Yelemia

7 Kino’ki kyo kinenwa kya Yehova kyaile kudi Yelemia amba: 2 “Imana pa kibelo kya njibo ya Yehova usapule’po uno musapu amba, ‘Ivwanai kinenwa kya Yehova, banwe bantu bonso ba Yuda batwelanga pa bino bibelo mwanda wa kwivukwila ku meso a Yehova. 3 Yehova wa bibumbo, Leza wa Isalela wanena namino amba: “Lumbululai mashinda enu ne bilongwa byenu, nami nkemuleka mwikale nyeke mu kino kifuko.+ 4 Kemwakikulupilai binenwa bya kyongo kemunena’mba, ‘Ai keyo* tempelo ya Yehova, tempelo ya Yehova, tempelo ya Yehova!’+ 5 Mwanda shi bine mulumbulule mashinda enu ne bilongwa byenu; shi bine mutyibe myanda moyolokele pa bukata bwa muntu ne mulondakani nandi;+ 6 shi kemumwesheshepo malwa beni ba kibundi, bana ba nshiye,* ne bakaji ba kishala;+ shi kemumwangilepo mashi ampikwa mambo mu kino kifuko; kadi shi kemulondelepo baleza bakwabo mwanda wa kwisanshija banwe bene;+ 7 nabya nkemuleka mwikale nyeke mu kino kifuko, mu ntanda yonapele lonso* bakulutuba benu.”’”

8 “Ino banwe mukulupile binenwa bya kyongo+—kebikemuletelapo kamweno nansha kamo. 9 Le mubwanya kwiba,+ kwipayañana, kulonga makoji, kutyipa bya bubela,+ kutapila Bāla bitapwa,*+ ne kulonda baleza bokemwadipo muyukile, 10 kupwa kemwiya kwimana ku meso ami mu ino njibo iselele dijina dyami kemunena’mba, ‘Tusa kupanda,’ nansha byomulongele bino bintu byonso bya munyanji? 11 Le ino njibo iselele dijina dyami ikale ke mutá wa batubwalāla ku meso enu?+ Nemwena’kyo ami mwine,” i Yehova unena.

12 “‘Ino pano endai ku kifuko kyami mu Shilo,+ monaikadije dibajinji dijina dyami,+ mumone byonalongele’mo pa mwanda wa bubi bwa bantu bami bene Isalela.+ 13 Ino banwe mwadi mulonga’nka kulonga bino bintu byonso,’ i Yehova unena, ‘nansha byonesambile nenu kyaba ne kyaba,* kemwaivwenepo.+ Nadi nemwita’nka kwimwita, ino banwe kwitaba mpika.+ 14 Nkalonga ino njibo iselele dijina dyami,+ mine yomukulupile,+ ne kino kifuko kyonemupele banwe ne bakulutuba benu, monka monalongele Shilo.+ 15 Nkemutalula ku meso ami monka monatalwidile banabenu bonso, lutundu lonso lwa Efelaimi.’+

16 “Ino abe kokalombela pa mwanda wa bano bantu. Kokadila nansha kulombela nansha kunzenza pa mwanda wabo,+ ke-pantu nkikakwivwanapo.+ 17 Le kumwenepo byobya byobalonga mu bibundi bya Yuda ne mu bipito bya Yelusalema? 18 Bana batyabanga nkuni, bashabantu babanza mudilo, bakaji basambakanya mukama mwanda wa kulongela Mulopwe Mukaji wa Mūlu* mikate ya bitapwa,+ kadi bapungulwilanga baleza bakwabo byamulambu bya bitomibwa mwanda wa kunsanshija.+ 19 ‘Ino le i ami obasanshija?’* i Yehova unena. ‘Le ke abo benepo besanshija pa mwanda wa bumvu bwabo?’+ 20 O mwanda Mfumu Mwinē Lupusa Lonso Yehova wanena namino amba, ‘Talai! Bulobo bwami ne bukalabale bwami bukapungulwilwa pa kino kifuko,+ pa muntu ne nyema, pa mityi ya mu ntanda ne bipa bya nshi; bukatēma kadi kebukabulwepo.’+

21 “Yehova wa bibumbo, Leza wa Isalela wanena namino amba, ‘Endelelai, bwejai byamulambu byenu bisōkwe bituntulu ku bitapwa byenu bikwabo, kadi dyai mwita banwe bene.+ 22 Mwanda difuku dyonatambije bakulutuba benu mu ntanda ya Edipito, nkyesambilepo nabo nansha kwibasoñanya myanda ya byamulambu bisōkwe bituntulu ne bitapwa.+ 23 Ino nebasoñenye namino amba: “Kōkelai diwi dyami, nami nkekala Leza wenu, nenu mukekala bantu bami.+ Mufwaninwe kunangila mu mashinda onso onemusoñanya, amba bimwendekele biyampe.”’+ 24 Abo kebaivwenepo nansha kuta kutwi kwabo;+ ino banangīle mu nkuku ya* abo bene, balonda na kibengo mutyima wabo mubi,+ bajokela kunyuma pa kyaba kya kwenda kumeso, 25 tamba difuku dyatambile bakulutuba benu mu ntanda ya Edipito kufika ne dyalelo.+ Nadi nemutumina bengidi bami bonso bapolofeto, nebatuma difuku ne difuku, kyaba ne kyaba.*+ 26 Abo bapelele kungivwana, kadi kebatelepo kutwi kwabo.+ Ino baumije mitwe* yabo, kadi balongele bibi kutabuka ne bakulutuba babo bene!

27 “Ukesamba nabo bino binenwa byonso,+ ino kebakakwivwanapo; ukebeta ino kebakakwitabapo. 28 Ukebanena’mba, ‘Uno’u i muzo kewakōkelepo diwi dya Yehova Leza wabo kadi wapelele kwitabija kulemununwa. Kikōkeji kibaoneka kadi kekitelwangapo ne kutelwa kwine mu bukata mwabo.’*+

29 “Tenda nywene yobe keyatendelwe* wiyele kulampe, kadi tulula lwimbo lwa bulanda* pa mikuna padi tō, mwanda Yehova wapele luno lukongo lwamukalabaja kadi ukelwela. 30 ‘Mwanda bantu ba Yuda abalonga bibi ku meso ami,’ i Yehova unena. ‘Abatūla bilezaleza byabo bya mukenye mu njibo iselele dijina dyami mwanda wa kwiisubija.+ 31 Abaubaka mitenta ya Tofeta, udi mu Musanza wa Mwanā Hinome*+ mwanda wa kusōka babo bana bana-balume ne bana-bakaji mu mudilo,+ kintu kyonkyasoñenyepo kadi kekyailepo nansha dimo ku mutyima wami.’*+

32 “‘O mwanda tala! mafuku āyanga,’ i Yehova unena, ‘kaketwepo monka bu Tofeta nansha bu Musanza wa Mwanā Hinome,* ino bu Musanza wa Kutukija. Bakajīka mu Tofeta enka ne byomupwa kyaba.+ 33 Kadi imbidi mifwe ya bano bantu ikekala ke bidibwa bya byoni bya mūlu ne bya banyema ba panshi, kwampikwa muntu nansha umo wa kwibazakaja’mba banyeme.+ 34 Nkafudija lunwa lwa kusepelela ne lunwa lwa nsangaji, diwi dya musoñañani ne diwi dya mutundaile,+ mu bibundi bya Yuda ne mu bipito bya Yelusalema, mwanda ntanda ikasalwa.’”+