Kupwila Kudi na Kamweno ku Bankasampe

¹ Nsongwakaji umo wanene amba: “Monangila, bankasampe bo badi na makambakano mavule mu būmi bwabo kupita bantu bonso. Twi bajokolokwe na bantu balonga busekese, batoma mfwanka ne dyamba, ne batoma malwa.” Lelo nobe ye momwenanga? Shi ye momwenanga, lelo i bika byolanga bibwanya kukupa bukomo bwa kunekenya lupusa lubi lwa bantu betujokolokele? Bikusakila wikale na lwitabijo, lwitabijo lukomo, lukwatañene na mashinda a Yehova, ke-pantu “kwakubulwa kwitabija kekyendelemopo kumutōkeja ku mutyima.” (Bah. 11:⁠6) Kutanwa ku kupwila kwa pa kipwilo kukakukwasha uningishe kikulupiji kyobe kya bwine Kidishitu ne kusumininwa kwepuka bintu bibi.

² Kupwila Kubwanya Kukuletela Byabuyabuya Bivule: I bika bineñenyanga bidibwa byomudyanga na balunda nobe? Mwene i bisombelwa byobasombele’mo ne nsangaji ya kipwano kyenu na bomushikete nabo, mwidīla kantalela? Bine, ne kupwila kwetu nako mo monka, kuletanga nsangaji, inoko mu bintu bya ku mushipiditu.

³ Bintu bibandaulwanga ku kupwila byūbakanga, kushilwila ku myanda itenga bintu byotulwanga nabyo bukile bukya, kutūla ne ku kufunda bupolofeto bwa mu Bible buleta nsangaji. Buno bufundiji bwa kamweno umbūmi bukufundijanga mwa kwikadila na būmi bulumbuluke ne mwa kulwila na bijika byotana mu dishinda dyobe. Balunda bomwitana nabo ku kupwila bo balunda balumbuluke kupita, kekudipo kungi kobwanya kwibatana, ne maloa adi’ko nao monka na monka, i kunengele senene shē. (Mit. 133:⁠1) Kino kyo kyanene ne nsongwakaji umo amba: “Ñendanga ku masomo afundwa kashinde-dyuba, njoka’ko mupungile. Ino kupwila kudi pamo bwa mu lumenya lubishi ludi mu ntanda mutuputupu mombwanya kwitūkija, biyampe shē, mwa kukafundila kadi kesha.” Mukwabo nandi amba: “Pano nayuka amba nanshi kupwana bininge na bakwetu baswele Yehova ko kunkwashanga ngikale nyeke kubwipi nandi.”

⁴ Shi wiandikije ku Masomo a Mwingilo wa Kiteokratike, usa kwifunda kukumankenya pamo myanda idi mu Bible, kwiilongolola ke kishinte mwa kukesambila’yo ku meso a bemvwaniki ku Njibo ya Bulopwe. Langa’po bidi kamweno kadi mu kufundijibwa muswelo wa kufundija na bwino myanda mivule ya mu bubinebine ipandijija bantu būmi idi mu Kinenwa kya Leza! Le i kwepi kubwanya bankasampe kutana bufundiji bwa mvubu namino?

⁵ Mwa Kumwena Kamweno Mpata mu Kupwila: Shi tusaka kumwena byabuyabuya bivule mu kupwila, kudi bintu bisatu bya mvubu mikatampe byotufwaninwe kulonga: kuteakanya, kulondolola, ne kwingidija.

⁶ Kuteakanya: Witūdile’ko kitatyi kya kuteakanya kupwila kwa kitatyi ne kitatyi. Kokaleka twaji twa ku masomo, nansha kaji ka kitatyi kampanda, nansha kwipwija mukose kukujimijije kitatyi kyowadi wa kupituluka mu myanda ikesambilwa’po ku kupwila ne kupwila. Kuteakanya kuletanga kibidiji kilumbuluke. Nakampata, endelela na mpangiko ya butangi bwa Bible bwa ku yenga ne yenga bwa ku Masomo a Mwingilo wa Kiteokratike. Bukulomba kitatyi kityetye’tu kya kutanga difuku ne difuku ne kulanguluka pa mashapita atelelwe. Tūla’ko kitatyi kya kuteakanya Kifundwa kya Kitabo kya pa Kipwilo ne Kiteba kya Mulami. Bamo bateakanyanga difuku dimo nansha abidi kumeso kwa kwine kupwila’kwa. Shi bibwanika, ubwanya kulonga muswelo umo onka na bipindi bidi ku mpangiko ya Kupwila kwa Mingilo kwa yenga ne yenga.

⁷ Londolola na Balondolola mu Kupwila: Bible witulombola amba Yesu, paāfikīle pa myaka 12, bāmutene mu tempelo, umvwana, wipangula bipangujo, nadi ulondolola ne kulondolola. (Luka 2:​46, 47) Mu muneneno mukwabo, wādi mutwele nabo mu mīsambo byabinebine. Kumwena biyampe bivule mu kupwila i kulonga buninge bwa kunena’ko na banena.​—⁠Nk. 15:⁠23.

⁸ Bikusakila kwimanija milangwe pa bintu bifundijibwa ku kupwila. Kyaba kimo, kumvwana kishinte kwikalanga kukola kupita ne kunena’kyo. Mwanda waka tunena namino? Mwanda milangwe yobe ikokeja kupuakana, aye muntu koku wisamba. Kuno kupuakanya milangwe ubwanya kwikupwa namani? Na kusoneka. Soneka mu kīpi myanda ya mvubu yobwanya kunyemena’ko mwenda mafuku. Kusoneka kukakukwasha wimanije milangwe yobe pa mpangiko. Kimba ne bisonekwa, ulonde ne mwibitangila muneni.

⁹ Kadi wikitūle bu kyobe kitungo kya kuleta kilondololwa ku kipangujo ne kipangujo mu mīsambo ya ku kupwila. Shi wikale na kibidiji kya kubadikila kulanguluka pa bintu byosaka kukanena, bine ukamwena’mo byabuyabuya bivule kutabuka. Nkindi 15:28 unena’mba: “Mutyima wa moloke ulanga pa kulondolola.”

¹⁰ Ingidija Bintu Byowifunda: Ditabula dya mfulo i kubandaula shi bintu byowifunda ‘bingilanga modi.’ (1 Tes. 2:13) Shi wingidija bintu bilumbuluke byomwifundanga ku kupwila ne kupwila, ukekala pabwipi mpata na Yehova Leza. Ukashilula kumumona bu udi’ko binebine, ne kadi ukemwena nsangaji mikatampe ne kuloelelwa ‘ponangila mu bubinebine’ ne kwibulonga ke bobe.​—⁠3 Yoa. 4.

¹¹ Banwe batutu ne bakaka bankasampe, shi mubapu kuteakanya kupwila, londololai’ko, mwingidije ne byomwifunda, bine mukaloelelwa mu kupwila. Ne kadi, mukamwena’mo byabuyabuya bya ntanda ne miseke. I kyabine, kyaba kyonso kyomukendelela na kwikala babine kudi Yehova, Shenu wa mūlu, lwitabijo lwenu lukaningila’ko.​—⁠Mit. 145:⁠18.