Edisha Wāmwene Makalo a Mudilo​—Le Abe Nobe?

Mulopwe wa Shidea wādi ukimba Edisha mupolofeto wa Leza, ebiya wākamulonda ku nsakwa ya Dotani kibundi kidi pa mukuna. Mu bukata bwa bufuku, mulopwe mwine Shidea watuma tubalwe, makalo a divita ne bibumbo bya bulwi ku Dotani. Bufuku pa kukya, bibumbo byandi bya bulwi byādi kebidi kubwipi na kibundi.​—2 Bal. 6:13, 14.

Mwingidi wa Edisha pa kwimana ne kutamba panja, wamona bantu ba kwiya kukwata mupolofeto. Waela lubila’mba, “E! mfumwami, lelo tukalonga namani, a?” Edisha wamunena’mba “kokakwatwa moyo, mwanda boba badi netu batabukile bungi boba bo badi nabo.” Kupwa mupolofeto wālombela’mba: “Yehova, nakwisashila, baputule meso andi amone.” Nsekununi yendelela na kunena’mba: “Kabidi Yehova waputula meso a nsongwalume’wa; nandi wamona; ino talapo bidi, lūlu lwadi luyule tubalwe ne makalo a mudilo kujokoloka Edisha.” (2 Bal. 6:15-17) Lelo i ñeni’ka yotukokeja kuboila ku uno mwanda ne binkumenkume bikwabo bya mu būmi bwa Edisha?

Edisha wādi talala nyā mu umbikalo wa mwine Ashidia, mwanda wādi ukulupile mudi Yehova ne kwimwena bukomo bwa Leza bwa kulama bantu bwingila. Dyalelo ketukulupilepo mu bingelengele, ino tujingulwile’mba Yehova ulamanga bantu bandi bonso. Netu tujokolokelwe na tubalwe ne makalo a mudilo mu muswelo kampanda. Shi ‘tubebimone’ na meso etu a lwitabijo ne shi tukulupile nyeke mudi Leza, ‘tukekala mu makomo’ kadi tukemwena madyese a Yehova. (Mit. 4:8) Tubandaulei’ko bidi muswelo otukokeja kumwena mu myanda mikwabo yātene Edisha mu būmi.

EDISHA WASHILULA KWINGIDILA EDIYA

Difuku dimo, Edisha paādi udima budimi, mupolofeto Ediya wamufwena ne kumwela kikutu kyandi. Edisha wādi uyukile nshintulwilo ya kino kilongwa. Wāsoba masobo, wāshadika ba shandi ne inandi, kupwa webashiya waenda kukengidila Ediya. (1 Bal. 19:16, 19-21) Byādi Edisha mwiteakanye kwingidila Leza ne pa mfulo, wāikele bu kingidilwa kidi mu kuboko kwa Yehova ne kwingila mwenda mafuku bu mupolofeto pa kyaba kya Ediya.

Edisha wāingidile Ediya mu kintu kya myaka isamba. Mu kino kitatyi, Edisha ye muntu ‘wādi upungulula mema pa makasa a Ediya.’ (2 Bil. 3:11) Mu mene mafuku’a, bantu bādi na kibidiji kya kudya na makasa, pa kubulwa nkanya, mpete, nansha bingidilwa bikwabo bya kudya nabyo. Pa kupwa kudya bidibwa, mwingidi wādi utūta mfumwandi mema ku makasa. Ku ngalwilo mingilo imo ya Edisha yādi ya maboko. Inoko, wādi umwene kwikala mwingidi wa Ediya bu dyese.

Mu muswelo umo onka, bene Kidishitu bavule dyalelo bengilanga mu mingilo palapala ya kitatyi kyonso. Mu uno muswelo, lwitabijo lwabo ne mutyima wabo bibatononanga bengidije bukomo bwabo ne pa mfulo mu mwingilo wa Yehova. Mingilo imoimo ibalombanga kushiya mobo ne kukengila​—ku Betele, mu mwingilo wa lūbako, ne mingilo mikwabo​—ibwanya kumonwa na bavule bu mingilo ya makasa. Kekudipo mwine Kidishitu nansha umo ukokeja kumona ino mingilo bu yampikwa mvubu nansha kwipēlula, mwanda Yehova wiimwene na mvubu mikatampe.​—Bah. 6:10.

