Lama Nyeke Bululame Bobe!

 1. Le Batumoni ba Yehova basatu batelelwe mu uno musango abalonga bika pa kushala balamate kudi Yehova?

LANGA’PO bidi ino myanda yatene Batumoni ba Yehova basatu. (1) Difuku dimo nkasampe mwana-mukaji paadi ku masomo, mwadimu wanenene bana ba masomo bonso ba mu kalasa bakatanwe ku fetyi. Uno nkasampe byaadi uyukile amba ino fetyi keisangajangapo Leza, wapela na bulēme kwenda’ko. (2) Nkasampe mwana-mulume wa bumvu usapula ku njibo ne njibo. Wajingulula’mba muntu obafundanga nandi ku masomo ushikatanga mu njibo ilonda’ko—i mukwabo wa ku masomo ufutululanga Batumoni ba Yehova. Ino nansha nankyo, uno nkasampe mwana-mulume wakokola ku njibo’ya. (3) Mwana-mulume umo wingilanga bininge mwanda wa kukwatakanya kisaka kyandi, ebiya difuku dimo mukulumpe wandi wa kaji wamunena alonge bintu bya budimbidimbi nansha bijilula bijila bya Leta. Nansha byaadi ubwanya kujimija kandi kaji, uno mwana-mulume washintulula’mba ufwaninwe kwikala wampikwa budimbidimbi ne kukōkela bijila, mwanda byo bilomba Leza ku bengidi bandi.—Loma 13:1-4; Bah. 13:18.

 2. Le i bipangujo’ka byotusa kubandaula, ne mwanda waka?

² Le i ngikadila’ka yowamona mu bano bantu basatu? Padi ubamone mivule, kimfwa bukankamane ne kubulwa budimbidimbi. Inoko kudi ngikadila imo imweka bu milēme mpata—ke bululame kadi. Bano bantu bonso basatu abalombola lulamato kudi Yehova. Umo ne umo wapele kujilula misoñanya ya Leza. Bululame ye bwalengeja bano bantu balonge byobalonga’bi. Yehova wasangela bininge umo ne umo pa kulombola ino ngikadila. Ne batwe netu tusakanga kusangaja Tata wetu wa mūlu. Leka twisambilei’ko bidi pa bino bipangujo: Le bululame i bika? Mwanda waka tusakilwa bululame? Ne i muswelo’ka otubwanya kusumininwa bininge kulama bululame mu bino bitatyi bikomo?

 3. (a) Le bululame bushintulula bika ku batwe bengidi ba Leza? (b) Le i bimfwa’ka bilombola’mba butuntulu, kubulwa bulema, nansha kukunkana bidi na mvubu kotudi?

³ Bululame shi bufunkila pa batwe bengidi ba Leza, bushintulula kusanswa na mutyima umo ne kulamata bininge kudi Yehova bu Muntu udi’ko bine, pa kusaka’mba tutangidije kiswa-mutyima kyandi mu butyibi bwetu bonso. Tala bidi ino myanda imo. Buluji bumo bidi bwa kyalwilo buleta Bible pa kishima “bululame” i buno: kituntulu, kyampikwa bulema, nansha kikunkane. Kimfwa, bene Isalela pobādi balambula bitapwa bya banyema kudi Yehova, Bijila byānenene amba bano banyema kebādipo bafwaninwe kwikala na bulema.b (Levi 22:21, 22) Bantu ba Leza kebādipo bafwaninwe kulambula nyema mupatuke kulu, kutwi, nansha diso; nansha kulambula nyema mubele. Yehova wādi usaka nyema ekale mutuntulu, wampikwa bulema, nansha mukunkane. (Mal. 1:6-9) Tubwanya kwivwanija mwanda waka Yehova wādi utele mutyima ku kubulwa bulema, nansha butuntulu. Shi ketupote kintu, kikale kipa, dibuku, nansha kingidilwa ketusakengapo kikale kitubuketubuke nansha kipatuke’ko bipindi bimo. Tusakanga kyokya kituntulu, kyampikwa bulema, nansha kikunkane. Ye musakila ne Yehova pa buswe botumuswele nansha lulamato. Bifwaninwe kwikala bituntulu, byampikwa bulema, nansha bikunkane.

 4. (a) Le i kika kinenenwa’mba muntu wampikwa kubwaninina ubwanya kwikala na bululame? (b) Kukwatañana na Ñimbo ya Mitōto 103:12-14, le i bika bitusakila Yehova?

