KISHINTE KYA KWIFUNDA 28
LWIMBO 123 Tukōkelelelei ku Ndudi ya Leza
Lelo Ujingulwile Bubine?
“Imanijai pototo koku mwikutyile mukaba wa bubine mu kifuka.”—EF. 6:14.
PEMANINE KISHINTE
Kwifunda muswelo wa kushiyañanya bubine botwifundile kudi Yehova ne bubela busambakanya Satana ne balwana netu.
1. Le wiivwananga namani pangala pa bubine?
BANTU ba Yehova Leza basenswe bubine budi mu Kinenwa kyandi. Lwitabijo lwetu lwimanine pa Kinenwa kyandi. (Loma 10:17) Tukulupile amba Yehova i mutūle’ko kipwilo kya bwine Kidishitu bu “kipanda kadi kikwatyijo kya bubine.” (1 Tm. 3:15) Kadi tukōkelelelanga na nsangaji ‘boba betutangidile kumeso’ mu bukata mwetu pobashintulula bubine bwa mu Bible, ne kwitupa bulombodi bukwatañene na kiswa-mutyima kya Leza.—Bah. 13:17.
2. Le mungya Yakoba 5:19, i bika bibwanya kwitufikila pa kupwa kwifunda bubine?
2 Inoko nansha ke pa kupwa kwitabija bubine ne mwingilo udi na bulongolodi bwa Leza mu kwitupa bwendeji bukulupilwa, tubwanya kwikala enka mu kyaka kya kusāsuka. (Tanga Yakoba 5:19.) Satana usakanga bininge kwitulengeja tuleke kukulupila Bible nansha bulombodi botutambula ku bulongolodi bwa Leza.—Ef. 4:14.
3. Mwanda waka tufwaninwe kukwatyija ku bubine? (Bene Efisesa 6:13, 14)
3 Tanga Bene Efisesa 6:13, 14. Panopano ponka Satana usa kwingidija lunsafwakanwa lukomo bininge mwanda wa kongola mizo yonso ilwe na Yehova. (Kus. 16:13, 14) Kadi tuyukile amba Satana ukalongela’ko bininge bukomo bwa kongola bantu ba Yehova. (Kus. 12:9) O mwanda i kya mvubu tuyuke kwishila kudi pa bukata bwa bubine ne bubela, ne kukōkela bubine. (Loma 6:17; 1 Pe. 1:22) Kulonga namino i kwa mvubu pa kupanda pa kyamalwa kikatampe!
4. Le i bika byotusa kwisambila’po mu kino kishinte?
4 Mu kino kishinte, tusa kwisambila’mo pa ngikadila ibidi yotusakilwa pa kujingulula bubine bwa mu Bible ne kwitabija bulombodi butamba ku bulongolodi bwa Leza. Kupwa tusa kwisambila’mo pa bintu bisatu byotunenwe kulonga pa kukwatyija nyeke ku bubine.
NGIKADILA YOTUSAKILWA PA KUJINGULULA BUBINE
5. Le kutyina Yehova kwitukwashanga namani tujingulule bubine?
5 Kutyina Yehova. Kutyina Yehova kushintulula kumusanswa bininge buswe buketulengeja tuleke kulonga kintu nansha kimo kimufītyija mutyima. Twikalanga na kipyupyu kya kuyuka kwishila kudi pa bukata bwa kyokya kyoloke ne kibi, ne kwishila kudi pa bubine ne bubela, mwanda wa kwitabijibwa na Yehova. (Nki. 2:3-6; Bah. 5:14) Ketufwaninwepo nansha dimo kuleka kityino kya bantu kikale kikomo bininge kutabuka buswe botusenswe Yehova. Mwanda byobya bisangajanga bantu, divule bifītyijanga Yehova mutyima.
