TWIULEI LWITABIJO LWABO | ABELE

“E Konka Kwākikinena ne Pano Pene, Nansha I Mufwe”

ABELE wādi utala mikōko ya luombe lwandi ludya mu ndoe pa lūlu. Padi waela meso kulampe na mikōko yandi, wamone mikejima. Wayuka’mba i lubimbi lwa mudilo lwalamuka koku na koku, lujike dishinda dyenda ku budimi bwa Edena. Mu buno budimi mo mwāshikete bambutwile bandi, ino pano abo ne babo bana kebakibwanyapo kutwela’mo. Mona mu ñeni kalupepo ka luvula mokataleja nywene ya Abele paela meso mūlu ulangulukila padi Mupangi wandi. Lelo mukalo wādi pa bukata bwa Leza na muntu wādi wa kupwa? Byo byādi bisaka Abele.

Abele ukinenena kodi dyalelo. Le ubwanya kumwivwana? Ubwanya padi kunena amba kebibwanikapo. Mwanda uno mwana Adama wa bubidi kemufwe pano kepadi kitatyi kilampe. Kivulukilo kyandi i kuvulaminibwe, ke mupwe kala kwityanga na biloba pano kepadi kubwipi kwa myaka 6000. Bible witufundija pa mwanda utala bafwe amba: “Kebayukilepo nansha kimo kine.” (Musapudi 9:5, 10) Kadi, mu Bible kemusonekelwepo binenwa binenene Abele. Penepa ubwanya kunenena kotudi namani?

Mutumibwa Polo wēsambile ku bukomo bwa mushipiditu padi Abele amba: “E konka kwākikinena ne pano pene, nansha i mufwe.” (Bahebelu 11:4) Le Abele unenenanga kupityila ku bika? I kupityila ku lwitabijo. Abele i muntu mubajinji wātamije ino ngikadilo milumbuluke. Nanshi kulombola kwaālombwele lwitabijo na bukomo kulombola’mba, kimfwa kyandi i kyūmi, ngikadilo ikunka mutyima yotubwanya kulonda dyalelo. Shi tuboile ñeni ku lwitabijo lwandi ne kusaka kumwiula, nankyo nsekununi ya Abele iketunenena kotudi mu muswelo muyampe kadi mumweke.

Penepa i ñeni’ka yotubwanya kuboila kudi Abele ne ku lwitabijo lwandi nansha Bible byakesambilepo myanda bivule imutala? Tutalei.

WĀTAMINE KITATYI KYĀDI KIKIDI BANTU BATYETYE PANO PA NTANDA

Abele wābutwilwe ku ngalwilo kwa mānga ya muzo wa muntu. Yesu wēsambīle mwenda mafuku padi Abele amba wāikele’ko “kungalwilo ya panopantanda.” (Luka 11:50, 51) Na bubine Yesu wādi wisambila pa ntanda ya bantu badi na lukulupilo lwa kukūlwa ku bubi. Abele byaādi muntu wa buná kwikala’ko, bimweka bu wadi muntu mubajinji wāmwenwe na Leza bu ufwaninwe kukūlwa.a Na bubine, Abele kātaminepo mu bantu baleta kimfwa kiyampe.

Nansha bantu byobādi batyetye pano pa ntanda, ino muzo wa muntu wāponenwe na ngikadilo ya bulanda. Bimweka bu ba Adama ne Eva, bambutwile ba Abele bādi bantu bapopoke kadi bakomo. Inoko, bālongele kilubo kikatampe mu būmi bwabo, kadi kyobādi bayukile. Bādi babwaninine kadi na kyepelo kya būmi bwa nyeke kumeso abo. Kupwa batombokela Yehova Leza ne kupangwa bapangilwa panja pa Paladisa kīkalo kyabo, ke budimi bwa Edena kadi. Pa kutangidija masakila abo kumeso kwa bintu byonso bikwabo—enka ne kumeso kwa bisakibwa bya lutundu lwabo—bājimije būmi bubwaninine kadi bwa nyeke.—Ngalwilo 2:15–3:24.

Pa kupangilwa panja pa budimi, būmi bwa ba Adama ne Eva bwakoma. Ino, mwana wabo mubajinji pa kubutulwa, bamwinika bu Kena, nansha “Kintu Kyalupuka,” ebiya Eva wanena amba: “Namone mwana mwana-mulume ku bukwashi bwa Yehova.” Binenwa byandi bilombola’mba wāvulukile padi mulao wālaile Yehova mu budimi, wa amba mwana-mukaji umo wādi wa kulupula “lukunwa” lwādi lwa konakanya difuku dimo yewa umbi wāsasukije ba Adama ne Eva. (Ngalwilo 3:15; 4:1) Lelo Eva wālangile amba i aye mwana-mukaji wālailwe mu bupolofeto ne Kena nandi ye wādi “lukunwa” lwālailwe?

