Būmi Kupwa Kwa Kufwa—I Kika Kinena’po Bible?

“Wi biloba, kabidi i kubiloba konka kokajokela.”​—NGALWILO 3:​19.

“MULANGWE wa masusu anyeke keukwatañenepo na lukulupilo lwa buswe bwa Leza bwaswele bipangwa. . . . Kukulupila’mba kudi mfuto yanyeke ikapebwa muya pa mwanda wa bilubo bya mu myaka mityetye, pampikwa kwiushila kyaba kya kwilemununa, i kuluba mungya mulongelo muluji,” mo mwānenene Nikhilananda, filozofe mwine Hindu.

² Dyalelo bantu bavule kebetabijangapo lufundijo lwa masusu anyeke, belwalakananga pamo bwa Nikhilananda. Ne mfundijo ya kufikila pa Nirvana ne kwikala umbumo na kipangila nayo monka na monka, bantu bavule bakolelwanga bininge pa kumvwanija’yo. Nansha ke mu boba betela’mba badi na nkulupilo imanine pa Bible, mudi milangwe mishileshile ya mwikadile muya, ne kyokya kiufikilanga potufwanga. Ino Bible witufundijanga namani pa mwanda utala muya? Pa kwikijingulula, kitulomba bidi kubandaula nshintulwilo ya bishima bya Kihebelu ne Kingidiki byalamwinwe bu “muya” mu Bible.

Muya Mungya Munenena’po Bible

³ Kishima kya Kihebelu kyalamwinwe bu “muya” i neʹphesh, kitanwa misunsa 754 mu Bisonekwa bya Kihebelu. Kishima neʹphesh kishintulula namani? Mungya munenena dibuku dimo (The Dictionary of Bible and Religion), “kino kishima kifunkilanga pa kintu kyūmi kyonso, pa muntu yense mutuntulu.” Bible ubingije kino palombola mwikadile muya mu Ngalwilo 2:​7, amba: “Yehova Leza wāshilula kubumba muntu ku biloba bya panshi ne kupuja mu mapunge andi umpuya wa būmi, ebiya muntu wāikala ke muya mūmi.” (NW) Ubaivwana, amba muntu mubajinji ‘wāikele’ ke muya. Ko kunena’mba Adama kādipo na muya; ino aye mwine ye wādi muya​—pamo’nka na muntu waikala ke muñanga i muñanga. Nanshi kishima “muya” kifunkilanga pa muntu, aye yense mutuntulu.

⁴ Kishima kyalamwinwe bu “muya” misunsa katwa ne musubu mu Bisonekwa bya Kingidiki bya bwine Kidishitu i psy·kheʹ. Kino kishima, pamo bwa neʹphesh, pavule kifunkilanga pa muntu aye yense mutuntulu. Kifwa, bandaula misemwa ilonda’ko ino: ‘Muya wami ubamvutakana.’ (Yoano 12:27) ‘Moyo wāshilula kukwata myuya yonso.’ (Bilongwa 2:​43) ‘Myuya yonso ikale kukōkela bakatampe balupusa.’ (Loma 13:1) ‘Nenai na kusenga ku myuya mipungile.’ (1 Tesalonika 5:​14) ‘Mwāpandile bantu babala-banga ku mema, kushintulula ko kunena’mba, myuya mwanda kete.’ (1 Petelo 3:​20) I kimweke patōka’mba psy·kheʹ, ne neʹphesh, byonso bifunkilanga pa muntu aye yense mutuntulu. Mungya munenena mufundi Nigel Turner, kino kishima “kishintululanga kyokya kiyukilwe amba ye muntu, muntu mwine, umbidi wa ngitu mudi rûaḥ [mushipiditu] wa Leza mupujije’mo. . . . Kimanine nakampata pa muntu yense mutuntulu.”

⁵ I kyabine, mu Bible, kishima “muya” kekifunkilangapo’nka pa bantu, i ne pa banyema. Kifwa, pa kulombola mwikadile bupangi bwa bipangwa bya mu mema, Ngalwilo 1:​20 unena’mba Leza wāsoñenye amba: ‘Mema alupule bungibungi bwa myuya myūmi.’ Kadi mu difuku dikwabo dya bupangi, Leza wānene amba: ‘Ntanda ilupule myuya myūmi mwendele miswelo yayo, banyema ba nja, bilandala, ne banyema ba ntanda mwendele muswelo wabo.’​—Ngalwilo 1:​24; enzankanya na Umbadilo 31:28.

