila mu myanda yonso​—eyo, wālemekele bijila kufika ne ku lufu lwandi.” Bine, ino yo mpalo milumbuluke yāfwaninwe kupalwa mwingidi wakikōkeji wa Yehova Leza. Kekudipo mpalo mikatampe kutabuka ikokeja kupebwa muntu kupitako ya kunena’mba wānekenye matompo pamwanda wa kikokeji kya kulemeka bijila, ne amba wādi muntu ulemekele bijila​—nansha ke mu myanda mityetye mine.

² Bine, kulemeka bijila i mwanda mukomo bininge. Mwanda waka? Mwanda kikokeji kya kulemeka bijila kilwanga na kilokoloko kya kwisakila kamweno. Bantu babajinji mu mulongo wa boba kebalemekanga bijila bya Leza i bakulumpe ba Bipwilo bya Ki-kristu. Kadi dyalelo, ngikadila ya kubulwa kulemeka bijila iyatandabuka mu busongi mu muswelo kewamwekele. Makoji endwanga konso-konso. Kadi kubulwa kulemeka bijila kutandabukile ne mu myanda ya busunga. Pa kino, betusapwila’mba: “Bemaniji ba mingilo ne bengidi bavule ba manwa . . . betabije’mba mu matyapu mavule dyalelo, enka bantu bafudilwe ne boba bimonya-malwa bo balemekanga bijila.” Bantu “balemeka bijila” bafūtululwanga. Mwimaniji umo wa kompani isokwelanga makompani makwabo mingilo wānene’mba: “Kikokeji kya kulemeka bijila i mwanda utala muntu aye mwine kete.” Inoko, kwisambila pa kikokeji kya kulemeka bijila amba i mwanda utala muntu aye mwine, i konakanya nshintulwilo ya kino kishima. Kino kituvuluja myanda idi mu Mika 7:2 (NW) mobanene’mba: “Muntu wakikokeji kya kulemeka bijila wajimina pano pantanda.”

³ Satana ne bandemona bandi i bavwale ñonga mwanda wa kulwa netu divita, i basumininwe kwitutonona tonakanye kikokeji kyetu kya kulemeka bijila bya Leza. Omwanda nanshi mu Efisesa 6:12 (MB) bakristu bapelwe’mo uno musoñanya’mba: “Ketulupo na bantu, anha, i na mabikavu ne na balupusa ne na bamfumwandya ntanda ya mfindi, ne na [mishipiditu] mibi ya mu madiulu.” Eyo, tufwaninwe kuta mutyima ku kidyumu kya’mba: “Tūkijai mityima, tengelai, wimushikilwe, ke dyabola kadi, unangakana bwa ntambo ubuluma, ukimba wakubokota.”​—1 Petelo 5:8.

⁴ Kadi kintu kitukankaja kwikala na kikokeji kya kulemeka bijila i ngikadila ya kwisakila kamweno yotwāpyene kudi bambutwile betu babajinji, pamo’nka na mokilombwelwe mu Ngalwilo 8:21 amba: “Mifwatakanyo ya mutyima wa muntu i mibi’tu”​—kadi ya kwisakila kamweno​—tamba’nka “ku bwanuke bwandi.” Batwe bonso tudi na makambakano alombola Polo amba nandi wādi nao. Unena’mba: “Kyokya kiyampe kyo nswile nkilonga’kyopo, ino bubi bo nkisweleko e bo nonga.”​—Loma 7:19.

