Endelelai Kwilombola Buswe bwa Ndamatyidile Banwe Bene na Bene

1-2. Le i bubinga’ka bwendele’mo botudi nabo bwa kwilombwela buswe bwa ndamatyidile batwe bene na bene?

TUDI na bubinga bwendele’mo bwa kwilombwela buswe bwa ndamatyidile batwe bene na bene. Le i bubinga’ka? Tala malondololo aleta nkindi isonekejibwe ku bukomo bwa mushipiditu: “Kokaleka buswe bwa ndamatyidile ne kikōkeji bikutaluke. . . . Nabya ukamona katōkwe ne bujinguludi buyampe ku meso a Leza ne a muntu.” “Muntu wa buswe bwa ndamatyidile umwenanga’mo aye mwine.” “Yewa ense ulondalonda boloke ne buswe bwa ndamatyidile ukamona būmi, boloke, ne ntumbo.”​—Nki. 3:3, 4; 11:17, kunshi kwa dyani; 21:21.

² Ino nkindi itela bubinga busatu botufwaninwe kulombwela buswe bwa ndamatyidile. Bubajinji, shi tulombola buswe bwa ndamatyidile tukekala balēme ku meso a Leza. Bwa bubidi, shi tulombola buswe bwa ndamatyidile tumwenanga’mo batwe bene. Kimfwa, tupwananga kipwano kya mpwaninine na bakwetu. Bwa busatu, kwendelela kulombola buswe bwa ndamatyidile kuketuletela madyese mu mafuku āya kumeso, ke būmi bwa nyeke kadi. Na bubine, tudi na bubinga bwendele’mo bwa kutejeja ano madingi a Yehova a amba: “Mwilongelei bintu na buswe bwa ndamatyidile ne na lusa.”​—Zek. 7:9.

 3. Le i bipangujo’ka byotusa kulondolola mu kino kishinte?

³ Mu kino kishinte, tusa kwisambila’mo pa bino bipangujo biná. I bāni botufwaninwe kulombola buswe bwa ndamatyidile? Le i ñeni’ka yotubwanya kuboila ku mukanda wa Luta pa kulombola buswe bwa ndamatyidile? I muswelo’ka otubwanya kulombola buswe bwa ndamatyidile dyalelo? Le i bika bimwenanga’mo boba balombola buswe bwa ndamatyidile?

 4. Le i muswelo’ka otubwanya kwiula Yehova mu kulombola buswe bwa ndamatyidile? (Mako 10:29, 30)

⁴ Enka na motwefundile’kyo mu kishinte kibadikile, Yehova ulombolanga buswe bwandi bwa ndamatyidile—enka ku boba bamusenswe ne bamwingidila. (Dan. 9:4) Tusakanga ‘kwiula Leza, pamo bwa bana baswedibwe.’ (Ef. 5:1) O mwanda tusenswe kulombola buswe bwa ndamatyidile ku batutu ne bakaka.​—Tanga Mako 10:29, 30.

5-6. Le kishima “lulamato” kibwanya kufunkila pa kipwano kya muswelo’ka?

⁵ Nenu mwitabije amba shi twivwanije senene mushintulwila buswe bwa ndamatyidile, nabya tukabwanya kulombola’bo batutu ne bakaka. Pa kwivwanija biyampe buswe bwa ndamatyidile, tutalei mobukwatañenine na lulamato mungya molwingidijibwanga divule. Tubandaulei kino kimfwa.

⁶ Dyalelo tubwanya kutela muntu waingila myaka mivule mu soshete imo bu mwingidi wa lulamato. Ino myaka yonso ingile uno muntu na ino soshete kemwene na mwimaniji wayo nansha umo. Padi ke ponsopo paadi usangela butyibi bwadi buletwa na ino soshete. Kadi kadipo usenswe ino soshete, ino wadi wingila’ko mwanda wa mfutwa yaadi upebwa. Shi kasokwelepo kaji kayampe kupita kano, ukendelela kwingila ku ino soshete kufika ne byatambula pansho.

7-8. (a) Le i bika bitononanga muntu alombole buswe bwa ndamatyidile? (b) Mwanda waka tusa kwisambila pa mavese amoamo a mu mukanda wa Luta?

⁷ Kintu kishiyañanya lulamato lwisambilwe’po mu musango 6 na buswe bwa ndamatyidile i kukanina kwa mutyima kwa muntu. Le i kika kyādi kilengeja bantu ba Leza batelelwe mu Bible balombole buswe bwa ndamatyidile? Boba bādi balombola buswe bwa ndamatyidile, kebādipo bebulombola mwanda bādi banenwe kulonga nabya, ino kwādi i kusaka kwa mutyima wa abo bene. Twisambilei pa kimfwa kya Davida. Wāsakile kulombola buswe bwa ndamatyidile kudi mulunda nandi Yonafane, nansha shandya Yonafane byaādi usaka kwipaya Davida. Myaka mivule pa kupita’po na pāfwile Yonafane, Davida wāendelele kulombola buswe bwa ndamatyidile kudi Mefibosheta mwanā Yonafane.​—1 Sa. 20:9, 14, 15; 2 Sa. 4:4; 8:15; 9:1, 6, 7.