⁶ Nanshi kishima “muya” mungya mokingidijibwe mu Bible kifunkila pa muntu nansha pa nyema nansha kadi pa būmi budi na muntu nansha na nyema. (Tala kapango.) Bushintuludi buleta Bible pa muya i bupēla’tu, bubwane, kadi bwampikwa kudyambakanibwa na mafilozofi manyengakane nansha na kabutyibutyi ka bantu. Shi ke pano, kipangujo kine kikatampe kyotufwaninwe kwiipangula i kino, Mungya munenena’po Bible, i kika kifikilanga muya pa kufwa?

Bafwe Kebayukilepo Kintu

⁷ Ngikadilo idi’mo bafwe i milombolwe patōka mu Musapudi 9:​5, 10, mutangwa’mba: “Bafu ke kudi po kyobayukile nansya kimo . . . ke kudi po nansya kilongwa, nansya kumvwanizya, nansya buyuki, nansya tunangu mu [kibundu].” (Bisonekwa Bitokele) Nanshi lufu i kubulwa kwikala’ko. Mulembi wa mitōto wāsonekele amba shi muntu wafu, “walukila ku biloba byandi, mu dyodya difuku dimo dyonka mifwatakanyo yandi ībaoneka.” (Mitōto 146:4) Bafwe kebadipo ne kyobayukile nansha na kyobalonga kine.

⁸ Leza, pa kutyibila Adama nsambu, wānene amba: “Wi biloba, kabidi i kubiloba konka kokajokela.” (Ngalwilo 3:​19) Adama kādi’kopo pādi kepamubumbile Leza ku biloba bya panshi ne kumupa būmi. Pa kufwa, Adama wājokele mu ino ngikadilo. Mfuto yāmupelwe i lufu​—ke kutundulwilwapo mu kikalo kingi, mhm. Penepa muya wandi wāendele kwepi? Mu Bible kishima “muya” kifunkilanga divule pa muntu, nanshi potunena’mba Adama wāfwile, tunenenanga amba muya witwa bu Adama wāfwile. Kino kikokeja kumweka bu kyeni ku muntu ukulupile amba muya keufwangapo. Ino aye Bible unena’mba: “Mūya uloñanga bubi, kufwa ukafwanga.” (Ezekyele 18:4) Bene Levi 21:1 (NW), wiutela bu “muya mufwe” (muntu “ufwile,” Bisonekwa Bitokele). Bene Nazila nabo bādi banenwe kuleka kufwena kubwipi na “muya o-onso mufwe” (“umbidi mufwe,” Mukanda Ukola).​—Umbadilo 6:⁠6, NW.

⁹ Ino i kika kikanenwa pa lufu lwa malwa lwāfwile Letyela pa kubutula wandi mwana wa bubidi, lusekunwinwe mu Ngalwilo 35:18? Tutanga’mo amba: “Pa kukala [“kulupuka kwa,” NW] muya wandi, ne kufwa wafwa, wamwinika dijina dya bu-Benoni, [ino] shandi wamwinika bu-Benjemani.” Lelo kino kisonekwa kilombola’mba Letyela wādi na muntu wa munda wāmutambile’mo pa kufwa kwandi? Mhm, ke amopo. Vuluka, kishima “muya” kifunkilanga ne pa būmi budi na muntu. Nanshi pano, “muya” wa Letyela ushintulula’tu “būmi” bwandi. O mwanda Mabible makwabo alamwine kino kishima “pa kulupuka kwa muya wandi” bu “būmi bwandi bwādi bwenda bumupwa” (Knox), “paadi kapungila” (BB), ne “būmi bwandi bwāmulupuka’mo” (Bible in Basic English). Kekudipo kintu kilombola’mba kudi kipindi kekimweka kya ku umbidi wa Letyela kyāshele kyūmi pa kufwa kwandi.

