Mwanyongolwelwe pa Kanye Kakatampe

1, 2. I muswelo’ka ubwanya kwitukwasha Loma 5:12?

LOMA 5:12 unena’mba: “Monka mwātwelele bubi mu ino ntanda kupityila ku muntu umo ne lufu kupityila ku bubi, ne lufu nalo lwasambakana ku bantu bonso mwanda bonso balongele bubi.” Uno i vese otuyukile biyampe ne otwingidijanga divule potufundija bantu myanda ya mu Bible.

² Uno vese i mutelwe misunsa mivule mu mabuku, Lelo I Bika Bine Bifundija Bible? ne Lelo I Bika Bitufundija Bible? Potwifunda shapita 3, 5, ne 6 na betu bana nansha na bantu bakwabo, i biyampe kutanga Loma 5:12. Tubwanya kwingidija uno vese pa kwibakwasha bevwanije kine kekikadilepo ntanda bu paladisa, kine kyotusakilwa kinkūlwa ne kine kyotufwila. Inoko uno vese ubwanya kadi kwitukwasha batwe bonso tutamije mutyima wetu wa kufwija’ko Yehova pa mwanda wa kipwano kyotupwene nandi. Ubwanya kwitukwasha tusumininwe ne pa mfulo kutengela bintu byaetulaile ne kumusangaja.

 3. I bika byotufwaninwe kuvuluka pa mwikadilo wetu?

³ I kya bulanda, batwe bonso twi ba bubi. Tuloñanga bilubo difuku ne difuku. Inoko Yehova i wa lusa. Uyukile amba twi ba kubulwa kubwaninina, kadi udi na mutyima wa kwitulekela. (Ñimbo ya Mitōto 103:13, 14) Yesu wētusapwidile amba tufwaninwe kulomba Leza etulekele bubi bwetu. (Luka 11:2-4) Shi Yehova wetulekela bubi botwalongele pa kala, ketufwaninwepo kadi kwibuvuluka. Lekai tubandaule muswelo ubwanya Yehova kwitulekela.

4, 5. (a) Le i bika bitukwasha twivwanije Loma 5:12? (b) Le “kanye kakatampe” kashintulula bika?

⁴ Mukanda wa Loma, nakampata shapita 6, witukwasha twivwanije muswelo ubwanya Yehova kwitulekela bubi bwetu. Mu shapita 3, twifunda’mo amba “bonso i bapye mambo.” Kadi Polo ushintulula’mba: “Ne kutelwa kobatelwa bu boloke i kyabuntu kya ku bitupu pa kanye kandi kakatampe kupityila ku bunyongolodi bwa kinkūlwa kyafutyile Kidishitu Yesu.” (Loma 3:23, 24) Kishima kya Kingidiki kyalamwinwe bu “kanye kakatampe” kidi na mulangwe wa kulonga kintu na kanye kwakubulwa kutengela kwalwijibwa kintu nansha kimo, i kintu kekingidilwepo nansha kintu kya ku bitupu.

⁵ Mwifundi umo ushintulula’mba, pavule, kino kishima kya Kingidiki kifunkilanga pa byobya bilongele Leza ne Kidishitu mwanda wa kukūla bantu ku bubi ne ku lufu. O mwanda Bushintuludi bwa Ntanda Mipya bwa mu Kiluba bwalamwine kino kishima kya Kingidiki bu “kanye kakatampe.” Tutalei byobya byētulongele Yehova ne muswelo otumwena mu kanye kandi kakatampe tamba’nka pano ne kwitupa lukulupilo lwa kumeso.

 6. I bāni babwanya kumwena mu kanye kakatampe ka Leza, ne muswelo’ka?

⁶ Byālongele Adama bubi, o mwanda bubi ne lufu i bisambukile bantu bonso bekele pano pa ntanda. Bible unena’mba “pa kilubo kya muntu umo lufu lwābikele bulopwe.” Ino Yehova wālombwele kanye kakatampe na kuleta muswelo wa kukūla bantu bonso kupityila “ku muntu umo, Yesu Kidishitu.” (Loma 5:12, 15, 17) “Kikōkeji kya muntu umo nakyo mo monka kikalengeja bavule ke boloke.” Kadi babwanya kutengela kukamona “būmi bwa nyeke kupityila kudi Yesu Kidishitu.”​—Loma 5:19, 21.