EDISHA WĀDI ULAMETE KU MWINGILO WANDI

Kumeso kwa Leza ‘kutekwina Ediya mūlu mu kimpumpu,’ wātumine mupolofeto atambe ku Ngilengale ende ku Betele. Ediya wānene mupwani nandi ashale, ino Edisha wālondolola amba: “Nkikakushiyepo.” Lwendo byolwādi lukidi lulampe, Ediya wāsoñanya Edisha misunsa ibidi ashale, ino aye wāpela. (2 Bal. 2:1-6) Monka mwādi mulamatyile Luta kudi Naomi, Edisha nandi wādi ulamete kudi Ediya. (Luta 1:8, 16, 17) Mwanda waka? I mwanda Edisha wādi usangedile dyese dyāmupele Leza dya kwingidila Ediya.

Edisha i mwitushile kimfwa kiyampe. Shi abetupe dyese dya mwingilo kampanda mu bulongolodi bwa Leza, tukedimona na mvubu mpata shi tuvulukile’mba twingidilanga Yehova. Kekudipo dyese ditabukile dino.​—Mit. 65:4; 84:10.

“LOMBA KYOSAKA NKULONGELE”

Kitatyi kyādi kyenda bano bana-balume babidi, Ediya wānena Edisha’mba: “Lomba kyosaka nkulongele.” Edisha wālomba kintu kya ku mushipiditu na mwālombedile’kyo Solomone myaka kunyuma. Wālomba ‘bipindi bibidi bya kyepelo kya Ediya kya mushipiditu wandi wikale kwadi.’ (1 Bal. 3:5, 9; 2 Bal. 2:9) Mu Isalela, mwana mwana-mulume umbedi wādi upebwa bya bupyani pabidi. (Kup. 21:15-17) Ebiya Edisha wālomba ekale mpyana wa Ediya wa ku mushipiditu. Kadi, Edisha wāsakile mwenda mafuku kwikala na mushipiditu wa bukankamane na wādi na Ediya, mwine wādi usumininwe “ne mukao byamwiko mwanda wa Yehova.”​—1 Bal. 19:13, 14.

Le Ediya wālondolwele namani ku kulomba kwa mwingidi wandi? Mupolofeto wānene’mba “Ubalombe kintu kikolakola, shi umone po ntekunwa kodi, nankyo kikekadila monka kodi; shi keamopo nankyo kekikekalangapopo, mhm.” (2 Bal. 2:10) Mobimwekela malondololo a Ediya ādi na buluji bubidi. Bubajinji, i enka Leza kete ye wādi wa kuyuka shi Edisha wādi wa kupebwa kyaālombele. Bwa bubidi, Shi Edisha wāpelwe’kyo, wādi ufwaninwe kusumininwa kwikala nyeke na Ediya mu ngikadilo yo-yonso.

BYĀMWENE EDISHA

Lelo Leza wāmwene namani kulomba kwa Edisha kwa bipindi bibidi bya kyepelo kya Ediya kya mushipiditu? Nsekununi inena’mba: “Byobiya kyapita enka nabya, byo bakidi benda besamba, ino talapo, kwamweka dikalo dya mudilo, ne tubalwe twa mudilo, byebakalañanya palapala; kabidi Ediya wakanda monka mūlu mu kimpumpu. Penepo kala Edisha wekimona.”a Ano o malondololo ālondolwele Leza ku kulomba kwa Edisha. Edisha wāmwene Ediya utekunwa, wātambula bipindi bibidi bya kyepelo kya Ediya kya mushipiditu, ne kwikala mpyana wa Edisha wa ku mushipiditu.​—2 Bal. 2:11-14.

Edisha wāboya kikutu kyāponene Ediya ne kuvwala’kyo. Kino kikutu kyāyukanya Edisha bu mupolofeto wa Leza. Bukamoni bukwabo bwāmwekele patōkelela paālongele kingelengele mwenda mafuku kya kukalañanya mema a Munonga wa Yodano.

Na bubine, Edisha watulumukile bininge pa kumona byālongekele kitatyi kyātekwinwe Ediya mu kimpumpu. Ne kadi, kekudipo muntu wāmwene dikalo dya mudilo ne tubalwe twa mudilo difuku ne difuku! Bino byonso byāletele bukamoni bulombola’mba, Yehova wālondolwele biyampe ku kulomba kwa Edisha. Kitatyi kilondololanga Leza milombelo yetu, ketumonangapo kimonwa kya dikalo dya divita ditēma lubimbi nansha tubalwe twa mudilo. Inoko, tukokeja kujingulula amba Leza wingidijanga bukomo bukatampe mwanda wa kulonga kiswa-mutyima kyandi. Kadi kitatyi kyotumona amba Yehova waesela kipindi kya pano panshi kya bulongolodi bwandi, na bubine ‘tumonanga’ dikalo dyandi dya momwa mūlu dingila.​—Ezek. 10:9-13.

