Le Bubine Bukidi na Mvubu?

Lelo umonanga’mba ke bikomo bininge kujingulula bintu bya bine ne bya bubela? Bantu dyalelo bamweka bu bakulupilanga bintu mungya mobeivwanina ne byobalanga, pa kyaba kya kwimanina pa bubine ne bubinga bwa patōka. Ntanda yonso dyalelo, bantu bavule bakulupile amba kekudipo bintu bya bine.

Uno mumweno keushilwilepo dyalelo. Pano kepadi kintu kya myaka 2 000, Pontyusa Pilato Mbikabu mwine Loma, wāipangwile Yesu amba: “Le bubine i bika?” (Yoano 18:38) Nansha Pilato byakādipo utengēle bamulondolole, ino kipangujo kyandi kyādi kya mvubu. Bible uleta malondololo obwanya kusangela, mene abwanya kukukwasha ujingulule bintu bya bine ne bya bubela, nansha bantu byobavutakanibwe ñeni mu ino ntanda.

Le bubine budi’ko?

En-en. Bible wingidija kishima “bubine” mwanda wa kufunkila pa bukamoni bwa bine ne pa byobya biyampe mu mwikadilo. Witufundija’mba Yehovaa Leza ye Nsulo ya bubine kebupatanibwa, na kumutela bu “Leza wa binebine.” (Ñimbo ya Mitōto 31:5) Mu Bible mudi bubine butamba kudi Leza, kadi Bible udingakanya buno bubine na kitōkeji kītumunikila dyalelo mu mfindi ya ino ntanda.—Ñimbo ya Mitōto 43:3; Yoano 17:17.

I muswelo’ka obwanya kutana bubine?

Leza ketusakilangapo twitabije bupofu bubine budi mu Bible. Ino, witusoñanya twibubandaule na kwingidija bukomo bwetu bwa kulanguluka pa kyaba kya kwimanina pa mwiivwanino wetu. (Bene Loma 12:1) Usaka tufikile pa kumuyuka ne kumusanswa na ‘ñeni yetu yonso,’ kadi witukankamika tukulupile batwe bene amba byotwifunda mu Bible i bya bine.—Mateo 22:37, 38; Bilongwa 17:11.

Le bubela bwātambile kwepi?

Bible unena’mba bubela bwāshilwile kudi walwana na Leza, Satana Dyabola, mwine witwa na Bible bu “shandya bubela.” (Yoano 8:44) Wābepēle Leza kudi bantu babajinji. (Ngalwilo 3:1-6, 13, 17-19; 5:5) Tamba penepa, Satana wendelelanga na kusambakanya bubela ne kufya bubine butala padi Leza.—Kusokwelwa 12:9.

Mwanda waka kudi bubela buvule dyalelo?

Mu kino kyetu kitatyi, kītwa na Bible bu “mafuku a mfulo,” lupusa lwa Satana lwa bongojani i luvudile’ko bininge pano pa ntanda. Bantu banenanga divule bubela mwanda wa kongola bakwabo ne kwibamwena pa mutwe. (2 Temote 3:1, 13) Kadi bubela i butāle bininge mu bipwilo bivule dyalelo. Monka mwālaile’kyo Bible pangala pa kino kyetu kitatyi, bantu “bakevudijija bafundiji ba abo bene ba kwibafundija bisangaja matwi abo,” ne kwālamuka “kebakitejepo bubine.”—2 Temote 4:3, 4.

Mwanda waka bubine i bwa mvubu?

Bubine bulengejanga bantu bekulupile. Pa kubulwa kwikulupila, bulunda ne kipwano kya bantu byonekanga. Bible ulombola’mba Leza usakanga butōtyi bwetu bwimanine pa bubine. Unena’mba: “Boba [batōta Leza] bafwaninwe kumutōta na mushipiditu ne bubine.” (Yoano 4:24) Pa kuyuka muswelo ubwanya kukukwasha bubine bwa mu Bible ujingulule bubela bwa bipwilo ne kwinyongolola’mo, tanga bishinte binena’mba “Bubela Bumwekeja’mba Leza Kadipo na Buswe.”

Mwanda waka Leza usaka ndyuke bubine?

Leza usaka upande, kadi nobe unenwe kwifunda bubine butala pādi pa kupanda. (1 Temote 2:4) Shi wifunde misoñanya ya Leza ya kiyampe ne kibi ne kwiilonda mu būmi, nabya ukapwana nandi. (Ñimbo ya Mitōto 15:1, 2) Leza wātumine Yesu pano pa ntanda mwanda wa kukwasha bantu befunde bubine. Leza usakanga tuteje bufundiji bwa Yesu.—Mateo 17:5; Yoano 18:37.

Lelo Leza ukatalula’ko bubela?

En-en. Leza ushikilwe bantu bengidija bongojani mwanda wa kumwena bakwabo pa mitwe. I mulaye kutalula pano pa ntanda boba basumininwe kwendelela kubepa. (Ñimbo ya Mitōto 5:6) Kitatyi kisa kwibatalula’ko Leza, usa kufikidija ne uno mulao wandi wa amba: “Milomo ya bubine ikekalanga’ko nyeke.”—Nkindi 12:19.