Tamija Kikōkeji Penda Pafwena Mfulo Pano

“Mizo yonso ikakokelanga [Shilo].”—NGALWILO 49:10.

 1. (a) Pa kala, kukōkela Yehova kwādi kulomba divule ne kukōkela bāni? (b) I bupolofeto’ka butala pa kikōkeji bwānene Yakoba?

KUKŌKELA Yehova kulombanga divule ne kukōkela bantunguluji bandi. Kifwa bamwikeulu, bakulutuba, batyibi, babitobo, bapolofeto, ne balopwe. O mwanda lupona lwa balopwe ba Isalela lwādi lutelwa ne bu lupona lwa Yehova. (1 Bilongwa 29:23) Ino yō, balopwe bavule ba Isalela kebādipo bakōkela Leza, bādi beobolwela byamalwa, bobolwela’byo ne bantu bobādi babikadile. Ino Yehova kālekelepo bantu badikōkeji pambulwa lukulupilo; wēbasengele na mulao wa kukatūla’ko Mulopwe wampikwa kubola, obakakōkela na nsangaji kudi boloke. (Isaya 9:6, 7) Mukulutuba Yakoba, kubwipi na kufwa kwandi, wānene bupolofeto butala pa uno mulopwe ukāya’ko amba: “Kibango kya bulopwe kekikamushetukapo [Yuda] nansha mukombo wa buledi mu maulu andi, poso’nka Shilo āye, ino mizo yonso ikakokelanga kwadi.”—Ngalwilo 49:10.

 2. Le kishima “Shilo” kishintulula namani, ne bulopwe bwandi i bwa kubikala pa bāni?

² “Shilo” i kishima dya Kihebelu kishintulula amba “Yewa Mwinē’kyo,” nansha amba “Mwinē kyandi.” I amo, Shilo kadipo wa kupyana kintu kingi, poso’nka kyepelo kya buludiki, kyelekejibwe na kibango, ne lupusa lwa kulelañana, lwelekejibwe na mukombo wa buledi. Kadi bulopwe bwandi ke bwa kubikalapo enka pa lutundu lwa Yakoba, ehe, ino i pa “mizo” yonsololo. Kino i kikwatañane na mulao wālaile Yehova kudi Abalahama amba: “Lukunwa lobe lukayata bu-kishi kyalo kibelo kya balwana nalo. Kadi mu lukunwa lobe e mo ike[esela]nga dyese mizo yonso ya panopanshi.” (Ngalwilo 22:17, 18) Yehova wāyukenye luno lukunwa lwine mu mwaka wa 29 K.K., paāshingile Yesu wa Nazala māni a mushipiditu sandu.—Luka 3:21-23, 34; Ngalatea 3:16.

Bulopwe Bubajinji bwa Yesu

 3. I bulopwe’ka bwāpelwe Yesu paākandile mūlu?

³ Yesu pa kukanda mūlu, kāikelepo kala kukwata mukombo na kushilwididila kubikala pa mizo ya pano pa ntanda, mhm. (Mitōto 110:1) Inoko wāpelwe “bulopwe” bwa kubikala pa bantu bāmukōkele. Mutumibwa Polo wātelele buno bulopwe paāsonekele amba: “[Leza] wetunyongolwele [batwe bene Kidishitu bashingwe-māni] ku bukomo bwa mfindi, wetupitaija mu Bulopwe bwa Mwana wandi wasenswe.” (Kolose 1:13, MB) Buno bunyongolodi bwāanjile pa Pentekosa wa 33 K.K., pāpungulwilwe mushipiditu sandu pa balondi bakikōkeji ba Yesu.—Bilongwa 2:1-4; 1 Petelo 2:9.