Edisha wēmwenine bintu bivule byāmukulupije’mba Yehova udi na bukomo bukatampe. Bine, mushipiditu sandu wa Leza wākweshe mupolofeto alonge bingelengele 16​—misunsa ibidi pamo na bingelengele bivule byātelēlwe Ediya.b Edisha wāmwene tubalwe ne makalo a divita a mudilo musunsa wa bubidi mu kitatyi kya bufudile bwādi mu Dotani, kibundi kitelelwe ku ngalwilo kwa kino kishinte.

EDISHA WĀDI UKULUPILE MUDI YEHOVA

Nansha byaādi ujokolokelwe na balwana mu Dotani, Edisha wādi wikele talala nyā. Mwanda waka? Mwanda wātamije lwitabijo lukomo mudi Yehova. Netu tusakilwa lwitabijo lwa uno muswelo. Nanshi, tulombei mushipiditu sandu wa Leza mwanda wa tubwanye kulombola lwitabijo ne ngikadilo mikwabo ibadilwa mu kipa kya mushipiditu.​—Luka 11:13; Ngat. 5:22, 23.

Bintu byālongekele mu Dotani nabyo byāpele Edisha bubinga bwinebwine bwa kukulupidila mudi Yehova ne mu bibumbo byandi bya bulami byampikwa kumweka. Mupolofeto wājingulwile’mba, Leza wātumine bibumbo bya bamwikeulu kujokoloka kibundi ne babulwi bakyo. Leza wāpandije Edisha mu kingelengele ne mwingidi wandi na kupa balwana bupofu. (2 Bal. 6:17-23) Mu kino kitatyi kikomo pamo’nka na mu ngikadilo mikwabo, Edisha wālombwele lwitabijo ne kutūla kikulupiji kyandi kyonso mudi Yehova.

Pamo bwa Edisha, tukulupilei mudi Yehova Leza. (Nk. 3:5, 6) Shi tulonge namino, “Leza [uketukwatyilwa] lusa ne kwitwesela dyese.” (Mit. 67:1) Na bubine, ketujokolokelwepo na makalo a mudilo ne tubalwe tumweka na meso. Inoko, Yehova uketukinga byotudi mu bu bana na bana bwetu bwa ntanda yonso kitatyi kikafika “kyamalwa kibūke.” (Mat. 24:21; Kus. 7:9, 14) Kushilwila’nka pano, tuvulukei nyeke amba “Leza i mpakala yetu.”​—Mit. 62:8.

[Kunshi kwa dyani]

[Kifwatulo pa paje 28]

[Kapango pa paje 30]

KUBINGA KUMOKUMO KWA PANOPANO KWA MU BISAMBO

243 Misunsa ya panopano yabingile Batumoni ba Yehova kujokoloka ntanda yonso ku kidye kikatampe

France​—Waalwije Midiyo 8,2 ya Madolala

Buvule (bwa lupeto) lwajokejibwe Batumoni ba Yehova mu 11 Kweji 12, 2012, na umbikalo wa Franse pa kupwa kwa myaka 15 ya bisambo

Ngidiki​—Kitango kya Leta

Kitango kya Leta kyajingulwile mu mafuku 2 Kweji 11, 2012 amba Batumoni ba Yehova, kipwilo kya bwine Kidishitu kiyukene ntanda yonso, badi na lupusa lwa kūbaka mobo a kutōtela’mo

20 Misunsa itambwilwe bushindañani ku Kidye kya Bulaya Kitala Byepelo bya Bantu tamba mu Kweji 4, 2000

Korea wa Kunshi: O.N.U. Komite Utala Byepelo bya Bantu

25 Kweji 10, 2012- Korea wa Kunshi wanenwe kufuta bantu 388 bapelele ne mutyima tō kutwela busola mwadi ne Batumoni ba Yehova amande ya lupeto lufwaninwe mwanda wa kutyumuna kobatyumwine byepelo byabo