‘Lelo Mutyima Obe Udi Biyampe Kondi?’

“Twaya nami pamo, umone bupyasakane bwami bwa padi Yehova.”​—2 BALOPWE 10:16.

MWAKA wa 905 K.K.K. wādi mwaka wa kwalamuka kukatampe mu Isalela. Kubwipi kwa myaka 100 kunyuma, Yehova wākalañenye bulopwe bwa Isalela pangala pa bupondo bwa Solomone. (1 Balopwe 11:​9-​13) Yuda, bulopwe bwa kunshi, wābikalwa na Lehaboma mwanā Solomone; ino Isalela, bulopwe bwa kungala, wābikalwa na Mulopwe Yeloboame mwine Efelaimi. Bya bulanda, bulopwe bwa kungala bwāshilula na bishoto. Yeloboame kādipo usakila bantu bandi kwenda’bo ku bulopwe bwa kunshi kukatōta ku tempelo, kutyina’mba bakekala na mulangwe wa kujokela ku njibo ya Davida. Penepo wāshimika mutōtelo wa kyana kya ñombe mu Isalela, enka namino, wāshiya mutōtelo wa bilezaleza wāendelele mu myaka yonso yābikele bulopwe bwa kungala.​—1 Balopwe 12:26-​33.

² Pa kubikala kwa Ahaba, mwanā Omidi, po pene bintu byābipīla’ko. Mwanda wādi na Yezebele, mukaji wa ntanda ingi, wāshinsakenye mutōtelo wa Bala kadi wāipaya ne bapolofeto ba Yehova. Ahaba kāmukandile’byopo nansha patye, nansha byādi bimudyumuna mupolofeto Ediya pakubulwa kafinda. Ino mu 905 K.K.K., Ahaba wāfwa, ebiya wandi mwana Yolama wābikala. Pano kitatyi kya kusubula ntanda kyābwana. Edisha, mpingakani wa Ediya, wāyukija mudyavita Yehu amba Yehova usa kukushinga māni wikale mulopwe umpya wa Isalela. Mwingilo wandi i mwingilo’ka? I kutukija njibo ipile mambo ya Ahaba ne kulubula kinongo kya mashi a bapolofeto āmwangile Yezebele!​—2 Balopwe 9:​1-​10.

³ Yehu, muntu mukōkele ku mbila ya Leza, wāipaija Yezebele wanshikani, papo wāshilula kutōkeja Isalela na kutukija njibo ya Ahaba. (2 Balopwe 9:⁠15–​10:14, 17) Kadi wāmona wa kumulunga’ko kuboko. “Pa kutaluka popa watana Yonadaba mwan[ā] Lekaba wiya kumutundaila, kabidi wamwimuna, kamunena’mba: Lelo mutyima obe udi biyampe [kondi], mwikadile mutyima wami kudi obe mutyima’ni, a? Kwivwana kudi Yonadaba walondolola’mba: Udi biyampe. Yehu nandi amba: Shi i nankyo nanshi nsambijenga. Kadi nandi wamusambija; penepo wamutentamija mu dikalo dyandi. Byobiya aye wanena’mba: Twaya nami pamo, umone bupyasakane bwami bwa padi Yehova. Ino enka namino bamutentamija mu dikalo dyandi.”​—2 Balopwe 10:15, 16.

⁴ Yehonadaba (witwa ne bu Yonadaba) kādipo mwine Isalela. Inoko mungya dijina dyandi (dishintulula amba “Yehova I Mwitabe,” “Yehova I Mukatampe,” nansha amba “Yehova I Kyaba Bulāle”) wādi mutōtyi wa Yehova. (Yelemia 35:6) Kunena na bubine, wāsepelele mpata pa kumona ‘bupyasakane bwa Yehu bwa padi Yehova.’ Mwanda waka tunena namino? Mwanda kwitana kwandi na mulopwe mushingwe-māni wa Isalela kekwādipo kwa kwitulukila. Yehonadaba wādi “wiya kumutundaila,” kadi pa kino kitatyi Yehu wādi ke mupwe kala kwipaya Yezebele ne bantu bakwabo ba mu njibo ya Ahaba. Yehonadaba wāyukile mwanda obādi bendela paāitabije lwito lwa Yehu lwa kukanda mu dikalo dyandi. Kētupilepo pa kwikala ku mutamba wa Yehu​—ne wa Yehova​—mu buno bulwi bwādi pa bukata bwa mutōtelo wabine ne wabubela.

