Bintu Bibajinji Tūlai’byo Pa Kifuko Kibajinji!

WI MULUME kadi shandya bana. Ke ku nkotokelo ya mingilo ya kashinde dyuba, milangwe yobe keidi ku kupwila kwa pa kipwilo kwa kyolwa. Shi utaluke’tu papwa mingilo, ukamona kyaba kya koya, kushinta bisandi, ne kudya bidibwa kumeso kwa kwenda ku kupwila. Papo kapita obe wa mingilo wakufwena kakulombe wingile’ko nsaa ya ntentekelo. Kadi wakulaija kukufuta mfutwa miyampe. Abe nobe usaka lupeto.

Pakwabo wi mukaji kadi inabana. Kitatyi kyotēka bidibwa bya kyolwa, abe amba wele meso, ubamone mudita wa bisandi byambulwa kukomwa, bikwabo i bya kuvwala kesha. Papo wiipangula’mba, ‘Shi ñende nkapwile kino kyolwa, kitatyi kikwabo kya kwiya kukoma byobi byonso ngiya kwikimona kwepi?’ Abe utwelele pa kaji ka nshikije dyuba panopano, ubamone mukomene kukwatakanya mingilo ya njibo koku wabila kwikala senene mu būmi.

Nansha padi wi mwanā masomo. Madevwala a ku masomo i mayule pa meza bā mu kyobe kyumba. Makwabo emupelwe pano kepadi mafuku, ino wadi utundulwila kupwa’o kesha ke kesha, ebiya pano amo alombwa kukatūla. Papo ulanga kulomba bambutwile lupusa lwa kushala ku njibo upwe bidi madevwala pa kyaba kya kwenda ku kupwila.

Le abe usa kutūla bika pa kifuko kibajinji: i kaji ka ntentekelo’ni, i kukoma bisandi’ni, i madevwala’ni, nansha i kupwila kwa pa kipwilo? Mungya muneneno wa kumushipiditu, kutūla bintu bibajinji pa kifuko kibajinji kishintulula namani? Lelo Yehova umwene’po namani?

I Kika Kyofwaninwe Kutūla pa Kifuko Kibajinji?

Mafuku matyetye kupwa kwa bene Isalela kupebwa Mbila Dikumi, mwana-mulume umo wātenwe uboya nyala mu dya Sabado. Kino kyādi kintu kijidikwe mu Bijila. (Umbadilo 15:32-​34; Kupituluka 5:​12-​15) Lelo abe wādi wa kutyiba namani uno mwanda? Lelo wādi wa kufwila lusa uno mwana-mulume, amba le kadi, kadipo wingila mwanda wa kwikala na būmi bwabupeta, wādi’tu usasaketa kyandi kisaka? Nansha wādi wa kulanga’mba, eyo mafuku a kulama dya Sabado mu bula bwa mwaka i mavule kadi pakwabo uno Sabado wābudilwe’ye mwanda wa kukomenwa kuteakanya bya kumeso, o mwanda wādi ufwaninwe’tu kulekelwa?

Yehova aye wāmwene uno mwanda bu mwanda musumininwe. Bible unena’mba: “Kwivwana kwadi Yehova kanena Mosesa amba: Uno muntu uno’u kufwa ukafikijibwa ne ku lufu.” (Umbadilo 15:35) Mwanda waka Yehova wāsumininwe uno muswelo pa kyālongele uno mwana-mulume?

Mwanda bantu bādi na mafuku asamba a kutyaba nkuni ne nyala ne bisakibwa bikwabo bya bidibwa, bivwalwa, ne bīkalo. Difuku dya busamba-bubidi dyādi dya kwipānina ku bisakibwa byabo bya kumushipiditu. Nansha byokekyādipo kibi kuboya nyala, ino kyādi kibi kwingidija kitatyi kifwaninwe kutūdilwa butōtyi bwa Yehova ku kuboya nyala. Nansha bene Kidishitu byokebakidipo munshi mwa Bijila bya Mosesa, mwene kino kitukwasha tuboile’po ñeni ya byotufwaninwe kutangidija kumeso dyalelo?​—Fidipai 1:​10.

Pa kupwa kujokoloka myaka 40 mituntulu mu ntanda mutuputupu, bene Isalela bādi kebādi kubwipi na kutwela mu Ntanda ya Mulao. Bavule bādi ke bapungile kudya māna ādi ebapa Leza mu ntanda mutuputupu, kebābila kushinta bidibwa. Yehova wēbavuluja mwanda wa kwibakwasha bekale na mumweno mufwaninwe mwa kukatwelela mu ntanda “ikukanga mabele ne būki,” amba: “Muntu nanshi kamwenepo bumi ku bidibwa byonka, mhm, muntu umona bumi poso’nka ku byonso bitambanga mu kyakanwa kya Yehova.”​—Divilu 3:8; Kupituluka 8:⁠3.