¹⁰ Ne mwanda wa lusangukilo lwa mwanā mwana-mukaji wa kishala lusonekelwe mu 1 Balopwe shapita 17 nalo mo monka. Tutanga mu vese 22 amba, Ediya pa kulombela pangala pa nkasampe mwana-mulume, “Yehova waūmvwana diwi dya Ediya; ino mūya wa mwana’wa wamutwela monka, kadi wasanguka.” Pano napo, kishima “muya” kishintulula “būmi.” O mwanda tutanga mu bwalamuni bumo (New American Standard Bible) amba: “Būmi bwa mwana bwājokela kwadi wāikala ke mūmi monka.” Bine, bwādi būmi bwājokēle kudi uno nkasampe, ke muvwepo. Kino i kikwatañane na byānene Ediya kudi inandya mwana’mba: “Mona bidi, mwanobe [muntu aye yense mutuntulu] i mūmi.”​—1 Balopwe 17:23.

Lelo Mushipiditu I Kika?

¹¹ Bible unena’mba pafwanga muntu ‘mushipiditu wandi utamba, muntu wajokela ku biloba byandi.’ (Mitōto 146:4) Lelo kino kishintulula’mba shi muntu wafu, mushipiditu omokanga pa bute pa bute mu umbidi kewendelela nyeke na būmi? Mhm, ke-pantu mulembi wa mitōto unena monka’mba: “Mu dyodya difuku dimo dyonka mifwatakanyo yandi ibaoneka” (“mpango ya[ndi yonso ya]oneka,” BB). Shi ke pano, le mushipiditu mwine i kika, ne ‘utambanga’ mu muntu namani pa kufwa kwandi?

¹² Mu Bible, bishima byalamwinwe bu “mushipiditu” (mu Kihebelu, ruʹach; mu Kingidiki, pneuʹma) buluji bwabyo bwa pa kitako i “umpuya.” O mwanda pa kyaba kya kunena’mba ‘mushipiditu wandi utamba,’ bwalamuni bwa R. A. Knox i bwingidije kishima “umpuya utaluka mu umbidi wandi.” (Mitōto 145:4, Knox) Inoko kishima “mushipiditu” kiselele myanda mivule kupita’ko kwesa bitupu. Kifwa, Ngalwilo 7:22 ulombola mwāonakanibwe būmi bwa bantu ne bwa banyema pa Dilobe amba: ‘Bintu byonso byādi na umpuya wa bukomo [mushipiditu; mu Kihebelu ruʹach] bwa būmi bwingila mu myulu yabyo, ko kunena’mba, byonso byādi pa nshi myumu, byāfwile.’ Nanshi “mushipiditu” i bukomo bwa būmi bwingila mu bipangwa byonso byūmi, mu bantu ne mu banyema, bukwatakanibwa na kwesa nansha kufoma.

¹³ Panena Musapudi 12:7 amba shi muntu wafu, “mushipiditu ujokela kudi Leza wapene’o,” lelo kishintulula namani? Lelo kino kishintulula’mba mushipiditu utyibululanga mu lwelele, wakafika ku meso a Leza? Mhm, ke amopo. Vuluka’mba mushipiditu i bukomo bwa būmi, “ujokela kudi Leza” mu buno buluji, muntu ye-yense ufwa, kikulupiji kya kukamona’ye būmi monka kidi mu makasa a Leza kete. Enka Leza bunka bwandi ye ukokeja kwalwija muntu mushipiditu, bukomo bwa būmi, mwanda wa ekale mūmi monka. (Mitōto 104:30) Ino lelo Leza udi na mutyima wa kwikilonga?

“Ukasanguka”

¹⁴ Mu kabundi ketwa bu Betani, ku makilometele asatu kutamba ku Yelusalema, Madia ne Mata bādi badila mwanabo Lazalasa wāfwile ukidi mubishimubishi. Yesu wātenekelwe na bushiyena bwabo, mwanda wādi usenswe Lazalasa ne bakaka wandi. Yesu wāsengele namani bano bakaka wa Lazalasa? Ke na kwibasekunwinapo mānga mikutakane, mhm, i na kwibalombola bubinebine. Yesu wānene’tu amba: “Mwanenu ukasanguka,” Penepo Yesu wāenda ku kibundu, wāsangula Lazalasa​—wajokeleja būmi ku muntu wādi mufwe mafuku ke aná matuntulu!​—Yoano 11:18-​23, 38-​44, BB.

