Tukwatei bakwetu na bulēme

“Mu kwilemeka namo, [badikilai] kwilemeka banwe bene na bene.” —LOMA 12:10, MB.

KISHINTE kibadikile kino kyaimanine pa mvubu ya madingi atanwa mu Kinenwa kya Leza anena’mba: ‘Banwe bonsololo vwalai mutyima wa bumvubumvu ku umo ne mukwabo; ke-muntu Leza upelele bakibengo, ino upānanga buntu kudi boba betyepeje.’ (1 Petelo 5:5) Muswelo umo wa kwivwika batwe bene mutyima wa bumvubumvu i kukwata bakwetu na bulēme.

² Kishima “bulēme” i kingidijibwe divule mu Bible mwanda wa kulombola kalēmo, kabango, ne mutyika otufwaninwe kukwata nao bakwetu. Bakwetu botulēmekele twibakwatanga na kanye, na bulēmantu, tuteja milangwe yabo, twibalongela pa nongelo bintu byobetulomba. Boba badi na mutyima wa bumvubumvu kebakolelwangapo pa uno mwanda. Ino ku boba badi na mutyima wa kwitatula, kukwata bakwabo na bulēme bwabinebine i kintu kibakolelanga mpata, o mwanda bakimbanga kwilamika ku bakwabo na lushiñanya nansha na umpolejo wa bubelabubela.

Yehova ulēmekanga bantu

³ Yehova aye mwine i mulete kifwa mu myanda itala kukwata bantu na bulēme. Wāpangile bantu na bwanapabo bwa kwitongela; ne kadi kebamwenepo bu mashini, mhm. (1 Petelo 2:16) Kifwa, Yehova paālombwele Abalahama amba usa konakanya Sodoma pa mwanda wa bubi buvule bwādi’mo, Abalahama wāmwipangwile amba: “Lelo uloteja boloke ne babi pamo’ni? Shi padi kudi boloke makumi atano mu kibundi’kya, lelo uloteja’kyo ne kwikipandija mpika pa mwanda wa boloke makumi atano badi monka?” Yehova wālondolola amba ubwanya kupandija kibundi pa mwanda wa boloke 50. Abalahama po pene wāendelela na kumuzenza na kwityepeja. Amba le shi mwatanwa nansha 45? 40? 30? 20? 10? Yehova wākulupija Abalahama amba kakonakanyapo Sodoma shi mudi nansha boloke dikumi.—Ngalwilo 18:20-33.

⁴ Yehova wādi uyukile amba mu Sodoma kemudipo boloke dikumi, inoko wālēmeka Abalahama na kuteja mulangwe wandi, wēsamba nandi bya bulēme. Mwanda waka? Mwanda Abalahama ‘wādi mwitabije mudi Yehova; Yehova nandi wāmutela bu moloke.’ Abalahama wātelwa “bu-mulunda na Leza.” (Ngalwilo 15:6; Yakoba 2:23) Ne kadi, Yehova wāmwene amba Abalahama i muntu ulēmekele bakwabo. Lupata lwa kufwila myaba polwālupukile pa bukata bwa bakumbi bandi ne ba Lota mwanā mwanabo, Abalahama wālēmekele Lota na kumunena abadikile kutonga kifuko kyasaka. Lota wātonga ntanda yaāmwene bu yo miyampe, ino Abalahama wākashikata kungi.—Ngalwilo 13:5-11.

⁵ Yehova wālemekele ne Lota. Kumeso kwa konakanya Sodoma, wānene Lota amba nyemena mu ngulu. Ino Lota wāpela kwenda’ko; mwanda wādi wabila pa Zola pabwipi, nansha kino kibundi byokyādi mu kifuko kyādi kisa konakanibwa. Yehova wānena Lota amba: “Monapo nanshi nakwitabija pa kino, nankyo nkikonakanyapo kibundi kyonena’kya.” Yehova wākwata Lota na bulēme, muntu wa kikōkeji, wāmulongela bintu byaāmulombele.—Ngalwilo 19:15-22; 2 Petelo 2:6-9.