Kikokeji kya Kulemeka Bijila i Kintu Kyapabula

⁵ “Kikokeji kya kulemeka bijila” i kishima kya pabula. Omwanda, dibuku Insight on the Scriptures dinena’mba: “Kimweka bu kekudipo bishima bya mu Angele bikokeja kuleta nshintulwilo mipotoloke ya bishima bya Kihebelu ne Kingidiki, byālamwinwe bu “kikokeji kya kulemeka bijila,” ino kino kishima kifunkila pa mulangwe wa kwipāna ne kikōkeji kyabinebine, kitatyi kyotwisambila padi Leza ne mwingilo wandi, kikwasha mwanda wa kuleta nshintulwilo ifwena ku kishima ‘kikokeji kya kulemeka bijila.’a Pamwanda utala “kikokeji kya kulemeka bijila,” Kiteba kya Mulami kyāshintulwile’mba i “Kikokeji kyabinebine, mingilo, buswe, kiselwa, kulamata pototo. Lelo bino bishima byenzankene namani? Kudi miswelo mishileshile ya kikokeji kya kulemeka bijila.” Eyo, kudi miswelo mivule ya bululame ino nabubine i miswelo mishileshile ya “kikokeji kya kulemeka bijila.” I kyamvubu kujingulula muswelo wingidijibwe pamo boloke ne kikokeji kya kulemeka bijila mu Bisonekwa.

⁶ Bushintuludi bulondako bukokeja monka kwitukwasha: ‘Kikokeji kya kulemeka bijila kifunkila pa kikokeji kikulupilwa, kyakubulwa mikalo, ne kyuminina mu matompo onso nansha byongo bisaka kwikinekenya. ‘Kikokeji kya kulemeka bijila kifunkila pa kulamata pototo ku kinenwa kya mulao nansha kadi kwendelela na kukōkela ku bulongolodi nansha ku misoñanya yoitabije na kusumininwa; kino kishima kekilombolapo enka lulamato kete ino kilombola monka bukomo bwa kukomena lupusa lonso lusaka kwitongola ne kwitusonsolwela kulampe na luno lulamato.’ Omwanda nanshi i kyendelemo kutela bantu bendelela na kulama kikokeji kyabo mu kupangwapangwa, mu masusu ne mu matompo bu ‘bakikokeji kya kulemeka bijila.’

⁷ Inoko, pamwanda utala kikokeji kya kulemeka bijila, i kiyampe kulombola kwishila kudi pabukata bwa kikokeji kya kulemeka bijila ne kikokeji kyabinebine. Kushika kwa ntanda ya Amerika, kudi mushimwa ulupulanga mema apyana kubwipi kwa nsaa yonso. Alupukanga kitatyi ne kitatyi, omwanda beutelanga bu Mununu Wakikokeji kyabinebine. Bible wisambilanga pa bintu bya uno muswelo byakubulwa būmi, kimfwa kweji, amba udi na kikokeji kyabinebine mwanda ukokeja kukulupilwa. Mitōto 89:37 unena’mba kweji i “kamoni ka binebine ka mūlu.” Kinenwa kya Leza nakyo kitelwa bu kyabinebine. Kusokwelwa 21:​5 unena’mba: “Yewa ushikete pa lupona wanena’mba: Monaipo bidi, byo mpangulula byonso ke bipya. Ino kwivwana kwādi’mba: Soneka’mba: Ino myanda īno’ī i ya binebine, milumbuluke.” Bino bintu byonso bitelelwe, bidi na kikokeji kyabinebine, bikokeja kukulupilwa, ino kebikokejapo kwikala na lulamato nansha ngikadila milumbuluke, kimfwa kikokeji kya kulemeka bijila.

Yehova, Utabukile Bonso ku Kulemeka Bijila

⁸ Pakubulwa ne kutātana kwine, Yehova Leza ye kimfwa kilumbuluke kutabuka kya muntu wakikokeji kya kulemeka bijila. Yehova ulemekele bijila bitala pa muzo wa muntu, omwanda wāpēne wandi Mwana amba bantu bamone muswelo wa kutambula būmi bwanyeke. (Yoano 3:16) Tutanga mu Yelemia 3:12 amba: “Joka abe Isalela mushetemuke; i Yehova unena, mwanda ami ne wakanye; i Yehova unena; nkikatalepo mu bulobo po mudi, [mwanda ami ne wakikokeji kya kulemeka bijila, NW].” Bukamoni bukwabo bulombola kikokeji kya Yehova kya kulemeka bijila budi mu binenwa bisekunwinwe mu Kusokwelwa 16:5 (NW) amba: “Abe ulemekanga bijila, wi moloke, udiko, kadi wādiko.” Kadi betusapwila mu Mitōto 145:17 amba: ‘Yehova i moloke mu mashinda andi onso, kadi ulemekanga bijila mu mingilo yandi yonso.’ Nabubine, kikokeji kya Yehova kya kulemeka bijila kitulumukwa bininge, omwanda Kusokwelwa 15:4 unena’mba: “Abe Yehova, lelo i ani kakakutyina, ne kutumbija dijina dyobe? Ke-wi-muntu abe enka ye [ulemekanga bijila, NW].” Yehova Leza ye ulemekanga bijila kutabuka bantu bonso.