¹⁵ Lelo Mata wātulumukile byānene Yesu amba Lazalasa “ukasanguka”? Nansha dimo, ke-muntu wālondolwele amba: “Kuyūkako ngyūkile’mba, ukasangukanga ponka pa kusanguka pa difuku dya mfulo.” Wādi kala na lwitabijo mu mulao wa lusangukilo. Yesu wāmusapwila’mba: “Ami uno ne [lu]sangukilo kadi ne bumi. Yewa ungitabija nandi ukekala mumi nansha ufwile.” (Yoano 11:23-​25, MB) Kingelengele kya kujokejibwa kwa Lazalasa ku būmi kyāningishe lwitabijo lwandi ne kushimika’lo mu bantu bakwabo. (Yoano 11:45) Ino kishima “lusangukilo” kine kishintulula namani?

¹⁶ Kishima “lusangukilo” i kyalamunwe ku kishima kya Kingidiki a·naʹsta·sis, kishintulula pa bute pa bute “kwimana dikwabo.” Balamuni balamuna Kingidiki mu Kihebelu balamunanga kishima a·naʹsta·sis na bishima bishintulula “kujokela ku būmi kwa mufwe” (mu Kihebelu, techi·yathʹ ham·me·thimʹ).a Nanshi lusangukilo ludi na mulangwe wa kulangula muntu mu ngikadilo yakubulwa būmi, mu lufu​—kupa ngitu ya muntu bukomo dipya ikale monka myūmi.

¹⁷ Yehova i Leza wa tunangu twampikwa mfulo, wa lūku lubwaninine, o mwanda ukokeja kusangula muntu pakubulwa kimukomena. Kuvuluka mwādi mwikadile būmi bwa bafwe​—bumuntu bwabo, mānga yabo, ne kakintu kamo ne kamo ka kwibayukila’po​—ke mwandapo mukomo kudi aye. (Yoba 12:13; enzankanya na Isaya 40:26.) Yesu Kidishitu nandi mo monka, usakanga kusangula bafwe, ne udi na bukomo bwa kwibasangula pamo na mwaāsangwidile Lazalasa. (Enzankanya na Luka 7:11-⁠17; 8:​40-​56) Bine, Yesu Kidishitu wānene amba: “Dyuba dikāya’ko’dya bonso badi mu bibundu bivulukwa bakevwananga diwi dyandi [Yesu] ne kukatamba’mo.” (Yoano 5:​28, 29, NW) Eyo, Yesu Kidishitu wālaile amba boba bonso bavulukwa na Yehova bakasangulwa. Mungya Bible i kimweke patōka’mba muya ufwanga, ne bwanga bukapwa lufu i enka lusangukilo. Ino bantu bavule bene bādi bōmi pano ke bafwe. Lelo umbukata mwabo, i bāni bavulukwanga na Leza, batengele lusangukilo?

¹⁸ Boba bengidi ba Yehova bādi na mwiendelejo moloke bakasangulwanga. Ino kudi bantu bakwabo midiyo ne midiyo bāfwile pampikwa kuyukana shi bādi ba kubwanya kulonda misoñanya myoloke ya Leza. Bamo bādi kebayukilepo bisaka Yehova, bakwabo bābulwa kitatyi kifikile kya kwalamuka musakila Leza. Ne bano nabo bavulukwanga na Leza, nanshi nabo bakasangulwa, mwanda Bible ulaya’mba: “Kusanguka kwa bafu kudiko, kwa boloke, ne bampikwa koloka kumo.”​—Bilongwa 24:15.

¹⁹ Mutumibwa Yoano wāmwene kimonwa kisangaja kya bantu basangulwe bemene kumeso kwa lupona lwa Leza. Ulombola mokikadile amba: “Kalunga ka mema kalubula bafu badi monka; ne lufu ne Kalunganyembo [Hades, NW] nabo balubula bafu badi monka, ino batyibilwa mambo bantu bonso monka mwendele mīngilo yabo, wa yandi, wa yandi. Ebiya lufu ne Kalunganyembo baelelwe mu dijiba dya mudilo. Luno namino lo lufu lwa bidye, ke dijiba dya mudilo kadi.” (Kusokwelwa 20:12-​14) Bine ukekala mwanda mukatampe! Bafwile bonso bavulukwanga na Leza bakanyongololwa mu Hades, Sheol, ke kibundu kya bantu bonso kadi. (Mitōto 16:10; Bilongwa 2:​31) Kupwa “lufu ne Kalunganyembo” bikelwa momwa mwitwa bu mu “dijiba dya mudilo,” kyelekejo kya konakanibwa kwa lonso. Kibundu kya bantu bonso kekikekala’kopo dikwabo.