⁶ Yehova paātumine Mosesa akajokele mu Edipito kukalupula bantu Bandi mu bupika ne kunena Felo alekelele bantu ba Leza bende, Mosesa wālondolwele amba: “A! Mfumwami! amiwa nkidipo ne kampeja-bukidi ka kwisambila.” Yehova wākulupija Mosesa amba: “Amiwa [nkekala] kyakanwa kyobe ne kukakulaija kyokya kyokanena.” Ino Mosesa wēkaka monka. Yehova wāmukulupija kadi amba nkatuma Alone mwanenu ukakwikadila bu kyakanwa kyobe.—Divilu 4:10-16.

⁷ Mu bino byonso, Yehova wālombwele kusaka kwasakanga kulēmeka bakwabo, nakampata boba bamwingidila. Yehova wēbalongele byonso byobādi basaka nansha byobyādi bishile na mulangwe wandi umbajinji, wālongela monka ponso pokyādi kikwatañene na mpango yandi.

Yesu wādi ulēmekele bakwabo

⁸ Yesu wāiwile Yehova mu kulēmeka bakwabo. Mwana-mukaji umo wādi ubela luba lwa muyeye tamba myaka 12 wāile mu kibumbo kya bantu. Bañanga bākankalwa kumundapa. Mu Bijila bya Mosesa, uno mwana-mukaji wādi wa disubi, kādipo wa kwikala mu kibumbo nabya. Wābembelela kunyuma kwa Yesu, wāmutenga ku bisandi ne kupwibwa wāpwibwa. Yesu kāimaninepo pa kukonkotola tumyanda twa mwendele Bijila, nansha kumufunina pangala pa byobya byaālongele. Ino wātadile’tu enka ngikadilo yādi’mo uno lolo, wāmulēmeka, amba: “Abe mwana’mi lwitabijo lobe lubakupandija. Endapo ne ku mutyima talala! Ubapwibwa ku [luba lukomo lowadi ubela].”—Mako 5:25-34; Levi 15:25-27.

⁹ Kitatyi kikwabo, mwana-mukaji mwine Fenisea wānene Yesu amba: “Bamfwile’ko lusa Mfumwami, abe Mwana Davida, mwana wami wamonwamo na malwa makata kudi mudemona.” Yesu byaādi uyukile amba wātuminwe bidi ku muzo wa Isalela, ke ku Bajentailapo, wāmulondolola’mba: “Kebiyampepo, kutekuna bidibwa bya bāna [bene Isalela] ko wibyela tubwa [Bajentaila], mhm.” Mwana-mukaji nandi amba: “Eyo, mwa! Mfumwami, ne tubwa nato nanshi tuboyanga tubukuku tupona ku mesa kudi bamfumwato.” Penepa Yesu amba: “Abe mwana-mukaji nanshi lwitabijo lobe i lukatampe lwine, kikulongelwe monka mōsakile.” Mwana mwana-mukaji wa mwine lolo’o wābeluka. Yesu wālēmekele uno Mujentaila pa mwanda wa lwitabijo lwandi. Kadi pa kyaba kya kwita Bajentaila bu bambwa ne mikila, ino aye wēbeta bu “tubwa,” mwityilo wa kutyepeka mambo, ulombola mutyima wandi wa lusa.—Mateo 15:21-28.

