Le Wi Mwilongolole ku Kyamalwa Kikatampe?

 1. Mwanda waka i kya tunangu kwilongolola ku kimpengele?

KWILONGOLOLA kupandijanga būmi. Kimfwa, shi kubalongeka kimpengele, bantu badi belongolole’ko bapēlelwanga bininge kupanda ne kukwasha bantu bakwabo. Bulongolodi bumo bwa mu Bulaya buloñanga bukomo bwa kukwasha bantu, bunena’mba: “Kwilongolola senene kubwanya kupandija būmi.”

 2. Mwanda waka tufwaninwe kwilongolola ku kyamalwa kikatampe? (Mateo 24:44)

² “Kyamalwa kikatampe” kikashilula mu kitulumukila. (Mat. 24:21) Inoko kyamalwa kikatampe i kishile na bimpengele bikwabo bivule, mwanda tuyukile amba kisa kulongeka. Yesu wādyumwine balondi bandi belongolole ku dino difuku, pano kepadi kintu kya myaka 2 000. (Tanga Mateo 24:44.) Shi twilongolole, biketupēlela kūminina mu kino kitatyi kya makambakano, ne kukwasha bantu bakwabo bōminine.—Luka 21:36.

 3. Le kūminina, mutyima wa lusalusa, ne buswe, bitukwashanga namani twikale belongolole ku kyamalwa kikatampe?

³ Twisambilei’ko pa ngikadila isatu ibwanya kwitukwasha twilongolole ku kyamalwa kikatampe. Le tukalonga namani shi abetunena kusapula musapu usansa wa butyibi ebiya balwana netu kebetulwe? (Kus. 16:21) Tukasakilwa kūminina pa kukōkela Yehova ne kukulupila’mba uketukinga. Le tukalonga namani shi banabetu abajimija bintu byabo bimo bya ku ngitu nansha byonso byobadi nabyo? (Hab. 3:17, 18) Tukasakilwa mutyima wa lusalusa pa kwibakwasha. Le tukalonga namani shi pa mwanda wa kutambwa bulwi na mizo mikutyile mu bumo, bibetulombe kushikatyila pamo na batutu ne bakaka mu kitatyi kampanda? (Ezk. 38:10-12) Tukasakilwa kwibasanswa bininge pa kusaka’mba tupite mu kino kitatyi kya makambakano.

 4. Le Bible ulombola namani amba tufwaninwe kwendelela kwikala na kūminina, na mutyima wa lusalusa, ne na buswe?

⁴ Kinenwa kya Leza kitukankamikanga twikale nyeke na kūminina, na mutyima wa lusalusa, ne na buswe. Luka 21:19 unena’mba: “Na kūminina kwenu, mukalamanga būmi bwenu.” Bene Kolose 3:12 unena’mba: “Vwalai . . . mutyima wa lusalusa.” Kadi 1 Bene Tesalonika 4:9, 10 unena’mba: “Banwe bene mwi bafundijibwe na Leza kwisanswa banwe bene na bene. . . . Ino, banwe banabetu, tubemwisāshila’mba endelelai kulonga namino pakatampe pene.” Bino binenwa byālembēlwe bana ba bwanga bādi balombola kala kūminina, mutyima wa lusalusa, ne buswe. Inoko, bādi banenwe kwendelela kwifunda muswelo wa kulombola ino ngikadila. Netu ye byotufwaninwe kulonga. Mwanda wa kwitukwasha, tusa kwisambila’ko pa muswelo wālombwele bene Kidishitu ba mu myaka katwa kabajinji ino ngikadila. Kupwa tusa kumona muswelo otubwanya kwiula bano bana ba bwanga, mwa kwilombwela’mba twi belongolole ku kyamalwa kikatampe.

