Bipangujo bya Batangi

‘Mwa Kōlolokwa’ mwisambīlwe’po mu Bahebelu 4:9-11 i mwa kōlolokwa’ka, ne muntu ukokeja namani ‘kutwela muno mwa kōlolokwa’?

Mutumibwa Polo wātumīne bene Kidishitu Bahebelu ba mu myaka katwa imbajinji mukanda amba: “Kudi difuku dikwabo ditungilwe bantu ba Leza, difuku dya kololokwa difwene difuku dya busamba-bubidi. Mwanda yewa utwela mwakololokwa’mwa ukololokwa ku mingilo yandi’nka mwaololokelwe Leza ku yandi. Twinyingishei nanshi kutwela mwakololokwa muno.”—Bahebelu 4:9-11, MB.

Pāsonekele Polo amba Leza wāololokelwe ku mingilo Yandi, padi wādi ulanga ku byobya bisonekelwe mu Ngalwilo 2:2, mutangwa’mba: “Mu difuku dya busamba-bubidi Leza wavuididila mingilo yandi yadi ulonga; ino waolo[lo]kwa mu difuku dya busamba-bubidi ku mingilo yandi yonso yalongele.” Mwanda waka Yehova ‘wāololokelwe mu difuku dya busamba-bubidi’? Na bubine, Leza kādipo usaka kwitūkija bidi “ku mingilo yandi yonso yalongele.” Mwanda vese ulonda’po witwivwanija kino, amba: “Leza waesela dyese difuku dya busamba-bubidi kwidijidika ke dikola, mwanda i mu dino difuku mwaololokelwe ku mingilo yandi yonso yāpangile, ne yālongele Mwine Leza.”—Ngalwilo 2:3; Isaya 40:26, 28.

“Difuku dya busamba-bubidi” dyādi dishile na mafuku makwabo asamba ābadikile, mwanda dyo difuku dyāeselwe na Leza ne kwidijidika ke dikola, ko kunena amba, wēdipandwile, wēdisansanya, amba i dya mpango ya pa bula. Ayo mine yādi mpango’ka? Ku ngalwilo, Leza wābadikile kala kusokola mpango yandi itala pa bantu ne ntanda. Wānena ba mulume ne mukaji babajinji amba: “Butulai; mwivudijei, muyujei panopanshi ne kwipanekenya, kabidi bikalai bulopwe bwa pa mwita wa kalunga-kamema, ne bwa pa byoni bya mūlu, ne bwa pa bintu byonso byumi bilandala panopanshi.” (Ngalwilo 1:28) Nansha Leza byaāpele bantu ne ntanda kyalwilo kibwaninine, ino kyādi kilomba myaka, ebiya penepa ntanda yonso keikala kunekenibwa ne kwalamunwa bu paladisa miyule bisaka bya bantu babwaninine mungya mpango ya Leza. O mwanda Leza wāololokelwe, wāimika mingilo mikwabo ya bupangi pano panshi mu “difuku dya busamba-bubidi,” amba byobya byaāpwile kala kupanga byendelele na kutama mungya kiswa-mutyima kyandi. Ebiya ku mfulo kwa dino “difuku,” mpango yonso yākwete Leza ikale mivuikidile. Lelo i myaka inga yādi ya kwija kuno kōlolokwa?

Shi tujokele ku binenwa bya Polo mu Bahebelu, tusa kwivwana amba wānene amba “kudi difuku dikwabo ditungilwe bantu ba Leza, difuku dya kololokwa difwene difuku dya busamba-bubidi,” kadi usoñanya bengidi nandi bene Kidishitu balonge buninge bwa ‘kutwela mwa kōlolokwa’mwa.’ Kino kilombola amba pāsonekele Polo bino binenwa, “difuku dya busamba-bubidi” dya kōlolokwa kwa Leza dyāshilwile kintu kya myaka 4000 kunyuma dyādi dikyendelela. Kufula kwadyo i enka shi mpango ya Leza itala pa bantu ne ntanda ibafikidila yonsololo ku mfulo kwa Myaka Kanunu ya Umbikalo wa Yesu Kidishitu, “Mfumwandya dya Sabado.”—Mateo 12:8, MB; Kusokwelwa 20:1-6; 21:1-4.