Bene Isalela bādi baputuma pa kumona “mabele ne būki.” Mwanda kwādi bibumbo bya bulwi byādi bya kunekenya, mobo a kūbaka, ne madimi a kudima. Ino nansha byobādi na ino midimo yonso, Yehova wēbasoñenye betūdile’ko kyaba kya kulanguluka pa myanda ya kumushipiditu difuku ne difuku. Bādi bafwaninwe kwitūdila ne kyaba kya kufundija bana mashinda a Leza. Yehova wānene amba: “[Mbila yami] mu kalombolanga’yo bāna benu kwisamba’yo poshikete mu njibo yobe, ne ponanga mwishinda, kadi polāla ne polanguka pene.”​—Kupituluka 11:19.

Mwana-mulume yense mwine Isalela nansha waketutyile mu ino ntanda wādi musoñanibwe kukamweka ku meso a Yehova misunsa isatu ku mwaka. Mitwe mivule ya bisaka pa kuyuka’mba kisaka kituntulu kikamwena kamweno ka kumushipiditu mu bino byaba, yādi ipaika bakaji babo ne bana babo bene kumo. Ino lelo i ani wādi wa kulama mobo abo ne madimi ku balwana nabo pādi bisaka byabo mu lwendo? Yehova wēbalaile’mba: “[Kekudipo] nansha umo mwine muntu ukasaka ntanda yobe pokakanda kukamweka ku meso a Yehova Leza obe misungu isatu ku mwaka.” (Divilu 34:24) Kino kyādi kilomba bene Isalela bekale na lwitabijo amba shi batūle tumweno twa kumushipiditu pa kifuko kibajinji, kebakajimijapo bintu bya kungitu. Lelo Yehova wādi wabine mu binenwa byandi? Bine, wādi wabine!

Badikilai Bidi Kusaka Bulopwe

Yesu wāfundije balondi bandi kutūla byabulēme bya kumushipiditu kumeso kwa bintu byonso. Mu Bufundiji bwandi bwa ku Lūlu, wādingile bemvwaniki bandi amba: “Kemukikambakanya mityima’mba: Le tudya bika? ne byotutoma bīne le bika? ne byo tukavwala bīne bidi pi? Nanshi badikilai bidi kusaka bulopwe bwa Leza, ne boloke bwandi kumo, ebiya nankyo ne byabyo byonso [bintu bya kungitu] bikemutentekelwapo.” (Mateo 6:​31, 33) Kinondanonda na lufu lwa Yesu, bene Kidishitu bapya babatyijibwe bālondele ano madingi. Bavule bādi Bayuda ne baketutyile mu Buyuda bāendele ku Yelusalema kukasoba masobo a Pentekosa mu 33 K.K. Pobādi ku ano masobo kwālongekele mwanda wakubulwa kulaya. Bāivwene ne kwitabija myanda miyampe itala padi Yesu Kidishitu. Pa kwikala na kyaka kya kuyukila’ko bivule bitala pa lwitabijo lwabo lupya, bāshele mu Yelusalema. Byakudya papo byāshilula kusakana, ino kusaka kudya biyampe wādi mwanda mutyetye kobadi. Mwanda bāsokwele Meshiasa! Banababo bene Kidishitu bādi beabila nabo bintu byabo bya kungitu mwanda wa abo bonso bendelele na “[k]uminina monka mu lufundijo lwa batumibwa, ne . . . mu milombelo mwine.”​—Bilongwa 2:​42.

Mwenda mafuku, bene Kidishitu bamobamo bājimija kyaka kya kwimona na batōtyi nabo ku kupwila kitatyi ne kitatyi. (Bahebelu 10:23-​25) Kepabulwe padi bāikele kusanswa byabupeta, bāpelula bintu bya kumushipiditu, benda basasaketa misokwe yabo ne ya byabo bisaka. Ino mutumibwa Polo pa kupwa kudyumuna banababo kuleka kwilwa kubungakana, wāsonekele amba: “Kadi monso mo mwikadila kusanswa kwa bupeta keko; loelelwai mu byonka bintu byo mudi nabyo; ke-muntu aye mwine wanena’mba: Ami nkikakuzobololapo, nansha patyetye pene, nansha kukulekelela mpika.”​—Bahebelu 13:5.