Yehu wa Ino Myaka ne Yehonadaba wa Ino Myaka

⁵ Dyalelo, bintu bisa kwalamuka bikatampe’nka panopano ku bantu bonso, monka mobyāalamukile pa kala ku Isalela mu 905 K.K.K. Kitatyi pano kekidi pabwipi ponka kya Yehova kutōkeja pano panshi bibibibi byonso bilupukile ku lupusa lwa Satana, ne mutōtelo wabubela kumo. Lelo Yehu wa ino myaka i ani? Ke ungipo, mhm, i Yesu Kidishitu, wisambīlwe’po bino binenwa bya bupolofeto amba: “Vwala kipete kyobe mu munda, abe mukatakata mwine, ntumbo yobe ne bulopwe bobe. Kadi mu bya bulopwe bobe enda utentamine umone biyampe, pa mwanda wa bu-binebine, ne kikōkeji ne boloke.” (Mitōto 45:​3, 4) Yesu udi na bantunguluji bandi pano panshi, ke ‘Isalela wa Leza’ kadi, ubundilwe na bene Kidishitu bashingwe-māni “bālamine bijila bya Leza, ne kulamata ku busapudi bwa Yesu.” (Ngalatea 6:​16; Kusokwelwa 12:17) Tamba 1922, bano banababo na Yesu bashingwe-māni badyumunanga pakubulwa moyo kwiya kwa nsambu ya butyibi bwa Yehova.​—Isaya 61:​1, 2; Kusokwelwa 8:7–​9:​21; 16:​2-​21.

⁶ Bene Kidishitu bashingwe-māni kebadipo kasuku. Monka mwāidile Yehonadaba kutundaila Yehu, ne bantu bavule batambile mu mizo nabo mo monka, bāyanga kwitaba Yesu, Yehu Mukatakata ne bantunguluji bandi badi pano pantanda balamete ku mutōtelo wabine. (Zekadia 8:​23) Yesu wēbatelele bu yandi “mikōko mikwabo,” bo bonka bāikele kupotololwa senene mu 1932 bu Yehonadaba wa ino myaka udingakene na yewa wa kala, bāityilwe ‘kukanda mu dikalo’ dya Yehu wa ino myaka. (Yoano 10:16) Namani? Na ‘kulama bijila bya Leza’ ne na kusapula na bashingwe-māni “busapudi bwa Yesu.” Mu ino myaka, abo bonso basapulanga myanda miyampe ya Bulopwe bwa Leza bubikale, bwendejibwa na Yesu Mulopwe. (Mako 13:10) Mu 1935 bano “Bayonadaba” bāyukilwe senene amba kyo akyo “kibumbo kikatampe” kitelelwe mu Kusokwelwa 7:​9-​17.

⁷ Tamba mu myaka ya 1930, ba mu kibumbo kikatampe ne banababo bashingwe-māni i bekwate’ko na kininga, babingija mutōtelo wabine. Bavule umbukata mwabo bepaibwanga pa mwanda wa lwitabijo lwabo mu matanda amoamo a Kutunduka ne a Kushika kwa Bulaya, a Kulampe Kutunduka, ne a mu Afrika. (Luka 9:​23, 24) Mu matanda makwabo, bakutwanga, bamo bayoibwa, bakwabo bapangwapangwa. (2 Temote 3:​12) Bine, buno i bukamoni bulombola’mba badi na lwitabijo! Mwanda Lapolo wa Mwaka wa Mingilo wa 1997 ulombola’mba kekudipo kibakalanga, i basumininwe kwingidila Leza. ‘Mityima yabo idi nyeke biyampe’ ku mutyima wa Yesu. Kino kyamwekele patōka mu mwaka wa 1997, mwadi basapudi ba Bulopwe 5599931, bavule umbukata mwabo i “Bayonadaba,” baingile masaa 1179735841 mu mwingilo wa kusapula busapudi bwa Yesu.

