Mwanda wa Yehova I Mūmi

Myanda Mikatampe ya mu Mukanda wa Yoba

MUKULUTUBA Yoba ushikatanga mu ntanda ya Uza, dyalelo i mu Alabia. Bene Isalela bavule bene pano badi mu Edipito. Ino Yoba, nansha byakadipo Mwine Isalela, i mutōtyi wa Yehova Leza. Bible wisambila padi aye amba: “Kemudipo kadi munshi umwifwene aye, nansha umo mwine, mubwaninine [“mululame,” NW] muntu moloke, wakwakamwa Leza ne kutyina bibibibi.” (Yoba 1:8) Kino kitatyi kimweka bu kya pa bukata bwa bengidi babidi ba Yehova batendelwa—Yosefa mwanā Yakoba ne mupolofeto Mosesa.

Mosesa, umonwa bu wāsonekele mukanda wa Yoba, padi wāyukile mwanda wa Yoba paālēle myaka 40 mu Midyana, ntanda idi kubwipi na ntanda ya Uza. Pakwabo padi Mosesa wāivwene myaka ya mfulo ya Yoba kitatyi kyādi Bene Isalela kubwipi na Uza, dya ku mvuyo ya myaka 40 ya lwendo lwabo mu ntanda mutuputupu.a Myanda yātene Yoba i misonekwe mu muswelo utobala, na mulembelo utendelwa. Ne kadi ilondololanga bipangujo pamo bwa bino: Mwanda waka bantu bayampe basusuka? I bika bilekēle’ko Yehova bubi? Lelo bantu bampikwa kubwaninina bakokeja kulama bululame bwabo kudi Leza? Uno musapu wa mu mukanda wa Yoba byoubadilwa mu Kinenwa kya Leza kya ku bukomo bwa mushipiditu, na bubine i mūmi ne wa bukomo ne didi kūlu dino.—Bahebelu 4:12.

“DIFUKU DYO NABUTWILWEMO DYONEKE”

(Yoba 1:1–3:26)

Dyuba dimo, Satana wapatanya bululame bwa Yoba ku meso a Leza. Yehova waitabija luno lupata ne kuleka Satana aponeneje Yoba lunkunkwa-mulongo lwa byamalwa. Ino Yoba wapele ‘kutuka Leza.’—Yoba 2:9.

Balunda basatu ba Yoba abaiya “kumusenga.” (Yoba 2:11) Abashikata nandi kunena mwanda mpika, kutūla ne bishilula kunena Yoba amba: “Difuku dyo nabutwilwemo dyoneke.” (Yoba 3:3) Waabila kwikala “pamo’nka bwa twana-twalukeke ketwamwenepo mwinya,” ko kunena’mba tupulumunwe.—Yoba 3:11, 16.

Bipangujo bya mu Bisonekwa Bilondolwelwe:

1:4—Lelo bana ba Yoba bādi basoba masobo a kubutulwa kwabo? Mhm, ke amopo. Bishima bya mu ludimi lubajinjibajinji “difuku” ne “difuku dya kubutulwa” i bishile mu buluji bwabyo. (Ngalwilo 40:20) Mu Yoba 1:4, kishima “difuku” kitelelwe i kitatyi kya tamba lubanga kutūla ku kyolwa. Bana basamba-babidi ba Yoba badi padi basoba masobo mu kisaka mu bula bwa yenga umo ku mwaka. Byobādi basoba kupwa yeu ke yeu, mwana ne mwana wādi utundaila bakwabo mu njibo yandi mu “difuku dyandi.”

1:6; 2:1—Le i ani wādi ufwaninwe kutwela ku meso a Yehova? Mu boba bakemene ku meso a Yehova mudi ne Mwanda, ko kunena’mba Mwana wa bunka wa Leza; bamwikeulu ba kikōkeji; ne ‘bana ba Leza’ bakwabo, ko kunena’mba bamwikeulu bampikwa kikōkeji, ne Satana Dyabola mwine kumo. (Yoano 1:1, 18) Satana ne bademona bandi bādi kebapangilwe lubilo momwa mūlu, ke-pantu bāpangilwe’mo kinondanonda na kushimikwa kwa Bulopwe ba Leza mu 1914. (Kusokwelwa 12:1-12) Yehova pa kwibaleka batwele ku meso andi, wātulwije lupata lwa Satana ne myanda yonso yolwālupwile ku meso a bipangwa byonso bya ku mushipiditu.