 5. Le bene Kidishitu ba mu myaka katwa kabajinji bāuminine namani makambakano?

⁵ Bene Kidishitu ba mu myaka katwa kabajinji bādi basakilwa kūminina. (Bah. 10:36) Kutentekela pa makambakano obādi bekonda nao ādi atanwa na bantu bonso, abo bādi bekonda ne na makambakano makwabo. Bavule mobadi kebādipo bapangwapangwa enka na bendeji ba bipwilo Bayuda ne na ba lupusa bene Loma, ino i ne na bantu ba mu bisaka byabo. (Mat. 10:21) Kadi kyaba kimo mu kipwilo, bādi banenwe kulwa na mfundijo ya batupondo ileta nkalañani pa kusaka’mba ileke kwikala na lupusa pobadi. (Bil. 20:29, 30) Inoko bano bene Kidishitu bāuminine. (Kus. 2:3) Muswelo’ka? I na kulangulukila pa bimfwa bya mu Bisonekwa bya bantu bāuminine, pamo bwa Yoba. (Yak. 5:10, 11) Bālombele Leza ebape bukomo. (Bil. 4:29-31) Kadi bātele mutyima ku bintu biyampe bilupuka ku kūminina.—Bil. 5:41.

 6. Le i ñeni’ka yowaboila ku byalongele kaka Merita mwanda wa kūminina kulwibwa?

⁶ Netu tubwanya kūminina shi twifunda kitatyi kyonso bimfwa bya bantu bāuminine bidi mu Kinenwa kya Leza ne mu mabuku etu, ne kulangulukila’po. Kulonga namino kwakweshe kaka Merita wa mu Albani ōminine kulwibwa kukatampe kwa na bantu ba mu kyandi kisaka. Unena’mba: “Natengelwe bininge ponefundile nsekununi ya mu Bible ya Yoba. Wāsusukile bininge, pampikwa kuyuka i ani wādi umuletela byamalwa—inoko aye wānenene amba: ‘Enka ne byomfwa, nkikalekapo bululame bwami!’ (Yoba 27:5) Namwene amba byamalwa bya Yoba byādi bivule kutabuka byami. Ino ami ne mwishile na Yoba, mwanda nadi ndyukile mwine wadi undetela makambakano.”

 7. Shi nansha pano ketwikondengapo na makambakano makatampe, le i bika byotufwaninwe kwifunda kulonga tamba’nka pano?

⁷ Kadi tubwanya kuningija kūminina kwetu na kusapwila Yehova kitatyi kyonso makambakano etu mu milombelo. (Fid. 4:6; 1 Ts. 5:17) Padi pano kwikondengapo na makambakano makomo. Nansha nankyo, le ukimbanga buludiki bwa Yehova kitatyi kyotyumukilwe mutyima, kyovutakanibwe, nansha kulemenenwa na milangwe? Shi ulomba kyaba kyonso Leza akukwashe mu makambakano a difuku ne difuku pano, bikakupēlela kumulomba bukwashi kitatyi kyokekonda na makambakano makatampe mafuku āya kumeso. Ukakulupila’mba Yehova uyukile senene kitatyi ne muswelo wa kukukwasha.—Ñim. 27:1, 3.

 8. Le kimfwa kya kaka Mira kilombola namani amba kūminina makambakano dyalelo kubwanya kwitukwasha tukōminine makambakano mafuku āya kumeso? (Yakoba 1:2-4) (Tala ne kifwatulo.)

⁸ Biketupēlela kūminina pa kyamalwa kikatampe shi tūminina makambakano a dyalelo. (Loma 5:3) Mwanda waka tubanena namino? Batutu ne bakaka bavule i bamone amba kitatyi kyonso kyobōminina makambakano amo, bibakwashanga bōminine makambakano makwabo. Kūminina kwebalumbulwile ne kuningija lwitabijo lwabo amba Yehova usakanga kwibakwasha. Lwitabijo lwabo mudi Yehova lwebakweshe bōminine makambakano obatenwe nao monka. (Tanga Yakoba 1:2-4.) Kaka Mira pania wa mu Albani, wajingulwile amba kūminina kwaūminine mafuku kunyuma kwamukweshe endelele kūminina. Unena’mba, kyaba kimo wimonanga’mba aye kete ye wikonda na makambakano mavule. Inoko wavuluka bintu bivule bimulongēle Yehova mwanda wa kumukwasha mu bula bwa myaka 20 ipityile’i. Kupwa kaenena’mba: ‘Ikala nyeke na kikōkeji. Kokaleka ino myaka yonso ne bulwi bonso bonekenye na bukwashi bwa Yehova byende mu mema.’ Ne abe nobe ubwanya kulangulukila pa muswelo ke mukukwashe Yehova amba ūminine. Kulupila’mba umonanga kitatyi kyonso kyoūminina makambakano kampanda kadi ukakupalanga mpalo. (Mat. 5:10-12) Ebiya pakashilula kyamalwa kikatampe, ukayuka muswelo wa kūminina kadi ukasumininwa kwendelela kūminina.

