Boba Bafwaninwe Kulombolwa ku Nsulo ya Mema a Būmi

“Kāna-ka-mukōko . . . ukēkalanga mukumbi wabo, wakwibalombola ku nsulo ya mema a būmi.”—KUS. 7:17.

 1. Lelo Kinenwa kya Leza kilombola Bene Kidishitu bashingwe māni bu ani, ne i kiselwa’ka kyēbatwikile Yesu?

KINENWA KYA LEZA kilombola amba Bene Kidishitu bashingwe māni balama tumweno twa Kidishitu pano panshi ye “umpika wa binebine, udi na manwa.” Paile Kidishitu kupempula uno “umpika” mu 1918, watene bano bashingwe māni pano panshi bapāna na kikōkeji ‘bidibwa bya ku mushipiditu pa kitatyi kifwaninwe.’ O mwanda Yesu Mfumwandi wāmupele bukalama pa ‘bintu byandi byonsololo.’ (Tanga Mateo 24:45-47.) Mu uno muswelo, kumeso kwa Bene Kidishitu bashingwe māni kutambula bupyani bwabo bwa mūlu, bengidilanga batōtyi bakwabo ba Yehova pano panshi.

 2. Tela bintu byonsololo bya Yesu.

² Mfumu ye udi na lupusa pa bintu byandi byonso, ne ubwanya kwingidija’byo monso mwasakila. Bintu bya Yesu Kidishitu, Mulopwe ubikikilwe na Yehova, i tumweno tonso twa Bulopwe tudi pano pa ntanda. Mubadilwa ne “kibumbo kikatampe” kyāmwenwe na mutumibwa Yoano mu kimonwa. Yoano wisambila pa kibumbo kikatampe amba: “Na’mba, ntale, namwene kibumbo kikatampe kīne kekibadibwapo na muntu, mhm; batambile mu mizo yonso, ne mu bisaka byonso ne mu bantu, ne mu ndimi, bēmene mu kifuko kya lupona, ne kya Kāna-ka-mukōko, bavwele bivwalwa bitōka, ne tunkindu ku maboko abo.”—Kus. 7:9.

3, 4. Bantu ba mu kibumbo kikatampe i beselwe bikatampe muswelo’ka?

³ Yesu wātelele bantu ba mu kibumbo kikatampe bu yandi “mikōko mikwabo.” (Yoa. 10:16) Badi na lukulupilo lwa kwikala nyeke mu paladisa pano pa ntanda. Kadi bakulupile amba Yesu ye “wakwibalombola ku nsulo ya mema a būmi,” ne amba “Leza nandi ukebapampula impolo yonsololo ku meso abo.” O mwanda “abakendeja bivwalwa byabo ne kwibitōkeja, tō, mu mashi a Kāna-ka-mukōko.” (Kus. 7:14, 17) Betabije mu kitapwa kya Yesu, ne ku meso a Leza i ‘bavwale bivwalwa bitōka.’ Ko kunena’mba i batelwe bu boloke mwanda i balunda na Leza mwādi mwikadile Abalahama.

⁴ Pakwabo kadi, ba mu kibumbo kikatampe kya mikōko mikwabo kyenda kibaila’ko byobamwenwe na Leza bu boloke, batengele kupanda pa bonakani bwa ino ngikadilo ya bintu ku kyamalwa kibūke. (Yak. 2:23-26) Bakokeja kufwena kudi Yehova, kadi abo bonso kya pamo badi na kyepelo kya pa bula kya kupanda ku Amakedona. (Yak. 4:8; Kus. 7:15) Kebengilangapo wa pandi wa pandi, ino abo bonso badi na mutyima wa kulonda buludiki bwa Mulopwe udi mūlu ne bwa banababo bashingwe māni badi pano panshi.

 5. Boba ba mu kibumbo kikatampe bakwashanga banababo na Kidishitu bashingwe māni namani?

⁵ Bene Kidishitu bashingwe māni bālondelwelondelwe kadi bakyendelela kulondwalondwa na ntanda ya Satana. Inoko, bakulupile mu bukwashi bwa bapwani nabo ba mu kibumbo kikatampe. Nansha Bene Kidishitu bashingwe māni byobenda batyepa, kibumbo kikatampe akyo kyendelelanga na kwibweja’ko mwaka ne mwaka na tununu tutwa ne tutwa twa bantu. Bashingwe māni kebakokejapo bunka bwabo kwikala batadi mu bipwilo kintu kya 100 000 kujokoloka ntanda yonso. O mwanda bukwashi bumo bidi bukwashibwa bashingwe māni na mikōko mikwabo i bwa bana-balume babwenye bisakibwa ba mu kibumbo kikatampe bengila bu bakulumpe mu bipwilo. Bakwashanga ku kulela midiyo ne midiyo ya Bene Kidishitu bapelwe “umpika wa binebine, udi na manwa.”