 4. Bana-babwanga babajinji ba Yesu bālombwele namani kikōkeji kyabo, ne i muswelo’ka wēbatelele Yesu abo bonso kya pamo?

⁴ Bana-babwanga bashingwe māni a mushipiditu yo ‘mikendi idi pa kyaba kya Kidishitu,’ o mwanda bāshilwile kukongakanya bakwabo ba kukekala “bene kibundi” pamo nabo mu bulopwe bwa ku mushipiditu. (2 Kodinda 5:20; Efisesa 2:19; Bilongwa 1:8) Kadi pa kusaka kwitabijibwa’bo na Mulopwe wabo Yesu Kidishitu, bādi banenwe kushala nyeke “babambakanibwe pamo, monka umutyima umo, ne [mu mulangilo umo].” (1 Kodinda 1:10) Abo bonso kya pamo bo bābundile “umpika wabinebine ne wamanwa,” kabumbo ka kalama wabinebine.—Mateo 24:45, NW; Luka 12:42.

Beselwe pa Kukōkela “Kalama” wa Leza

 5. Yehova wādi ufundija bantu bandi ba pa kala muswelo’ka?

⁵ Yehova upānanga nyeke bafundiji ba kufundija bantu bandi. Kifwa, pātambile Bayuda ku Babiloni, Ezela ne bana-balume bakwabo babwino kebādipo’tu batangila bantu Bijila bya Leza kete, ehe, bādi “balombola mungya mwanda” wa bijila’wa, ‘bāleta buluji bwao ne kwivwanija’ Kinenwa kya Leza.—Nehemia 8:8.

6, 7. I muswelo’ka upāna kabumbo ka umpika bidibwa bya ku mushipiditu pa kitatyi kifwaninwe kupityila ku kyako Kitango Kyendeji, ne mwanda waka kukōkela kano kabumbo i kwendele’mo?

⁶ Mu myaka katwa kabajinji, pālupukile mwanda wa disao mu 49 K.K., kitango kyendeji kya kabumbo kabajinji ka umpika kyābandawile’o mu milombelo, ne kufikila pa kulupula mulangwe wa mfulo ukwatañene na Bisonekwa. Kupwa bālombola butyibi bwabo mu mukanda, penepa bipwilo byākōkela ku buludiki bwāletelwe, Leza nandi wēbyesela madyese mavule. (Bilongwa 15:6-15, 22-29; 16:4, 5) Ne mu ano mafuku namo mo monka, umpika wabinebine, kupityila ku Kitango kyandi Kyendeji, uletanga kitōkeji pa myanda mikatampe, kifwa kuleka kwikuja mu bimyanda bya ntanda, buujila bwa mashi, ne kuleka kutoma dyamba ne mfwanka. (Isaya 2:4; Bilongwa 21:25; 2 Kodinda 7:1) Yehova i mwesele bantu bandi mwanda bakōkele ku Kinenwa kyandi ne kudi umpika wabinebine.

⁷ Bantu ba Leza pobakōkela kabumbo ka umpika i kulombola kobalombola amba bakōkele ne Yesu Kidishitu Mfumwabo. Kino kikōkeji kidi na buluji bukatampe mu kino kitatyi, mwanda mo mupelwe Yesu lupusa lukatampe, monka mwālailwe’kyo mu bupolofeto bwa Yakoba bwaānene kubwipi na kufwa kwandi.

Shilo Ke Mulopwe wa Ntanda Mwinē Kyepelo

 8. I kitatyi’ka ne muswelo’ka wātandabwilwe lupusa lwa Kidishitu?

⁸ Bupolofeto bwa Yakoba bwālaile amba “mizo yonso ikakokelanga” ku bwendeji bwa Shilo. Nanshi i kimweke patōka amba buludiki bwa Kidishitu bwādi bwa kutandabuka kupita ne pa Isalela wa ku mushipiditu. Bwādi bwa kutandabuka kufika ne kwepi? Kusokwelwa 11:15 ulondolola’mba: “Bulopwe bwa panopantanda pano ke bwa Mfumwetu, ne bwa Kidishitu wandi; ukabikalanga nyeke na nyeke.” Bible usokola amba Yesu wāpelwe lwine lupusa’lu ku mfulo ya “bitatyi bisamba-bibidi” bya bupolofeto—‘bitatyi bitungwe bya mizo’—mu 1914.a (Danyele 4:16, 17; Luka 21:24) Mwine mwaka’u o wāshilwile “kwikala’po” kwambulwa kumweka kwa Kidishitu bu Mulopwe Meshiasa, pamo ne kitatyi kyandi kya ‘kubikala bulopwe umbukata mwa boba bamushikilwe.’—Mateo 24:3, NW; Mitōto 110:2.