Bakisapula na Bupyasakane

⁸ Yehu wādi mutumbile mu kwendeja dikalo lubilo​—kino kilombola’mba wādi mupyasakane byabinebine mu kuvuija mwingilo wāmupelwe. (2 Balopwe 9:​20) Yesu, Yehu Mukatakata, i mutelwe bu muntu ‘udibwa’ na bupyasakane. (Mitōto 69:9) Kekudipo widilwe kino, bene Kidishitu babine dyalelo i bayukane pa mwanda wa bupyasakane bwabo. Mu kipwilo ne ku meso a bantu bonso, i bekwate’ko na “[ku]sapula uno mwanda . . . mo pafikila, ne mo kepafikile.” (2 Temote 4:2) Buno bupyasakane bwabo bwamwekele nakampata mu bula bwa kipindi kibajinji kya mwaka 1997, palupwilwe kishinte mu Mwingilo Wetu wa Bulopwe kyadi kikankamika basapudi bavule kwingila mwingilo wa bu pania mukwashi. Ntanda ne ntanda yadi mītungile kibalwa kya bapania bakwashi kya kubwanya. Lelo kwalupukile bika? I kintu kyakutendelwa kashaā! Misambo mivule yapityije ne pa kibalwa kine kyoyadi ītungile. Kifwa Ekwatele, wetungile 4 000, ino mu kweji 3 waletele lapolo wa bapania bakwashi 6 936. Jampani waletele lapolo wa buvule bwa bapania 104 215 mu ino myeji yonso isatu. Mu Zambia, mwetungilwe kufikila pa bapania bakwashi 6000, ino lapolo wa kweji 3 wadi nabo 6414; kweji 4 na 6532; kweji 5 na 7695. Bapania bonso pamo, bakwashi ne balonso, badi 1110251, kuno i kwilundila’ko kwa bipindi 34,2 pa katwa kupita mu 1996!

⁹ Mutumibwa Polo wālombwele bakulumpe ba mu Efisesa’mba: “Nkyatyinine kwimusapwila nansha kimo kya kwimuloelelwa ku mityima, mhm. Nadi nemufundijija pa kitango kya bantu, ne ku mōbo ku mōbo.” (Bilongwa 20:20) Batumoni ba Yehova dyalelo balondanga kifwa kya Polo kya kwenda kusapula myanda miyampe ku njibo ne njibo na bupyasakane. Eyo, kutana bantu ku mobo abo ke mwandapo upēla. O mwanda “umpika wabinebine ne wamanwa” ukankamikanga basapudi ba Bulopwe kufikila bantu mu bīkwe, mu bipito, mu byabu, mu biwanza mwiolola bantu​—konso konso kutanwa bantu. (Mateo 24:45-​47, NW) Bipa bilupukanga’ko i byakutendelwa.

¹⁰ Mu Kopenage, mu Danemalake, kakisumpi katyetye ka basapudi kadi kapāna bukamoni mu bipito panja pa mangala a kudiye. Tamba mu kweji 1 kutūla mu kweji 6, baponeje mapepala 4 733, besambile na bantu bavule, kadi balongele kujokelamo kupya kuvule mpata. Basapudi bavule ba mu ntanda’yo badi pano na bantu bobashīlanga mapepala mu mikenza ya busunga. Mu vile imo mwikalanga nsoko mikatampe dyabutano dyonso, muyulanga beni tununu ne tununu. Mwine’mo, kipwilo kitūdile’ko mpangiko ya busapudi bwa mu nsoko bwa kitatyi ne kitatyi. Mu mwaba mukwabo, basapudi bendanga bapempula masomo na mabuku adi na myanda mivule isenswe badimu.

