Ubulwe’po Kukwatañanya Mpangiko Yobe?

 1. Mwanda waka tufwaninwe kukwatañanya mpangiko yetu ya busapudi?

¹ Batwe Bene Kidishitu twi betabe ku lwito lwa kwikala “biluwe bya bantu.” (Mat. 4:19) Pamo’nka bwa kiluwe, tukapoya biyampe mu buno buluwe bwa bantu shi tudi na mpangiko ya kusapula pa kitatyi kitanwa bantu bavule ku mobo. Mu matanda mavule, mu myeji īya’ko’i, mwinya ukekalanga mulampe kupita bufuku. Penepa nanshi mu byolwa bantu bavule bakekala ku mobo abo. Pavule ñeni ikekala ke mitūke ne bakekala na mutyima wa kutambula beni. Penepa le ubulwe’po kukwatañanya mpangiko yobe mu bino bitatyi?​—1 Kod. 9:23.

 2. I miswelo’ka imoimo yotukokeja kufikila bantu na myanda miyampe?

² Busapudi bwa Kyolwa: Kwiteakanya kala mwa kukasapwila mansaa a kyolwa kuketukwasha twitane na bantu bavule ba kusapwila myanda miyampe. (Nk. 21:5) Bankasampe bakokeja kusapula shi abatambe ku masomo. Bakwabo nabo bakokeja kusapula shi abatambe ku kaji. Bisumpi bimo bya kifundwa kya kitabo nabyo bikokeja kusapula nsaa umo kumeso kwa kifundwa kyabo kya kitabo kya yenga ne yenga.

 3. I miswelo’ka imoimo yokokeja kusapula dyuba ke dipūluke nansha mu kyolwa bininge mu kibundi kyenu?

³ Kusapula ku njibo ne njibo mu kyolwa bininge kukokeja kulupula bipa biyampe bya kwisamba na bantu kebavudilepo kutanwa ku mobo abo. Mu bibundi bivule, busapudi bwa mu bipito ne bwa miswelo mikwabo nabo bukokeja kulongwa mu kyolwa. Kadi bavule basangelanga kulonga kujokela’mo kupya nansha kushilula bifundwa bya Bible mu kyolwa.

 4. Mwanda waka i biyampe kusansanya ne kulangila bantu potusapula mu kyolwa?

⁴ Kusansanya Kudi na Mvubu: Kwikala na ñeni mijalale i kuyampe shi tusapula mu kyolwa. Pavule pene, shi mu meso kemulambakana i kipite buya kwimika busapudi, pa kyaba kya kukakokola ku bibelo bya bantu abo kebasake kulāla. (Fid. 4:5) Shi ukokola ku kibelo, imana pantu pobabwanya kukumona, kadi witele bakuyuke. Peja kulombola kine kyoidile. Shi ubafika pa kitatyi kibi, kimfwa kitatyi kidya kisaka bidibwa, nabya joka ne kulaya kitatyi kikwabo. Langila bakwenu kitatyi kyonso.​—Mat. 7:12.

 5. Le tukepuka namani byaka bikokeja kulupuka potusapula?

⁵ Kadi i biyampe kudyumuka ku byaka bikokeja kulupuka. Shi usapula kyolwa kapita i kani, nabya i biyampe kwenda bubidi nansha buvule. Enda mu bipito mudi kitōkeji kadi kokolwa kwitolwela kufula kwa bunka. Sapula enka mu bifuko bya mutyima-ntenke. Tyina mu bifuko mudi mfindi, kemo byaka.​—Nk. 22:3.

 6. I byabuyabuya’ka bikwabo bidi mu busapudi bwa kyolwa?

⁶ Busapudi bwa kyolwa bwitupanga mikenga ya kutana bantu bavule bakusapwila myanda miyampe. Kadi bubwanya kwitukwasha twingile pamo na bapania bakwashi ne na bapania ba lonso. (Loma 1:12) Le ubulwe’po nobe kukwatañanya mpangiko yobe mwa kwingidila uno mwingilo wa mu kyolwa?