 9. Le kipwilo kya mu Antyioka wa Shidea kyālombwele namani mutyima wa lusalusa?

⁹ Tala byālongekele pātenwe bene Kidishitu ba mu Yudea na kipupo kikatampe kya nzala. Kipwilo kya mu Antyioka wa Shidea pokyāivwene myanda ya kino kipupo, kyāivwanine lusa banababo ba mu Yudea. Ebiya bālonga’po kintu mwanda wa kulombola lusa lwabo mu bilongwa. “Bakwata mulangwe, umo ne umo mungya mwabwaninya, wa kutuma bukwashi ku banabetu bekele mu Yudea.” (Bil. 11:27-30) Nansha bano banabetu bāponenwe na kipupo byobādi kulampe, bene Kidishitu ba mu Antyioka bāsumininwe kwibakwasha.—1 Yo. 3:17, 18.

10. I muswelo’ka otubwanya kulombola mutyima wa lusalusa kitatyi kiponenwa banabetu mu lwitabijo na kimpengele? (Tala ne kifwatulo.)

¹⁰ Netu tubwanya kulombola mutyima wa lusalusa dyalelo kitatyi kyotwivwana’mba banabetu mu lwitabijo baponenwe na kimpengele. Tuloñanga’po kintu bukidibukidi—padi na kwipangula bakulumpe shi tubwanya kukakwasha’ko, na kutūla byabuntu bya mwingilo wa ntanda yonso, nansha na kulombelela banabetu baponenwe na kimpengele.b (Nki. 17:17) Kimfwa mu 2020, kwabundilwe Makomite Akuleta Bukwashi mu Bitatyi bya Bimpengele 950 ne kupita ntanda yonso, mwanda wa kukwatakanya boba badi basakilwa bukwashi mu kitatyi kya kipupo kya Corona. Bine tufwijanga’ko bininge batutu ne bakaka bengila mu mwingilo wa kuleta bukwashi. Pa mwanda wa mutyima wabo wa lusalusa pa batutu ne bakaka, baletele bukwashi bwa ku ngitu, bwa ku mushipiditu, kadi kitatyi kimo balongolwele nansha kūbaka mobo ne bifuko bya kutōtela’po.—Dingakanya na 2 Bene Kodinda 8:1-4.

11. Le bilongwa byetu bya lusa bipejanga namani Tata wetu wa mūlu bulēme?

¹¹ Potulombola mutyima wa lusalusa kitatyi kilongeka kimpengele, bantu bakwabo bamonanga byotulonga. Kimfwa mu 2019, kimpumpu kya Dorian kyaonakenye Njibo ya Bulopwe mu Bahama. Banabetu pobadi bōbakulula’yo, baipangwile muntu umo ke Kamonipo wingilanga mu bya lūbako ebalombole lupeto lwa kumufuta mwanda wa kwingila mingilo imoimo yadi isakilwa’ko. Webalondolola’mba: “Nsa kupāna . . . bingidilwa ne bintu. . . . Nsa kulonga’byo’tu pa mwanda wa bulongolodi bwenu. Ne mutengwe na muswelo [omutele] banabenu mutyima.” Bantu bavule mu ino ntanda kebayukilepo Yehova. Inoko bavule bamonanga bilonga Batumoni ba Yehova mwanda wa kukwasha bantu bakwabo. Bine i dyese’po kashā kuyuka’mba bilongwa byetu bya lusa bikokelanga bantu kudi Yehova, “mpeta mu lusa”!—Ef. 2:4.

