Yesu—Kyaāfwidile

“Mwanā muntu . . . [wāidile] kupana būmi bwandi ke kikūlwa kya bangi bangi.”—MAKO 10:45.

YESU wādi uyukile bisa kumufikila. Wādi uyukile amba ukekala na būmi bwa masusu. Ino, wādi ujingulwile amba būmi bwandi bukatyibwa’ko bibibibi aye papo ukidi na myaka 30 ne musubu, ne wādi mwiteakanye kufwa luno lufu.

Bible utelanga lufu lwa Yesu bu lwa mvubu mikatampe. Dibuku dimo dinena’mba lufu lwa Yesu i lutelwe patōkelela misunsa 175 mu Bisonekwa bya Kingidiki bya Bwine Kidishitu, bītwa ne bu Kipwanino Kipya. Ino mwanda waka byādi bilomba Yesu asusuke namino ne kufwa? I biyampe tuyuke uno mwanda, ke-pantu, lufu lwa Yesu lubwanya kushinta būmi bwetu.

▪ Byādi bitengēle Yesu Yesu wādyumwine divule dine bandi bana ba bwanga ku mfulo ya būmi bwandi amba usa kususuka ne kufwa. Pobādi benda ku Yelusalema ku masobo a Pashika, andi a mfulo, wāsapwidile balondi bandi 12 amba: “Mwanā muntu ukafikijibwa kudi bapidishitu bakatampe, ne kudi basonekeji, ino bakamuponeja mu kidye kutwalwa ku lufu, ne bakamufikija kadi ku baJentaila. Ebiya bakamubengeja kibengo, ne kukupila bakamukupila, ne kumupelela mata, bamwipaye.”a (Mako 10:33, 34) Mwanda waka wādi witabije amba bine bino bintu bikamutananga?

Yesu wādi uyukile senene bupolofeto buvule bwa mu Bisonekwa bya Kihebelu bwālaile mukafudila būmi bwandi. (Luka 18:31-33) Tala bupolofeto bumobumo pamo ne mavese a mu Bisonekwa ashintulula mobwāfikidile.

Meshiasa wādi wa . . .

▪ Kwabwa ku bibese bya ndalama 30.—ZEKADIA 11:12; MATEO 26:14-16.

▪ Kukupilwa ne kupelelwa mata.—ISAYA 50:6; MATEO 26:67; 27:26, 30.

▪ Kupopwa ku mutyi.—MITŌTO 22:16; MAKO 15:24, 25.

▪ Kupunikwa aye pa mutyi wa masusu.—MITŌTO 22:7, 8; MATEO 27:39-43.

▪ Kwipaibwa kwampikwa mukupa wandi nansha umo kutyumunwa.—MITŌTO 34:20; YOANO 19:33, 36.

Yesu wāfikidije buno bupolofeto ne bukwabo buvule. Kādipo wa kubwanya kulonga bino byonso na bukomo bwa aye mwine. Kufikidila kwa buno bupolofeto bonso kulombola amba, bine Yesu wātuminwe na Leza.b

Penepo, mwanda waka Yesu wādi ufwaninwe kususuka ne kufwa?

▪ Yesu wāfwile mwanda wa kupwa lupata lukatampe Yesu wādi uyukile lupata lutala ntanda yonso lwāshilwile mu budimi bwa Edena. Ba Adama ne Eva pa kutononwa na kipangwa kya ku mushipiditu kyātombokele, nabo bātonga kuleka kukōkela Leza. Butomboki bwa bano ba mulume ne mukaji bwādi butatana shi Leza udi na mbila ya kubikala, ne muludikilo wandi. Bubi bwabo bwālupwile kadi kipangujo kya kuyuka shi muntu ukokeja kushala na dikōkeji kudi Leza mu kitatyi kya matompo.—Ngalwilo 3:1-6; Yoba 2:1-5.

Yesu wāletele kilondololwa kya kupwididila lupata mu myanda yonso ibidi—bubikadi bwa Yehova ne bululame bwa muntu. Yesu pa kukōkela na bubwaninine kufika ne “ku lufu, . . . lwa [pa mutyi wa masusu],” wākwatakenye bubikadi bwa Leza. (Fidipai 2:8) Yesu wālombwele kadi amba muntu mubwaninine ukokeja kulama bululame bubwaninine kudi Yehova nansha ke mu matompo makomo namani.

▪ Yesu wāfwile mwanda wa kunyongolola muzo wa muntu Mupolofeto Isaya wālaile amba masusu ne lufu lwa Meshiasa wālailwe lukaleta kipwanyo kya pa bubi bwa bantu. (Isaya 53:5, 10) Yesu wādi uyukile senene uno mwanda, kadi wāitabije na mutyima umo kupāna “muya wandi ke kikūlwa kya bavule bene.” (Mateo 20:28) Lufu lwandi bu kitapwa lwāshitwidile bantu bakubulwa kubwaninina dishinda dya kupwana na Yehova ne kukūlwa ku bubi ne lufu. Lufu lwa Yesu i lwitupe mukenga wa kumona monka kyokya kyājimije ba Adama ne Eva—kyepelo kya kwikala nyeke na nyeke mu ngikadilo mibwaninine pano pa ntanda.c—Kusokwelwa 21:3, 4.

▪ Byokokeja kulonga Mu luno lunkunkwa mulongo lwa bishinte, tubabandaula binena Bible padi Yesu—kwaātambile, būmi bwandi, ne kyaāfwidile. Kuyuka buno bubinebine butala padi Yesu kukokeja kukwasha mu bivule ne kwitutalula milangwe ya bubela. Kulonga bintu mungya buno buyuki kukokeja kwituletela madyese—būmi bulumbuluke dyalelo ne bwa nyeke mu mafuku āya’ko. Bible witulombola byotufwaninwe kulonga shi tusaka kukamona ano madyese.

▪ wifunde bivule bitala padi Yesu Kidishitu ne pa mwingilo wandi mu mpango ya Yehova.—YOANO 17:3.

▪ tamija lwitabijo mudi Yesu, na kulombola mu būmi bobe amba umwitabije bu Mukūdi obe.—YOANO 3:36; BILONGWA 5:31.

Batumoni ba Yehova bakasangela kukukwasha wifunde bivule bitala padi Yesu Kidishitu, ‘Mwana wa bunka’ wa Leza, ke-pantu, kupityila kudi aye, ye kotukokeja kukatambwila kyabuntu kya “būmi bwa kulādila monka nyeke ne nyeke.”—Yoano 3:16.

[Kunshi kwa dyani]