⁸ Tubwanya kwifunda bintu bivule pa buswe bwa ndamatyidile na kubandaula mavese amoamo a mu mukanda wa Luta. Le i ñeni’ka yotubwanya kuboila ku bantu batelelwe mu uno mukanda pa buswe bwa ndamatyidile? I muswelo’ka otukengidija mu kipwilo ino ñeni yotuboila’ko?b

 9. Mwanda waka Naomi wāfudile ku kunena’mba i Yehova wādi umulwa?

⁹ Mu mukanda wa Luta, tutana’mo mānga ya Naomi, ya muko wandi Luta, ne ya Boaza, mwana-mulume wādi utyina Leza, mwine wādi mubutule wa mulumya Naomi. Pa mwanda wa kipupo kya nzala kyātwelele mu Isalela, Naomi, wandi mulume, ne bandi bana babidi bāvilukidile mu Moabu. Mwine’mwa, mulumya Naomi wāfwa. Bandi bana babidi bāsonga, ino kya bulanda nabo bafwa. (Luta 1:3-5; 2:1) Ano makambakano ālengeje Naomi atyumukwe mutyima bininge, ne kubulwa kikulupiji. Kuno kutyumukwa mutyima kwāmulengeje afule ku kunena’mba i Yehova wadi ulwa nandi. Tala byaānenene pa mwaādi kamwena Leza: “Kuboko kwa Yehova kubaungalamukila.” “Mwinē Bukomo Bonso waludija būmi bwami bininge.” Kadi wābwejeje’ko amba: “Yehova . . . ye ulwa nami kadi Mwinē Bukomo Bonso ye waundetela kyamalwa.”​—Luta 1:13, 20, 21.

10. Le Yehova wālongele namani pa binenwa bisansa bya Naomi?

¹⁰ Le Yehova wālongele namani pa bino binenwa bisansa bya Naomi? Kāelelepo uno mwingidi wandi wādi mutyumukwe mutyima. Ino, wāmwivwanine lusa. Yehova wivwanije amba: “Kumweshibwa malwa kubwanya kutwala muntu wa tunangu ku bulubi.” (Mus. 7:7) Inoko Naomi wādi ukisakilwa bukwashi pa kwitabija’mba Yehova kamwelelepo. Le Yehova wāmukweshe namani? (1 Sa. 2:8) Wālengeje Luta akwashe Naomi na kumulombola buswe bwa ndamatyidile. Luta wākweshe muko wandi na mutyima umo ne na kanye, ealuje mu ñeni ne ku mushipiditu. Le i ñeni’ka yotuboila ku kimfwa kya Luta?

11. Le i bika bilengejanga batutu ne bakaka ba mityima miyampe bakwashe boba batyumukilwe mutyima?

¹¹ Buswe bwa ndamatyidile bwitulengejanga tukwashe boba batyumukilwe mutyima. Pamo’nka bwa Luta wādi ulamete Naomi, batutu ne bakaka ba mityima miyampe nabo dyalelo, balamatanga banababo mu kipwilo batyumukilwe mutyima. Basenswe batutu ne bakaka kadi basangelanga kulonga byobabwanya mwanda wa kwibakwasha. (Nki. 12:25, kunshi kwa dyani; 24:10) Kino kikwatañene na madingi āletele Polo amba: “Mwisambei mu muswelo usenga boba banyoñame pa mityima, kwashai bazoze, tūkijijai bonso mutyima.”​—1 Ts. 5:14.

12. Divule dine le i muswelo’ka muyampe wa kukwasha tutu nansha kaka utyumukilwe mutyima?

¹² Divule, muswelo muyampe obwanya kukwasha tutu nansha kaka utyumukilwe mutyima i kumuteja senene ne kumulengeja eivwane amba umusenswe. Leza ukumonanga potá uno mukōko mulēme wa Yehova mutyima. (Ñim. 41:1) Kisonekwa kya Nkindi 19:17 kinena’mba: “Yewa ufwila mupēlulwe lusa wapujanga Yehova, Aye nandi ukamulubwilanga pa byobya byalonga.”

13. Le Luta wādi mwishile namani na Olepa, mwanda waka butyibi bwākwete Luta kyādi kilongwa kya buswe bwa ndamatyidile? (Tala kifwatulo pa kibalu.)