Shi i amo, wādi wiongola. Ne kadi, shi aye ne Adama bātwejeje ino milangwe mu ñeni ya Kena paātamine, na bubine bālengeje uno muntu wakubulwa kubwaninina etatule byampikwa kwendela’mo. Mwenda mafuku, Eva wabutula mwana wa bubidi, ino ketumwenepo binenwa bya kumutendela. Bamwinika bu Abele, ko kunena amba “kintu kya bitupu,” nansha “Kupanga luvula.” (Ngalwilo 4:2) Le kutonga dino dijina kulombola kumupelula, pamo’nka na abo bakulupile Kena bininge kupita Abele? Eyo padi, ino ketuyukilepo.

Nansha shi byādi namani, bambutwile ba dyalelo bakokeja kuboila ñeni mivule ku bano bambutwile babajinji. Lelo mukatweja mu ñeni ya benu bana mitatulo, kwabila, ne milangwe ya kwisakila kupityila ku binenwa ne bilongwa byenu? Nansha mukebafundija basanswe Yehova ne kukimba kupwana nandi? Ino i kya bulanda, mwanda bambutwile babajinji bākomenwe kiselwa kyabo. Inoko kwādi kukidi lukulupilo pa lutundu lwabo.

ABELE WĀTAMIJE LWITABIJO—NAMANI?

Kitatyi kyātamine bano bana babidi, bimweka bu Adama wēbafundije mwingilo obādi bafwaninwe kwingila pa kuvuija bisakibwa bya kisaka. Kena wādi kidimye; Abele nandi mukumbi.

Inoko, Abele wālongele kintu kya mvubu mpata. Mu bula bwa myaka mivule, wātamije lwitabijo—ngikadilo miyampe mine yāsonekele Polo mwenda mafuku. Langa’po bidi. Abele kādipo na muntu wādi uleta kimfwa waādi ubwanya kwiula. Le penepa wātamije lwitabijo mudi Yehova Leza namani? Tala bintu bisatu byākweshe Abele ekale na lwitabijo lukomo.

Bupangi bwa Yehova. Bine, Yehova wāfingile nshi mafingo, mene ālengeje nshi, imene miba ne pimbye bine byona bikunanwa. Nansha nabya, ntanda yādi ilupula bidibwa byādi bilamine būmi bwa kisaka kya ba Abele. Banyema, byoni ne mwita wa lui; ngulu, majiba, minonga, tulunga twa lui, madiulu, makumbi, dyuba, kweji ne ñenyenye kebyāfingilwepo. Konso kwādi kutala Abele, wādi wimwena buswe bukatampe, tunangu ne buyampe bwa Yehova Leza mwine wāpangile bintu byonso. (Loma 1:20) Kulangulukila pa bino bintu na nsangaji kwākomeje lwitabijo lwandi.

Na bubine Abele wētūdile’ko kitatyi kya kulangulukila pa bintu bya ku mushipiditu. Mumone’po bidi mu ñeni pakumba luombe lwandi. Būmi bwa bu mukumbi bwāmulombele kwendakana bininge. Wādi utwala luombe ku ngulu, upityila mu mpongo, utyibuluka minonga—ukimba nyeke lumenya luyampe, bina bya mema mayampe, ne bifuko bya mwemba wa kukōkolokwa’mo. Mu bipangwa byonso bya Leza, mikōko yādi imweka bu keidipo na bukwashi, enka na ayo yāpangilwe mwanda wa kwikala na muntu wa kwiyendeja ne kwiilama. Lelo Abele nandi wādi umwene amba usakilwa kuludikwa, kulamwa, ne kutebwa mutyima na muntu wa tunangu ne bukomo mpata kupita muntu ye-yense? Na bubine wālombwele bininge ino milangwe mu milombelo, penepa lwitabijo lwandi lwaendelela na kutama.

Milao ya Yehova. Ba Adama ne Eva bāsekunwinine babo bana myanda yēbapangije mu budimi bwa Edena. Mu uno muswelo, Abele wādi na bintu bivule bya kulangulukila’po.