⁹ Nakampata, mānga ya bene Isalela ilombola bukamoni buvule pa muswelo ulombolanga Yehova kikokeji kyandi kya kulemeka bijila ku bantu bandi. Mu myaka ya Batyibi, pavule Isalela wāsonsolokele kulampe na mutōtelo wabine, ino kitatyi ne kitatyi Yehova wādi wibafwila lusa, kadi wibakūla. (Batyibi 2:​15-22) Umbula bwa myaka tutwa tutano mituntulu pādi Isalela uludikwa na balopwe, Yehova wālombwele kikokeji kyandi kya kulemeka bijila ku uno muzo.

¹⁰ Kikokeji kya Yehova kya kulemeka bijila kimupanga butūkanye mu kipwano kyandi na bantu bandi, pamo na mokilombwedilwe mu 2 Bilongwa 36:​15, 16 amba: “Yehova Leza wa bashabo’wa watuma ko badi pa mikendi yandi kukēlela lubanga’tu bwē ne kutuma; ke-muntu wasokwele lusa pa bantu bandi, ne pa kikalo kyandi; ino beibenga kibengo mikendi ya Leza, bafutulula myanda yandi ne kutuka bapolofeto bandi, enka ne byafikile bukalabale bwa Yehova bwatalukila bandi bantu, ino kekwadipo kūndapwa, mhm.”

¹¹ Pamwanda wa kikokeji kya Yehova kya kulemeka bijila pakatampe, mutumibwa Polo wāsonekele mu Loma 8:​38-39 amba: “Ami ne musumininwe byamwiko, na’mba: Nansha lufu, nansha būmi, nansha bamwikeulu, nansha bēne bakatampe bene, nansha bintu bidipo panopano, nansha bikāyako kumeso, nansha bilobo, nansha bula bwa mūlu, nansha bula bwa panshi, nansha kipangwa kikwabo, shi kika, shi kika, kikamona mwakwitukalañanya ne [buswe bwa] Leza, [b]udi mudi Kidishitu Yesu Mfumwetu.” Eyo, Yehova witupa kikulupiji amba: “Ami nkikakuzobololapo, nansha patyetye pene, nansha kukulekelela mpika.” (Bahebelu 13:5) Kyabine, kuyuka’mba Yehova Leza ulemekanga bijila nyeke, i mwanda ukankamika kashaa!

Yesu Kristu, Mwana Wakikokeji kya Kulemeka Bijila

¹² Muntu wiulanga Yehova mu muswelo mubwaninine na kulombola kikokeji kya kulemeka bijila tamba kala kufika ne dyalelo i Yesu Kristu. Mutumibwa Petelo wātelele Mitōto 16:10 mu muswelo mwendelemo pādi wisambila padi Yesu Kristu mu Bilongwa 2:27 amba: “Abe kukanshīlapo muya wami mu kalunganyembo. Nansha kumupana uno obe [wakikokeji kya kulemeka bijila, NW] abole bubole, mhm.” Nanshi i kyendelemo kutela Yesu Kristu bu muntu “wakikokeji kya kulemeka bijila.” Ulemekanga bijila bya Shandi mu miswelo yonso ne bijila bitala pa Bulopwe bulaile Leza. Kuñajilo, Satana wātompele konakanya kikokeji kya Yesu na kwingidija matompo emanine pa kwisakila kamweno. Byākomenwe konakanya kikokeji kya Yesu na kwingidija matompo, Dyabola wāingidije kupangwapangwa, kumfulo wāipaija Yesu ku mutyi wa masusu. Yesu kālekelepo kulemeka bijila bya Shandi wa mūlu, Yehova Leza.​—Mateo 4:​1-11.