¹¹ Mu Hawaii namo mwalongelwe bukomo bwa kufikila boba bonso bapiñwanga ku mobo. Mu myaba miyampe mukongwilanga bantu (bipito, biwanza, nshīko ne mu bilumbo bya myotoka), tubundi twa mufula, mikenza ya busunga ne ku biwanza bya maamviyo, busapudi bwa ku telefone, bwa mu byendwa nabyo (busapudi bwa mu myotoka), ne mu bipango bya masomo. Baloñanga buninge bwa kuleka kupa Batumoni bavule mwaba umo, ne kwibalombola senene mwingilo obapelwe. Buno bulongolodi bulondwa na kininga buyampe namino bo bonka budi ne mu matanda mavule. Kino kyo kyalengeja kutana bantu basepelela musapu bavule kupita batanwanga mu mwingilo wa ku njibo ne njibo.

Twimanijei Pototo

¹² Mu matanda mavule mu 1997, Batumoni ba Yehova balongelwe bintu bisansa mutyima, babepelwa bubela ne kwelelwa mabila a kwibasambila. Ino abo ne kutelententa mpika! (Mitōto 112:​7, 8) Badi bavuluka milombelo ya mulembi wa mitōto wānene’mba: “Bakwitatula abankutyila bubela; ne mutyima wami onso nkalamininanga bitongwe byobe.” (Mitōto 119:69) Kuno kulamikilwa bimyanda byabubela i bukamoni’tu bulombola amba bene Kidishitu babine i bashikibwe, pamo’nka na mwātobele’kyo Yesu. (Mateo 24:9) Bino byonso pavule bibatunyanga. Kifwa, mwana-mulume umo wa mu Belejike watangile kishinte kimo kifutulula Batumoni ba Yehova kyadi mu dipepala ditumbe dilupulwanga difuku ne difuku. Luno lunsamfwa-kanwa pa kumusansa, waiya ku kupwila ku Njibo ya Bulopwe dyayenga dyalondele’po, amba nkemwene ami mwine. Walomba kwifunda Bible na Batumoni, pano waendelela kumeso lubilolubilo lonka. Mafuku a kunyuma, wadi umo wa mu kibumbo kya batumbula. Kifundwa kyandi i kimukwashe, pano ke mulumbwa wa bene, kekudipo mwikalwa nandi utatana kuno kwandi kwalamuka. Na bubine, mulembi wa kino kishinte kya lunsamfwa-kanwa kadipo ulanga amba kikokeja kulupula bipa bya uno muswelo!

¹³ Bantu bamobamo ba mityima myoloke ba mu Belejike batopekele mpata ano mabila a tufutululo. Umo umbukata mwabo i mukelenge wādi mpingakani wa mulopwe, watendele bikatampe bintu bilongele Batumoni ba Yehova. Kilolo umo nandi wasonekele’mba: “Bimyanda bya amba amba byotwivwana koku ne koku i bingi, byotumona nabyo bingi, ami [Batumoni ba Yehova] nkibamwenepo na kabi nansha katye kaleta kyaka ku Leta. I bana ba kibundi basenswe ndoe, basumininwe, bantu balēmekele balupusa.” I byabine, mutumibwa Petelo wānene byatunangu, mba: “Mwikadilo wenu wikale wakufwaninwa umbukata mwa baJentaila; amba, monka mo bemunenena pamo bwa balonga bibi, ino pa mingilo yenu milumbuluke yo bamona, batumbije Leza mu dyodya difuku dyakupempulwa.”​—1 Petelo 2:​12.

