Mosesa​—Muntu wa Buswe

Buswe i kisanso kikatampe kya kusanswa bakwetu. Muntu wa buswe ulombolanga kupityila ku binenwa ne bilongwa byandi muswelo waeivwana pa boba basenswe nansha shi kulonga namino kumulomba kwipāna.

Mosesa wālombwele amba usenswe Leza. Mu muswelo’ka? Vuluka binenwa bisonekelwe mu 1 Yoano 5:3 bya amba: “Luno namino lo lusa [buswe] lwa Leza, lwa’mba tulame bijila byandi.” Mosesa wālondele uno musoñanya. Mu byonso byāmunene Leza kulonga—kushilwila ku mwingilo ulenga moyo wa kwikoka na Felo mukomokomo kutūla ne ku mwingilo wādi umweka bu upēla wa kukupila mukombo pa Kalunga Katyila—Mosesa wākōkele. Ekale shi musoñanya wādi upela nansha mukomo kuvuija, ino Mesesa wālondele’o. “E mwālongele.”—Divilu 40:16.

Mosesa wālombwele buswe bwaādi uswele banababo bene Isalela. Bādi bayukile amba Yehova wāingidije Mosesa mwanda wa kwendeja bantu bandi, o mwanda bāfwenene Mosesa na myanda yabo palapala. Tutanga amba: “Bantu baimana kwadi Mosesa, kushilwila lubanga ne ku kyolwa.” (Divilu 18:13-16) Langa’po mwādi mupungidila Mosesa kwivwana—mansá na mansá—bene Isalela bamusapwila myanda yabo! Inoko, Mosesa wādi usangedile kukwasha bantu baādi usenswe.

Kutentekela pa kwibevwana, Mosesa wādi ulombela ne pangala pa baswe bandi. Wālombele’nka ne pangala pa bantu bādi bamulonga bibi! Kimfwa, Midiamu mwanabo na Mosesa mwana-mukaji pa kwiuningila Mosesa, Yehova wamuponejeja makopo. Pa kyaba kya kusangela mfuto yāmupelwe, Mosesa wālombele kiponka na ponka pa mwanda wandi amba: “Leza, bamundape bidi nakwisashila.” (Umbadilo 12:13) Mwene i buswe bwālengeje Mosesa alombe ino milombelo yampikwa kwisakila?

Tubwanya kwiula Mosesa na kutamija buswe bukatampe bwa kuswa Leza. Buno buswe bwitutononanga tukōkele bijila byandi ne ‘mutyima onso.’ (Loma 6:17) Kitatyi kyotukōkela Yehova na mutyima wetu onso, tusangajanga mutyima wandi. (Nkindi 27:11) Ne kadi tumwenanga’mo batwe bene. Kadi, kitatyi kyotwingidila Leza na buswe bwa bine, ketukalongapo’nka bintu byoloke, ino tukasangela kwibilonga!—Mitōto 100:2.

Muswelo mukwabo otubwanya kwiula Mosesa i wa kutamija buswe bwa kwipānina bakwetu. Kitatyi kitufwena balunda nansha bantu ba mu kisaka na myanda yabo, buswe buketutonona (1) twibate mutyima bya binebine; (2) twitūle pa kyabo kyaba nansha kwiimvwana mobeimvwanina; ne (3) kwibalombola amba twibatele mutyima.

Pamo bwa Mosesa, tubwanya kulombela pangala pa baswe betu. Kyaba kimo, tubwanya kwiivwana bu ketubwanyapo kwibakwasha kitatyi kyobetulombola yabo myanda. Padi tubwanya nansha kutompola amba, “yō kintu nkyombwanya kulonga i kulombela pa mwanda obe.” Ino vuluka’mba: “Lulombelo lwa kinyinga lwa muntu mōloke ludi ne bukomo bukatampe.” (Yakoba 5:16, Dibuku Dijila) Na bubine, milombelo yetu ibwanya kutonona Yehova alongele muntu kintu kampanda Kyakadipo padi wa kulonga. Penepa, i kintu’ka kiyampe kyotubwanya kulongela baswe betu kitabukile kulombela pangala pabo?a

Le kwitabijepo amba tubwanya kuboila ñeni mivule kudi Mosesa? Nansha byaādi muntu pamo bwa batwe, wāshile kimfwa kya kutendelwa kya lwitabijo, kwityepeja ne buswe. Shi tulonge bukomo bwa kwiula kimfwa kyandi, tukamwena’mo batwe bene ne bakwetu.​—Loma 15:4.