Yehova wānene amba ino nshi i mifingwe. Abele wādi bine ubwanya kumona miba ne bapimbye bine byāfikidije bino binenwa. Kadi Yehova wālaile amba Eva wādi wa kususuka na dimi ne pa kubutula. Kitatyi kyābutwilwe banababo na Abele, wāmwene kufikidila kwa bino binenwa. Yehova wābadikile kala kumona amba Eva wādi wakusaka pampikwa ndiñamano mulume amuswe ne kumuta mutyima ne amba Adama nandi wādi wa kumutādila. Abele wēmwenine bino bintu bilongeka mu bambutwile bandi. Mu myanda mivule, Abele wāmwene kufikidila kwa binenwa bya Yehova byonso. Mu uno muswelo, Abele wadi na bubinga bwinebwine bwa kutūdila lwitabijo mu mulao wa Leza utala “lukunwa” lwādi lubwanya kupwa difuku dimo bibi byāshilwile mu Edena.—Ngalwilo 3:15-19.

Bengidi ba Yehova. Abele kātenepo bimfwa biyampe mu kisaka kya muntu, ino wātene’byo enka mu bipangwa bya ñeni byādi pano pa ntanda mu kine kitatyi’kya. Kitatyi kyāpangilwe ba Adama ne Eva mu budimi, Yehova wēbakankeje abo ne lutundu lwabo baleke kutwela mu ino Paladisa ya pano panshi. Pa kulama kwa kutwelela, Yehova wātūdile’ko bakelubi—bamwikeulu ba ludingo lwa peulu—ne lupanga lwa lubimbi lwa mudilo lwalamuka ku mitamba yonso.—Ngalwilo 3:24.

Langa’po bidi, Abele wāmwene bano bakelubi paādi nkasampe. Byobāvwele ngitu ya bu muntu, Abele wādi ubwanya kumona bu badi na bukomo bukatampe. Kadi luno “lupanga,” lwādi nyeke na lubimbi, lwalamuka nyeke, luleta luzakalo lukatampe. Abele pa kutama, lelo wādi umona bano bamwikeulu bakambakanya ne kushiya kifuko kobādi balama? Mhm. Bino bipangwa bya bukomo kadi bya ñeni byādi’nka pa kifuko’kya, dyuba ne bufuku, myaka na myaka, ne makumi na makumi a myaka. Mu uno muswelo Abele wāyukile amba Yehova Leza udi na bengidi boloke kadi bemanije. Abele wāmwene mu bano bakelubi, dikōkeji ne kikōkeji kudi Yehova kyākadipo ubwanya kumona mu kyabo kisaka. Na bubine kimfwa kya ba mwikeulu kyākankamikile lwitabijo lwandi.

Kulangulukila pa bintu byāsokwele Yehova padi kupityila ku bupangi, ku milao yandi ne ku bimfwa bya bengidi Bandi, kwātamije bininge lwitabijo lwa Abele. Bine kimfwa kyandi kinenenanga kotudi. Nakampata kino kibwanya kukulupija bankasampe bayuke amba bakokeja kutamija lwitabijo lwa binebine mudi Yehova Leza, nansha shi bantu ba mu kisaka kyabo balonge bika. Kupityila ku bupangi bonso bwa kutendelwa bwitujokolokele, ku Bible yense mutuntulu otudi nandi, ne ku bimfwa bivule bya bantu ba lwitabijo, tudi na kyalwilo kiyampe kya kutamija lwitabijo dyalelo.

KITAPWA KYA ABELE—KITABUKE BUYA

Kitatyi kyātamine lwitabijo lwa Abele mudi Yehova, wākimbile muswelo wa kulombola lwitabijo lwandi mu bilongwa. Ino, le muntu bitupu wādi ubwanya kupa Umpangi wa diulu ne ntanda bika? Na bubine, Leza kasakilwangapo kyabuntu nansha bukwashi bwa bantu. Kyaba kimo, Abele wāyukile bubinebine bukatampe: Shi—na kukanina kwa mutyima kuyampe—wādi usaka’tu kulambula kudi Yehova biyampe byaādi nabyo, byādi byākusangaja Shandi wa mūlu wa buswe.

O mwanda Abele wāteakenye kwela mukōko wa mu luombe lwandi. Wātongele owa muyampe, wa kilala-ndá, ebiya waela bipindi byādi bimweka bu biyampe. Mu kitatyi kimo kyonka, Kena nandi wakimba kweselwa na Leza ne kwitabijibwa nandi, wāteakanya kyakwela mu bya mwangulo byandi. Ino kukanina kwandi kwa mutyima kekwādipo na kwa Abele. Kwishila kwāmwekele kitatyi kyobāelele byakwela byabo.

Bano bana babidi ba Adama bāingidije padi madabahu ne mudilo mwanda wa kwela bitapwa byabo, padi kumeso a bakelubi, bene bādi belekeja Yehova pano panshi mu kine kitatyi’kya. Yehova walondolola! Tutanga amba: “Yehova walemeka Abele ne kyakwela kyandi kine.” (Ngalwilo 4:4) I muswelo’ka wamwekele kwitabija kwa Leza, Bible kanene’popo kintu. Ino mwanda waka wāitabije Abele?