 7. Mwanda waka kyabuntu kya Leza kya kinkūlwa i kilomboji kya kanye kakatampe?

⁷ Langulukila bidi pa kino: Yehova kadipo unenwe kupāna wandi Mwana bu kinkūlwa. Ino wālombwele kanye kakatampe na kuleta kintu kya kwitukūla ku bubi ne ku lufu. I kutupu muntu nansha umo wadi mufwaninwe byobya byētulongele Leza ne Yesu. Bine twibafwijanga’ko pa kwitupa mukenga wa kulekelwa bubi ne kukamona būmi bwa nyeke! Nanshi tulombolei amba tufwijanga’ko Leza kupityila ku muswelo otwiendeja mu būmi.

 8. I mwikadilo’ka otufwaninwe kupela?

⁸ Tuyukile’mba Yehova udi na mutyima wa kwitulekela bubi nansha ke bubi bukatampe bwine. Inoko ketufwaninwepo kumona kanye kakatampe ka Yehova bu kabepelo ka kulongela’mo bintu bibi ne kulanga’mba, ‘Yehova ukandekela.’ Mu myaka katwa kabajinji, kwadi bene Kidishitu bamo bādi na uno mwikadilo’nka ne pādi batumibwa bakidi bōmi. (Tanga Yude 4.) Dyalelo, tufwaninwe kutadija kutyina’mba bakwabo baketutonona ne kushilula bityebitye kulanga uno muswelo.

9, 10. Lelo Polo ne bakwabo bānyongolwelwe namani ku bubi ne ku lufu?

⁹ Polo wāsapwidile bene Kidishitu amba i bibi mpata kulanga’mba shi bendelele na kulonga bubi, Yehova ukendelela’nka na kwibalekela. Polo wānenene’mba bādi bafwaninwe kuleka uno mulangilo mwanda ‘bāfwile ku bubi.’ (Tanga Loma 6:1, 2.) Le ko kunena namani?

¹⁰ Kupityila ku kinkūlwa, Leza wālekele Polo bubi ne bene Kidishitu bakwabo ba mu myaka katwa kabajinji. Yehova wēbashingile māni a mushipiditu ujila bekale bandi bana. Shi bālamine kikōkeji bādi ba kukabikala mūlu na Kidishitu. Ino byobākidi bōmi pano pa ntanda, le ‘bāfwile ku bubi’ muswelo’ka? Polo wāingidije kyelekejo pa kulombola’mba mwikadilo wabo wa mu būmi wāshintyile bininge. Wānenene amba Yesu pa kufwa, wāsangwilwe na ngitu ya mushipiditu keifu. O mwanda mwine lufu “kelukimubikalapo bufumu monka.” Mu muswelo umo onka, bene Kidishitu nabo bādi pamo na abo ke bafwe kala. Būmi bwabo bwāshintyile bininge mwanda kebākidipo kadi batadilwe na bya kusakasaka bya bubi. Tamba pene’pa bādi ke balonga bukomo bwabo bonso na kwiendeja mu muswelo usangaja Leza. Bādi ke “bafwe pa mwanda wa bubi ino bōmi pa mwanda wa Leza mudi Kidishitu Yesu.”​—Loma 6:9, 11.

11. Le bene Kidishitu dyalelo i ‘bafwe ku bubi’ muswelo’ka?

¹¹ Le batwe netu le? Lelo twi ‘bafwe ku bubi’ muswelo’ka? Padi twadi tulonga bintu bibi pa kala pampikwa kuyuka mumwena Yehova bilongwa byetu. Twadi “bu bapika ba disubi ne ba kujilula bijila.” (Loma 6:19, 20) Inoko kitatyi kyotwefundile mu Bible muswelo witusakila Leza twiendeje, twashintyile būmi bwetu, twepāna batwe bene kwadi ne kubatyijibwa. Tamba pene’pa tudi na mutyima wa kukōkela Yehova ne kwiendeja mu muswelo umusangaja. ‘Twakūdilwe ku bubi,’ twaikala “bapika ba boloke.”​—Loma 6:17, 18.

