Ikala Wampikwa Budimbidimbi mu Bintu Byonso

Bantu bonso basakanga balunda bampikwa budimbidimbi. Ne Yehova nandi usakanga balunda nandi bekale bampikwa budimbidimbi. Shako kebipēlangapo potushikete mu ino ntanda muyudile bantu ba budimbidimbi. Ino le kwikala bampikwa budimbidimbi mu byonso kudi na kamweno’ka?

1. I bubinga’ka bukatampe bwa kwikadila bampikwa budimbidimbi?

Shi ketudipo na budimbidimbi na bakwabo, nabya tubalombola Yehova amba twi bamusanswe kadi tumulēmekele. Tala: Yehova uyukile bintu byonso byotulanga ne byotulonga. (Bahebelu 4:13) Umonanga kitatyi kyonso kyotutonga kwikala bampikwa budimbidimbi, kadi usangelanga’byo. Kinenwa kyandi kinena’mba: “Yehova ushikilwe muntu wa buzazangi, ino upwananga bulunda bwa pa mutyima na bantu boloke swā.”​—Nkindi 3:32.

2. I miswelo’ka imo ya kwikala bampikwa budimbidimbi mu būmi?

Yehova witusakila twisambe “bubine umo ku mukwabo.” (Zekadia 8:16, 17) Le kino kishintulula bika? Potwisamba na bantu ba mu kisaka, ba ku kaji, batutu ne bakaka bene Kidishitu, ba lupusa, tupelanga kubepa nansha kunyengakanya myanda. Bantu bampikwa budimbidimbi kebebangapo bakwabo nansha kwibongola. (Tangai Nkindi 24:28 ne Bene Efisesa 4:28.) Bantu bampikwa budimbidimbi bafutanga bitanshi byonso bibalombwa. (Bene Loma 13:5-7) Mu ino miswelo ne mu mikwabo, twiendejanga “kwampikwa budimbidimbi mu byonso.”​—Bahebelu 13:18.

3. I kamweno’ka kadi mu kwikala wampikwa budimbidimbi?

Shi tuyukene amba ketudipo ba budimbidimbi, bantu bakwabo baketukulupila. Tukalengeja mu kipwilo mwikale mutyima-ntenke pamo’nka bwa mu kisaka. Tukekala na mutyima wa mundamunda utōka. Kadi kubulwa budimbidimbi kwetu kukanengeja “bufundiji bwa Umpandiji wetu, Leza,” ne kino kikakoka bantu badi panja pa kipwilo bāye mu butōtyi bwa bine.​—Tetusa 2:10.

LANGULUKA BININGE

4. Kubulwa budimbidimbi kusangajanga Yehova

Tangai Ñimbo ya Mitōto 44:21 ne Malaki 3:16, ne kwisambila pa bino bipangujo:

• Mwanda waka kulanga’mba tubwanya kufya bubine i kubulwa tunangu?

• Molangila, Yehova ukeivwana namani shi tubatonge kunena bubine enka ne pobimweka bu bikomo?

5. Ikala wampikwa budimbidimbi kitatyi kyonso

VIDEO: I Bika Biletanga Nsangaji?—Mutyima wa Mundamunda Utōka (2:32)

Tangai Bahebelu 13:18, ne kwisambila pa muswelo otubwanya kwikala bampikwa budimbidimbi . . .

• mu kisaka.

• ku kaji nansha ku masomo.

• ne mu ngikadilo mikwabo.

6. Tumwenanga mu kubulwa budimbidimbi

Kyaba kimo kubulwa budimbidimbi kubwanya kwituletela myanda. Ino mfulo mfulō, kyo kintu kiyampe kulonga. Tangai Ñimbo ya Mitōto 34:12-16, ne kwisambila pa kino kipangujo:

• Lelo kubulwa budimbidimbi kulumbululanga namani būmi bwetu?

1. Balume ne bakaji bampikwa budimbidimbi bakomejanga masongi abo

2. Bengidi bampikwa budimbidimbi balengejanga bakulu babo ba kaji bebakulupile

3. Bana ba kibundi bampikwa budimbidimbi bekalanga na ntumbo miyampe ku meso a ba lupusa

MU KĪPI

Yehova usaka balunda nandi bekale bampikwa budimbidimbi mu byonso byobanena ne byobalonga.

Pitulukai’mo

• Le i mu miswelo’ka mumo motubwanya kwikala bampikwa budimbidimbi?

• Mwanda waka kulanga’mba tubwanya kufya bubine i kubulwa tunangu?

• I kika kyosakila kwikala wampikwa budimbidimbi kitatyi kyonso?

KIMBA

Le bambutwile babwanya namani kufundija babo bana bekale bampikwa budimbidimbi?

Ikala wa Bine (1:44)

I kamweno’ka kadi mu kufikidija byolaile?

Fikidija Byolaile, Amba Weselwe (9:09)

Tala mwanda waka tufwaninwe kufuta bitanshi nansha shi kebingidijibwepo biyampe.

“Le Ufwaninwe’nka Kufuta Bitanshi?” (Kiteba kya Mulami, 1 Kweji 9, 2011)

Le i bika bilengejanga muntu wa budimbidimbi ashinte būmi bwandi ke wampikwa budimbidimbi?

“Nefundile Amba Yehova Udi na Lusa ne Lulekelo” (Kiteba kya Mulami, 1 Kweji 5, 2015)