1:7; 2:2—Lelo Yehova wēsambile na Satana mpala na mpala? Bible kashintulwilepo kamo ne kamo myanda ya mwisambilanga Yehova na bipangwa bya ku mushipiditu. Inoko, mupolofeto Mikaya wāmwene mu kimonwa mwikeulu umo wisamba mpala na mpala na Yehova. (1 Balopwe 22:14, 19-23) Nanshi bimweka amba Yehova wēsambile na Satana pampikwa kupityila ku muntu ungi.

1:21—Le Yoba wādi wa kujokela ‘munda mwa inandi’ namani? Yehova Leza wāpungile muntu “ku biloba bya panshi,” o mwanda kishima “lolo” i kingidijibwe pano bu kyelekejo kifunkila pa nshi.—Ngalwilo 2:7.

2:9—Mukaja Yoba wādi wiivwene namani ku mutyima pa kunena mulumyandi amba tuka Leza ne kufwa ufwe? Mukaja Yoba wāsusukile pamo na mulume mu kujimija byonso. Mutyima wāmusanshile pa kumona mulumyandi wādi mukomo nkē pano kabela misongo ya munyanji. Ne kadi wāfwidilwe bana bandi baādi uswele. Pa kino, padi milangwe yāmuvutakene pa kumona bino byonso, wājimija ne kintu kya kamweno ka binebine—kipwano kyabo na Leza.

Ñeni Yotuboila’ko:

1:8-11; 2:3-5. Monka mokyāfikile Yoba, bululame kebulombepo enka kulonga ne kunena biyampe, ino i ne kwikala na milangwe miyampe potwingidila Yehova.

1:21, 22. Shi tulame dikōkeji kudi Yehova mu bitatyi biyampe ne bibi bine kumo, nabya tubalombola amba Satana i mbepai.—Nkindi 27:11.

2:9, 10. Tukokeja kwimanija mu lwitabijo pamo bwa Yoba, nansha shi ba mu kisaka bafutulwile myanda ya ku mushipiditu yotulonda nansha shi betuningila tutune ne kubomboka mu lwitabijo lwetu.

2:13. Balunda na Yoba kebādipo na kamwanda nansha kamo kasenga mutyima katala padi Leza ne pa milao yandi mwanda kebādipo bakomo ku mushipiditu.

‘NKIKAFUNDULAPO BULULAME BWAMI KONDI!’

(Yoba 4:1–31:40)

Mwanda mwine ukalakala na balunda ba Yoba mu binenwa byabo i uno wa kunena amba Yoba i mulonge kintu kibi mpata o mwanda Leza wamupe mfuto milobo. Edifaza ye umbajinji kunena. Biledade walonda Edifaza na kushinika Yoba bishima bisansa. Ku mfulo, Zofala wapityija’byo mifutululo.

Yoba ketabijepo mulangilo umbi wa bano baile kumupempula. Pa kutunya kwivwanija kine kimulekēle Leza ususuka nenki, Yoba kashilula kwibingija. Inoko Yoba ukiswele Leza, o mwanda wanena’mba: “Poso’nka ne byo nkafwa nkikafundulapo bu-binebine [“bululame,” NW] bwami ko ndi”!—Yoba 27:5.

Bipangujo bya mu Bisonekwa Bilondolwelwe:

7:1; 14:14—Lelo “mīngilo mikomokomo” ne ‘mafuku a bulwi’ i bika? Malwa a Yoba ādi makomo mpata, o mwanda wālangile amba būmi bwandi bwādi pamo bwa mingilo mikomokomo, ilomba kulwa bulwi ne kupampa byanga. (Yoba 10:17) Kadi myaka ilāla muntu mu Kalunganyembo—tamba pafwa kutūla ne pakasangulwa—i ya kuningilwa, o mwanda Yoba wādingakenye’yo na bulwi.

