Shi Ubabela Misongo Mikatampe

“Ponayukile amba ngidi na dyaya dya ku mayumba ne mu muongo, nalangile amba nsa kufwa. Ami pa kutamba kwa dokitele najokela ku njibo, nanena mu mutyima’mba, ‘eyo,nkyadipo nebilanga, ino mfwaninwe kukimba muswelo wa kwibyūminina.’”—Linda, wa myaka 71.

“Nasusukile na misongo ya mijilo ya ku bongolo ku mutamba wa lunkuso. Difuku dimo, navutakanibwa ñeni na misanshi mikatampe. Kitatyi kivule nadi nemona bu ngidi bunka, kenanga ne ya kwiipaya.”—Elise, wa myaka 49.

Mwana-mulume umo ubela ushikete mu kakinga wenda na bantu basenswe

SHI ke bakukwate abe nansha muntu osenswe misongo ya lufu, uyukile muvutakenanga ñeni. Kutentekela pa misongo, ubwanya kadi ne kwikonda na byobya bilupuka’ko. Ubwanya kwikala na moyo ne kuzumbija mutyima bininge pa kuketana na bamuñanga, kukomenwa kutana bundapi nansha lupeto lwa kufuta, nansha bulobo bwa malawa. Malangalanga ne misongo mikatampe bibwanya kukulēmenena.

Le i kwepi kokakimba bukwashi? Bantu bavule basengelwe bininge na kulomba kudi Leza ne kutanga mavese asenga adi mu Bible. Bukwashi bukwabo bubwanya kutamba ku kisaka ne ku balunda bakusenswe kadi bakukwatakenye.

MWALONGĒLE BANTU BAMO

Robert wa myaka 58 uleta madingi amba: “Ikala na lwitabijo mudi Leza powikonda na misongo, nandi ukakukwasha ūminine. Lombela kudi Yehova. Mulombole mowiivwanina. Mulombe mushipiditu ujila. Munene akupe bukomo bwa kukankamika kisaka ne kukukwasha ūminine misongo yobe na bulēmantu.

“Shi kisaka kikukwasha mu ñeni kadi kikele’ko pa mwanda obe i biyampe. Difuku ne difuku badi bangita ku telefone kudi muntu umo nansha babidi bangipangula’mba ‘ubabūka namani?’ Balunda ba mu bifuko palapala badi bankankamika. Bine baunkweshe neivwane biyampe, kadi ndeke kuzoza.”

Shi wi mukapempule mulunda nobe ubela, tá mutyima ku bintu byanenene Linda amba: “Yewa ubela usakanga kwikala mukomo na mwawadi wikadile, kadi kasakengapo kwisambila nyeke pa misongo. Nanshi wisambile pa myanda yomwisambanga nandi nyeke.”

Na bukwashi butamba kudi Leza, busengi bwa mu Bisonekwa, ne bukwashi bwa ba mu kisaka ne balunda betusenswe, tubwanya kukulupila’mba būmi budi na mvubu nansha ke potwikonda na misongo mikatampe pene.

Bisonekwa Bibwanya Kukukwasha

Kulupila mudi Leza.

“Naipangwile Yehova, nandi wanondolola. Waunkūla ku moyo wami onso. Uno muntu mupēlulwe waityile, Yehova nandi waivwana.”—Ñimbo ya Mitōto 34:4, 6.

Linda, utelelwe kala unena’mba: “Nkyalombele nansha dimo amba, ‘Mbelule.’ Ino nombelanga nyeke amba, ‘Nkwashe’ko ngikale mukomo, kadi nkwashe ñūminine misongo yami.’”

Mwena bukomo ku Kinenwa kya Leza.

“I kutupu mwikadi ukanena’mba: ‘Nabela.’”—Isaya 33:24.

Komeja lukulupilo lobe na kulangulukila pa milao ya Leza ya mu mafuku a kumeso.

Nena kisaka ne balunda bakukwashe.

“Mulunda wa bine ulombolanga buswe kitatyi kyonso kadi i mwanenu mubutulwe mwanda wa bitatyi bya tusua.”—Nkindi 17:17.

Elise, utelelwe kala uleta madingi amba: “Leka kwitolwela. Leka balunda bakukwashe. Kubwanya kwikala kitatyi kyowimona bu udi bunka ne kyokulangapo amba Leza ukwivwananga, ino nansha nankyo leka kwitolwela.”