Yehova Tata Wetu, Witusenswe Bininge

 1. Le i bika byādi bilombwa pa kukesamba na mulopwe wa Peleshia?

LANGA’PO bidi shi wadi mu Peleshia pano ke padi myaka 2 500. Usaka kulombola mulopwe wa ntanda mwanda kampanda, ebiya ubaenda ku Shushane, kibundi kya kibikēlo. Kumeso kwa kukemona na mbikavu, bikulomba bidi kupebwa lupusa lwandi. Shi kupelwepo lupusa, ubwanya kwipaibwa!​—Ese. 4:11.

 2. Le Yehova usakanga twisambe nandi namani?

² Bine, tufwijanga’ko mwanda Yehova i mwishile na uno mulopwe wa Peleshia! Nansha Yehova byadi na lupusa lukatampe kupita muntu ye-yense ubikele, ino tubwanya kwisamba nandi kyaba kyo-kyonso. Usakanga twisambe nandi na bwanapabo. Kimfwa, nansha Yehova byadi na bino bitenta bikatampe pamo bwa Umpangi Mukatampe, Mwinē Bukomo Bonso, Mfumu Mwinē Lupusa Lonso, usakanga tumwite bu “Tata” potwisamba nandi. (Mat. 6:9) Bisangaja’po kashā pa kuyuka’mba Yehova usakanga tumumone bu mulunda otubwanya kufwena!

 3. Mwanda waka twita Yehova bu “Tata,” ne i bika byotusa kwisambila’po mu kino kishinte?

³ Tudi na bubinga bwa kwityila Yehova bu “Tata,” mwanda aye ye Nsulo ya būmi bwetu. (Ñim. 36:9) Byadi Tata wetu, tufwaninwe kumukōkela. Shi tulonga byaetusakila, tukeselwa madyese makatampe. (Bah. 12:9) Mu ano madyese mubadilwa būmi bwa nyeke, ekale bwa momwa mūlu nansha bwa pano pa ntanda. Kadi tumwenanga’mo tamba’nka pano. Kino kishinte kisa kwisambila pa muswelo ulonga Yehova bintu pamo bwa Tata wa buswe dyalelo, ne pa kine kyotubwanya kukulupidila’mba kaketwelapo nansha dimo mu mafuku āya kumeso. Dibajinji, twisambilei bidi pa kine kyotubwanya kukulupidila’mba Tata wetu wa mūlu witusenswe bininge kadi witutele mutyima.

 4. Mwanda waka bantu bamo bakomenwanga kumona Yehova bu Tata wabo?

⁴ Le ukomenwanga kumona Leza bu Tata obe? Bantu bamo babwanya kwimona bu batyetyetyetye ne bu bampikwa mvubu pobedingakanya na Yehova. Kebetabijepo amba Leza Mwinē Bukomo Bonso wibatele mutyima umo ne umo. Inoko, Tata wetu wa buswe kasakengapo twimone uno muswelo. I mwitupe būmi kadi usakanga tupwane nandi. Mutumibwa Polo pa kupwa kwisambila pa buno bubine, wāshintulwidile bantu baādi wisamba nabo mu Atene amba, Yehova kadipo “kulampe na batwe bonso.” (Bil. 17:24-29) Leza usaka umo ne umo mu bukata mwetu esambe nandi na mwisambilanga mwana na mbutwile wandi wa buswe kadi umutele mutyima.

 5. Le i ñeni’ka yotuboila ku bintu byemwenine kaka umo mwine Kidishitu?

⁵ Bantu bakwabo babwanya kukomenwa kumona Yehova bu Tata wabo pa mwanda wa shabo wibabutwile kebasenswepo bininge nansha kebaswenswepo nansha dimo. Tulangulukilei bidi pa bintu byanenene kaka umo mwine Kidishitu. Unena’mba, “tata wadi mubi bininge. Kadi ponashilwile kwifunda Bible, nadi nkomenwa kwisamba na Tata wa mūlu. Ino ami pa kuyuka Yehova, nashinta bininge.” Le nobe wiivwananga uno muswelo? Shi i amo, nobe kulupila’mba ubwanya kumona Yehova bu Tata muyampe.

