Kwasha Bampofu Nabo Bayuke Yehova

 1. Lelo Yesu wākwatyilwe bampofu lusa namani?

¹ Kubashala mafuku matyetye kumeso kwa lufu lwa Yesu. Aye pa kutamba mu kibundi kya Yediko, bampofu babidi bāela lubila amba: “A Mfumwetu, witufwile’ko lusa!” Nansha Yesu bya wādi mulemenenwe na matompo ādi amutengele, wāimana, webeta ne kwibondapa. (Mat. 20:29-34) Le netu tukokeja kukwatyilwa bampofu lusa namani mu kimfwa kya Yesu?

 2. I muswelo’ka otukokeja kusapwila bampofu botutana pa bantu?

² Wibakwashe: Shi ubatana mpofu, padi i pa bantu bavule, mwimune ne kwitela ne kutompa kumukwasha. Bavule byobasulanga bampofu, mpofu ukokeja padi kwikaka bidi. Inoko, ngikadila yobe ya bulunda ne kumuta mutyima ikokeja kumukokela kodi. Bupofu i bwishile, kuyuka kino kukakukwasha uyuke mwa kumukwashisha. Shi ubapu kumukwasha, ukokeja padi ne kumuyukija amba ukwashanga bantu na kwifunda nabo Bible. Munene mutange nandi Kisonekwa kimo, kimfwa Mitōto 146:8 nansha Isaya 35:5. Shi uno muntu uyukile kutanga Bilembwa bya Bampofu, munene shi usangela kutambula dibuku dya bampofu dya kumukwasha ayuke myanda mivule ya mu Bible. Ukokeja ne kumukwasha mwa kutanina mawi makwate kala a mabuku adi pa diteba dya jw.org. Shi mpofu udi na kompyuta wa kutanga nandi bilembwa ku diwi, kakabulwepo kusangela kusela bishinte nansha mabuku a pa jw.org a RTF (Rich Text Format).—Tala kapango kanena’mba: “Mwa Kukwashisha Mpofu . . .”

 3. I muswelo’ka wa kukimba bampofu mu mwaba wetu?

³ Kimba Bampofu: Ke divulepo dyotutananga bampofu ku njibo ne njibo, mwanda bavule bevwananga bumvu bwa kwisamba na bantu bokebayukile baya kwabo. O mwanda, bilombanga kwikankila’ko pa ‘kukimba’ bampofu ne kwibasapwila. (Mat. 10:11) Lelo kudi muntu omwingilanga nandi nansha omufundanga nandi mpofu? Kimba muswelo wa kwisamba nandi. Shi mu wenu mwaba mudi masomo a bampofu, ukokeja kwibaletela’ko mabuku a bilembwa bya bampofu a kubika mu kibiko kya masomo. Lelo uyukile kisaka kampanda mudi mpofu? Le mu wenu mwaba mudi bitango bikwashanga bampofu nansha byubakilanga bampofu kwa kushikata? Lombola wa mu kyabo kisaka, yewa utundaila baya ku njibo ya bampofu nansha mwimaniji wabo amba Batumoni ba Yehova basangelanga kukwasha bampofu ne kwibaletela mabuku a bilembwa bya bampofu nansha mawi makwate kala. Mulombole mulao wa mu Bible ulombola amba Leza usa kutalula panopano ponka bupofu lonso. Ukokeja ne kumulombola video ya ku jw.org unena amba, “Kwampikwa ino Video, Nadi wa Kujimina” (Falanse), isambila pa myanda ya mpofu umo wamwenine mu Bible wa bampofu. Kitatyi kyolombola kine kyoidile, kikakushitwila dishinda dya mwa kwisambila na bampofu.

 4. Le i ñeni’ka yotuboila ku byalongele Janet?

⁴ Kaka umo mpofu, Janet, wakapempwile njibo imo mushikatanga bampofu. Washilula kwisamba na nsongwakaji umo. Janet wamulombola amba, “Yesu waundapile bampofu mwanda wa kulombola byobya byakalongela bampofu bonso.” Wabandaula nandi Kusokwelwa 21:3, 4, kupwa Janet washintulula mukafikidila uno mulao mu Bulopwe bwa Leza. Nsongwakaji’wa wakunkamana nyā, ebiya wanena’mba: “Kashā nkyaivwene mpofu wisamba uno muswelo. Bantu bavule bamona banenanga amba bantu bekalanga bampofu pa mwanda wa bintu byobalongele abo bene nansha bilongele bankambo babo.” Janet watumina uno mwana-mukaji mu kompyuta kya kumutwala ku dibuku Bifundija Bible, panenwa pano ke befundanga nandi Bible misunsa ibidi ku yenga.

 5. Nansha byoketubwanyapo kubelula bampofu pamo bwa Yesu, ino i dyese’ka dyotukekala nadyo shi twibate mutyima?

⁵ Na bubine, ketubwanyapo kubelula bampofu pamo bwa Yesu, inoko tukokeja kukwasha boba basabibwe meso a mutyima na leza wa ino ngikadilo ya bintu, kubadila’mo ne bampofu bene, nabo bevwanije bubinebine bwa Kinenwa kya Leza. (2 Ko. 4:4) Yesu wābelwile bantu babidi kubwipi na Yediko, mwanda wāikele “kwibakwatyilwa lusa.” (Mat. 20:34) Shi netu tute bampofu mutyima uno muswelo, nabya tukekala na dyese dya kwibakwasha bayuke Yehova, mwine ukafudija bupofu lonso.