Le i pa mwanda wa kyakwela? Abele wāelele kipangwa kyūmi, kyesa, ne kusūmija mashi malēme. Le Abele wādi uyukile mvubu ya kino kitapwa? Tutwa na tutwa twa myaka pa kupwa kwa Abele kufwa, Leza wāingidije kitapwa kya kana ka mukōko kampikwa bulema mwanda wa kwelekeja kitapwa kya Wandi Mwana mubwaninine, “Mwana-mukōko wa Leza,” wa mashi ambulwa mambo ādi akumwangibwa. (Yoano 1:29; Divilu 12:5-7) Inoko, Abele kādipo uyukile nansha kwivwanija muswelo wādi wa kwingidija Yehova bitapwa mwenda mafuku.

Byotuyukile i bino amba: Abele wāelele kintu kiyampe mpata kyaādi nakyo. Yehova kāitabijepo’nka kyakwela ino i ne muntu mwine wāelele’kyo. Abele wāelele kitapwa mwanda wātonwenwe na buswe bwa kuswa Yehova ne lwitabijo lwa binebine mwadi.

Pādi kwishila na Kena. Yehova “kamulemekelepo Kena, nansha kyakwela kyandi kine.” (Ngalwilo 4:5) Ke kyakwelapo kya Kena kyādi kibi; mwanda Mukanda wa Bijila wa Leza wāsoñenye mwenda mafuku kwela bipa bya mu madimi. (Levi 6:14, 15) Ino Bible wisambila padi Kena amba, “mīngilo yandi yadi mibi.” (1 Yoano 3:12) Pamo bwa bantu bavule dyalelo, Kena wālangile na bubine amba bipa’tu bilombola kwipāna kudi Leza byādi bibwane. Kubulwa kwandi kwa lwitabijo lwa binebine nansha buswe bwa kuswa Yehova, kwāmwekele bukidi bonka mu bilongwa byandi.

Kitatyi kyāmwene Kena amba Yehova kamwitabijepo, le wākimbile kuboila ñeni ku kimfwa kya Abele? Mhm. Mushikwa wa kushikwa mwanabo wadi ubila mwadi. Yehova wāmwene byādi bilongeka mu mutyima wa Kena, ebiya wamulanguluja na kitūkijetyima. Wādyumwine Kena amba mwiendelejo wandi wādi wa kumutwala ku bubi bukatampe, ne kumupa Kena kikulupiji kya “kutambulwa” shi wāshintyile mashinda andi.—Ngalwilo 4:6, 7.

Kena wāpumpwinye kidyumu kya Leza. Ino, waita nkasandi mukulupilwe bende ku madimi. Kwine’kwa Kena watalukila Abele ne kumwipaya wamwipaya. (Ngalwilo 4:8) Mu uno muswelo, Abele waikala muntu mubajinji kupangwapangwa ne kwipaibwa pa mwanda wa Leza. Wāfwile, ino mānga yandi keyākadikilepo’nka penepa.

Mashi a Abele ādidile Yehova mu muswelo wa kyelekejo amba aluje kinongo nansha boloke. Ebiya Leza walonga boloke, wapa Kena mubi mfuto pa mwanda wa butapani bwandi. (Ngalwilo 4:9-12) Kya mvubu kutabuka, nsekununi ya lwitabijo lwa Abele inenenanga kotudi dyalelo. Bula bwa būmi bwandi—padi bwa myaka katwa—bwādi bwīpi kupita bwa bantu ba mu kine kitatyi’kya, ino Abele wāsangeje Leza mu būmi bwandi bwa pano panshi. Wāfwile koku uyukile amba wādi musanshibwe ne kwitabijibwa na Yehova Shandi wa mūlu. (Bahebelu 11:4) Tubwanya kukulupila amba, i mūmi mu luté lwa Yehova keludi mfulo, ukungile kusangwilwa ku būmi mu paladisa ya pano panshi. (Yoano 5:28, 29) Le ukemona nandi mu paladisa? Ubwanya shi wi musumininwe kuteja panena Abele ne kwiula lwitabijo lwandi lwa kutendelwa.

[Kunshi kwa dyani]

[Kifwatulo pa paje 12]

[Kifwatulo pa paje 13]

Abele wāmwene mu būmi bwandi bonso amba, bakelubi bādi bakōkele kadi bengidi ba Yehova ba kikōkeji

[Bushintuludi pa paje 14]

Abele wāmwene bubinga bwinebwine bwa kukulupidila mudi Umpangi wa buswe kupityila ku bupangi

[Kifwatulo pa paje 15]

Abele wāelele kitapwa kyandi na lwitabijo; ino Kena kāelele’kyopo na lwitabijo