7:9, 10; 10:21; 16:22—Le bino binenwa bilombola amba Yoba kādipo ukulupile mu lusangukilo? Bino binenwa byādi bīsambila pa būmi bwa Yoba bwa kitatyi kya mafuku a kumeso bityetye. Le penepo wādi usaka kunena bika? Pamo wādi usaka kunena amba shi wafu, i kutupu kadi muntu ku bobādi nabo wādi ubwanya kumumona monka. Mungya kumona kwabo, kādipo ubwanya kujokela ku njibo yandi nansha kuyukana monka kutūla ne ku kitatyi kitungwe kya Leza. Kadi Yoba wādi padi usaka kunena amba kekudipo ubwanya kutamba mu Kalunganyembo aye mwine. Binenwa bidi mu Yoba 14:13-15 bilombola patōkelela’mba wādi witabije lusangukilo lwiya kumeso.

10:10—Yehova ‘wapungulwile Yoba bwa mabele ne kumukamankatya bwa mukama wa mabele’ muswelo’ka? Bino i binenwa bya kusāsula bilombola mwāpungilwe Yoba munda mwa inandi.

19:20—Yoba wādi ukimba kushintulula bika pa kunena’mba ‘Napande ku kikoba kya meno’ ami? Pa kunena amba wāpandile na kikoba kya kintu kimweka bu kekidipo na kikoba, Yoba wādi padi usaka kunena amba wāpandile pampikwa kantu.

Ñeni Yotuboila’ko:

4:7, 8; 8:5, 6; 11:13-15. Ketufwaninwepo kwiyumbila kunena amba muntu umona malwa wangulanga byobya byaakunine ne amba Leza wamwela.

4:18, 19; 22:2, 3. Madingi etu afwaninwe kutamba mu Kinenwa kya Leza ke mu milangwe yetupo, mhm.—2 Temote 3:16.

10:1. Bululu bwāsabile Yoba meso, wātunya kujingulula bubinga bukwabo bwāsusukila. Ketufwaninwepo kwivwana bululu shi tususuka, ke-pantu twivwanije senene myanda yonso koitamba.

14:7, 13-15; 19:25; 33:24. Lukulupilo lwa lusangukilo lufwaninwe kwitukomeja mu matompo o-onso etuletela Satana.

16:5; 19:2. Binenwa byetu bifwaninwe kukankamika ne kukomeja bakwetu, kebifwaninwepo kwibalobeja, mhm.—Nkindi 18:21.

22:5-7. Madingi a kutopeka muntu pambulwa bubinga buluji poemanine keadipo na mvubu kadi asansanga mpata.

27:2; 30:20, 21. Kulama bululame kekulombepo kwikala babwaninine. Yoba wātopekele Leza bya bitupu.

27:5. Enka Yoba kete aye mwine ye wādi ukokeja kufundula bubinebine nansha bululame bwandi bwimanine pa buswe bwa kuswa Leza. Nanshi netu tufwaninwe kutamija buswe bukatampe bwa kuswa Yehova.

28:1-28. Muntu uyukile i nshi’ka ifile bya bulēme. Kadi pa kukimba’byo, bimulomba bwino mwa kusokwela mashinda abyo a panshi keabwanyapo kumonwa na kyoni kikobola kadi kimona kulampe. Ino tunangu twa Bwine Leza tutamba ku kwakamwa Yehova.

29:12-15. Tufwaninwe kulongela bakwetu bintu na kanye ka buswe.

31:1, 9-28. Yoba wētushidile kimfwa kiyampe kya kutyina dipyaselemba na bantu ba ngitu ingi, makoji, bukondame ne kubulwa kukwatyilwa bakwetu lusa, kusanswa bya bupeta, ne kutōta bilezaleza.

“NĀLAMUKA PA MUTYIMA KWITŪTA LUVUMBI NE BUTO”

(Yoba 32:1–42:17)

Nsongwalume witwa bu Edihu, wadi wiimanine kufula wibatala, waivwana mīsambo yabo yonso. Pano nandi washilula kunena. Walemununa Yoba ne boba basatu’ba badi bamusanshija.

Aye Edihu upwa’tu kunena, Yehova nandi walondolola mu kimpumpu kinyenga. Kashintulwilepo kine kisusukila Yoba. Mwine Bukomo Bonso pa kwipangula Yoba lunkunkwa-mulongo lwa bipangujo, Yoba wajingulula bukomo bulenga nzuba ne tunangu tukatakata twa Leza. Yoba waitabija amba wadi unena kwivwanija mpika, kanena’mba: “Nekwatwa mukenye ami mwine, nālamuka pa mutyima kwitūta luvumbi ne buto.” (Yoba 42:6) Matompo a Yoba pa kupwa, bululame bwandi bubapalwa mpalo.