 6. Mungya Mateo 11:27, le i muswelo’ka umo witukweshe Yehova tumumone bu Tata wetu wa buswe?

⁶ Muswelo umo witukweshe Yehova tumumone bu Tata wetu wa buswe i kupityila ku binenwa ne bilongwa bya Yesu bilembelwe mu Bible. (Tanga Mateo 11:27.) Yesu wāmwekeje ngikadila ya Shandi mu muswelo mubwaninine, o mwanda wānenene amba: “Yewa ense umona ami wamone ne Tata mwine.” (Yoa. 14:9) Divule dine Yesu wādi utela Yehova bu Tata. Mu Maevanjile’tu aná, Yesu wāityile Yehova bu “Tata” kubwipi kwa misunsa 165. Mwanda waka Yesu wēsambīle bininge padi Yehova? I mwanda wa bantu bakulupile amba Yehova i Tata wa buswe.​—Yoa. 17:25, 26.

 7. Le i ñeni’ka yotuboila ku muswelo wādi wikele Yehova na wandi Mwana?

⁷ Tutalei ñeni yotuboila ku muswelo wādi wikele Yehova na Yesu wandi Mwana. Yehova wādi nyeke wivwana milombelo ya Yesu. Kādipo’tu wivwana milombelo ya Yesu bitupu, ino wādi ulondolola’yo. (Yoa. 11:41, 42) Nansha shi Yesu wātenwe na matompo’ka, aye wādi umwene amba Shandi umusenswe kadi umukwatakenye.​—Luka 22:42, 43.

 8. Le Yehova wāvuije bisakibwa’ka bya Yesu?

⁸ Yesu wādi uyukile amba Shandi ye Nsulo kadi Mukwatakani wa būmi bwandi paānenene amba: “Naikala mūmi pa mwanda wa Tata.” (Yoa. 6:57) Yesu wādi ukulupile Shandi bya binebine, kadi Yehova nandi wāvuije bisakibwa byandi bya ku ngitu. Kya mvubu kutabuka i kino, Yehova wāvuije bisakibwa bya Yesu bya ku mushipiditu.​—Mat. 4:4.

 9. Le Yehova wālombwele namani amba usenswe Yesu ne kumuta mutyima?

⁹ Byadi Tata wa buswe, Yehova wākulupije Yesu ayuke amba Shandi umukwatakanyanga. (Mat. 26:53; Yoa. 8:16) Nansha Yehova byākakingilepo Yesu ku makambakano onso, ino aye wāmukweshe ōminine matompo. Yesu wādi ukulupile amba makambakono onso awādi wikonda nao i a lupito. (Bah. 12:2) Yehova wālombwele amba utele Yesu mutyima na kumuteja, kumuvuijija bisakibwa, kumufundija, ne kumukwatakanya. (Yoa. 5:20; 8:28) Pano tutalei bintu bilombola’mba Tata wetu wa mūlu i mwitute netu mutyima uno muswelo.

10. Mungya Ñimbo ya Mitōto 66:19, 20, le Yehova ulombolanga namani amba witusenswe?

¹⁰ Yehova wivwananga milombelo yetu. (Tanga Ñimbo ya Mitōto 66:19, 20.) Aye ketutūdīlepo mikalo kitatyi kyotumulomba; witusoñanya tumulombe kyaba kyonso. (1 Ts. 5:17) Tubwanya kulomba Leza wetu bya bulēme kitatyi kyo-kyonso, nansha shi tudi kwepi. Kavudilwepo bya kulonga pa kwitwivwana; aye wivwananga nyeke milombelo yetu. Shi tubayuka’mba Yehova wivwananga milombelo yetu, tukamufwena. Mulembi wa mitōto wānenene amba: “Amiwa nsenswe Yehova mwanda wivwananga diwi dyami.”​—Ñim. 116:1.