¹³ Yesu Kristu wālombwele bandi bana-babwanga’mba wādi ulemekele bijila na kulama mulao usekunwinwe mu Mateo 28:20 amba: “Ebiya, ami nami kadi, ngidi nenu mafuku onso nyeke, ne kumfulo kwine kwa panopantanda.” Tamba mu Pentekosa mu mwaka wa 33 K.K. kufika ne dyalelo, Yesu uludikanga kipwilo kyandi mwanda wa kulombola muswelo wakōkele ku ino mbila.

Bantu Bakubulwa Kubwaninina Bādi Balemekele Bijila

¹⁴ Ino lelo tukanena namani pamwanda utala bantu bakubulwa kubwaninina? Lelo bakokeja kulemeka bijila bya Leza? Tudi na kimfwa kitulumukwa kya Yoba. Satana wāmwekeje uno mwanda patōka. Lelo Yoba wādi ulemekele bijila bya Yehova Leza’ni, nansha wādi umwingidila enka pamwanda wa kukimba kamweno ka aye mwine? Satana wādi witatula’mba ukokeja kubombola Yoba avundamine Yehova na kumuletela kavutakanya. Pājimije Yoba bupeta bwandi bonso, bandi bana bonso ne bukomo bwandi bwangitu, wandi mukaji wāmusoñenye’mba: “Tuka bidi Leza, penepa ufwe.” Ino Yoba wādi na kikokeji kya kulemeka bijila, omwanda wāmusapwidile amba: “Wisambanga pamo’nka bwa mwisambilanga umo wa ku banabakaji balembakane. Lelo i namani? Lelo shi tutambulanga biyampe pa dikasa dya Leza, ino tubulwe nanshi kutambulapo ne bibi’ni, a? Mu kine kino’ki kyonsololo Yoba kalongelepo bubi ku milomo yandi, ehe.” (Yoba 2:​9, 10) Ino, boba bādi befwatakenya bu basengi bandi, Yoba wēbasapwidile’mba: “Nansha [Leza] ungipaya, mukulupila.” (Yoba 13:15) Ke kya kutulumukapo pakuyuka’mba Yoba wāitabijibwe na Leza! Omwanda nanshi Yehova wāsapwidile Edifaza mwine Temani amba: “Bukalabale bwami bubaakijibwa padi abe, ne padi balunda nobe babidi; mwanda kemwesambilepo kudi ami byoloke, mwesambile mwingidi wami Yoba.”​—Yoba 42:​7, 10-16; Yakoba 5:11.

¹⁵ Bana-balume ne bana-bakaji bonso bādi na lwitabijo batelelwe mu Bahebelu shapita 11 bakokeja kutelwa bu bantu bakikokeji kya kulemeka bijila. Kebādipo enka na kikokeji kyabinebine kete, ino kadi bādi balemekele bijila nansha byobādi na mitabakano. Pamwanda wabo tutanga’mba: ‘Ponka pa kwitabija . . . bāmumije byakanwa bya ntambo ponka. Kadi ne kubula bulobo bwa mudilo ponka, ne kupanda ku buī bwa kipete ponka, . . . ino bakwabo nabo bātompelwe ne byakibengo, ne bikupilwa kutentekelwapo, ne nkano, ne bifungo, bāashibwa mabwe, bangi nabo baladibwa lupasu umbukata; aba batompibwa, aba batapibwa ku lupete, bangi benda bapōtakana, bavwele biseba bya mikōko ne bya bambuji; bafudilwa, ne kumweshibwa malwa.’​—Bahebelu 11:​33-37.