¹³ Tubwanya kadi kwivwanija biyampe buswe bwa ndamatyidile na kubandaula byātene Naomi pa kupwa kwa kufwilwa mulume ne bana babidi. Pāivwene Naomi amba: “Yehova wate bantu bandi mutyima webape byakudya,” wākwata butyibi bwa kujokela kwabo. (Luta 1:6) Bako bandi bonso babidi baānza kujoka nandi. Ino mu dishinda, Naomi wālombola bano bana-bakaji misunsa isatu amba bajokele ku Moabu. Le bālongele’po namani? Tutanga’mba: “Olepa wafifya inandi muko wajoka. Ino Luta wamulamata.” (Luta 1:7-14) Pa kutonga kujoka, Olepa wālondele byāmulombwele Naomi. Ino Luta wālongele bivule kupita byāmulombwele Naomi. Nandi wādi na bwanapabo bwa kujoka, ino byaādi usenswe Naomi buswe bwa ndamatyidile, wāsaka kushala nandi mwanda wa kumukwasha. (Luta 1:16, 17) Luta wātongele kulamata Naomi, ke mwandapo amba wādi unenwe kumukwasha, ino i mwanda wāsakile kulonga namino. Buno butyibi bwākwete Luta kyādi kilongwa kya buswe bwa ndamatyidile. Le i ñeni’ka yotuboila ku ino nsekununi?

14. (a) Le i butongi’ka butoñanga batutu ne bakaka dyalelo? (b) Kukwatañana na Behebelu 13:16, le i bitapwa bya muswelo’ka bisangajanga Leza?

¹⁴ Buswe bwa ndamatyidile bwitulengejanga twielele’ko kukwasha bakwetu. Pamo’nka bwa mu mafuku a kunyuma, dyalelo nadyo batutu ne bakaka i batonge kulombola buswe bwa ndamatyidile ku banababo mu lwitabijo, enka ne boba bokebemwene nabo kashā. Kimfwa, shi abaivwana’mba kubalongeka kimpengele kya kipangila, basakanga ponka na ponka kuyuka muswelo wa kukwasha’ko. Shi kudi muntu watanwa na makambakano mu kipwilo, kebekakangapo kumukwasha mu miswelo mipotoloke. Pamo’nka bwa bene Masedonya ba mu myaka katwa kabajinji, nabo baloñanga bukomo bwa kukwasha bakwabo. Bapānanga kitatyi ne bintu byabo “kupita ne pa muswelo wabo,” mwanda wa kukwasha batutu ne bakaka bafudilwe. (2 Ko. 8:3) Bine, Yehova usangalanga bininge pamona buswe bwa uno muswelo!​—Tanga Bahebelu 13:16.

15-16. Le Luta wālombwele namani amba kālekele’byopo?

¹⁵ Tubwanya kuboila ñeni miyampe mivule mu kubandaula muswelo Luta waākweshe Naomi. Tutalei’ko imoimo.

¹⁶ Ketwakilekai’byo. Luta paāsakile kwenda na muko wandi ku Yuda, Naomi wāpelele bidi. Ino Luta kālekele’byopo. Kwalupuka bika? “Naomi pa kumona’mba Luta ukimba’nka kwenda nandi, waleka kumunekenya.”​—Luta 1:15-18.

17. I bika biketukwasha twendelele kuleka’byo mpika?

¹⁷ Ñeni yotuboila’ko: Bilombanga kwikala na kitūkijetyima pa kukwasha muntu mutyumukwe mutyima, ino ketufwaninwepo kuleka’byo. Kaka usakilwa bukwashi ubwanya dibajinji kupela tumukwashe.c Ino buswe bwa ndamatyidile buketutonona tulonge bukomo bwa kumulamata. (Ngt. 6:2) Koku tukulupile amba uketabija tumukwashe ne kumusenga.

18. Le i bika padi byādi bibwanya kusansa Luta?

¹⁸ Kokiloba. Naomi paāfikile na Luta mu Betelema, Naomi wētana na balondakani nandi ba kala. Wēbalombola’mba: “Nadi muyulwe ponaendele, ino Yehova wanjokeja makasa.” (Luta 1:21) Langa’po mwādi mwa kwiivwanina Luta pa kwivwana bino binenwa bya Naomi! Luta wātambile kwabo mwanda wa kukwasha Naomi. Luta wādidile nandi, wāmusenga, kadi wāenda nandi ne lwendo lwa mafuku mavule. Nansha nankyo, Naomi wānenene amba: “Yehova wanjokeja makasa.” Bino binenwa bya Naomi bilombola’mba kāitabijepo nansha amba Luta wāmukweshe, muntu kamulekelepo. Bine, ye bino byāsense Luta bininge! Inoko wālamete Naomi.