Kuvuluka Kukatampe kwa Kivulukilo

¹⁴ I kyendele’mo, boba bonso basapula busapudi bwa Yesu bafwaninwe kumona Kivulukilo kya lufu lwandi bu mwanda mukatampe mu mwaka. Mu 1997, bantu batenwe ku kino kivulukilo mu mafuku 23 kweji 3 badi 14322226. Ko kunena’mba kwelundile bantu 1400000 ne musubu kupita mu 1996. (Luka 22:14-​20) Mu matanda mavule, kibalwa kya batenwe ku Kivulukilo kyādi kipite kulampe kwine kya basapudi ba Bulopwe, kino kilombola’mba kusa kwikala kwilundila’ko kukatampe. Kifwa mu Haiti, kibalwa kikande kyadi kya basapudi 10 621 mu 1997, ino ku Kivulukilo kwatenwe bantu 67259. Ukokeja kwela diso pa lapolo wa mwaka udi pa paje 18 kutūla ku 21 umone matanda makwabo mangi mwatenwe bantu ku Kivulukilo bavule kupita basapudi.

¹⁵ Ku bamo, kutanwa ku Kivulukilo kekyadipo kintu kipēla. Kifwa mu Albania, balungu badi bashilula kukwatañana’nka mu kyolwa kyolwa, mwanda wa kavutakanya ka ba kibundi. Kivulukilo kyashilwile na 5:⁠45 ya kyolwa mu tubisumpi tonso 115 twabungakene mu ino ntanda. Kupona kwa dyuba na 6:⁠08 ya kyolwa yo yadi ngalwilo ya mafuku 14 Nisane. Byelekejo (mukate ne vinyu) byapityijibwa kubwipi kwa 6:⁠15 ya kyolwa. Mu bisumpi bivule milombelo yamfulo yaikele kulombelwa na 6:⁠30 ya kyolwa, bonso batenwe’ko bepangila kujokela ku mobo padi kepashilwile kukwatañana balungu. Inoko ku Kivulukilo kwatenwe bantu 3154, nansha basapudi byobadi 1 090. Mu ntanda imo ya mu Afrika, mwadi kavutakanya ka ba kibundi kapite, ku Njibo ya Bulopwe kwakoma kufika, ino bakulumpe babidi batyiba mbila ya kwitanina kwa mukulumpe wabusatu, amba tukakale ñeni ya kuvuluka kino Kivulukilo mu tubisumpi tutyetutye. Pa kusaka kufika ku ino njibo, bakulumpe babidi’bo badi bafwaninwe kwabuka kinkolankola. Ino, mu kine kifuko’kyo mwadi bulwi, bangasañani badi basa muntu ye-yense wadi upima kwabuka kino kinkolankola. Mukulumpe umo watyibulula pampikwa kimulongele. Wabubidi amba atabuke, waivwana buta buwavuma. Wapone aye mwine umbiloba, wekokela kufyame, waivwene’nka ne mutendela bidyanga pangala pa mutwe. Kuno kwitana kwa bakulumpe kwapityile senene, ne bisakibwa bya kipwilo byabandaulwa’nka biyampe.

“Batambile mu Mizo Yonso, mu Bisaka . . . ne mu Ndimi”

¹⁶ Mutumibwa Yoano wānene’mba kukekalanga kibumbo kikatampe kitambile “mu mizo yonso, ne mu bisaka byonso ne mu bantu, ne mu ndimi.” (Kusokwelwa 7:9) Pa kino, Kitango Kyendeji i kikale ñeni ya kulupula mabuku mu ndimi mivulevule​—kubadila’mo ne yoya inenwa na tubila twa kulampe, ne na tubisumpi tutyetutye twa bantu. Kifwa mu Mozambike, trakte Bumi bwa ndoe mu ntanda impya walupukile’ko mu ndimi mikwabo itano. Mu Nikaragua, mukanda Ikalai ne bumi bwa nsangaji ya nyeke pano pa ntanda! walupwilwe mu ludimi lwa Kimiskito​—dyo dibuku dya Sosiete Watch Tower dibajinji kulupulwa mu luno ludimi. Bantu banenanga Kimiskito bavule basangele mpata pa kumona uno mukanda mu lwabo ludimi. Monka mu 1997, Sosiete waitabije amba mabuku alupulwe mu ndimi mikwabo 25 kadi watampa ne mapepala mudiyala umo ne kupita.

