Bavule Bakapanda Pakafika Mfulo​—Nobe Ukokeja Kupanda

Bible witulombola amba mfulo ikaleta bonakani: “Kukekala kyamalwa kikatampe kekyaikele’ko kashā tamba ku ngalwilo ya ino ntanda kufika ne pano, aa . . . Shi oa mafuku keaipipijibwepo, longa kekwadipo kwa kupanda ngitu nansha imo.” (Mateo 24:21, 22) Inoko Leza i mwitulaye amba bantu bavule bakapanda: “Ntanda ipitanga . . . , inoko yewa ulonga kiswa-mutyima kya Leza udi’ko nyeke.”​—1 Yoano 2:17.

Shi usaka kupanda pakapita ino ntanda ne ‘kwikala’ko nyeke,’ le i bika byofwaninwe kulonga? Le ufwaninwe kushilula kwibīkila bintu nansha kwiteakanya ku ngitu mu muswelo kampanda? Mhm. Bible witunena ukoma kutangidija kumeso bintu bikwabo bya kamweno. Tutanga amba: “Bino bintu byonso’bi byobisa kusunguluka namino, talai shi mufwaninwe kwikala bantu ba muswelo’ka mu bilongwa bijila bya mwikadilo ne mingilo ya bwine Leza, pomutengela ne kulama nyeke mu ñeni kitatyi kya kwikala’po kwa difuku dya Yehova.” (2 Petelo 3:10-12) Myanda idi kūlu ne kunshi ilombola amba, mu “bino bintu byonso” bya kusungululwa mubadilwa maludiki a ino ntanda myoneke ne boba bonso batonga buno buludiki pa kyaba kya kutonga bwa Leza. Bine, shi twibikile bintu bilumbuluke bya ku ngitu, kebiketupandijapo ku buno bonakani.

Na bubine, pa kusaka amba tupande bitulomba kwipāna kudi Yehova Leza ne kwifunda kwikala na mwiendelejo ne bilongwa bimusangaja. (Zefenia 2:3) Pa kyaba kya kulonda kibumbo dyalelo ne kuvulaminwa biyukeno bipotoloke bilombola amba tudi mu kityi kya mvubu, tufwaninwe “kulama nyeke mu ñeni kitatyi kya kwikala’po kwa difuku dya Yehova.” Batumoni ba Yehova babwanya kukulombola mu Bible muswelo obwanya kupanda mu difuku dīya’di.