Bipangujo bya mu Bisonekwa Bilondolwelwe:

32:1-3—Edihu wāfikile kitatyi’ka? Byāivwene Edihu mīsambo yonso, nanshi wādi ushikata dya kubwipi wivwana, kitatyi kampanda kumeso kwa Yoba kushilula kwisamba kadi wāshikete kutūla ne ku mfulo kwa mafuku asamba-abidi ādi ashikete bapwani basatu ba Yoba talala.—Yoba 3:1, 2.

34:7—Lelo Yoba wādi “utoma kibengo bwa mema” muswelo’ka? Yoba pa kumona malwa, wādi kamone amba kibengo kya bana-balume basatu bāile kumupempula i aye obabenga’kyo, pa kyaba kya kuyuka’mba mwine obādi babenga i Leza. (Yoba 42:7) Pa kino, wādi umina kibengo pamo bwa muntu utoma mema na nsangaji.

Ñeni Yotuboila’ko:

32:8, 9. Tunangu ketwiyangapo enka ku buvule bwa myaka. Ino twiyanga ku kwivwanija Kinenwa kya Leza ne buludiki bwa mushipiditu wandi.

34:36. Bululame bumwekanga kitatyi ‘kyotutompibwa ne pa mfulo’ mu mwanda kampanda.

35:2. Edihu wāivwanije na katentekeji mwanda mwine wādi wīsambilwa’po kumeso kwa kunena. (Yoba 10:7; 16:7; 34:5) Pa kino, bakulumpe Bene Kidishitu bafwaninwe bidi kuteja na katentekeji, ne kwivwanija biyampe myanda yonso ebiya kebaleta madingi.—Nkindi 18:13.

37:14; 38:1–39:30. Shi tulanguluka pa mingilo ya kutendelwa ya Yehova—mine ilombola bukomo ne tunangu twandi—tuketyepeja ne tukamona amba kubingija bubikadi bwandi ko kudi na kamweno kutabuka tumweno twetu to-tonso.—Mateo 6:9, 10.

40:1-4. Shi ketukimbe kwiuningila Mwine Bukomo Bonso, tufwaninwe ‘kutūla dikasa dyetu pa kyakanwa kyetu.’

40:15–41:34. Bine, kyovwe (Behemote) ne ñwena (Leviatane) bidi na bukomo bwa kashā! Pa kūminina mu mwingilo wa Leza, tufwaninwe netu kwikala na bukomo bwitupa Mulongi wa bano banyema bakomokomo.—Fidipai 4:13.

42:1-6. Kwivwana mwanda wa Yehova ne kuvuluka bintu bilombola bukomo bwandi byo bintu byākweshe Yoba ‘amone Leza,’ ko kunena’mba evwanije bubinebine butala padi Leza. (Yoba 19:26) Kino kyāsendulwile mulangilo wandi. Shi abetulemununa kukwatañana na Bisonekwa, tufwaninwe kwikala na mutyima wa kwitabija bilubo byetu ne kwisendulula.

Tamija ‘Kūminina kwa Yoba’

Mukanda wa Yoba ulombola patōka amba Leza ke ayepo uletela bantu masusu. Ino i Satana. Shi Leza ulekele bibi bilongeka pano pa ntanda i mukenga waetupa netu tulombole ku mutamba kotudi mu myanda itala bubikadi bwa Yehova ne bululame bwetu.

Pamo bwa Yoba, boba bonso baswele Yehova bakatompibwa. Nsekununi ya Yoba itukulupija amba tubwanya kūminina. Ituvuluja kadi amba makambakano otudi nao ke aendaendapo. Yakoba 5:11 unena’mba: “Mwaivwene bukankamane [“kūminina,” NW] bwa Yoba, mwamwene ne kwāfudile nandi Yehova.” (Yakoba 5:11) Bine, Yehova wāpadile Yoba mpalo pangala pa kulama kwaālamine bululame. (Yoba 42:10-17) Bine tukulupile kukamona kintu kilumbuluke kashā—būmi bwa nyeke mu Paladisa pano pa ntanda! Shi ke pano, pamo bwa Yoba, tusumininwei kulama bululame bwetu.—Bahebelu 11:6.

[Kunshi kwa dyani]

[Kifwatulo pa paje 32]

I ñeni’ka yotuboila ku ‘kūminina kwa Yoba’?