 9. I bika byālongele Yesu kitatyi kyaāpelwe Bulopwe bwandi, ne kino i kifikije bantu, nakampata bandi bana-babwanga, ku kulongwa bika?

⁹ Kilongwa kibajinji kya Yesu pa kupwa kutambula lupusa lwa bulopwe i kwela Satana—kifwa kine kīsokwele kya kubulwa kikōkeji—pamo ne bademona bandi “panopanshi.” Tamba penepa, ino mishipiditu imbi iletanga malwa keaneneka mu bantu, koku ōna ngikadilo mwanda wa kukōkela Yehova kukomene bantu. (Kusokwelwa 12:7-12; 2 Temote 3:1-5) Inoko Satana bene bapwila mpumpu mu bulwi bwa ku mushipiditu bwalwa i bashingwe-māni ba Yehova, “bālamine bijila bya Leza, ne kulamata ku busapudi bwa Yesu,” pamo ne bapwani nabo “mikōko mikwabo.”—Kusokwelwa 12:17; Yoano 10:16.

10. I kufikidila kwa bupolofeto’ka bwa mu Bible kulombola amba Satana i mukankalwe divita dyatamba bene Kidishitu babine?

¹⁰ Nansha nankyo, Satana usa’nka kukankalwa, mwanda dino i “difuku dya Mfumwetu,” i kutupu kikankaja Yesu kufikidija ne pa mfulo ‘kunekenya’ kwandi. (Kusokwelwa 1:10; 6:2) Kifwa, Yesu kasapo kutunya kutūla biyukeno musunsa wa mfulo pa bene Isalela ba ku mushipiditu 144 000. Kadi kasapo kubulwa kukinga “kibumbo kikatampe kīne kekibadibwapo na muntu, [kya bantu] batambile mu mizo yonso, ne mu bisaka byonso ne mu bantu, ne mu ndimi.” (Kusokwelwa 7:1-4, 9, 14-16) Ba mu kino kibumbo i beshile na bapwani nabo bashingwe-māni, mwanda abo bakekala babikalwa bakikōkeji ba Yesu ba pano panshi. (Danyele 7:13, 14) Kumweka kwabo pano pa ntanda i kilomboji kala kimweka na meso kilombola amba bine Shilo ye Mulopwe wa “Bulopwe bwa panopantanda.”—Kusokwelwa 11:15.

Kino Kyo Kitatyi kya “Kukōkela Myanda-Miyampe”

11, 12. (a) I bāni kete bakapanda pa mfulo ya ino ngikadilo ya bintu? (b) I ngikadilo’ka ya bumuntu idi mu boba batoma ‘mushipiditu wa ino ntanda’?

¹¹ Bonso bakimba kukamona būmi bwa nyeke bafwaninwe kwifunda kukōkela, ke-pantu Bible unena patōkelela amba “boba bampikwa kuyūka Leza, ne ku boba bampikwa kukōkela myanda-miyampe ya Mfumwetu Yesu,” kebakapandepo pa difuku dya kinongo dya Leza. (2 Tesalonika 1:8) Inoko, ngikadilo imbi idi’ko dyalelo ne mushipiditu wayo wa kutombokela bijila ne misoñanya ya mu Bible byo bilengeja kukōkela myanda miyampe kumweke bu mwanda mukomo.

¹² Bible utela uno mushipiditu ufutulwija Leza bu “mushipiditu wa [ino] ntanda.” (1 Kodinda 2:12) Mutumibwa Polo ushintulula lupusa lwao pa bantu mu mukanda waātumīne bene Kidishitu ba mu myaka katwa kabajinji ba mu Efisesa, amba: “Mo mwanangile kala, mwikadile muswelo wa [ino] ntanda, konka kudi mulopwe wa lupusa lwa luvula, wa mushipiditu wa kulonga mudi bāna bampikwa kikōkeji; e monka mo twadi ne bātwe bonso twikele mu bya kilokoloko kya ngitu yetu, kulonga byonka bikimbakimba ngitu ne ku mutyima, twadi bāna babukalabale pa bukata, pamo na bakwetu.”—Efisesa 2:2, 3.