12. Le kwikala na mutyima wa lusalusa dyalelo kwituteakanyanga namani ku kyamalwa kikatampe? (Kusokwelwa 13:16, 17)

¹² Mwanda waka tukasakilwa kwikala na mutyima wa lusalusa pa kyamalwa kikatampe? Bible ulombola’mba boba kebakakwatakanyapo imbikalo ya ino ntanda bakatanwa na makambakano—batanwanga nao tamba’nka pano kadi bakatanwa nao ne pa kyamalwa kikatampe. (Tanga Kusokwelwa 13:16, 17.) Batutu ne bakaka babwanya kusakilwa bukwashi pa kuvuija bisakibwa byabo bya kyalwilo. Tusaka’mba kitatyi kikāya Mulopwe wetu Yesu Kidishitu mwanda wa kutyibila bantu mambo, aketutane twikele na mutyima wa lusalusa ne kwitwita ‘tupyane Bulopwe.’—Mat. 25:34-40.

13. Le kukwatañana na Bene Loma 15:7, i muswelo’ka wāningije bene Kidishitu ba mu myaka katwa kabajinji kijimba kyabo kya buswe?

¹³ Buswe bo bwādi buyukanya bene Kidishitu ba mu myaka katwa kabajinji. Ino le byādi bipēla kobadi kulombola buswe? Tala bantu ba miswelo palapala bādi mu kipwilo kya mu Loma. Mu kino kipwilo kēmwadipo enka Bayuda kete bene bāsoñanibwe kukōkela Bijila bya Mosesa, ino mwādi ne bantu ba mu mizo bādi na bibidiji bishile bininge na bya Bayuda. Bene Kidishitu bamo bādi bapika, bakwabo nabo na bwanapabo—padi bene Kidishitu bamo bādi enka ne na bapika. Le bano bene Kidishitu bādi babwanya namani kwendelela kwisanswa nansha byokwādi kuno kwishila? Mutumibwa Polo wēbakankamikile amba, “mwitambulei banwe bene na bene.” (Tanga Bene Loma 15:7.) Lelo wādi usaka kunena bika? Kishima kyalamwinwe bu ‘kwitambula,’ kishintulula kutambula muntu biyampe nansha na kizaji, kimfwa mu njibo nansha mu bantu bapwenwe nabo. Kimfwa, Polo wālombwele Filemone atundaile Oneshifolusa umpika wandi wānyemene amba: “Mutambule biyampe.” (Fil. 17) Ba Pishila ne Akwila nabo bātambwile Apolosa, mwine wādi uyukile bityetye mu myanda ya bwine Kidishitu na kumusela “baenda nandi pamo.” (Bil. 18:26) Pa kyaba kya kuleka kuno kwishila kwibakalañanye, bano bene Kidishitu bāendelele kwisanswa ne kwitambula abo bene na bene.

14. Le kaka Anna ne wandi mulume balombwele namani buswe?

¹⁴ Netu tubwanya kulombola’mba tusenswe batutu ne bakaka na kupwana nabo. Kulonga namino, kukebalengeja nabo betusanswe. (2 Ko. 6:11-13) Twisambilei’ko pa byatene kaka Anna ne wandi mulume bengilanga bu bamishonele. Kitatyi kityetye pa kupita’po na pobatuminwe mu kifuko kikwabo, mu Afrika wa Kushika, kipupo kya Corona kyapona. Pa mwanda wa kino kipupo, kebadipo babwanya kupwidila pamo mpala na mpala na banababo mu kipwilo. Le bano ba mulume ne mukaji balombwele namani buswe? Badi besamba na batutu ne bakaka kupityila ku video ne kwibalombola mobabidila kwiyuka nabo senene. Bisaka bya banabetu byatengelwe bininge, nabo bashilula kwibeta kitatyi ne kitatyi ku telefone ne kwibatumina misapu. Mwanda waka bano ba mulume ne mukaji balongele namino? Kaka Anna unena’mba, “Mvulukanga nyeke buswe bwetulombwele batutu ne bakaka ami ne kyetu kisaka, kino kyantonwene nami nombole buswe ku banabetu.”