¹⁰ Yesu wādi ufundija nyeke bandi bana-babwanga mvubu idi mu kwikala na mutyima wa bumvubumvu ne mu kukwata bakwabo na bulēme, mwanda bādi bakidi na kamushipiditu ka ami-bidi. Difuku dimo, bāpwile’tu kwipatanya, Yesu wēbepangula’mba: ‘Kyo mwadi mwipatenya i kika?’ Abo bāuba nyā, mwanda “badi bāya bēpatanya mu dishinda’mba: Lelo mukatampe pano i ani?” (Mako 9:33, 34) Ne bufuku bukya Yesu kafu, “mwatalukile lupata monka mu bukata bwabo’mba: Le i wepi usa kutumba ke mukatampe mwine?” (Luka 22:24) O mwanda pa bidibwa bya Pashika, Yesu wāpungulwile “mema mu kyoilo washilula koija maulu a bāna-bandi-babwanga.” Bine, i bufundiji bukatampe! Yesu wādi Mwanā Leza, kupwa’tu Yehova ke aye mu umbuo onso wa diulu ne ntanda. Ino, wāfundije bandi bana-babwanga kintu kya bulēme na kwiboija maulu. Amba: “Napu kwimushīla kala mwakulondela’mba, monka mo nemulongela nenu mukalongele monka.”—Yoano 13:5-15.

Polo wādi na bulēme

¹¹ Mutumibwa Polo wādi ukwete bakwabo na bulēme, mwanda wāiwile Kidishitu. (1 Kodinda 11:1) Wānene amba: “Nansha kusaka kutumbikwa ku bantu mpika . . . Ino nanshi, twadi bakikōkeji kyonka mubukata mwenu, pamo bwa inamuntu udi na bāna ba ku kyadi.” (1 Tesalonika 2:6, 7) Inamwana wamusha utanga mutyima ku bana bandi banuke. Polo pa kwikala ke mwine Kidishitu, wāfundile kwikala na mutyima wa bumvubumvu ne kukwata bene Kidishitu bakwabo na bulēme, wibakwatakanya na kanye. Mu kwibalongela bino byonso, wādi ulēmeka ne bwanapabo bwabo bwa kwitongela, pamo na mulombwela mwanda wālongekele paādi mukutwe mu Loma.

¹² Onesemusa mupika wānyemene mfumwandi wāivwene bufundiji bwa Polo. Wāikala ke mwine Kidishitu kadi mulunda na Polo. Mfumwandya umpika wādi Filemone, nandi mwine Kidishitu wādi ushikata mu Azia Minele. Polo wālombwele mwādi mumukwashisha Onesemusa mu mukanda waātumine Filemone amba: “Naswele na’mba, ekale nami kuno.” Ino Polo wāalwija Onesemusa kudi Filemone, wāmusonekela ne kumusonekela’mba: “Nkisakilepo kulonga, nansha kimo, kya kubulwa kwīla umutyima obe, amba buyampe bobe bwakēkala bwa kūminijibwa, kuswilamo abe mwine mpika.” Polo kāsakilepo kushikatyija Onesemusa mu Loma amba mwanda’po ndi mutumibwa, mhm, ino wālēmekele Filemone. Ne kadi Polo wādingile Filemone ekale kulēmeka Onesemusa, na kumumona bu “mutabuke ne umpika, ke mwanetu, muswedibwe pakatampe pēne.”—Filemone 13-16.

Kukwata bantu na bulēme mu ano mafuku

¹³ Kinenwa kya Leza kidingila’mba: “Mu kwilemeka namo, [badikilai] kwilemeka banwe bene na bene.” (Loma 12:10, MB) Kino kishintulula amba ketufwaninwepo kutengela amba bakwetu babadikile bidi kwitukwata na bulēme, batwe bo ba kushilula. “Kekukēkala muntu, nansha umo, wakwisakila bya aye mwine, poso byonka bya mukwabo.” (1 Kodinda 10:24; 1 Petelo 3:8, 9) Nanshi bengidi ba Yehova bafwaninwe kukimba pa kukwatyila na bulēme ba mu kisaka, balunda bene Kidishitu mu kipwilo, ne ba panja pa kipwilo bene.