13. Bene Kidishitu babwanya namani kukomena senene mushipiditu wa ino ntanda, ne i kamweno’ka kobamwena’mo?

¹³ Na bya dyese, bene Kidishitu ba mu Efisesa kebāshelepo bapika ba mushipiditu wa bumpikwa kikōkeji. Ino bāikele ke bana ba Leza bakikōkeji pa kukōkela mushipiditu wandi ne kwangula bipa byao bineñene bya ntanda ne miseke. (Ngalatea 5:22, 23) Ne dyalelo nadyo mo monka, mushipiditu wa Leza—bukomo bupityile bonso mūlu ne pano pa ntanda—ukwashanga midiyo ne midiyo ya bantu bakōkele Yehova ne kumwena’mo kininga kya “kukulupila ne kumfulo kwine.”—Bahebelu 6:11; Zekadia 4:6.

14. Yesu wādyumwine namani bene Kidishitu bonso badi mu ano mafuku a mfulo ku bintu bivule bikatūla kikōkeji kyabo pa ditompo?

¹⁴ Yuka kadi amba Shilo witukwatakanyanga na bukomo, mwanda aye ne Shandi kebakalekapo walwana nansha umo—shi demona shi muntu—atompe kikōkeji kyetu kupita pafudile bukomo bwetu. (1 Kodinda 10:13) I kyabine, Yesu wētukweshe mu bulwi bwetu bwa ku mushipiditu na kwitulombola kala makambakano mavulevule etutana mu ano mafuku a mfulo. Wētulombwele’o mu mikanda isamba-ibidi yaāpele mutumibwa Yoano mu kimonwa. (Kusokwelwa 1:10, 11) Eyo, madingi a kamweno adi’mo ākweshe bene Kidishitu mu mine myaka’ya, ino mvubu yao minemine imweka mu “difuku dya Mfumwetu,” dyāshilwile tamba mu 1914. Nanshi i kipite buya tute mutyima ku ino misapu!b

Nyema Buñumauma, Busekese, Kuswa bya Bupeta

15. Mwanda waka tufwaninwe kwepuka mwanda wātene kipwilo kya mu Efisesa, ne tukepuka’o namani? (2 Petelo 1:5-8)

¹⁵ Mukanda umbajinji wa Yesu wātumīne’o kipwilo kya mu Efisesa. Wābadikile bidi kufwija’ko kipwilo pa kūminina kwakyo, kupwa wānena’mba: “Ino nanshi, ngidi na mwanda kudi abe, i uno na’mba, washīle lusa [“buswe,” NW] lobe lubajinji.” (Kusokwelwa 2:1-4) Dyalelo, bene Kidishitu bamo bādi bapyasakane ke bajimije buswe bwake mudilo bobādi baswele Leza. Kujimija buswe namino kubwanya kuzozeja kipwano kipwene muntu na Leza, o mwanda kifwaninwe kwisendulula bukidibukidi. Ino buno buswe bubwanya kulangulwa monka namani? I na kwifunda Bible, kutanwa ku kupwila, kulombela, ne kulanguluka kitatyi ne kitatyi. (1 Yoano 5:3) Eyo, kino kilomba shakyo ‘kwielela’ko’ byabinebine, ino kuno kwielela’ko kudi na kafwila midimo. (2 Petelo 1:5-8) Shi ubebandaula pampikwa kwididika ne kumona amba buswe bobe bubatalala, wilemunune bya bukidi, ne kukōkela ku musoñanya wa Yesu unena’mba: “Vuluka popa po waponene, ne kwalamuka pa mutyima, ulonge mīngilo īmbajinji.”—Kusokwelwa 2:5.

16. I lupusa’ka luleta kyaka ku mushipiditu lwādi mu kipwilo kya Pengamume ne kya Tyiataila, ne i kika kinenenwa amba binenwa byēbanene Yesu i byendele’mo kotudi dyalelo?