19. I bika biketukwasha tulamate mwanetu mutyumukwe mutyima?

¹⁹ Ñeni yotuboila’ko: Dyalelo, kaka mutyumukwe mutyima ubwanya dibajinji kwitunena bintu bitusansa ku mutyima, nansha shi tulonga bukomo bwa kumukwasha. Inoko ketulobengapo. Tulamatanga kaka usakilwa bukwashi ne kulomba Yehova etukwashe tumone muswelo wa kumusenga.​—Nki. 17:17.

20. Le i bika byākweshe Luta aleke kukōka?

²⁰ Kankamika boba basakilwa bukwashi. Luta wālombwele buswe bwa ndamatyidile kudi Naomi, ino pano Luta nandi wādi kasakilwa kukankamikwa. Yehova wāingidije Boaza pa kumukankamika. Boaza wānena Luta amba: “Yehova akupale mpalo pa byowalongele, kadi wikale na mfutwa mibwaninine itamba kudi Yehova Leza wa Isalela, mwanda ubaiya kufyama munshi mwa mapapa andi.” Bino binenwa byātengele Luta ku mutyima bininge. Luta wālondolola Boaza’mba: “Ubaunsenge ne kwisamba na mwingidi obe bikulupija.” (Luta 2:12, 13) Bino binenwa bya Boaza byākankamikile Luta aleke kukōka.

21. Mungya Isaya 32:1, 2, le i bika biloñanga bakulumpe ba kilelo?

²¹ Ñeni yotuboila’ko: Boba balombola buswe bwa ndamatyidile ku bakwabo, nabo basakilwanga kukankamikwa kyaba kimo. Pamo bwa Boaza wākulupije Luta amba bilongwa byandi bya kanye byamwenwe, ne dyalelo nadyo, bakulumpe bayukile kutadija, bafwijanga’ko batutu ne bakaka ba buswe pa kukwasha kobakwashanga bakwabo. Bino binenwa bya kufwija’ko, bipanga bano batutu ne bakaka bukomo bobasakilwa mwanda wa baleke kukōka.​—Tanga Isaya 32:1, 2.

22-23. Le mumweno wa Naomi wāshintyile namani ne mwanda waka? (Ñimbo ya Mitōto 136:23, 26)

²² Kitatyi pa kupita’po, Boaza wāpele ba Luta ne Naomi kyabuntu kya byakudya bivule. (Luta 2:14-18) Le Naomi wālongele namani pa buno buntu bwa Boaza? Wānenene amba: “Eselwe dyese na Yehova mwine kakankelwepo kumwekeja buswe bwandi bwa ndamatyidile ku bōmi ne ku bafwe.” (Luta 2:20a) Kuno shako ko kushinta kwāshintyile Naomi mumweno wandi! Mafuku kunyuma paādi na misanshi wānenene amba: “Yehova . . . ye ulwa nami.” Ino pano wanena na nsangaji amba: “Yehova . . . kakankelwepo kumwekeja buswe bwandi bwa ndamatyidile.” Le i bika padi byākweshe Naomi ashinte mumweno wandi?

²³ Ku mfulo, Naomi wāshilwile kumona bukwashi bwa Yehova mu būmi bwandi. Yehova wāingidije Luta amukwatakanye mu lwendo lwa ku Yuda. (Luta 1:16) Kadi Naomi wāmwene bukwashi bwa Yehova pēbapēle Boaza, umo wa mu “bakūdi” babo byakudya bivule.d (Luta 2:19, 20b) Ye uno wēneneje amba, ‘Naivwanija bine amba Yehova kandekelepo nansha dimo. Udi nami nyeke.’ (Tanga Ñimbo ya Mitōto 136:23, 26.) Bine, Naomi wāsangele bininge mwanda ba Luta ne Boaza kebālekele’byopo kumukwasha. Tubwanya kufwatakanya’mba bonso bāsangele pa kumona Naomi wingidila monka Yehova na nsangaji.

24. Mwanda waka tusakanga kulombola nyeke buswe bwa ndamatyidile ku banabetu mu lwitabijo?

²⁴ Le i bika byotwefunda mu mukanda wa Luta pa buswe bwa ndamatyidile? Buswe bwa ndamatyidile bwitutononanga twendelele kukwasha batutu ne bakaka badi mu makambakano pampikwa kuleka’byo. Kadi bwitulengejanga twipāne mwanda wa kwibakwasha. Bakulumpe bafwaninwe kukankamika boba balombola buswe bwa ndamatyidile ku bakwabo. Potumona banabetu kebengidila monka Yehova na nsangaji, tusangalanga bininge. (Bil. 20:35) Ino le i bubinga’ka bukatampe botulombwelanga nyeke buswe bwa ndamatyidile? I mwanda tusakanga kwiula ne kusangaja Yehova, Leza “muyule buswe bwa ndamatyidile.”​—Div. 34:6; Ñim. 33:22.