¹⁴ Bible unena’mba: “Mutwe wa mwana-mulume i Kidishitu; ino mutwe wa mwana-mukaji, i mulume.” (1 Kodinda 11:3) Yehova unena ukoma amba balume bafwaninwe kukwatakanya bakaji babo pamo’nka na mukwatakeninye Kidishitu kipwilo. Balume i basoñanibwe mu 1 Petelo 3:7 kupa “bulēme bakaji, byo badi bwa kintu kya bukomo butyetye, [kya bwana-bukaji, NW].” Mulume ukokeja kupa mukaji bulēme na kutūkanya mutyima shē umuteja, ne na kubanga milangwe yandi yaleta. (Ngalwilo 21:12) Shi kekudipo kibi kidi’po, ukokeja nansha kubadikila kumulongela byasaka ne kumukwatakanya na kanye. “Mukaji nandi alemeke mulumyandi.” (Efisesa 5:33) Umuteja, pambulwa kufwila kupityija byasaka kumeso, nansha kumupelula ne kumufutulula. Ufwaninwe kwikala na mutyima wa bumvubumvu, pampikwa kukimba kutādila mulume, nansha shi udi na manwa mapite a mulume mu myanda kansangwa.

¹⁵ Mu kipwilo kya bwine Kidishitu mudi namo bafwaninwe kupebwa bulēme bwa pa bula, kifwa banunu. “Ukamutalukila wa mvwi ku mutwe ne kukafwa kipala mpala ya mununu [mwana-mulume nansha mwana-mukaji].” (Levi 19:32) Nakampata boba ke bengidile Yehova na kikōkeji myaka mivule, mwanda “mutwe wa mvwi i kilongo kya ntumbo, [shi utanwa] mu dishinda dya boloke.” (Nkindi 16:31) Batadi bafwaninwe kuleta kifwa na kukwata balunda nabo bene Kidishitu ke balāle myaka mivule kwibapita abo na kabango kebafwaninwe. Eyo, ne banunu nabo bafwaninwe kukwata bankasampe na bulēme, nakampata boba badi na kiselwa kya kukumba luombe.—1 Petelo 5:2, 3.

¹⁶ Bankasampe bafwaninwe kulēmeka bambutwile babo: “Bānwe bāna, kōkelai bakwimubutula monka mudi Mfumwetu, ke-kintu i kyendelemo biyampe. Lemeka shobe ne inobe mwine kumo; (kyo kijila kibajinji kino kya pa mwanda-wamulao) amba umone biyampe, shē, ne myaka yobe īvule ya kwikala panopantanda.” Bambutwile nabo balēmeke babo bana, mwanda i basoñanibwe ‘kuleka kusomba babo bana ku bukalabale; ino bebatamije biyampe monka mu madingi ne mu lufundijo lwa Yehova.’—Efisesa 6:1-4; Divilu 20:12.

¹⁷ Bakwabo bafwaninwe kukwatwa na bulēme i boba baputumina mu mingilo ya kipwilo, i amo: ‘Bakulumpe balelañana biyampe nabo bafwaninwe kupebwa bulēme pabidi, nakampata boba baputumina mu mingilo ya kunena ne kufundija.’ (1 Temote 5:17) Muswelo umo wa kwibapa buno bulēme i kulonga kyokya kinena Bahebelu 13:17 amba: “Kōkelai boba bemulelele, ne kwibakōkelelela.”

¹⁸ Lelo tufwaninwe kukwata ne boba ba panja pa kipwilo na bulēme? I amo. Kifwa, twi basoñanibwe amba: “Bantu bonso bēkale kukōkela bakatampe balupusa.” (Loma 13:1) Bano bakatampe balupusa batelelwe pano i bambikavu bene ntanda balekelwe na Yehova amba babikale kufika ne pobakapingakanibwa na Bulopwe bwandi. (Danyele 2:44) Nanshi tufwaninwe kulambula “kudi abo bonso mo kyendelemo, musonko wende ku bamusonko; milambu nayo konka ku bamilambu; moyo nao, mo monka, nao ku batyinwa moyo; ne buleme nabo bwikale konka ku bakulemekwa buleme.” (Loma 13:7) Tufwaninwe “[kulēmeka] bantu bonso [bana-balume ne bana-bakaji].”—1 Petelo 2:17.