12. Lelo i butongi’ka bufwaninwe kutonga umo ne umo motudi?

¹² Inoko, tukidi na butongi bwa kutonga. Polo wānenene’mba: “Bubi kebwakyendelela kwimubikala bulopwe mu imbidi yenu ya lufu, kemukōkela bya kusakasaka byayo.” (Loma 6:12) Nanshi tubwanya kufundula nansha kunekenya milangwe ne bya kusakasaka bya bubi. Wiipangule’po bidi’mba: ‘Lelo ndekanga bya kusakasaka bibi bitame mu mutyima wami ne kumfikija ku kulonga bubi? Nansha le mfudulanga’byo na kampeja bukidi?’ Shi tudi na mutyima wa kufwija’ko Leza pa kanye kandi kakatampe, nabya tukalonga bukomo bwa kumusangaja.

13. I bika bitukulupija’mba tubwanya kulonga byoloke?

¹³ Mu myaka katwa kabajinji, bantu bamo ba mu Kodinda bādi bangivi, bana-balume balāla bana-balume, ba makoji, ba kutōta bilezaleza, ne bankolwankolwa, bāyukile Yehova ne kumusanswa, bāshinta. Bādi ke bakwatwa bumvu bilongwa byabo bya kala. (Loma 6:21; 1 Kodinda 6:9-11) Bene Kidishitu ba mu Loma nabo bādi basakilwa kushinta uno muswelo. Polo wēbasapwidile’mba: “Nansha kwendelela kupāna bya ku ngitu yenu ku bubi pamo bwa byabulwi bya bukondame, ino mwipānei kudi Leza pamo bwa bōmi batambile mu bafwe, ne kupāna bya ku ngitu yenu kudi Leza pamo bwa byabulwi bya boloke.” (Loma 6:13) Polo wādi ukulupile’mba bakalonga byoloke kadi bakendelela kumwena mu kanye kakatampe ka Leza.

14, 15. Lelo i bika byotufwaninwe kwiipangula?

¹⁴ Mo mobikadile ne dyalelo. Padi batutu ne bakaka bamo badi beendeja pamo wa boba ba mu Kodinda. Ino pobayukile Yehova, bashintyile. Bāikala’nka na abo ‘baoijibwa tō.’ Pa kusangaja Yehova, batwe bonso twashintyile būmi bwetu. Enka ne pano pene tusakanga kulombola’mba tufwijanga’ko Leza pa kanye kandi kakatampe. O mwanda twi basumininwe kulwa na bya kusakasaka byetu bya bubi pa mwanda wa kwingidila Yehova mu bwetu būmi.

¹⁵ Na bubine, tufwaninwe kwepuka kulonga bubi bukatampe na bwādi bulonga bantu bamo ba mu Kodinda. Ketufwaninwepo kwendelela kulonga buno bubi ne kutengela’mba Leza uketulekela pa kanye kandi kakatampe. Ino, le bubi bubwanya kumonwa na bantu bamo bu butyetye nabo le? Le tusumininwe kulonga bukomo bwetu bonso mwanda wa kukōkela Yehova mu bintu byonso?​—Loma 6:14, 17.

16. Le tubayuka namani’mba tufwaninwe kwepuka bubi kebutelelwepo mu 1 Kodinda 6:9-11?

¹⁶ Langulukila padi mutumibwa Polo. Wālembele amba: “Amiwa ne wa ku ngitu, mupotejibwe ku bubi. Mwanda nkivwanijepo byonoñanga. Byobya byonsaka, e byonkiloñangapo nyeke; ino byobya byonshikilwe’ko e byononga.” (Loma 7:14, 15) Nansha byākadipo ulonga bintu bitelelwe mu 1 Kodinda 6:9-11, Polo wādi witabije amba ukidi wa bubi. Byaādi usaka kusangaja Yehova, wālwile mwanda wa kuleka kulonga bintu bibi. (Tanga Loma 7:21-23.) Twiulei kimfwa kyandi na kulonga byonso byotubwanya mwanda wa kukōkela Yehova.