11. Le Yehova ulondololanga namani milombelo yetu?

¹¹ Tata wetu wivwananga milombelo yetu ne kwiilondolola. Mutumibwa Yoano witukulupija’mba: “Shi tumulombe kintu kyonso, shi kika shi kika, mwendele kiswa-mutyima kyandi [kya Leza], witwivwananga.” (1 Yo. 5:14, 15) Na bubine, Yehova kabwanyapo padi kulondolola milombelo yetu na motusakila. Aye uyukile bintu biyampe byotusakilwa, o mwanda kyaba kimo upelanga kulondolola, pakwabo kadi usakanga twilaije’ko bidi.​—2 Ko. 12:7-9.

12-13. Le Tata wetu wa mūlu uvuijanga bisakibwa byetu mu miswelo’ka?

¹² Yehova uvuijanga bisakibwa byetu. Uloñanga byobya byasakila bambutwile bonso kulonga. (1 Tm. 5:8) Uvuijijanga bandi bana bisakibwa bya ku ngitu. Kasakengapo tuzumbije mutyima pa byakudya, byakuvwala, ne mwa kushikata. (Mat. 6:32, 33; 7:11) Byadi mbutwile wa buswe, Yehova i mukwate’ko mpangilo ya kwitupa byonso byotusakilwa mu mafuku a kumeso.

¹³ Kintu kya mvubu kutabuka i kino, Yehova uvuijanga bisakibwa byetu bya ku mushipiditu. Kupityila ku Kinenwa kyandi, i musokole bubine butala pādi, pa mpango yandi, pa kamweno kadi na būmi, ne pa bintu bya mu mafuku a kumeso. Wetutele mutyima kitatyi kyotwashilwile kwifunda bubine, na kwingidija bambutwile betu nansha muntu mukwabo mwanda wa kwitukwasha tumuyuke. Kadi tukyendelela kukwashibwa biyampe mu kipwilo na bakulumpe ba buswe ne na batutu ne bakaka batame ku mushipiditu. Ne kadi, Yehova witufundijanga kupityila ku kupwila, kwine kotufundanga pamo na batutu ne bakaka. Mu ino miswelo ne mikwabo, Yehova wilombolanga bu tata witutele mutyima batwe bonso.​—Ñim. 32:8.

14. Mwanda waka Yehova witufundijanga, ne witufundijanga namani?

¹⁴ Yehova witufundijanga. Batwe twi beshile na Yesu, mwanda twi bampikwa kubwaninina. O mwanda pa kusaka kwitufundija, Tata wetu wa buswe witulemununanga ponso potusakilwa kulemununwa. Kinenwa kyandi kituvuluja’mba: “Boba bobasenswe kudi Yehova, wibalemununanga.” (Bah. 12:6, 7) Yehova witulemununanga mu miswelo mivule. Kimfwa, tubwanya kushinta kupityila ku byobya byotutanga mu Kinenwa kyandi nansha ku bintu byotwivwana ku kupwila kwetu. Nansha padi na bukwashi bwitukwasha bakulumpe. Nansha shi bulemununi bwikale bwa muswelo’ka, Yehova witulemununanga nyeke na buswe.​—Yel. 30:11.

15. Le Yehova witukiñanga namani?

¹⁵ Yehova witukwatakanyanga mu matompo. Monka mukwatakenyanga mbutwile wa buswe bandi bana mu bitatyi bya makambakano, Tata wetu wa mūlu nandi witukwatakanyanga mu matompo. Wingidijanga mushipiditu wandi ujila mwanda wa kwitukinga ku bintu bibwanya kwitona ku mushipiditu. (Luka 11:13) Kadi Yehova witukiñanga kitatyi kyotutyumukilwe mutyima. Kimfwa, i mwitupe lukulupilo lwa kutendelwa. Luno lukulupilo lwa mu mafuku a kumeso lwitukwashanga tūminine bikoleja. Langulukila’po pa uno mwanda: Nansha shi bintu bibi bibetufikila, Tata wetu wa buswe ukapwija bibi byonso bitususula. Nansha shi tubatanwa na makambakano’ka, ao onso i a lupito, ino madyese etwesela Yehova i a nyeke ne nyeke.​—2 Ko. 4:16-18.