 6. I muswelo’ka wālailwe bukwashi bukwashibwa Bene Kidishitu bashingwe māni na bapwani nabo mikōko mikwabo?

⁶ Bukwashi bwa na mutyima tō bukwashibwa Bene Kidishitu bashingwe māni na bapwani nabo mikōko mikwabo bwālailwe na mupolofeto Isaya. Wāsonekele amba: “E mwanenena Yehova amba: Mingilo ya Edipito, ne busunga bwa Efiopya ne bwa bene Sabe, bantu balabala, bakābukila kodi; nabo bakekalanga bobe [bakakulonda].” (Is. 45:14) Bene Kidishitu badi na lukulupilo lwa pano panshi balondanga mu kyelekejo kabumbo ka umpika ka bashingwe māni ne Kitango kyandi Kyendeji, pobalonda bwendeji bwabo. Pamo’nka bwa bantu ‘ba mingilo,’ mikōko mikwabo ipānanga na mutyima tō bukomo ne lupeto lwayo mu kukwatakanya mwingilo wa kusapula ntanda yonso upēne Kidishitu ku balondi bandi bashingwe māni badi pano pa ntanda.—Bil. 1:8; Kus. 12:17.

 7. Ba mu kibumbo kikatampe bafundijibwanga mwa kukalongela bika?

⁷ Ba mu kibumbo kikatampe pobakwasha’ko banababo bashingwe māni, bafundanga kala mwa kukādila kyalwilo kya kitango kya bantu kipya kikekala’ko kupwa kwa Amakedona. Kino kyalwilo kifwaninwe kwikala kikomo, kishimatyije, ne babadilwa’mo bafwaninwe kwikala na mutyima wa kulonda bwendeji bwa Mfumwabo ne kubwanya kwibulonda. Mwine Kidishitu yense udi na mukenga wa kulombola amba ubwanya kwingidijibwa na Mulopwe, Kidishitu Yesu. Shi udi na lwitabijo ne dikōkeji kudi Mulopwe tamba’nka pano, nabya ukalombola amba ukalonda ne bwendeji bwandi bwakaleta mu ntanda impya.

Kibumbo Kikatampe Kilombola Lwitabijo

8, 9. Lelo bantu ba mu kibumbo kikatampe balombolanga namani lwitabijo lwabo?

⁸ Mikōko mikwabo ingidila pamo na kipwilo kya Bene Kidishitu bashingwe māni ilombolanga lwitabijo mu miswelo palapala. Dibajinji, ikwashanga bashingwe māni mu kusapula myanda miyampe ya Bulopwe bwa Leza. (Mat. 24:14; 28:19, 20) Dya bubidi, ikōkelanga na mutyima tō ku bwendeji bupānwa na Kitango Kyendeji.—Bah. 13:17; tanga Zekadia 8:23.

⁹ Dya busatu, ba mu kibumbo kikatampe bakwashanga’ko bananabo bashingwe māni na kulonda mu būmi bwabo misoñanya myoloke ya Yehova. Baloñanga bukomo bwa kutamija “Buswe, nsangaji, ndoe, kitūkijetyima, kanye, buyampe, lwitabijo, kutalala, kwīfula.” (Ngat. 5:22, 23, NW) Dyalelo ke bantupo bavule badi na ino ngikadilo, mwanda balombolanga “mīngilo ya ngitu.” Ino, bantu ba mu kibumbo kikatampe abo i basumininwe kwepuka “busekese, ne kujilula kwa bijila, ne byakulondalonda bya mutyima umbi, ne kutota bakishi, ne bufwityi, ne nshikani, ne lupata, ne mukao, ne bukalabale, ne ñuma, ne kwilalulula kubikubi, ne kwiketa kubi kwa pala pala, ne bya kilokoloko, ne bunkolwankolwa, ne lupotopoto, kadi [ne] bikwabo byonso bidi namino’bi.”—Ngat. 5:19-21.

10. Lelo i kusumininwa’ka kudi na bantu ba mu kibumbo kikatampe?

¹⁰ Kupa kipa kya ku mushipiditu, kwepuka mingilo ya ngitu, ne kukomena lupusa lwa ntanda ya Satana i bulwi kotudi, mwanda twi bantu bakubulwa kubwaninina. Ino ketusakilepo kupungila kuletwa na bukōkekōke bwetu, kutupatupa, ne bikoleja bya ngitu bizozeje bukomo bwa lwitabijo lwetu nansha kutyepeja buswe botuswele Yehova. Tuyukile amba Yehova ukalonga monka mwalaile—eyo, ukapandija kibumbo kikatampe pa kyamalwa kibūke.