17. Mwanda waka ufwaninwe kwikala wampikwa budimbidimbi?

¹⁷ Kimfwa, tuyukile’mba batwe bengidi ba Yehova tufwaninwe kwikala bampikwa budimbidimbi. (Tanga Nkindi 14:5; Efisesa 4:25.) Ketusakengapo kwikala bwa Satana, “shandya bubela.” Kadi tuvulukei amba ba Ananaisa ne wandi mukaji bāfwile mwanda bābepele. Nanshi ketwakibepai. (Yoano 8:44; Bilongwa 5:1-11) Inoko kubulwa budimbidimbi ke enkapo’tu kuleka kubepa kete. Na bubine, shi tufwijanga’ko Leza pa kanye kandi kakatampe, nabya tukekala bampikwa budimbidimbi ne mu myanda mikwabo.

18, 19. Lelo kwikala wampikwa budimbidimbi kushintulula bika?

¹⁸ Muntu ubwanya kwikala wa budimbidimbi aye papo kubepa mpika. Kimfwa, Yehova wāsapwidile bene Isalela’mba: “Kukolwe kwiba nansha kukedimbañena, mhm, nansha kwibepejañena bubela.” Mwanda waka? Mwanda Yehova wānenene amba: “Mukekalanga bajila, mwanda amiwa Yehova Leza wenu ne ujila.” (Levi 19:2, 11) Nansha shi ketubepangapo, ino shi tulengeja bakwabo bakulupile myanda ya bubela, nabya tubaikala ba budimbidimbi.

¹⁹ Kimfwa, muntu ubwanya kusapwila mukulumpe wandi wa kaji nansha bobengila nabo amba usakilwa kutamba ku kaji kumeso kwa kitatyi mwanda wa kwenda ku lupitalo. Inoko buno nanshi ke bubingapo bwine bwasakila kwendela. Ino aye usakanga’tu kutamba kumeso kwa kitatyi mwanda wa kwenda kuketūkija. “Kwenda ku lupitalo” kwandi i kukapita’tu bukidi kokwa kobapotejanga malawa ne kwenda mu bilo ya dokitele kukajokeja ndeni. Lelo uno muntu i wa kubulwa budimbidimbi’ni nansha udimbanga bakwabo? Uno muntu walengeja bakwabo bakulupile myanda ya bubela. Kyaba kimo bantu badimbanga bakwabo mwanda wa kumwena’mo kintu kampanda kyobasaka nansha’tu mwanda wa kwepuka mfuto. Ino batwe tukōkele Yehova wānenene amba: “Kukolwe . . . kukedimbañena.” Tusakanga kulonga byobya byamona bu byoloke ne bu bijila.​—Loma 6:19.

20, 21. I bika bikwabo byotukepuka shi tufwija’ko Leza pa kanye kandi kakatampe?

²⁰ Na bubine twi bepuke makoji, bunkolwankolwa ne bubi bukwabo bukatampe. Ino kutentekela pa bino tufwaninwe ne kwepuka kintu kyo-kyonso kekisangajapo Yehova. Kimfwa, ketwepukangapo’tu enka busekese ino i ne kwipwija mukose kubi. Ketulekangapo’tu enka kukolwa ino i ne kuleka mutomeno mpata. Pa kino tufwaninwe kulonga bukomo pa kukomena matompo pamo bwa ano, kadi bibwanikanga.

²¹ Twitungilei kitungo kya kulonda byobya byānenene Polo amba: “Bubi kebwakyendelela kwimubikala bulopwe mu imbidi yenu ya lufu, kemukōkela bya kusakasaka byayo.” (Loma 6:12; 7:18-20) Na bubine ketubwanyapo kwepukididila bubi bonso. Inoko shi tulwe na miswelo yonso ya bubi, nabya tubalombola na bubine amba tufwijanga’ko Leza ne Kidishitu pa kanye kakatampe kobalombwele kotudi.

22. Le i mpalo’ka yotubwanya kutengela shi tufwija’ko Yehova pa kanye kandi kakatampe?

²² Yehova wetulekele bubi bwetu kadi ubwanya kwendelela na kwitulekela. Bine tumufwijanga’ko pa kanye kandi kakatampe! Nanshi tulongei bukomo bwa kwepuka bintu byamona bu bibi, nansha shi bantu bakwabo kebebimonepo bu bubi. Le i mpalo’ka yotubwanya kutengela shi tulonge namino? Polo amba: “Pano, byomwakūdilwe ku bubi kemudi bapika ba Leza, mwangulanga bipa mu buujila, kadi ku mfulo, būmi bwa nyeke.”​—Loma 6:22.