¹⁶ Bisonekwa bya bwine-kristu bya Kingidiki nabyo bilombola kimfwa kitenga ku mutyima kya mutumibwa Polo. Wāsapwidile bakristu bene Tesalonika mu muswelo mwendelemo pamwanda utala mwingilo wandi’mba: “Bānwe mwi tumoni twetu, ne Leza mwine kumo, mo twadi twikadile nenu, bānwe bakwitabija, [mu kulemeka bijila, NW], ne mu boloke, ne mu kubulwa mwanda wa matope.” (1 Tesalonika 2:10) Tudi na bukamoni bukwabo bulombola kikokeji kya kulemeka bijila kya Polo mu binenwa byandi bisonekelwe mu 2 Kodinda 6:4, 5, motutanga’mba: “Umbintu byonso twiyūkanyei bātwe bene bu-bengidi ba Leza, mu kuyūkija mutyima pakatampe pene, ne mu byamalwa, ne mu kubulwa bintu, ne umbufudile, ne mu bikupilwa, ne mu kukutwakutwa, ne mu binzengele, ne mu kuputumina mu mīngilo, ne mu kutengelatengela, ne mu kushikilwa na nzala.” Bino byonso bilombola’mba mutumibwa Polo wādi mulemantu mwanda wādi ulemekele bijila.

Balemekele Bijila mu Kino Kyetu Kitatyi

¹⁷ Pamwanda utala kino kyetu kitatyi, tudi kala na kimfwa kilumbuluke kyotwadi tubesambila’po kungala. Tujingululei myanda inenwe mu dibuku dimo Worldwide Security Under the “Prince of Peace,” pa paje 146 munshi mwa mutwe wa mwanda unena’mba “Loyalty During Time of Imprisonment” (Bālemekele Bijila Umbula bwa Kitatyi Kyobāelelwe mu Bifungo). Bānene’mo amba: “Pamwanda wa kikokeji kyandi kya kulemeka bijila bya bulongolodi bwa Yehova, Joseph F. Rutherford, wādi mwimaniji wa Sosiete Watch Tower, wāsonekele mu mafuku 25 kweji 12, 1918, kitatyi kyādi mu kifungo’mba: ‘Abangela mu kifungo mwanda nāpelele kwikuja mu myanda ya Babiloni Mukatakata, ino nāingidile Mfumwami na kikokeji kyabinebine, bine mfwijako bikatampe pa uno mwanda . . . Naitabija kwelwa mu kifungo mwanda wa kwitabijibwa na Leza ne kusangaja mutyima wandi, kupitako kupwana na Kinyema kya kyelekejo ne kupebwa bwanapabo kadi kukupidilwa nkashi na ntanda yonso.”b

¹⁸ Tudi na bimfwa bikwabo bilumbuluke bya bakristu bāuminine kupangwapangwa mwanda bādi na kikokeji kya kulemeka bijila. Umbukata mwa bano bantu balemekele bijila tubadila’mo ne ba Tumoni twa Yehova ba mu Alemanye bāuminine kupangwapangwa mu kitatyi kya umbikalo wa Nazi, pamo’nka na mokilombwedilwe mu bande video udi na mutwe wa mwanda unena’mba: Purple Triangles, ulupwilwe mu kibalwa kikatampe mu ludimi lwa Angele. Bimfwa bikwabo bitulumukwa i bya ba Tumoni twa Yehova ba mu Afrika balemekele bijila, kimfwa mu Malawi. Mwine’mwa, kalama umo wa kifungo wēsambile pa kikokeji kya kulemeka bijila kya ba Tumoni amba: “Kebakokejapo kutuna lwitabijo lwabo nansha dimo, kibalwa kyabo kyenda kilundila’ko.”

¹⁹ Kekudipo muntu nansha umo ukokeja kutanga Kitabu-Mwaka Cha Mashahidi wa Yehova pakubulwa kutulumuka pamwanda wa kikokeji kya kulemeka bijila kilombola bakristu babine, kimfwa bakristu ba mu Ngidiki, ba mu Mozambike ne ba mu Polonye. Bavule umbukata mwabo bāsuswilwe byamwiko; bakwabo bāipailwe. Pa paje 177 wa Kitabu-Mwaka 1992 bālombwele’po bifwatulo bya bakristu kitema bana-balume ba mu Etyopi bāipailwe mwanda bālemekele bijila. Byotudi ba Tumoni twa Yehova, lelo ketudipo na nsangaji ya kuyuka bino bimfwa bilumbuluke bitutonona netu twikale na kikokeji kya kulemeka bijila?