6. Le kityino kya bantu kyālengeje namani bamfumu dikumi ba Isalela banyengakanye bubine?
6 Shi tutyina bininge bantu kupita’ko Leza, tubwanya kusāsuka mu bubine. Tubandaulei’ko kimfwa kya bamfumu 12 bākabelele ntanda yobālaile kupa bene Isalela kudi Yehova. Kityino kya batubedibedi dikumi kyobātyinine bene Kenani, kyāikele kikomo bininge kutabuka buswe bobādi basenswe Yehova. Bāsapwidile banababo bene Isalela amba: “Ketubwanyapo kukanda kukalwa na boba bantu, mwanda i bakomo kwitupita.” (Umb. 13:27-31) Na mumweno wa bumuntu, bene Kenani bādi bakomo kutabuka bene Isalela—kunena namino kwādi kwa bine. Inoko kunena’mba bene Isalela kebabwanyapo kunekenya balwana nabo, i kwilwa’ko amba bādi na Yehova. Bano batubedibedi dikumi bādi bafwaninwe kuta mutyima pa bintu byādi bisakila Yehova bene Isalela kulonga. Kadi bādi bafwaninwe kulangulukila pa bintu byaēbalongēle mafuku matyetye kunyuma. Namino bādi ba kujingulula’mba Yehova i mukomo bininge kutabuka bene Kenani. Inoko ba Yoshua ne Kalebu bādi beshile na bano batubedibedi bampikwa lwitabijo. Abo bāsakile kwitabijibwa na Yehova. Bāsapwidile bantu amba: “Shi Yehova wetusangela, bine uketutwejanga mu yoya ntanda ne kwitupa’yo.”—Umb. 14:6-9.
7. Le i muswelo’ka otubwanya kuningija kityino kyetu kya Yehova? (Tala ne kifwatulo.)
7 Pa kuningija kityino kyetu kya Yehova, tunenwe kuta mutyima pa kumusangaja mu butyibi bonso botukwata. (Ñim. 16:8) Potanga nsekununi ya mu Bible wiipangule amba, ‘Shi ami ye wadi mu ino ngikadilo, i butyibi’ka bonadi wa kukwata?’ Kimfwa, fwatakanya’po uteja bamfumu dikumi ba Isalela baleta lapolo mibi. Lelo wadi wa kwitabija ino lapolo ne kwikala na kityino kya bantu’ni, nansha buswe bosenswe Yehova ne mutyima wa kusaka kumusangaja byadi bya kwikala bikomo kutabuka moyo obe? Lukongo lutuntulu lwa bene Isalela lwākomenwe kujingulula bubine bwēsambile ba Yoshua ne Kalebu. Kino kyēbalengeje bakomenwe kutwela mu Ntanda ya Mulao.—Umb. 14:10, 22, 23.
Le i ani okakulupila? (Tala musango 7)
8. Le tufwaninwe kulonga bukomo bwa kwikala na ngikadila’ka, ne mwanda waka?
8 Kwityepeja. Yehova usokolanga bubine ku boba betyepeje. (Mat. 11:25) Twaitabije na kwityepeja bukwashi bobetukweshe bwa kwifunda bubine. (Bil. 8:30, 31) Inoko tufwaninwe kutadija kutyina twakekala na mitatulo. Kwikala na mitatulo kubwanya kwitulengeja tumone mumweno wetu bu i moloke pamo’nka bwa misoñanya ya mu Bisonekwa ne bulombodi botutambula ku bulongolodi bwa Yehova.
9. Le i muswelo’ka otubwanya kushala nyeke betyepeje?
9 Pa kwikala nyeke betyepeje, tufwaninwe kuvuluka’mba twi batyetyetyetye ku meso a Yehova. (Ñim. 8:3, 4) Kadi tubwanya kulomba Yehova etukwashe twikale betyepeje ne betabija kufundijibwa. Yehova uketukwasha tutangidije milangwe yandi, mine yaetupa kupityila ku Kinenwa kyandi ne ku bulongolodi bwandi, kumeso kwa yetu. Potanga Bible, kimba myanda ilombola’mba Yehova usenswe kwityepeja, ne kushikwa mitatulo, kwianya, ne kibengo. Kadi tadija bininge, amba ushale nyeke mwityepeje shi ubapebwa madyese a mingilo akupēja bulēme kampanda.