Polo wāshintulwile muswelo ubwanya muntu kutwela muno mwa kōlolokwa mwa Leza mwanda nandi wādi utengele kino kyepelo kya kutendelwa. Wālemba’mba: “Yewa utwela mwakololokwa’mwa ukololokwa ku mingilo yandi.” Kino kitulombola amba bantu, nansha byobāpelwe kyalwilo kibwaninine, ke bonsololopo bakatwela mwa kōlolokwa mwa Leza. Mwanda ba Adama ne Eva kebālaminepo mwa kōlolokwa mwa Leza mu “difuku dya busamba-bubidi” na kwitabija kulonda mpangiko yaēbapele. Ino bātombokele, bākimba kwikala banapabo kudi Leza. Bēlunga ku nkuku ya Satana pa kyaba kya kwitabija bwendeji buyampe bwa Leza. (Ngalwilo 2:15-17) Enka namino, bājimija kyepelo kyabo kya kwikala na būmi bwa nyeke mu paladisa pano pa ntanda. Tamba penepa, bantu bonso bāikala bapika ba bubi ne lufu.—Loma 5:12, 14.

Butomboki bwa bantu kebwākalakenyepo mpango ya Leza. Kōlolokwa kwandi kukyendelela. Inoko, Yehova wākwete mpango ya buswe ya kuleta kinkūlwa kupityila kudi Yesu Kidishitu Mwanandi, amba bonso ba kwitabija’kyo bu kitako kya lwitabijo lwabo batengele kunyongololwa ne kōlolokwa ku biselwa bya bubi ne lufu. (Loma 6:23) O mwanda Polo wāsoñenye balunda nandi bene Kidishitu ‘kōlolokwa ku mingilo yabo.’ Bādi bafwaninwe kwitabija mpangiko ya lupandilo iletele Leza, ne kuleka kwikimbila būmi bwa kumeso mungya mashinda a abo bene, pamo bwa ba Adama ne Eva. Bādi bafwaninwe kadi kwepuka kulondalonda mingilo ya kusaka kwibingija abo bene.

Bine, kuleka bilokoloko ne bya kulondalonda bya bwine ntanda mwanda wa kulonga kiswa-mutyima kya Leza i kintu kitūkija mutyima ne kōlolokeja muntu! Yesu wāelele luno lwito amba: “Iyai kwami bānwe bonso bakuputuma na mīngilo, ne bakulemenwa, nabya nami nkemutukija’byo biyampe. Twela mu lupungu lwami lwa bu-umpika, muboīle manwa kudi ami, ke-ne-muntu amiwa ne wakukōkela, kadi ngidi ne bumvu pa mutyima, ebiya nabya mukamonanga mityima mitūke biyampe. Mwanda lupungu lwami lwa bu-umpika ludipo biyampe ne kiselwa kyami nakyo kyonka kipela.”—Mateo 11:28-30.

Nanshi mīsambo ya Polo ya mwa kōlolokwa mwa Leza ne muswelo ukokeja muntu kutwela’mo yādi nsulo ya bukankamane kudi bene Kidishitu Bahebelu ba mu Yelusalema, bādi bominina kupangwapangwa kuvule ne kupunikwa pa mwanda wa lwitabijo lwabo. (Bilongwa 8:1; 12:1-5) Ne ku bene Kidishitu ba dyalelo nako mo monka, binenwa bya Polo i nsulo ya bukankamane kobadi. Ne batwe netu tusumininwei kōlolokwa ku mingilo yetu ne kulonga buninge bwa kutwela mwa kōlolokwa’mwa, mwanda tubayuka amba kufikidila kwa mulao wa Leza wa kuleta paladisa pano pa ntanda mu bwendeji bwa Bulopwe boloke kubafwena.—Mateo 6:10, 33; 2 Petelo 3:13.

[Bifwatulo pa paje 31]

Mulao wa Leza wa kulongolola ino ntanda ke paladisa ukafikidila ku mfulo kwa difuku dya kōlolokwa kwandi