Kikulupiji Kikatampe Kine!

²⁰ Popa pakasangulwa midiyo ya bantu ku lusangukilo, kebakajokela’po ku būmi pa ntanda patupu bantu. (Isaya 45:18) Bakasangwilwa mu ngikadilo milumbuluke mpata kadi bakatana mobo a kwikala’mo, bivwalwa, ne bidibwa bya ntanda ne miseke bibalongolwelwe. (Mitōto 67:6; 72:16; Isaya 65:21, 22) I bāni bakebalongolwela bino byonso? I kimweke patōka’mba kukekala bantu bōmi mu ntanda impya kumeso kwa kushilula lusangukilo lwa pano pantanda. Le abo bene i bāni?

²¹ Kufikidila kwa bupolofeto bwa Bible kulombola’mba tudi mu “mafuku a kumfulo” a ino ngikadilo ya bintu.b (2 Temote 3:1) Panopano ponka, Yehova Leza ukemanina myanda ya bantu ne kukomba bubi bonso pano pantanda. (Mitōto 37:10, 11; Nkindi 2:​21, 22) Mu kyakyo kitatyi, i bika bikafikila boba bengidila Leza na kikōkeji?

²² Yehova kakonakanyapo babi ne boloke kumo. (Mitōto 145:20) Kashāa kalongele kintu kya uno muswelo, ne kadi kakekilongapo kitatyi kyakakomba bubi bonso pano pantanda. (Enzankanya na Ngalwilo 18:22, 23, 26.) Mukanda wa mfulo wa Bible wisambila pa “kibumbo kikatampe kīne kekibadibwapo na muntu, mhm; [kya bantu] batambile mu mizo yonso, ne mu bisaka byonso ne mu bantu, ne mu ndimi,” kilupukile mu “oa malwa makatakata.” (Kusokwelwa 7:9-⁠14) Eyo, kudi bungibungi bwa bantu bakapanda ku kyamalwa kibūke kikafudija ino ntanda imbi, ne kutwela’bo mu ntanda impya ya Leza. Mwine’mwa, bantu bakikōkeji bakamwena mu mpango ya Leza ya kutendelwa ya kukūla bantu ku bubi ne ku lufu. (Kusokwelwa 22:​1, 2) Nanshi “kibumbo kikatampe” kekikafupo nansha dimo. Bine, kino kyo kikulupiji kikatampe kine!

Būmi Pampikwa Kufwa

²³ Le tukokeja kutūla kikulupiji mu luno lukulupilo lwa kutendelwa? Bine, tukokeja! Yesu Kidishitu wālombwele’kyo kala, amba kudi kitatyi kikekalanga bantu na būmi pampikwa kumona lufu. Yesu, kumeso kwa kusangula mulunda nandi Lazalasa, wālombwele Mata amba: “Kadi yewa wa būmi mungitabije kakafupo nansha patyetye pene.”​—Yoano 11:26.

²⁴ Lelo usakanga kukekala na būmi bwanyeke mu Paladisa pano pantanda? Le wabilanga kukamona dikwabo bantu bosenswe? Mutumibwa Yoano unena’mba: “Ntanda ipita ne lwiso lwayo, ino yewa ulonga kiswa mucima kya Leza wikala ko nyeke.” (1 Yoano 2:​17, BB) Kino kyo kitatyi kya kwifunda kuyuka kiswamutyima kya Leza ne kusumininwa kwikala na būmi bukwatañene nakyo. Nabya ukekala na būmi bwanyeke mu Paladisa pano pantanda, pamo na midiyo ya bantu bakwabo balonga kala kiswamutyima kya Leza.

[Footnotes]

[Questions]

1, 2. (a) I milangwe’ka mishileshile idi na bantu itala pa Ntanda ya Baya-kalunga? (b) I kika kyotufwaninwe kubandaula mwanda wa kuyuka kyokya kifundija Bible pa muya?

3. (a) I kishima’ka kyalamwinwe bu “muya” mu Bisonekwa bya Kihebelu, ne buluji bwakyo bwa pa kitako i buluji’ka? (b) Ngalwilo 2:7 ulombola namani amba kishima “muya” kifunkilanga pa muntu yense mutuntulu?