Madingi a Polo āfikile pa kitatyi kifwaninwe. Polo wāpwile’tu kutuma uno wandi mukanda kudi Bahebelu, pāpita’nka myaka itano, bashidika bene Loma bādi bendejibwa na Cestius Gallus bāela Yelusalema mu lukalo. Bene Kidishitu bakikōkeji bāvuluka kidyumu kyēbadyumwine Yesu amba: “Po mukamonapo [kino] . . . , wa ku musaka wa njibo katūkako’mba: Ntwele mu njibo nkalupule kintu, mhm. Nansha wa mu budimi nandi kakajokamo’mba: Nkayate mutwelo wami.” (Mako 13:14-​16) Bādi bayukile amba kupanda kwabo kwādi kwimanine pa kikōkeji kyabo ku misoñanya ya Yesu, ke pa kwikalapo na kaji kayampe nansha pa mvubu ya bintu bya kungitu, ehe. Boba bālondele madingi a Polo bātūla tumweno twa kumushipiditu pa kifuko kibajinji kebākolelwepo nansha dimo kushiya mobo, twaji, bisandi, ne bituntwa byabo byonso, bānyemena ku ngulu, pamo na mwāikadile kukolelwa boba bādi na mutyima wa kusanswa lupeto.

Mwatūdila Bamo Bintu Bibajinji pa Kifuko Kibajinji Dyalelo

Bene Kidishitu bakikōkeji dyalelo bakwete na mutyika kisense kya na banababo, o mwanda bavule beelelanga’ko bakatanwa ku kupwila. Mu bifuko bimo, mudi enka twaji twa kwikombola. Tutu umo wanene mwingidi nandi ekale kumukombola mu madya Mposo bufuku, asangelwanga na bantu bavule basaka kwiolola, mwanda wa aye amone kukapwila. Batutu bakwabo bekombolanga ku kaji kambulwa kwibashila kyaba kya kukapwila mu kyabo kipwilo, bakapwila mu kipwilo kya pabwipi. Mu uno muswelo kebabulwangapo kupwila. Muntu umo wasepelele musapu mu Kanada wayukile bukidi bonka mvubu ya Kupwila kwa Masomo a Mwingilo wa Kiteokratike ne Kupwila kwa Mingilo, ino nsaa yobadi batamba ku kaji yadi imubudija kutanwa ku kupwila. O mwanda wanene kufuta mwingidi nandi wa kumwingidila pa andi mafuku mwa kukataninwa’ye ku kuno kupwila kwa kamweno.

Bantu bavule basusuka na misongo ya bukile bukya kebabulwangapo divule kupwila. Mafuku obakomenwanga kutanwa ku Njibo ya Bulopwe, balondanga mpangiko ya kupwila ku mobo abo ku telefone nansha ku bande wa kasete. Bakwete na mutyika bidibwa bya kumushipiditu bipāna Yehova kupityila kudi wandi “umpika wabinebine ne wamanwa”! (Mateo 24:​45, NW) Bene Kidishitu balela bambutwile babo banunu basepelelanga na bubine shi tutu nansha kaka waitabija kwibashadila na bambutwile mwanda wa nabo bamone kukatanwa ku kupwila kwa pa kipwilo.

Badikila Kuteakanya!

Bambutwile beyukile bisakibwa byabo bya kumushipiditu bakwashanga babo bana, nabo bakatanwe ku kupwila kwa bwine Kidishitu. O mwanda basakanga babo bana balonge madevwala enka pobakipebwa’o, kupita’ko kwialundika mulwi. Shi i difuku didi kupwila kyolwa, bana baloñanga madevwala abo kinondanonda na pobajokela kwabo kutamba ku masomo. Makayo a kwipwija mukose ne mingilo mikwabo kebibabudijangapo kupwila kwa pa kipwilo.

Abe byodi mulume kadi shandya bana, lelo utūdile kutanwa ku kupwila pa kifuko kibajinji? Shi wi mukaji ne inabana, le ubadikilanga kuteakanya mingilo yobe shē mwa kushīla’ko kyaba kya kwenda ku kupwila? Nansha wi nkasampe, lelo kyobadikilanga kutūla kumeso i madevwala obe kupwila kekulonda’ni, nansha i kupwila madevwala kealonda?

Kupwila kwa pa kipwilo i mpangiko ya buswe itūdije’ko Yehova. Tufwaninwe kulonga bukomo bwetu bonso, kukwatakanya ino mpangiko. Yehova ukakwesela shi ubadikile kutūla bintu bibajinji pa kifuko kibajinji!

[Kifwatulo pa paje 19]

Kyolwa kudi kupwila, ino udi kadi na mingilo ya kwingila. Lelo i kyepi kyokatūla pa kifuko kibajinji?