11. Lelo i manwa’ka engidijanga Satana mwafwila kuzozeja lwitabijo lwa Bene Kidishitu?

¹¹ Mo monka kadi tukeshanga nyeke mwanda tuyukile amba walwana netu mwinemwine i Dyabola, kadi ketulekangapo talala. (Tanga 1 Petelo 5:8.) Wingidijanga batupondo ne bantu bakwabo mwanda wa kwitukulupija amba bufundiji botulonda i bwa bubela. Ino ano manwa andi akomenwanga divule. Ne kupangwapangwa nako monka na monka, nansha byokutyepejanga kyaba kimo mwingilo wa busapudi, inoko kukomejanga lwitabijo lwa boba bapangwapangwa. O mwanda Satana ubwejanga’ko manwa mwa kwikadila na mikenga mivule ya kuzozeja lwitabijo lwetu. Kimfwa utwelelanga pa kutyumukwa mutyima. Bene Kidishitu ba mu myaka katwa kabajinji bādyumwinwe ku kyaka kya kupungila amba: “Mulangei bidi biyampe uno [Kidishitu] wakankamene namino, ponka pa kufutululwa na babipya-mambo.” Mwanda waka? “Mwanda wa kutyina’mba mwakēnda mukōka ne kupungila pa mityima penu.”—Bah. 12:3.

12. Madingi a mu Bible akomejanga muswelo’ka boba bapungile?

¹² Lelo nobe kodi mumone amba ubapungila? Le kyaba kimo ulañanga amba utupatupanga? Shi i amo, kokaleka Satana engidije mwiivwanino obe mwanda wa ukomenwe kwingidila Yehova. Kwifunda Bible na mushike, kulombela na kininga, kutanwa nyeke ku kupwila, ne kwinangila na boba bodi nabo mu lwitabijo lumo, kukakukomeja wendelele kumeso ‘ne kupungila pa mutyima’ obe mpika. Yehova ulaya kukwasha boba bamwingidila na kwibapa bukomo, ne mulao wandi i wa binebine. (Tanga Isaya 40:30, 31.) Bambila meso obe pa mwingilo wa Bulopwe. Epuka kwela kyaba mu bya kwipwija mukose, kadi wipāne mu kukwasha bakwenu. Ebiya nobe ukamona bukomo bwa kutyumwina umanwi kupungila ko-konso.—Ngat. 6:1, 2.

Kukūlwa ku Kyamalwa ne Kutwela mu Ntanda Impya

13. I mwingilo’ka utengele boba bakapanda pa Amakedona?

¹³ Pakapwa Amakedona, bibumbo ne bibumbo bya bantu bampikwa koloka bakasangulwa bakafundijibwa mashinda a Yehova. (Bil. 24:15) Bakasakilwa kuyuka kitapwa kya kikūlwa kya Yesu; ne kadi bafwaninwe kukafundijibwa kwitabija kino kitapwa mwa kutambwila byabuyabuya byokileta. Ne kadi bafwaninwe kufundula milangwe ya bubela ya bipwilo yobadi nayo, ne kuleka mashinda a būmi bwabo bwa kala. Bafwaninwe kukafunda kuvwala bumuntu bupya buyukilwa’po Bene Kidishitu ba bine. (Ef. 4:22-24; Kol. 3:9, 10) Boba badi pamo bwa mikōko bakapanda bakekala na mingilo mivule ya kwingila. Bine, i nsangaji mikatampe pa kukengidila Yehova, mu ntanda mwambulwa mitabakano ne bilabi bya ino ntanda imbi ya dyalelo!

14, 15. Shintulula mukekadila mīsambo ya boba bakapita bōmi pa kyamalwa kibūke ne boloke bakasangulwa.

¹⁴ Bengidi ba Yehova ba kikōkeji bāfwile Yesu kāile kwingila pano panshi nabo bafwaninwe kukafunda mu kitatyi’kya. Bakayuka Meshiasa wālailwe i ani, yewa obādi babila kumona. Mu būmi bobādi nabo bādi kala babilanga kufundijibwa na Yehova. Langa’po nsangaji ne dyese dyotukekala nadyo pa kukwasha bano bantu—kimfwa, kushintulwila Danyele mwafikidile bupolofeto bwaāsonekele ino kwivwanija’bo mpika!—Dan. 12:8, 9.

