Le Divita dya Amakedona I Bika?

Divita dya Amakedona i divita dya mfulo dikalwa maludiki a bantu na Leza. Ano maludiki ne boba beakwatakenye, balwanga na Leza enka ne dyalelo na kupela kukōkela ku buludiki bwandi. (Ñimbo ya Mitōto 2:2) Divita dya Amakedona dikafudija buludiki bwa muntu.​—Danyele 2:44.

Kishima “Amakedona” kidi musunsa umo kete mu Bible, mu Kusokwelwa 16:16. Kusokwelwa ulombola mu bupolofeto amba, “balopwe ba ntanda yonso ikelwe na bantu” bakakongakanibwa “ku divita dya difuku dikatampe dya Leza Mwinē Bukomo Bonso,” “pa kifuko kitwa mu Kihebelu bu Amakedona.”​—Kusokwelwa 16:14.

I bāni bakalwa pa Amakedona? Yesu Kidishitu ukendeja kibumbo kya momwa mūlu mwanda wa kunekenya balwana na Leza. (Kusokwelwa 19:11-16, 19-21) Mu bano balwana mudi ne boba balwa na lupusa lwa Leza ne kumulongela bintu pampikwa bulēme.​—Ezekyele 39:7.

Le divita dya Amakedona dikalwibwa Pabukata bwa Kutunduka? Aa, pa kyaba kya kulwibwa’dya mu kifuko kimo kete, divita dya Amakedona dikekala dya ntanda yonso.​—Yelemia 25:32-34; Ezekyele 39:17-20.

Kishima Amakedona, kyalamunwanga kyaba kimo bu “Alamakedona” (mu Kihebelu Har Meghiddohn), kishintulula “Lūlu lwa Mekido.” Mekido i kibundi kyādi mu Isalela wa kala. Mānga ilombola’mba mavita a basivile ne amo asonekelwe mu Bible, ādi alwibwa kubwipi na kino kibundi. (Batyibi 5:19, 20; 2 Balopwe 9:27; 23:29) Inoko, kishima Amakedona kekifunkilapo pa kifuko kimweka na meso kidi kubwipi na Mekido wa kala. Kekudipo lūlu lulampe, nansha ke mu Dilungu dya Musanza wa Yezelele kemukokejapo kubwana bantu bonso bakalwa na Leza. Inoko Amakedona i ngikadilo ya ntanda yonso ikekala’mo mizo mwanda wa kulwa buludiki bwa Leza.

Le divita dya Amakedona dikekala namani? Nansha byoketuyukilepo muswelo ukengidija Leza bukomo bwandi, inoko ukengidija byabulwi bimo byonka na byawāingidije pa kala​—mvula wa mabwe, kutenkana kwa ntanda, mvula mukatampe, mudilo ne bibidikityi, mapeni, ne misongo. (Yoba 38:22, 23; Ezekyele 38:19, 22; Habakuka 3:10, 11; Zekadia 14:12) Pa kuvutakanibwa, balwana na Leza bamo bakeipaya abo bene na bene, inoko ku mfulo bakajingulula’mba i Leza obalwa nandi.​—Ezekyele 38:21, 23; Zekadia 14:13.

Le Amakedona ikekala mfulo ya ntanda? Keikekelapo mfulo ya uno umbuo wetu wa ntanda, mwanda ntanda i kīkalo kya nyeke kya muzo wa muntu. (Ñimbo ya Mitōto 37:29; 96:10; Musapudi 1:4) Pa kyaba kya konakanya bantu, Amakedona ikebapandija, mwanda “kibumbo kikatampe” kya bengidi ba Leza kikapanda.​—Kusokwelwa 7:9, 14; Ñimbo ya Mitōto 37:34.

Pa kyaba kya kufunkila pa nshi, kishima “ntanda” kitelelwe mu Bible kifunkilanga kyaba kimo pa bantu babi balwa na Leza. (1 Yoano 2:15-17) I mu buno buluji, mukaleta Amakedona “mfulo ya pano pa ntanda.”​—Mateo 24:3, Dibuku Dijila.

Le Amakedona ikekala’ko kitatyi’ka? Yesu pa kwisambila pa “kyamalwa kikatampe” kikanana pa divita dya Amakedona, wānenene amba “pa mwanda wa dyodya difuku ne nsá mine, i kutupu nansha umo wibiyukile, nansha bamwikeulu ba mūlu nansha Mwana, poso’nka Tata kete.” (Mateo 24:21, 36) Inoko, Bible kalombwelepo amba yaikele’ko mu kitatyi kya kwikala’po kwa Yesu kwa kubulwa kumeka, kwashilwile mu 1914.​—Mateo 24:37-39.