16. Le Adama pa kutombokela Shandi wa buswe, i bika byālongekele?

¹⁶ Tumwene bukamoni bulombola’mba Yehova witusenswe kupityila ku muswelo waāpwijije myanda yālupukile dibajinji mu kisaka kyandi kya pano panshi. Adama paātombokēle Shandi wa mūlu, wājimije kifuko kyandi mu kisaka kya nsangaji kya Yehova, kifuko kyandi ne kya lutundu lwandi lwine. (Loma 5:12; 7:14) Inoko, Yehova wālongele’po kintu mwanda wa kukwasha lutundu lwa Adama.

17. Adama pa kupwa kutomboka, le Yehova wālongele bika ponka na ponka?

¹⁷ Yehova wāpele Adama mfuto, inoko kālekelepo lutundu lwa Adama pampikwa lukulupilo. Wālaile ponka na ponka’mba bantu ba kikōkeji bakabadilwa monka mu kisaka kyandi. (Ngo. 3:15; Loma 8:20, 21) Yehova wālongele kino kupityila ku kitapwa kya kinkūlwa kya Yesu, wandi Mwana wasenswe. Yehova pa kwitupa wandi Mwana, wālombwele amba witusenswe bininge.​—Yoa. 3:16.

18. Mwanda waka tubwanya kukulupila’mba Yehova usakanga twikale bandi bana nansha shi tubapaluka kwadi?

¹⁸ Nansha byotudi ba kubulwa kubwaninina, Yehova usakanga twikale mu kisaka kyandi, kadi ketumwenepo nansha dimo bu kiselwa. Tubwanya kumutyumuna mutyima nansha kumupaluka, inoko Yehova ketwelangapo. Yesu wāelekeje buswe bukatampe bwa Yehova mu nsekununi ya mwana mujine. (Luka 15:11-32) Shabana wa mu kino kyelekejo wādi ukulupile nyeke amba wandi mwana ukajoka. Pājokēle wandi mwana ku njibo, shandi wamutundaile na nsangaji. Netu shi tubapaluka kudi Yehova ino tubesāsa, tubwanya kukulupila’mba Tata wetu wa buswe uketutundaila biyampe.

19. Le Yehova ukalongolola namani bintu byonenwe na Adama?

¹⁹ Tata wetu ukalongolola byonso byonenwe na Adama. Adama pa kupwa kutomboka, Yehova wātongele’ko bantu 144 000 bakengila bu balopwe ne bu babitobo momwa mūlu pamo na wandi Mwana. Yesu ne boba bakabikala nabo bakakwasha bantu ba kikōkeji bekale babwaninine mu ntanda mipya. Shi abakapite pa ditompo dya mfulo, Leza ukebapa būmi bwa nyeke. Kupwa Tata wetu ukasangala pa kumona ntanda miyule bandi bana bana-balume ne bana-bakaji babwaninine. Bine, kikekala kitatyi kya nsangaji!

20. Le Yehova i mulombole namani amba witusenswe bininge, ne i bika byotukesambila’po mu kishinte kilonda’ko?

²⁰ Yehova i mulombole amba witusenswe bininge. I Tata muyampe. Wivwananga milombelo yetu ne kwitupa byotusakilwa ku ngitu ne ku mushipiditu. Witufundijanga ne kwitukwatakanya. Kadi witubīkile madyese a kutendelwa mu mafuku a kumeso. Mutyima wetu usangalanga pa kuyuka’mba Tata wetu witusenswe ne kwituta mutyima! Kishinte kilonda’ko kikesambila pa muswelo otubwanya kulombola’mba tufwijanga’ko pa buswe bwaetusenswe batwe bandi bana.