4. I kishima’ka kyalamwinwe bu “muya” mu Bisonekwa bya Kingidiki bya bwine Kidishitu, ne buluji bwine bwa kino kishima i buluji’ka?

5. Lelo banyema i myuya? Shintulula.

6. I kika kikokeja kunenwa pa mwingidijijo wa kishima “muya” mu Bible?

7, 8. (a) Bisonekwa i bilombole patōka bika bitala pa ngikadilo idi’mo bafwe? (b) Leta bifwa bya mu Bible bilombola amba muya ufwanga.

9. Bible usakanga kulombola bika panena’mba ‘muya wa Letyela wādi wenda umulupuka’mo’?

10. Le muya wa mwanā mwana-mukaji wa kishala wāsangwilwe wāikele ‘kumutwela monka’ mu buluji’ka?

11. I kika kinenenwa’mba kishima “mushipiditu” ke kipindipo kampanda kyomokanga mu umbidi shi muntu wafu?

12. Le kishima kya Kihebelu ne kya Kingidiki kyalamwinwe mu Bible bu “mushipiditu” kidi na nshintulwilo’ka?

13. Shi muntu wafu, mushipiditu wandi ujokelanga kudi Leza mu buluji’ka?

14. I bika byānene ne byālongele Yesu byāletele lukulupilo ne busengi ku bakaka wa Lazalasa bāfwidilwe mwanabo?

15. I bika byālondolwele Mata ku byānene ne byālongele Yesu?

16. Kishima “lusangukilo” kishintulula namani?

17. (a) Mwanda waka Yehova Leza ne Yesu Kidishitu kebakolelwapo kusangula bantu? (b) Yesu wāletele mulao’ka utala pa boba badi mu bibundu bivulukwa?

18. Lelo i bāni bakasangulwa?

19. (a) I kimonwa’ka kitala pa lusangukilo kyāmwene mutumibwa Yoano? (b) I bika bikelwa “mu dijiba dya mudilo,” ne kino kishima kishintulula namani?

20. Bantu midiyo ne midiyo ba mu boba bafwile bakasangwilwa ku būmi bwa muswelo’ka?

21, 22. I kikulupiji’ka kimo kete kitengele boba badi na būmi mu “mafuku a kumfulo”?

23, 24. Shi usaka kukekala mūmi pampikwa kufwa mu Paladisa pano pantanda, i kika kyofwaninwe kulonga?

[Box on page 25]

“Muya” bu Būmi bwa Kipangwa

Pamopamo, kishima “muya” kifunkilanga pa būmi budi na muntu nansha na nyema. Kino kekiponejapo buluji budi mu Bible bushintululwa muya bu muntu nansha nyema. Tulete kifwa: Tunenanga’mba kampanda i mūmi, ko kunena’mba i muntu mūmi. Kadi tukokeja kunena monka’mba udi na būmi. Muswelo umo onka, muntu mūmi i muya. Nanshi muntu pakidi mūmi, “muya” ukokeja kutelwa bu kintu kampanda kyadi nakyo.

Kifwa, Leza wāsapwidile Mosesa amba: “Bantu bonso badi bakimba muya obe abafu.” I kimweke patōka’mba balwana na Mosesa bādi bakimba būmi bwandi. (Divilu 4:​19, NW; enzankanya na Yoshua 9:​24, NW; Nkindi 12:​10, NW.) Yesu wāingidije kino kishima mu muswelo umo onka na uno paānene amba: “Mwanā muntu [wāidile] . . . kupana muya wandi ke kikūlwa kya bavule bene.” (Mateo 20:28; enzankanya na Mateo 10:28.) Ponso pano kishima “muya” kishintulula “būmi.”

[Caption on page 25]

Bonso i myuya

[Caption on page 26]

Yesu wālombwele amba bwanga bwa lufu i lusangukilo

[Caption on page 28]

“Yewa wa būmi mungitabije kakafupo nansha patyetye pene.”​—Yoano 11:26

[Review on page 29]

Ukivulukile?

◻ I buluji’ka bwa pa kitako bwa bishima bya mu ndimi mibajinji byalamwinwe bu “muya”?

◻ I kika kifikilanga muya shi muntu wafu?

◻ Mungya Bible, i bwanga’ka bukapwa lufu?

◻ I kikulupiji’ka kikatampe kine kipelwe bantu bakikōkeji dyalelo?