¹⁵ Na bubine, nansha shi boba bakasanguka bakefundila bivule kotudi, ino netu tukekala na bivule bya kwibepangula. Baketulombola bivule pa myanda itelelwe mu Bible ino yampikwa kushintululwa kamo ne kamo. Fwatakanya mukekadila nsangaji ya kuyuka twanda tuvule tutala Yesu kudi mwanabo Yoano Mubatyiji! Bintu byotukateja ku bano batumoni ba kikōkeji kebikabulwepo kwitwivwanija Kinenwa kya Leza kutabuka ne motwivwanina’kyo dyalelo. Bengidi ba kikōkeji ba Yehova bāfwile—kubadila’mo ne ba mu kibumbo kikatampe bafwa mu ino myaka ya mfulo—bakatambula “lusangukilo lutabukilemo buya.” Bashilwile kwingidila Yehova mu ntanda ibikelwe na Satana. Bine, bakekala na nsangaji ya kashā pa kwendelela na uno mwingilo mu ngikadilo miyampe kutabuka mu ntanda impya!—Bah. 11:35; 1 Yoa. 5:19.

16. Kukwatañana na bupolofeto, i muswelo’ka ukapita Difuku dya Kidye?

¹⁶ Kyaba kampanda, mu Difuku dya Kidye, mivungo ikapūtulwa. Bible pamo ne yoya mivungo byo bikekala kyalwilo bya kutyibila’po bōmi bonso mambo mwa kuyukila shi bafwaninwe kumona būmi bwa nyeke. (Tanga Kusokwelwa 20:12, 13.) Ku mfulo kwa Difuku dya Kidye, umo ne umo ukekala na mukenga wa kulombola shi udi ku mutamba’ka mu mwanda utala bubikadi bwa ntanda yonso. Lelo ukakwatakanya mpangiko ya Bulopwe ne kwitabija Kana ka Mukōko kukamulombola “ku nsulo ya mema a būmi”? Nansha le ukōmija nshingo yandi na kupela kukōkela Bulopwe bwa Leza? (Kus. 7:17; Is. 65:20) Papo ntanda yonso ikekala na mukenga wa kutyiba mbila, ku muntu ku muntu, pampikwa kukolejibwa na bubi botwāpyene nansha ngikadilo imbi. I kutupu ukatatana butyibi boloke bwa mfulo bukatyiba Yehova. Enka babi bo bakonakanibwa lonsololo.—Kus. 20:14, 15.

17, 18. I nsangaji’ka idi kala na Bene Kidishitu bashingwe māni ne mikōko mikwabo pangala pa Difuku dya Kidye?

¹⁷ Bene Kidishitu bashingwe māni dyalelo, byobadi bafwaninwe kupebwa Bulopwe, batengele na kipyupyu kubikala mu Difuku dya Kidye. Bine, dino i dyese dikatampe kobadi! O mwanda kino kyepelo kyabo kibatonona balonde madingi ādingile Petelo banababo ba mu myaka katwa kabajinji amba: “Mutabukilemo kupyasakana nakampata kuningija lwito lwenu, ne kutongibwa kwenu; mwanda bānwe wivwane mulonge bīne bino’bi, nankyo kemukakukalapo, mhm; i yenka namino kukemupebwanga bungibungi kitwelelo kya monka mu bulopwe bwa nyeke bwa Mfumwetu, Umpandiji Yesu Kidishitu.”—2 Pet. 1:10, 11.

¹⁸ Mikōko mikwabo nayo isangalanga pamo na banababo bashingwe māni. I misumininwe kwibakwasha. Byoisambile bulunda na Leza dyalelo, idi na mutyima wa kwielela’ko mu mingilo ya Leza. Mu Difuku dya Kidye, ikasangela kukwatakanya na mutyima umo mpangiko ya Leza ponso pakeilombola Yesu ku nsulo ya mema a būmi. Ebiya—ku mfulo—ikatelwa nayo bu mifwaninwe kwikala bu bengidi ba Yehova ba pano panshi nyeke ne nyekeke!—Loma 8:20, 21; Kus. 21:1-7.

Lelo Ukivulukile?

• Lelo bintu bya Yesu i bika ne bika?

• Le ba mu kibumbo kikatampe bakwashanga’ko namani banababo bashingwe māni?

• I madyese’ka ne byepelo’ka bitengele boba ba mu kibumbo kikatampe?

• Lelo umwene namani Difuku dya Kidye?

[Kifwatulo pa paje 29]

Boba ba mu kibumbo kikatampe i bakendeje bivwalwa byabo ne kwibitōkeja mu mashi a Kana ka Mukōko

[Kifwatulo pa paje 31]

Le i bika byotengele kuyuka ku boba ba kikōkeji bakasangulwa?