Mu Bible Mudi Mānga ya Bine ke Ñanopo

“Ami wakuyūkidija’byo byonso ne kungalwilo kwine.”—LUKA 1:3.

LE BIBLE I MWISHILE NA MABUKU MAKWABO NAMANI? Mfumo ne ñano isekununanga mānga ilenga moyo kwampikwa kutela bifuko, mafuku a mweji ne majina a bantu. Inoko mu Bible mudi nsekununi mipotoloke keibadika ikulupija batangi bamone amba Bible “unenanga bya bine kutabuka.”—Mitōto 119:160, The Psalms for Today, dya R. K. Harrison.

KIMFWA: Bible unena’mba, “Nebukaneza mulopwe wa Babiloni . . . wasela [Mulopwe wa Bayuda] Yehoyakini ku Babiloni.” Mwenda mafuku, “Evile-melodake mulopwe wa Babiloni, mu mwaka waalwile kubikala, watalula mutwe wa Yehoyakini mulopwe wa Yuda mu kifungo.” Ne kadi, “kwadi kyepelo kipebwe kwadi [Yehoyakini] nyeke ne nyeke kudi mulopwe, mo bukila kyepelo mo bukila, mafuku onsololo a būmi bwandi.”—2 Balopwe 24:11, 15; 25:27-30.

BISOKWELE BEFUNDI BA BINTU BYA KISHIYEKULU: Mu masala a Babiloni wa kala, befundi ba bintu bya kishiyekulu bāsokwele’mo mikanda ya kilelo kya ntanda ya tamba kubikala kwa Nebukaneza II. Bātelele’mo mulongo wa bidibwa byādi bipebwa bakutwa ne boba bādi mu kipango kya bulopwe. Mu bano bantu mubadilwa ne “Yaukine [Yehoyakini],” wādi “mulopwe wa ntanda ya Yahudu (Yuda),” ne ba mu kipango kyandi. Lelo kwikala’ko kwa Evile-melodake mpingakani wa Nebukaneza nako le? Bilembwa byādi bilembe pa mutyibi wāsokwelwe kubwipi na kibundi kya Susa bitangwa amba: “Ndaku ya Emile-Maludake [Evile-melodake], Mulopwe wa Babiloni, mwanā Nebukaneza, Mulopwe wa Babiloni.”

LE ULANGA’PO NAMANI? Lelo kudi’ko dibuku dikwabo dya kala dya bipwilo disamba bya bine, kadi patōkelela kitatyi kyodisambila pa mānga? Nansha i enka Bible kete?

[Bushintuludi pa paje 5]

“Myanda inena Bible itala kwilonda kwa mānga mungya bitatyi ne bifuko i ya bine ne ikulupilwa kupita yoya isonekelwe mu mabuku makwabo a kala.”—A SCIENTIFIC INVESTIGATION OF THE OLD TESTAMENT, DYA ROBERT D. WILSON

[Kifwatulo pa paje 5]

Mukanda wa Bwine Babiloni Utela Yehoyakini Mulopwe wa Yuda

[Kifwatulo pa paje 5]

© bpk, Berlin/Vorderasiatisches Museum, SMB/Olaf M. Tessmer/Art Resource, NY