¹⁹ Nansha byotufwaninwe kupa ne boba ba panja pa kipwilo bulēme, ino ivwana, Kinenwa kya Leza kitukoma’mba: “Monka motwakamwena mwakulongela, tulonge biyampe ku bakwetu bonso, ino ku boba badi mu kipango kya kwitabija bo bene.” (Ngalatea 6:10) Eyo, muswelo mulumbuluke wa ‘kulonga biyampe’ ku bakwetu i kutamija kyaka kyabo kya kumushipiditu na kwibafundija byobatondwa. (Mateo 5:3) Tubwanya kulonga kino na kulama byobya bituvuluja mutumibwa Polo amba: “Pyasakana umone kwitabijibwa kudi Leza bu sendwe, wampikwa ne kyafwijibwa bumvu, wakolokela monka mu [kinenwa kya bubinebine].” Shi twikale kukwatakanya na bwino mikenga yonso yotumona ya kupāna bukamoni, ‘tuvuija ne pa mfulo mwingilo wetu,’ nankyo ke enkapo biyampe kete byotulonga ku bonso, ino tubebakwata ne na bulēme.—2 Temote 2:15; 4:5.

Kulēmeka Yehova

²⁰ Yehova ulēmekele bipangwa byandi. Nanshi i kyendele’mo netu twikale kumupa bulēme. (Nkindi 3:9; Kusokwelwa 4:11) Kinenwa kya Yehova kinena kadi amba: “Boba bandemeka, nami nkebalemeka, kadi boba bamfutulula bakalemekwa patyetye’tu.” (1 Samwele 2:30) Pānenwe Felo wa Edipito amba lekelela bantu ba Leza bende, wālondolwele na kibengo amba: “Lelo Yehova i ani le? O ñivwana diwi dyandi”? (Divilu 5:2) Aye Felo utuma bibumbo byandi bya bulwi kukapondakanya bene Isalela, Yehova wākalañanya mema a Kalunga Katyila mwanda wa kupandija Isalela. Bene Edipito pa kulonda, Yehova wājokeja mema. “Makalo a Felo ne divita dyandi dine, [Yehova] waela’byo mu kalunga-kamema.” (Divilu 14:26-28; 15:4) Kibengo kya Felo kya kupela kulēmeka Yehova kyāmufikija kubi.—Mitōto 136:15.

²¹ Beleshazale mulopwe wa Babiloni nandi monka na monka, wāpelele kulēmeka Yehova. Pa masobo andi, wāfutulwile Yehova pa kutomena vinyu mu bipungwa bikola bya nsahabu ne bya ndalama byāselelwe mu tempelo ya mu Yelusalema. Koku utomena’mo, koku utendela baleza bandi ba bujentaila. Ino Danyele mwingidi wa Yehova wāmulombola’mba: “Kwiubijepo mutyima obe . . . Ino wezunzula abe mwine padi Mfumwandya mūlu.” Mu bonka bufuku’bwa, Beleshazale wāipaibwa, ne bulopwe bwandi bwine bwāyatwa.—Danyele 5:22-31.

²² Mu myaka katwa imbajinji K.K., Mulopwe Helode wādi wisamba ku meso a bantu, nabo baningija mawi amba: “Dino i diwi dya [leza], kedidipo dya muntu, mhm.” Uno mulopwe wakubulwa mvubu kāpelelepo kupebwa ino ntumbo, wāitabija’yo. Ponka’po “mwikeulu wa Yehova wamukupila ne kumukupila, . . . ke-muntu [kadipo] utumbije Leza ntumbo, mhm.” (Bilongwa 12:21-23) Helode wētumbije aye mwine, kātumbijepo Yehova, o mwanda wāipailwe. Bendeji ba bipwilo ba mu yabo myaka’ya nabo kebādipo balēmekele Leza, mwanda bādi bakuta bitumba bya kwipaya Yesu Mwanā Leza. Baludiki bamo bādi bayukile amba Yesu ufundijanga bubinebine, ino kumulonda mpika, “ke-bantu badi basenswe kutumbikwa ntumbo ku bantu kudi Leza’ko patyetye.” (Yoano 11:47-53; 12:42, 43) Muzo onso mutuntulu kewādipo ulēmekele Yehova nansha Yesu, Ntunguluji wandi waātongele. O mwanda Yehova nandi kāendelelepo na kwibapa bulēme, wēbaleka bonakanibwe, abo ne tempelo yabo mine. Wālama enka būmi bwa boba bādi bamulēmekele, balēmekele ne wandi Mwana.—Mateo 23:38; Luka 21:20-22.

