KIFUNDWA 08
Ubwanya Kwikala Mulunda na Yehova
Yehova usaka umuyuke biyampe. Mwanda waka? Mwanda uyukile amba shi uyuke mwaikadile, bilongwa byandi, mpango yandi, nabya ukakimba kwikala mulunda nandi. Le bine ubwanya kwikala mulunda na Leza? (Tangai Ñimbo ya Mitōto 25:14.) I bika byofwaninwe kulonga pa kwikala mulunda nandi? Bible ulondolola bino bipangujo kadi ulombola’mba bulunda na Yehova budi na mvubu mpata kutabuka bulunda bukwabo bonso.
1. Le Yehova ukwita ulonge bika?
“Fwenai kudi Leza, nandi ukemufwena.” (Yakoba 4:8) Le ko kunena namani? Yehova usaka wikale mulunda nandi. Bamo bakomenwanga kwitabija kupwana na muntu okebamwene, shi ke kupwana na Leza ko kwine! Inoko Yehova, kupityila ku Kinenwa kyandi Bible, i mwitusokwele byonso byotusakilwa kuyuka pa mwaikadile mwanda wa tufwene kwadi. Shi tutange musapu wa Leza udi mu Bible, bulunda bwetu na Yehova bukaningila’ko nansha byoketwamumwene.
2. Mwanda waka Yehova i Mulunda muyampe kutabuka?
I kutupu muntu ukusenswe mukusanshilwe Yehova. Usaka wikale na nsangaji kadi umulombe bukwashi kitatyi kyonso kyosakilwa’bo. Ukokeja ‘kwela kuzumbazumba kobe konso kwadi, mwanda aye ukutele mutyima.’ (1 Petelo 5:7) Yehova udi’ko nyeke mwanda wa kukwatakanya, kusenga, ne kuteja balunda nandi.—Tangai Ñimbo ya Mitōto 94:18, 19.
3. Le Yehova usaka balunda nandi balonge bika?
Yehova usenswe bantu bonso mu kikonge, “ino upwananga bulunda bwa pa mutyima na bantu boloke swā.” (Nkindi 3:32) Yehova ukimba balunda nandi balonge bintu byamona aye bu biyampe ino batyine byobya byamona aye bu bibi. Bamo babwanya kumona’mba kebakokejapo kulonda misoñanya ya Yehova itala pa bibi ne biyampe. Inoko Yehova aye udi na lusa. Witabijanga muntu ense umusenswe bya binebine ne ulonga bukomo bwandi bonso mwanda wa kumusangaja.—Ñimbo ya Mitōto 147:11; Bilongwa 10:34, 35.
LANGULUKA BININGE
Wifunde, uyuke muswelo okokeja kwikala mulunda na Yehova, kadi umone ne mwanda waka aye i Mulunda muyampe kupita bonso.
4. Abalahama wādi mulunda wa Yehova
Nsekununi ya mu Bible ya Abalahama (witwa ne bu Abalama) itukwasha twivwanije mwine mushintulwila kwikala mulunda na Leza. Tangai myanda ya Abalahama mu Ngalwilo 12:1-4. Kupwa, mwisambilei pa bino bipangujo:
Lelo Yehova wāmulombwele Abalahama alonge bika?
Le Yehova wālaile Abalahama bika?
Le Abalahama nandi wālongele’po namani pa byāmunenene Yehova?
5. Byobya bisaka Yehova ku balunda nandi
Divule, kudi byotusakilanga balunda netu balonge.
Le abe i bintu’ka bimobimo byosakanga balunda nobe bakulongele?
Tangai 1 Yoano 5:3, ne kwisambila pa kino kipangujo:
Lelo Yehova usaka balunda nandi balonge bika?
Pa kukōkela Yehova padi biketulomba kushinta mwiendelejo wetu ne ngikadila yetu. Tangai Isaya 48:17, 18, ne kwisambila pa kino kipangujo:
Mwanda waka Yehova ukimba balunda nandi bashinte?
Mulunda muyampe ukakuvuluja kintu kikukinga ne kyobwanya kumwena’mo. Yehova nandi mo mwalongelanga na balunda nandi
6. Le Yehova ulongelanga balunda nandi bika?
Yehova ukwashanga balunda nandi balwe na makambakano. Talai VIDEO, ne kwisambila pa kipangujo kilonda’kya.
Lelo Yehova wakweshe namani mwana-mukaji otwamona mu video alwe na milangwe mibi ne na kutyumukwa mutyima?
Tangai Isaya 41:10, 13, ne kwisambila pa bino bipangujo:
Le Yehova i mulaye kulongela balunda nandi bonso bika?
Le ulanga Yehova ubwanya kwikala Mulunda muyampe? Mwanda waka?
Balunda ba bine bekwashanga pobasakilwa bukwashi. Yehova ukakukwasha nobe
7. Bulunda na Yehova bulomba ne kwisamba nandi
Mīsambo ikomejanga kijimba kya bulunda. Tangai Ñimbo ya Mitōto 86:6, 11, ne kwisambila pa bino bipangujo:
I muswelo’ka otubwanya kwisamba na Yehova?
Le aye nandi wisambanga netu namani?
Twisambanga na Yehova kupityila ku milombelo; nandi wisamba netu kupityila ku Bible
BANTU BAMO BANENANGA’MBA: “Kebibwanikapo kufwena Leza.”
Le i kisonekwa’ka kyobwanya kutela mwanda wa kulombola’mba tubwanya bine kwikala balunda na Yehova?
MU KĪPI
Yehova usakanga ekale Mulunda nobe, kadi ukakukwasha umufwene pabwipi.
Pitulukai’mo
Lelo Yehova ukwashanga balunda nandi namani?
Mwanda waka Yehova ulomba balunda nandi bashinte mu būmi?
Le ulanga byobya bilomba Yehova ku balunda nandi i bipite kipimo? Mwanda waka ubanena nankyo?
KIMBA
Le bulunda bobe na Leza bubwanya kushinta namani būmi bobe?
“Yehova—Leza Otufwaninwe Kuyuka” (Kiteba kya Mulami, 15 Kweji 2, 2003)
Wifunde mwa kutamijija bulunda bobe na Leza.
Tala umone, mwanda waka mwana-mukaji umo wamwene amba bulunda bwandi na Yehova bo bwamupandije.
Ivwana binena bankasampe pobalombola mobeivwaninanga pa mwanda utala Yehova.