15. Le i ñeni’ka yowaboila ku kimfwa kya kaka Vanessa kya kusanswa batutu ne bakaka bonso? (Tala ne kifwatulo.)

¹⁵ Batwe bavule tudi mu bipwilo mudi batutu ne bakaka batambile mu bibidiji bishileshile kadi ba ngikadila palapala. Tubwanya kuningija buswe botwibasenswe na kuta mutyima pa ngikadila yabo miyampe. Kaka Vanessa, wingidilanga mu Nuvele-Zelande, wadi ukolelwa kupwana na banabetu bamo mu kipwilo. Ebiya wakwata butyibi bwa amba, pa kyaba kya kwanza kwepuka boba badi na ngikadila imulobeja, ukashilula kupityija nabo kitatyi kivule pamo. Kulonga namino kwamukweshe amone bine bisenswe Yehova mobadi. Unena’mba: “Tamba wami mulume wikala mutadi wa kipindi, tupityijanga kitatyi na batutu ne bakaka bavule ba ngikadila palapala, kadi ne mupēlelwe kupwana nabo. Pano kendi musanswe kuno kwishila. Ne Yehova nandi wikusenswe, mwanda i mwitabije tumutōtele pamo na bano bantu ba miswelo palapala.” Shi twifunde kumona bantu bakwabo mwibamwena Yehova, tukalombola’mba twibasenswe.—2 Ko. 8:24.

16. Mwanda waka buswe bukekala bwa mvubu mpata pa kyamalwa kikatampe? (Tala ne kifwatulo.)

¹⁶ Buswe bukekala bwa mvubu mpata pa kyamalwa kikatampe. Le Yehova uketukinga namani pakashilula kyamalwa kikatampe? Tutalei byāsoñenye Yehova bantu bandi pobātambilwe bulwi na Babiloni wa kala. Wēbasoñenye amba: “A bantu bami, endai, katwelei mu byumba byenu bya munda, kadi shitai bibelo byenu. Fyamai kitatyi kityetye Kufika ne bipita bukalabale.” (Isa. 26:20) Bimweka’mba bino binenwa bitutala ne batwe bakatanwa na kyamalwa kikatampe. “Byumba . . . bya munda” bibwanya kufunkila pa bipwilo byetu. Yehova i mwitulaye amba uketukinga pa kyamalwa kikatampe shi twendelele kumwingidila pamo na batutu ne bakaka. Nanshi tamba’nka pano, ketufwaninwepo’tu enka kulonga bukomo bwa kutyumwina mu manwi bukōkekōke bwa batutu ne bakaka, tufwaninwe ne kulonga bukomo bwa kwibasanswa. Kulonga namino kubwanya kuketukwasha tupande!

17. Le i bika byotukabwanya kulonga pa kyamalwa kikatampe shi twikale belongolole tamba’nka pano?

¹⁷ “Difuku dikatampe dya Yehova” dikaletela bantu bonso makambakano. (Zef. 1:14, 15) Ne bantu ba Yehova nabo bakatanwa na ano makambakano. Inoko shi twikale belongolole tamba’nka pano, tukabwanya kwikala talala ne kukwasha bantu bakwabo. Tukōminina makambakano onso aketutana. Pasusuka batutu ne bakaka, tukalonga byonso byotubwanya mwanda wa kwibakwasha na kwibalombola mutyima wa lusalusa ne kwibapa byobasakilwa. Kadi tukashala nyeke pabwipi na batutu ne bakaka, bene botulongēle kala bukomo bwa kusanswa. Ebiya Yehova uketwesela na kwitupa būmi bwa nyeke mu ntanda mwine kemukekalapo monka bimpengele ne byamalwa.—Isa. 65:17.