Mwāsokwedilwe Mukaja Isake

Bālongele Kiswamutyima Kya Yehova

UNO mununu ushikete ku mushimwa wa mema i mukōke bininge. Aye ne bengidi nandi batambile lwendo lulampe na bangamedia babo dikumi, batamba kubwipi na ku Belasheba benda kungala kwa Mesopotemya​—i kyala kya makilometele 800 ne kupita.a Pano pobafika kobadi benda, uno ñenda mukōke kakokolokwa, aku ulanguluka pa mwingilo mukomo wapelwe. Lelo uno muntu wādi ani, ne mwanda waka wāitabije kwenda luno lwendo lukomokomo?

Uno mwana-mulume wādi mwingidi wa Abalahama, “mukulumpe wa njibo yandi.” (Ngalwilo 24:2) Nansha byākatelelwe dijina mu ino nsekununi, bimweka bu wādi Ediezala, wātelelwe na Abalahama mu kitatyi kimo bu ‘mwana wa njibo yandi,’ wādi wa kwikala ‘mpyana wandi.’ (Ngalwilo 15:​2, 3) Bine, kino kyādi kitatyi kyākidi ba Abalahama ne Sala kebabutwile mwana nansha umo. Pano Isake, wabo mwana, wādi kadi na myaka 40, nansha Ediezala byākakidipo mpyana-impolo wa Abalahama, inoko wākidi mwingidi wandi. Omwanda, wāitabije mwingilo mukomo wāmupele Abalahama. Lelo wādi mwingilo’ka?

Mwingilo Mukomo Wāmupelwe

Mu mafuku a Abalahama, busongi kebwādipo butenga’nka kisaka kya musoñañani kete, mhm, ino bwādi butenga dyabo difu dyonso dituntulu, ba ku musuku wa shandi bonso. Omwanda bambutwile bādi na kibidiji kya kutongela babo bana bakaji. Ino Abalahama wākomenwe kukimbila Isake mu bene Kenani. Mwanda bene Kenani bādi na mikadilo yakubulwa bwine-Leza, omwanda kekyādipo kyendelemo kumusongela umo umbukata mwabo. (Kupituluka 18:​9-12) Kadi nansha byokyādi kibidiji ku mwana-mulume yense kusonga’nka muntu wa ku musuku wabo, ba ku musuku wa Abalahama bādi kulampe, ku makilometele tutwa na tutwa, kungala kwa Mesopotemya. Abalahama kādipo wa kujokeja Isake akashikate kokwa, mwanda Yehova wāmulaile’mba: “Konka ku lukunwa lobe nkelupanga ntanda ino,” ntanda ya Kenani. (Ngalwilo 24:7) Omwanda Abalahama wānene Ediezala’mba: “Poso ukende ku ntanda yami ne ku babutule bami, e kokamona mukaji wa wami mwana Isake.”​—⁠Ngalwilo 24:⁠4.

Kupwa kwa kwenda lwendo lulampe, Ediezala wāshikete ku mushimwa, kālanguluka pa mwingilo wāpelwe. Aye muyuke’mba bana-bakaji basa kwiya pano-pano ponka kuteka mema a kyolwa ku mushimwa. Penepo wāabija Yehova’mba: “Nkungakaji o nkanena’mba: Ikija mulondo obe nakwisashila, ntome; nandi anondolole’mba: Toma, nkatomeje ne bangamedia bobe bene kumo; nabya e enka aye o watongela mwingidi obe Isake, kadi po ponka po nkayukila byo wafwila lusa kudi mfumwami.”​—⁠Ngalwilo 24:⁠14.

Aye papo ukilombela, mwana-mukaji umo wa būya kebutalwe dimo, utelwa dya bu Lebeka, wāiya. Ediezala wāmunena’mba: “Nakwisashila mpe tumema ntome twa ku mulondo obe.” Lebeka nandi wālongela monka, kupwa wānena’mba: “Nkatekanga ne a bangamedia bobe bene, poso bekute nabo.” Bine, kino kyādi kyabuntu kya na mutyima tōo, mwanda ngamedia umo udi na kyumwa ukokeja kutoma mulondo wa mema mutuntulu mu minite 10 kete! Lebeka wādi uyukile’tu patōka’mba, mwingilo wādi usaka kwibengidila wādi mukomo, nansha shi bangamedia ba Ediezala bādi na kyumwa nansha shi kebādipo nakyo. Ebiya “wapeja kupungulula a mu mulondo mu kyato kya mutyi kanyemena konka ku mushimwa kuteka, wateka a bangamedia bandi bonso.”​—⁠Ngalwilo 24:​15-20.

Ediezala pa kujingulula’mba i kudi Lebeka kwāmuludikila Yehova, wāmupa kaningamunwe ka nsahabu ne nzenze ibidi ya nsahabu ya ku maboko, bikokeja kupotwa ku madollar 1 400 dyalelo. Lebeka pa kumulombola’mba i munkana Nahola, mwanabo na Abalahama, Ediezala wāfwijako Leza mu milombelo. Kānena’mba: “Yehova wankunkwije ami mu dishinda konka ku njibo ya bāna babo na mfumwami.” (Ngalwilo 24:​22-27) Ediezala wākafikile konka ku kisaka kya ba Lebeka. Mwenda mafuku, Lebeka wāikala ke mukaja Isake, kadi wāpebwa ne madyese a kwikala nkambo wa Yesu, Meshiasa.

Bufundiji Kotudi

Yehova wāesele Ediezala pamwanda wa milombelo yālombele na kininga ya kusokwela Isake mukaji wakaminwe Leza. Vuluka kadi amba busongi bwa Isake bwādi bukwatañane na mpango ya Leza ya kuleta lukunwa kupityila kudi Abalahama. Omwanda ino nsekununi keifwaninwepo kwitupa milangwe ya kunena’mba, muntu ye-yense ulombela mwanda wa kumona mwine-pandi ukapebwa’ye pamo bwa mu kukopa kwa diso. Inoko, shi twi balamate pototo ku misoñanya ya Yehova, nankyo uketupa bukomo bwa kūminina matompo atamba ku ngikadilo ya umbūmi yonso yotukokeja kwikala’mo​—ya busongi nansha ya bukunga.​—1 Kodinda 7:​8, 9, 28; enzankanya na Fidipai 4:​11-13.

Ediezala wālongele bukomo bukatampe mwanda wa kulonga mungya mashinda a Yehova. Padi netu tukokeja kumona’mba kwikala na būmi bukwatañane na misoñanya ya Yehova ke kipēlapo. Kimfwa, mu myanda itala kumona kāji kakwatañene na mwingilo wa kiteokratike, mwine-pobe wakaminwe Leza, bantu netu bakokeja kwitūbaka nansha kwipwija mukose kwendelemo. (Mateo 6:33; 1 Kodinda 7:39; 15:33; Efisesa 4:​17-19) Eyo, Yehova ukokeja kukwasha boba bapela kujilula misoñanya ya mu Bible. Bible ulaile’mba: “Kulupila mudi Yehova ne mutyima obe onsololo, kadi kokalēmenenapo pa kwivwanija kwa abe mwine; mu mashinda obe onso muyuke, kadi aye ukōlolanga tushinda tobe.”​—Nkindi 3:​5, 6.

[Kunshi kwa dyani]