MUSWELO WA KUKWATYIJA KU BUBINE
10. Le Yehova i mwingidije bāni mwanda wa kupa bantu bandi bulombodi ne bwendeji?
10 Kulupila nyeke bulombodi butamba ku bulongolodi bwa Yehova. Mu Isalela wa kala, Yehova wāingidije Mosesa kupwa ke Yoshua, mwanda wa kupa bantu bandi bulombodi. (Yos. 1:16, 17) Bene Isalela bādi beselwa kitatyi kyobādi bamona bano bana-balume bu bantu bengila mu dijina dya Yehova Leza. Mwenda mafuku pābundilwe kipwilo kibajinji kya bwine Kidishitu, batumibwa 12 bo bādi baleta bulombodi. (Bil. 8:14, 15) Kupwa mu kino kisumpi mwābwejibwa ne bakulumpe bakwabo mu Yelusalema. Pobādi balonda bwendeji bwa bano bana-balume ba kikōkeji, “bipwilo byadi bininga mu lwitabijo ne kwivudija difuku ne difuku.” (Bil. 16:4, 5) Mu kino kyetu kitatyi namo, tweselwanga kitatyi kyotulonda bulombodi botutambula ku bulongolodi bwa Yehova. Ino le Yehova uketumona namani shi tupela bantu bātongele? Tubwanya kulondolola kino kipangujo na kubandaula byāfikīle bene Isalela pobādi bendejibwa mwanda wa kukatwela mu Ntanda ya Mulao.
11. Le i bika byāfikīle bantu ba mu Isalela wa kala bālwile na Mosesa muntu wātongelwe na Yehova mwanda wa kutangidila bantu bandi? (Tala ne kifwatulo.)
11 Kitatyi kimo nenki mu lwendo lwa bene Isalela lwa kukatwela mu Ntanda ya Mulao, bana-balume ba bitenta bālwile na Mosesa ne mwingilo wāmupele Yehova. Bānenene amba: “Kitango kyonso [ke enkapo Mosesa] i kijila, abo bonso’ba, kadi Yehova udi umbukata mwabo.” (Umb. 16:1-3) Na bubine “kitango kyonso” kyādi kijila ku meso a Leza. Inoko Yehova wātongele Mosesa mwanda wa kutangidila bantu bandi. (Umb. 16:28) Bano bantomboki pa kufutulula Mosesa, na bubine i Yehova obāfutulwile. Kebātelepo mutyima pa byobya byādi bisaka Yehova; bātele’o pa byobādi basaka—ko kunena’mba kwikadila’ko na lupusa ne kuyukana. Leza wāipaile boba bādi bemanine buno butomboki, pamo ne bantu tununu ne tununu bēbakwatakenye. (Umb. 16:30-35, 41, 49) Ne dyalelo tubwanya kukulupila’mba, Yehova kasangelangapo boba kebalēmekapo bwendeji buletwa na bulongolodi bwandi.
Le i ani okakwatakanya? (Tala musango 11)
12. Mwanda waka tubwanya kulama nyeke kikulupiji kyetu mu bulongolodi bwa Yehova?
12 Tubwanya kulama nyeke kikulupiji kyetu mu bulongolodi bwa Yehova. Shi bibamweka patōka’mba bilomba kujadika mwivwanino kampanda wa bubine bwa mu Bible nansha muswelo ulongolwelwe mwingilo wa Bulopwe, boba batangidile kumeso kebekakangapo kuleta bujadiki. (Nki. 4:18) Baloñanga namino mwanda kyobasakanga bininge i kusangaja Yehova. Kadi bakwatanga butyibi bwabo kukwatañana na Kinenwa kya Leza, kine kidi na misoñanya ifwaninwe kukōkela bantu bonso ba Yehova.
13. Le “kimfwa kya kulondela’po kya binenwa biyampe” i bika, ne bulongolodi bwa Yehova i bwifundije kulonga bika?
13 “Kwatyija nyeke kimfwa kya kulondela’po kya binenwa biyampe.” (2 Tm. 1:13) “Kimfwa kya kulondela’po kya binenwa biyampe” kifunkila pa bufundiji bwa bwine Kidishitu butanwa mu Bible. (Yoa. 17:17) Buno bufundiji, po pemanine bintu byonso byotukulupile. Bulongolodi bwa Yehova i bwitufundije tulamate ku kino kimfwa kya kulondela’po. Kadi ponso potulonga namino, tweselwanga.