¹⁶ Bene Kidishitu ba mu Pengamume ne ba mu Tyiataila bāfwijibwe’ko pangala pa bululame, kūminina ne bupyasakane bwabo. (Kusokwelwa 2:12, 13, 18, 19) Ino nabo bādi batādilwe na lupusa lwa bamobamo bādi na mushipiditu umbi wa Balame ne wa Yezebele, bantu bāonene Isalela wa kala na lupusa lwabo lubi lwa busekese ne butōtyi bwa Bala. (Umbadilo 31:16; 1 Balopwe 16:30, 31; Kusokwelwa 2:14, 16, 20-23) Le bidi namani mu ano etu mafuku namo—mu “difuku dya Mfumwetu”? Le luno lupusa lubi lukidi’ko? Eyo, lukidi’ko, mwanda busekese kyo kintu kipangija bavule mu bantu ba Leza. Nanshi i kipite buya kwijiba kisense kibi na bonso—ba munda nansha ba panja pa kipwilo—badi na mwikadilo wa kiboja! (1 Kodinda 5:9-11; 15:33) Boba bakimba kwikala babikalwa ba Shilo bafwaninwe ne kwepuka kwipwija mukose kubi ne myanda ya bwitwa ilombolwa mu bitabo ne ku Entelenete.—Amose 5:15; Mateo 5:28, 29.

17. Le mumweno ne ngikadilo ya ba mu Saledise ne mu Laodesea yādi namani shi twiidingakanye na mwādi mumwenine Yesu ngikadilo yabo ya ku mushipiditu?

¹⁷ Kipwilo kya Saledise kekyāikelepo kufwijibwa’ko nansha dimo, poso bantu babala-banga kete. Kyadi na ‘dijina,’ nansha mumwekelo wa kumweka bu kyūmi, ino buñumauma bwa ku mushipiditu bwikitādile, o mwanda Yesu wēkimwene bu ‘kifwe.’ Kukōkela kwakyo ku myanda miyampe kwādi ke kwa kuvuija mbila bitupu. Bine, ano ādi matope asansa! (Kusokwelwa 3:1-3) Kipwilo kya Laodesea nakyo kyādi muswelo umo onka. Kyādi kianinya byabupeta byakyo bya ku ngitu, amba, “Ne mpeta,” ino ku meso a Kidishitu kyādi bwa muntu “wamalwa, ulenga ne lusa, mulanda, mpofu, ne wamutaka.”—Kusokwelwa 3:14-17.

18. Muntu ubwanya kwepuka namani kwikala wa lufufumya ku mushipiditu ku meso a Leza?

¹⁸ Ne dyalelo nadyo mo monka, bamo badi bene Kidishitu bakikōkeji kunyuma baponenanga mu kubulwa kikōkeji. Padi balekele mushipiditu wa ino ntanda utādila mutyima wa kupēlakana obadi nao, ne kutamija batamija ngikadilo ya lufufumya ku mushipiditu mu myanda itala kwifunda Bible, milombelo, kupwila kwa bwine Kidishitu ne mwingilo. (2 Petelo 3:3, 4, 11, 12) Bine, i kipite buya bano badi namino bakōkele Kidishitu na kwibikila bupeta bwa ku mushipiditu—eyo, na “kupota kudi [Kidishitu] nsahabu mitōkejibwe mu mudilo”! (Kusokwelwa 3:18) Kwikala na buno bupeta bwabinebine i ne kwikala “bampeta ba mu mīngilo milumbuluke, ne mutyima wa kupyasakana mu kupana, ne mu kukwasha bakwabo bonso.” Bine, kwibikila bino bituntwa bilēme binebine ‘ko kwibīkila biyampe kyalwilo kilumbuluke kya kumeso, mwa kukwatyija ku būmi bwinebwine.’—1 Temote 6:17-19.