²⁰ Shi tulemeka bijila ne kunekenya matompo ne mitabakano itufikila, tukekala balemantu. Lelo tukasangela kwikala ku mutamba’ka pamwanda utala kikokeji kya kulemeka bijila? Shi tudi na kikokeji kya kulemeka bijila, tukekala ku mutamba wa Yehova Leza ne tukalombola’mba Satana Dyabola ye mbepayi mukatampe mwine! Tuketabijibwa na Umpangi wetu, Yehova Leza, kadi tukapalwa mpalo ya kukekala na būmi bwanyeke mu nsangaji. (Mitōto 37:29; 144:15b) Mafuku akeya’ko, tukesambila pa myanda yotufwaninwe kulonga mwanda wa kwikala na kikokeji kya kulemeka bijila.

[Kunshi kwa dyani]

[Bipangujo]

1. I bukamoni’ka bwālombwele J. F. Rutherford pamwanda utala kikokeji kya kulemeka bijila kyādi na C. T. Russell, mwimaniji yāpingakene?

2, 3. (a) Mwanda waka kikokeji kya kulemeka bijila i mwanda mukomo kunekenya? (b) I bāni bakwabo bavwele ñonga ya kulwa na bakristu babine mu bukomo bobalonga mwanda wa kukokela ku bijila?

4. Kulemeka bijila kwikalanga kukoma pamwanda wa ngikadila’ka?

5, 6. Kikokeji kya kulemeka bijila i kika, ne kishintulwilwe muswelo’ka?

7. I kwishila’ka kudi pabukata bwa kikokeji kya kulemeka bijila ne kikokeji kyabinebine?

8. I bukamoni’ka budi mu Bisonekwa bulombola kimfwa kilumbuluke kya muntu udi na kikokeji kya kulemeka bijila?

9, 10. Mungya nsekununi, Yehova wālombwele muswelo’ka amba udi na kikokeji kya kulemeka bijila mu kipwano kyandi na bene Isalela?

11. I kikulupiji’ka nansha kadi i muswelo’ka otusengwa pa mutyima pa kuyuka’mba Yehova udi na kikokeji kya kulemeka bijila?

12, 13. Mwana Leza wālombwele bukamoni’ka butala pa kikokeji kya kulemeka bijila?

14. I kimfwa’ka kyāshile Yoba pa mwanda utala kikokeji kya kulemeka bijila?

15. I bukamoni’ka bulombwelwe mu Bisonekwa butala pa bengidi ba Yehova Leza bavule bālamine kikokeji kya kulemeka bijila?

16. Mutumibwa Polo wāshile kimfwa’ka pa mwanda utala kikokeji kya kulemeka bijila?

17. I myanda’ka yānene J. F. Rutherford ilombola’mba wādi musumininwe mwanda wa kulemeka bijila?

18, 19. I bimfwa’ka byotuyukile bya bantu bālamine kikokeji kya kulemeka bijila mu kino kyetu kitatyi?

20. I bipa’ka bikalupuka ku kikokeji kyetu kya kulemeka bijila?

[Kapango pa paje 10]

Charles Taze Russell

[Kapango pa paje 11]

Bine, Yesu wādi na ‘kikokeji kya kulemeka bijila’ bya Yehova

[Kapango pa paje 12]

Yoba wālemekele bijila bya Leza, nansha byādi muntu wakubulwa kubwaninina

[Kapango pa paje 13]

Polo wāshile kimfwa kilumbuluke kya muntu wakikokeji kya kulemeka bijila bya Yehova

Lelo Ukalondolola Namani?

◻ Mwanda waka kikokeji kya kulemeka bijila i mwanda mukomo?

◻ Mwanda waka tukokeja kunena’mba “kikokeji kya kulemeka bijila” i kishima kya pabula?

◻ I bimfwa’ka bilombwelwe mu Bisonekwa bya bantu bakubulwa kubwaninina bādi na kikokeji kya kulemeka bijila?

◻ I bimfwa’ka byotuyukile bya bantu ba mu kino kyetu kitatyi bālemekele bijila?