Nsongwalume umo ubandila bantu badi ku Njibo ya Bulopwe

BIPANGUJO BYA BANKASAMPE

Mwanda Waka Tukapwile ku Njibo ya Bulopwe?

Batumoni ba Yehova bapwidilanga mu kifuko kyabo kya kutōtela’po kitwa bu Njibo ya Bulopwe, misunsa ibidi yenga ne yenga. Le i bika bipitanga’ko, le i muswelo’ka obwanya kumwena’mo shi ubatanwa’ko?

I bika biloñwanga ku Njibo ya Bulopwe?

Njibo ya Bulopwe i kifuko kya kwifundila’po bufundiji bwa kamweno budi mu Bible. Kupwila kulongelwa’po kukakukwasha:

wifunde bubine padi Leza.
wivwanije kine kilongekela myanda yotumona dyalelo.
wikale muntu muyampe mpata.
usokole balunda bayampe.

Le wadi uyukile? Kifuko kipwidila’po Batumoni ba Yehova kitelwanga bu Njibo ya Bulopwe, mwanda besambilanga’po nakampata myanda ya Bulopwe bwa Leza.—Mateo 6:9, 10; 24:14; Luka 4:43.

Mwanda waka ufwaninwe kutanwa’ko?

Ukamwena mu myanda ipita’ko. Misoñanya ya mu Bible ifundwa ku kupwila kwa Batumoni ba Yehova ikakukwasha ‘wikale na tunangu.’ (Nkindi 4:5) Ko kunena’mba Bible ukakukwasha wikale ukwata butyibi buyampe mu būmi bobe. Kadi ukakukwasha usokole malondololo ku bipangujo bya mvubu mpata mu būmi, kimfwa:

Tala myanda imo īsambilwanga’po mu mīsambo ya ku kupwila kwetu kwa ku mfulo kwa yenga:

Mwanda Waka Ufwaninwe Kuludikwa na Bible?
I Kwepi Kokatana Bukwashi mu Kitatyi kya Tusuwa?
Bintu Bitulongela Bulopwe bwa Leza Dyalelo.

“Mulunda nami wa ku masomo waile kupwila netu. Washikata pamo na kisaka kyetu, twalonda nandi kupwila mu bitabo byetu. Pa kupwa, wansapwila’mba watulumuka pa malondololo adi aleta bantu mu bipindi bya bipangujo. Wanena ne kunena’mba mu kipwilo kyabo kebadipo na bingidilwa bya kwifundila’mo na motwikadile nabyo’mu.”—Brenda.

Le wadi uyukile? Ku Njibo ya Bulopwe, bityi i kushikata bitupu, kadi kekudipo mukongo wa lupeto.

Bokatana’ko bakakukankamika. Bible utela bubinga bumo bufwaninwe bene Kidishitu kupwidila pamo amba i mwanda wa ‘kwikankamika batwe bene na bene.’ (Bahebelu 10:24, 25) Kupwana na bantu babadikije Leza ne bakwabo kumeso i mwanda ukankamika mutyima mu ino ntanda ya bantu besakila.

“Nkōkanga ne kupungila shi naingila difuku dituntulu, inoko bantu bontananga ku Njibo ya Bulopwe banengejanga nyeke neivwane biyampe. Ponjokela kwinjibo ntamba ku kupwila, ngikalanga na nsangaji ne na bukomo bwa kulwa na difuku dilonda’ko.”—Elisa.

Le wadi uyukile? Ntanda yonso kudi bipwilo bya Batumoni ba Yehova 120000 ne kupita bipwidila pa bifuko 60000 ne kupita. Mwaka ne mwaka kūbakwanga nansha kulongolola Mobo a Bulopwe kintu kya 1500 mwanda wa kuvula kwa bantu batanwa’ko.a

Binena’po bakwenu

“Ponadi ku masomo, mukwetu umo wakatenwe nami ku kupwila kumokumo, watulumukile pa kumona befundi ba Bible, bakulu ne banuke bafunda bonso pamo. Panopano ponka mukulu wa kaji koñingilanga waile kupwila netu, kadi watulumukile pa buvule bwa misunsa yadi ingidijibwa Bible. Kumona muswelo waasangedile’byo kwanengeje nami nsangele’byo bininge!”—Jessica.

“Mona’mba kupwila kutūkijanga mutyima wami wadi ulēmenenwe na bya kuzumbazumba bya mu difuku. Twifundanga mwa kwikadila na kitungo mu būmi, mwa kwikadila bantu bayampe, ne bikwabokwabo. Potupwanga kupwila ku Njibo ya Bulopwe, ngikalanga mukankamikwe kadi musengibwe.”—Timothy.

“Muntu umo onaityile ku kupwila wanenene pa kupwa’mba: ‘Nailanga’tu mwanda wa mone pa kwimutopekela mu byomufundija. Pano namone nanshi byami’ko byo byadi bifwe!’ Kadi watulumwinwe na muswelo upwene Batumoni ba Yehova. Wanena’mba: ‘Nansha byowadi musunsa wami umbajinji kwiyuka nenu, ino mubanongela bintu wiya’mba twi beyuke nenu tamba kala!’”—Jacob.

“Kudi bitatyi byonadi nanga mu kupwila’mba, ‘I amena’tu napite lubilo.’ Ino kupwila pokwadi kukyendelela, milangwe ya kwipangila kukajoka yashilula kumpwa. Ino ami pa kupwa kupwila, nashilula kwisamba na bantu, natobadilwa nkikiyukilepo ne i mwanda waka milangwe mibajinji’ya yadi ibangiya’mo. Shi ke kwadipo kupwila, longa nkidipo na balunda balumbuluke na bano bondi nabo.”—Madison.

a Pa kusokola kifuko kya kupwidila’ko, pūtula mu “Kupwila kwa Batumoni ba Yehova” ne kutoneka pa “Kifuko kya Kubwipi na Kwami.”