¹⁷ Kisumpi kya ludimi lukwabo mu Kolé kyatambwile bukwashi. Mu mwaka wa 1997, mu Kolé mwalongelwe kitango kibajinji mu muneneno wa batumama. Monka mu Kolé mudi bipwilo 15 bya muneneno wa batumama bidi na basapudi 543, ku kino kitango kwatenwe bantu 1 174, kwabatyijibwa 21. Pano kudi mabuku mavule asa kulupulwa makwate mu mabande a video mu ndimi 13 ya batumama mishileshile a kukwasha nao babitwi bakomenwe kwivwanija bishima binenwa nansha bilembwa. Uno o muswelo ufundijibwanga babitwi “kutanga” ne myanda miyampe pamo, bino byonso bipitanga’nka biyampe. Mu Amerika (États-Unis), mu mafuku a kunyuma, kyadi kilomba myaka itano pa kusaka muntu wakitwi endelele kufika ku lubatyijo. Ino pano byaikala’ko mabande a video mavule a mu Muneneno wa Batumama wa Amerika, ku babitwi bamo ke mwaka umo kete.

‘Tushalei mu Dikalo’

¹⁸ Mafuku kunyuma, mu 905 K.K.K., Yehu wāshilwile kutukija mutōtelo wabubela, pāpwile kwilunga Yehonadaba kwadi. Wāela lubila ku batōtyi bonso ba Bala, amba: “Pandulai kitango kijila kya Bala.” Kupwa wātuma ba kwenda kukakonkotola mu ntanda yonso shi kemushelepo mutōtyi wa Bala nansha umo. Bibumbo byobyēpungulwidile mu tempelo mikatampe ya leza wabubela, bāikele kukonkotola byabinebine, kutyina’mba mwakatanwa mutōtyi wa Yehova nansha umo. Ku mfulo, Yehu ne kibumbo kyandi bāipaya batōtyi ba Bala. “Enka namino’u Yehu waonakanya Bala mu Isalela.”​—2 Balopwe 10:20-28.

¹⁹ Dyalelo butyibi bwamfulo bwa mutōtelo onso wabubela abu’nka pabwipi. Na bwendeji bwa bamwikeulu, bene Kidishitu basapulanga myanda miyampe ku bantu bonso, bebalombola kwakamwa Leza ne kwisansanya na mutōtelo wabubela. (Kusokwelwa 14:​6-8; 18:​2, 4) Banwe bonso babutūkanye, iyai mukōkele ku Bulopwe bwa Leza buludikwa na Yesu Kidishitu, Mulopwe ubikikilwe na Yehova. (Kusokwelwa 12:10) Kino i kitatyi kyotwela nsadi, kitatyi kya kwimanija nshinkidingi mu mutōtelo wabine, ke kitatyipo kya kuleka bupyasakane bwetu butalale.

²⁰ Kitatyi kyādi Mulopwe Davida munyoñame pa mutyima, wālombēle’mba: “Mutyima wami utele pamo ponka, abe Leza, mutyima wami utele pamo ponka; nkembanga, eyo i binebine, nkembanga mitendelo. Nkakufwijangako, a Mfumwami, umbukata mwa bantu.” (Mitōto 57:​7, 9) Ne batwe netu mo monka, tufwaninwe kuta’ko mutyima. Mu mwaka wa mingilo wa 1997 mwaelelwe kabobo ka mitendelo ya kutumbija Yehova Leza, nansha byomwadi bikoleja bivule. Ne mu uno mwaka namo twelei kabobo muswelo umo onka, tupityijei ne pano pene. Twikwatei’ko byabinebine, nansha Satana byakimba kwituzozeja nansha kwitulwa muswelo’ka. Namino ko kulombola’mba mityima yetu idi nyeke biyampe ku mutyima wa Yesu Kidishitu, Yehu Mukatakata, ne amba twi betabe na mutyima onso ku lwito lwa ku bukomo bwa mushipiditu lwitusoñanya’mba: “Loelelwai mudi Yehova, musepelelei bānwe boloke; kadi elai nsadi ya tusepo bānwe bonso ba mutyima, swā!”​—Mitōto 32:11.