14. Le bene Kidishitu bamo bālekele namani kukwatyija ku “kimfwa kya kulondela’po kya binenwa biyampe”?
14 Le i bika bibwanya kulongeka shi tubasāsuka ku “kimfwa kya kulondela’po kya binenwa biyampe”? Tubandaulei’ko kino kimfwa. Bimweka’mba mu myaka katwa kabajinji, lupupuluji lwāshilwile kusambakana mu bene Kidishitu bamo amba difuku dya Yehova ke difike kala. Mobimwekela kwādi mukanda wānenene namino, mwine wādi ulangilwa na bantu amba wālembelwe na mutumibwa Polo. Pampikwa ne kwitūdila’ko kitatyi kya kubandaula myanda, bene Kidishitu bamo mu Tesalonika bākukupile luno lupupuluji, enka ne kushilula kwilusambakanya. Kebādipo babwanya kongolwa shi bāvulukile bintu byēbafundije Polo kitatyi kyaākidi nabo pamo. (2 Ts. 2:1-5) Polo wādingīle banababo baleke kwitabija bintu byonso byobevwana. Kadi pa kwibakwasha mu mafuku a kumeso, Polo wāfudije mukanda wandi wa bubidi ku bene Tesalonika na binenwa bya amba: “Luno i lwimu lwami ami Polo, lonalemba na makasa ami, e kyo kiyukeno mu mukanda ne mukanda; e monembelanga namino.”—2 Ts. 3:17.
15. Le i muswelo’ka otubwanya kwikinga ku bubela bumweka bu myanda ya bine? Leta kimfwa. (Tala ne bifwatulo.)
15 Le i ñeni’ka yotubwanya kuboila ku byānenene Polo ku bene Tesalonika? Kitatyi kyotwivwana myanda kampanda keikwatañenepo na bintu byotwifundile mu Kinenwa kya Leza nansha kitatyi kyotwivwana lupupuluji lwa myanda ityikukwa, tufwaninwe kwikala na kusansanya. Mu Inio Sovietike wa kala, balwana netu bapēle banabetu mukanda obadi banena’mba utamba ku kité kya ntanda. Uno mukanda wadi ukankamika batutu bamo babunde’ko bulongolodi bukwabo bwiendeja abo bwine. Uno mukanda wadi umweka bu wa bine. Inoko batutu ba kikōkeji kebaongwelwepo. Bajingulwile amba musapu wadi mu mukanda kewadipo ukwatañene na bintu byobefundile. Kyaba kimo dyalelo, balwana na bubine bengidijanga bingidilwa bya busendwe mwanda wa kwituvutakanya ñeni ne kuleta nkalañani mu bukata mwetu. Pa kyaba kya ‘kutenkanibwa bukidi bonka mu milangwe yetu,’ tubwanya kwikinga batwe bene na kubandaula shi myanda yotwivwana nansha yotutanga ikwatañene na bubine botwifundile kala.—2 Ts. 2:2; 1 Yo. 4:1.
Kokyongolwa na bubela bumweka bu myanda ya bine (Tala musango 15)a
16. Le kukwatañana na Bene Loma 16:17, 18, i bika byotufwaninwe kulonga shi bantu bamo abasāsuka mu bubine?
16 Shala nyeke mu bumo na boba balamete Yehova. Leza usakanga twikale mu bumo na batutu ne bakaka. Tukashala nyeke mu bumo shi tulamate ku bubine. Boba bonso basāsuka mu bubine baletanga nkalañani mu kipwilo. O mwanda Leza witudyumuna ‘twibasonsoloke.’ Shi bitupu, netu tubwanya kusāsuka mu bubine.—Tanga Bene Loma 16:17, 18.
17. Le i byabuyabuya’ka byotukamwena mu kujingulula bubine ne kwibukwatyija pototo?
17 Shi tujingulule bubine ne kwibukwatyija pototo, tukashala nyeke pabwipi na Yehova ne kwikala na lwitabijo lukomo. (Ef. 4:15, 16) Tukakingwa ku mfundijo ya bubela ya Satana ne ku lunsafwakanwa lwandi, kadi tukakingwa na Yehova pa kyamalwa kikatampe. Nanshi kwatyija nyeke pototo ku bubine, ‘nabya Leza wa ndoe ukekalanga nobe.’—Fid. 4:8, 9.
LWIMBO 122 Tushimatyijei, ne Kujina Mpika!
a NSHINTULWILO YA KIFWATULO: Kwengelekeja kwa myanda yalongekele pano kepadi myaka mivule. Batutu ba mu Inio Sovietike wa kala abatambula mukanda umweka bu utamba ku kité kya ntanda ao’ko na bubine utamba ku balwana netu. Mu ano etu mafuku, balwana netu babwanya kwingidija Entelenete mwanda wa kusambakanya myanda ya kyongo pa bulongolodi bwa Yehova.