²³ Yewa yense usaka kukekala na būmi mu ntanda impya ya Leza pasa konakanibwa ino ngikadilo idi’ko dyalelo, ufwaninwe kulēmeka Leza ne Kidishitu Yesu, wandi Mwana, ne kwibakōkela. (Yoano 5:22, 23; Fidipai 2:9-11) Bonsololo bapela kwibalēmeka “bakatyibibwa ku ntanda’ya.” Ino babuluji balēmekele Leza ne Kidishitu, bebakōkele, bo “bakekalanga mu ntanda’ya.”—Nkindi 2:21, 22.

Kupituluka’mo

◻ Kulēmeka bakwabo kushintulula bika, ne Yehova wālongele bika bilombola amba ulēmekele bakwabo?

◻ Ba Yesu ne Polo bālēmekele bakwabo muswelo’ka?

◻ I bāni bafwaninwe kulēmekibwa mu ano etu mafuku?

◻ Mwanda waka tufwaninwe kulēmeka Yehova ne Yesu?

[Study Questions]

 1, 2. (a) I bika byotufwaninwe kulonga bilombola amba tudi na mutyima wa bumvubumvu? (b) Bible wingidije divule kishima “bulēme” mu muswelo’ka, ne i bāni kebakolelwangapo kukwata bakwabo na bulēme?

 3, 4. Yehova wālombwele namani bulēme kudi Abalahama, ne mwanda waka?

 5. Yehova wālēmekele Lota muswelo’ka?

 6. Yehova wālēmekele Mosesa muswelo’ka?

 7. Mwanda waka Yehova usakanga kulēmeka bakwabo?

 8. Yesu wālēmekele namani mwana-mukaji wādi ubela luba lukomo?

 9. Yesu wālēmekele Mujentaila umo muswelo’ka?

10. I bufundiji’ka bukatampe bwāfundije Yesu bandi bana-babwanga, ne mwanda waka kyādi kifwaninwe ebafundije?

11, 12. Polo paāikele ke mwine Kidishitu, i bika byaāfundile, ne wāingidije muswelo’ka kino kifundwa mu myanda itala Filemone?

13. Loma 12:10 witulomba kulonga bika?

14. I muswelo’ka ufwaninwe ba mulume ne mukaji kwikwata na bulēme?

15. I kabango’ka kafwaninwe kukwatwa nako banunu, nabo bafwaninwe kulonga’po bika?

16. Bambutwile ne bana bafwaninwe kwilēmeka muswelo’ka?

17. I bāni bafwaninwe ‘kupebwa bulēme pabidi’?

18. I bika byotufwaninwe kulonga ku boba ba panja pa kipwilo?

19. I muswelo’ka otukokeja ‘kulonga biyampe’ ku bakwetu ulombola amba twibakwete na bulēme?

20. I kika kyāfikile Felo ne bibumbo byandi bya bulwi, ne mwanda waka?

21. Mwanda waka Yehova wālwile Beleshazale, ne byāfudile namani?

22. (a) Mwanda waka bukalabale bwa Yehova bwāakile pa bendeji ba Isalela ne pa babo bantu? (b) Yehova upānanga buntu bwandi kudi bāni, ne i bika bilupukanga’ko?

23. I bika byotufwaninwe kulonga tukamone kushikata mu ntanda impya ya Leza? (Mitōto 37:9-11; Mateo 5:5)

[Picture on page 27]

Yehova wālēmekele Abalahama na kubanga kuzenza kwandi

[Picture on page 31]

Mu busongi bulumbuluke, ba mulume ne mukaji bepanga bulēme abo bene na bene