[Bipangujo]

1, 2. (a) Ngikadilo ya mutōtelo wa Isalela yādi yenda ibipila’ko muswelo’ka? (b) Mu 905 K.K.K., i kwalamuka’ka kukatampe kwāikele’ko mu Isalela?

3, 4. Yonadaba wālombwele muswelo’ka amba mutyima wandi wādi ‘biyampe ku mutyima wa Yehu’?

5. (a) I kwalamuka’ka kusa kulongeka panopano kukatenga bantu bonso? (b) Yehu Mukatakata i ani, ne bantunguluji bandi pano pantanda i bāni?

6. Lelo i bāni batambile mu mizo bakwete bene Kidishitu bashingwe-māni na makasa abidi, ne i muswelo’ka obakandile mu dikalo dya kyelekejo dya Yehu Mukatakata?

7. Le i muswelo’ka ulombwele bene Kidishitu dyalelo amba yabo ‘mityima idi biyampe’ ku mutyima wa Yesu?

8. Batumoni ba Yehova balombolanga namani bupyasakane bwabo mu mutōtelo wabine?

9. Kutentekela pa mwingilo wa ku njibo ne njibo, lelo Batumoni ba Yehova badi na miswelo’ka mikwabo yobatananga bantu ba kusapwila myanda miyampe?

10, 11. I mpangiko’ka milumbuluke yakwete basapudi ba mu matanda abidi ibapanga muswelo wa kutana bantu bavule basepelela musapu bapiñwanga ku mobo?

12, 13. (a) Satana wakwete bunwa’ka pa Batumoni ba Yehova mu mwaka 1997? (b) I kika kinenenwa’mba mabila abubela aelelwe mu ntanda imo atunyinye?

14. I malapolo’ka a batenwe ku Kivulukilo mu 1997 asangaja oyukile?

15. Mu matanda amoamo, i muswelo’ka wanekenye banabetu bikoleja byadi bisa kwibabudija kuvuluka Kivulukilo?

16. I ñeni’ka ikadile kabumbo ka umpika wabinebine ne wamanwa ya kusambakanya ntanda na myanda miyampe ne mu ndimi inenwa na bantu batyetye?

17. I kisumpi kya ludimi’ka lukwabo kyakwashibwe mu Kolé, ne mabande a video akwashanga muswelo’ka kino kisumpi kya bantu?

18. Yehu wāshilwile kulonga bika pāpwile kwilunga Yehonadaba kwadi?

19. Byotwayuka kyokya kisa kufikila bantu panopano ponka, i mushipiditu’ka otufwaninwe kwikala nao, ne i mwingilo’ka otupelwe otufwaninwe kuvuija na kininga?

20. Lelo twi basumininwe kulonga bika mu uno mwaka wa mingilo wa 1998?

[Kifwatulo pa paje 25]

Kibalwa kikatampe kya bantu batenwe ku Kivulukilo kilombola’mba kusa kwikala kwilundila’ko mu mafuku akāya kumeso

[Kifwatulo pa paje 26]

“Kibumbo kikatampe” kikwete Yesu Kidishitu, Yehu Mukatampe ne banababo bashingwe-māni makasa abidi, pamo’nka bwa Yehonadaba wākwete Yehu

Lelo Ukokeja Kushintulula?

◻ Lelo i kwalamuka’ka kwāikele’ko mu Isalela mu 905 K.K.K.?

◻ Yehu wa ino myaka i ani, ne i muswelo’ka ulombola ba mu “kibumbo kikatampe” amba ‘mutyima wabo i muyampe’ ku mutyima wandi?

◻ I bibalwa’ka bidi mu lapolo wa mwaka bilombola bupyasakane bwapyasakene Batumoni ba Yehova mu mwaka wa mingilo wa 1997?

◻ I mushipiditu’ka otufwaninwe kwikala nao mu uno mwaka wa mingilo wa 1998, nansha Satana byakatakata na kwitulonga shi bika shi bika?