Bāfwijibwe’ko Pangala pa Kikōkeji Kyabo

19. I kufwija’ko’ka ne madingi’ka apēne Yesu kudi bene Kidishitu ba mu Semilena ne ba mu Filadefia?

¹⁹ Kipwilo kya Semilena ne kya Filadefia byo bifwa bya kutendelwa mu myanda itala kikōkeji, mwanda mikanda yēbitumīne Yesu keyādipo na matope nansha amo. Wānene boba ba mu Semilena amba: “Ndyūkile byamalwa byobe, ne bulanda bobe (nanshi wi mpeta).” (Kusokwelwa 2:9) Bano i beshile kulampe na boba ba mu Laodesea bādi beaninya byabupeta bya bwine ntanda abo nanshi balandapale kala! Eyo, Dyabola kādipo usangela kumona muntu wikele na lwitabijo ne kikōkeji kudi Kidishitu. O mwanda Yesu wādyumwine amba: “Kokikwatwa moyo wa byobya byamalwa byōsaka kumona, mhm; monapo bidi, dyabola ukidi mukwimwela bānwe bamobamo mu kifungo’mba, mutompibwe; kadi mukamona byamalwa mafuku dikumi. Ikala wabinebine byonka ne ku lufu kwine, nabya nami nkakupanga kilukwa kya būmi.” (Kusokwelwa 2:10) Yesu wāfwijije’ko ne boba ba mu Filadefia amba: “Walamine mwanda wami [nansha amba wankōkele], ne kupela dijina dyami mpika. Ino yao ngiya bukidibukidi; uminina ku kino kyōdi nakyo, mwanda wa kunena’mba, umo wakakutek[u]na kilukwa kyobe.”—Kusokwelwa 3:8, 11.

20. I kika kinenenwa amba midiyo ne midiyo ya bantu ilamine mwanda wa Yesu, ne beulamine mu ngikadilo’ka?

²⁰ Mu “difuku dya Mfumwetu,” dyāshilwile mu 1914, bashele’ko bakikōkeji ne bapwani nabo mikōko mikwabo, ibalwa pano mu midiyo ne midiyo, balamine mwanda wa Yesu mwanda bengilanga mwingilo wabo na bupyasakane ne kulama ndaminine bululame bwabo. Bamo basusukanga pangala pa kukōkela Kidishitu, mwāsusukile banababo ba mu myaka katwa kabajinji, pakwabo belwa mu tuso ne mu makomponi a buloko bwa kasusu. Bakwabo balamine mwanda wa Yesu na kwikala na ‘diso ditūkanye,’ nansha byobajokolokelwe na bantu ba ntumbo ne lwiso. (Mateo 6:22, 23) Bine, mu ngikadilo ne mu bifuko byonso, bene Kidishitu babine bendelelanga na kusangaja mutyima wa Yehova na kikōkeji kyabo.—Nkindi 27:11.

21. (a) I kiselwa’ka kya ku mushipiditu kikendelela nyeke kuselwa na kabumbo ka umpika? (b) Tukalombola namani amba bine tusakanga kukōkela Shilo?

²¹ Bine, “umpika wabinebine ne wamanwa” usumininwe kushala nyeke mukōkele Kidishitu Mfumwandi, pano potwenda tufwena ku kyamalwa kibūke. Kino kimulomba ne kuteakanya bidibwa bya ku mushipiditu pa kitatyi kifwaninwe, bya kudya kipango kya Leza. Nanshi tufwijei’ko nyeke bulongolodi bwa kiteokratike bwa Yehova pa byonso byobwitulongela. Namino tukalombola amba tukōkele Shilo, mwine ukapāla babikalwa bandi bonsololo bakikōkeji mpalo ya būmi bwa nyeke.—Mateo 24:45-47, NW; 25:40; Yoano 5:22-24.

[Kunshi kwa dyani]

Le Ukivulukile?

• I mwingilo’ka wādi wa kwingila Yesu mungya mowālailwe mu bupolofeto bwānene Yakoba kubwipi na kufwa kwandi?

• Le twitabije namani amba Yesu ye Shilo, ne i mushipiditu’ka otufwaninwe kwepuka?

• I madingi’ka a kamweno kotudi dyalelo adi mu mikanda yātumīnwe bipwilo bisamba-bibidi bya mu Kusokwelwa?

• I muswelo’ka otukokeja kwiula ba mu kipwilo kya Semilena ne kya Filadefia?

[Bifwatulo pa paje 28]

Yehova weselanga bantu bandi bakōkela “kalama” wabinebine

[Kifwatulo pa paje 29]

Lupusa lwa Satana lulengejanga kukōkela Leza ke mwanda mukomo

[Bifwatulo pa paje 31]

Kipwano kininge na Yehova kitukwashanga twikale bakikōkeji kwadi