⁴ Lelo tufwaninwe kwikala babwaninine pa kwikala na bululame? Na bubine, tubwanya kwimona’mba ketubwanyapo kwikala bampikwa bulema, nansha’mba tudi na bilubo bivule. Tubandaulei’ko bubinga bubidi boketufwaninwepo kwimwena uno muswelo. Bubinga bubajinji, Yehova katelepo mutyima’nka pa bilubo byetu. Kinenwa kyandi kitusapwila’mba: “A Yah, shi wadi amba utalanga bilubo, a Yehova, le penepo i ani wadi ukokeja kwimana?” (Ñim. 130:3) Aye uyukile amba twi ba kubulwa kubwaninina, bantu ba bubi, kadi witulekelanga na mutyima umo. (Ñim. 86:5) Bubinga bwa bubidi, Yehova uyukile mikalo yetu, kadi ketunenangapo tulonge bintu byoketubwanyapo. (Tanga Ñimbo ya Mitōto 103:12-14.) Penepo tubwanya kwikala batuntulu, bampikwa bulema, nansha bakunkane ku meso andi mu buluji’ka?

 5. Le buswe bukwashanga namani bengidi ba Yehova bekale na bululame?

⁵ Kintu kikwasha bengidi ba Yehova pa kwikala na bululame i buswe. Buswe botuswele Leza ne kulamata kotumulamete bu Tata wetu wa mūlu, bifwaninwe kwikala bituntulu, byampikwa bulema, nansha bikunkane. Shi buswe bwetu budi uno muswelo nansha ke kitatyi kyotudi mu matompo, nabya tudi na bululame. (1 Bi. 28:9; Mat. 22:37) Twisambilei monka pa Batumoni basatu batelwanga ku ngalwilo. Mwanda waka balongele bintu nabya? Lelo nkasampe mwana-mukaji kadipo usaka kwisangaja ku masomo, nansha le nkasampe mwana-mulume wadi usaka bamufwije bumvu pa njibo’pa, nansha le mutwe wa kisaka wadi usaka ajimije kaji? Ke amopo. Inoko badi bayukile amba Yehova udi na misoñanya myoloke, penepa bata mutyima ku byobya bisangaja Shabo wa mūlu. Buswe bobamusenswe bwebalengeje bamutangidije kumeso mu butyibi bwabo. Mu uno muswelo balombwele bululame bwabo mu bilongwa.

 6. (a) Mwanda waka usakilwa bululame? (b) Le ba Adama ne Eva bākomenwe kulombola bululame muswelo’ka?

⁶ Mwanda waka batwe bonso tusakilwa bululame? Usakilwanga bululame mwanda Satana wātopekele Yehova, kadi ukutopekanga ne abe. Tamba mu budimi bwa Edena, uno mwikeulu ntomboki wēalamwine ke Satana, nansha “Kinkwa.” Wāsubije dijina diyampe dya Yehova na kutela Leza bu Muludiki mubi, wisakila, ne wa budimbidimbi. I kya bulanda, mwanda ba Adama ne Eva bēkupile kudi Satana, bātombokela Yehova. (Ngo. 3:1-6) Mu Edena, bādi na mikenga mivule ya kutamija buswe bobādi basenswe Yehova. Inoko kitatyi kyēbatompele Satana, buswe bwabo kebwādipo butuntulu, bwampikwa bulema, nansha bukunkane. Kupwa kwālupuka kino kipangujo: Lelo bantu bakalamata nyeke kudi Yehova Leza mwanda wa buswe bobamuswele? Nansha’mba le bantu bakokeja kulombola bululame? Kino kipangujo kyālupukile pa mwanda utala Yoba.

 7. Enka mokilombwedilwe mu Yoba 1:8-11, le Yehova wēivwene namani pa bululame bwa Yoba, ne Satana nandi wēivwene namani pa bululame bwa Yoba?

⁷ Yoba wāikele’ko kitatyi kyādi bene Isalela mu Edipito. Bululame bwandi bwādi bwa pa bula. Wādi muntu wampikwa kubwaninina pamo bwa batwe. Wālongele ne bilubo. Nansha nankyo, Yehova wādi usenswe Yoba mwanda wa bululame bwandi. Bimweka’mba Satana wādi ke mukolomone kala Yehova pa mwanda wa bululame bwa bantu. Penepa Yehova wānena Satana atale Yoba. Mwiendelejo wa uno mwana-mulume wālombwele patōka’mba Satana i mbepai! Satana wānenene akatompe bululame bwa Yoba. Yehova wādi ukulupile mulunda nandi Yoba, penepa Wāleka Satana akamutompe.—Tanga Yoba 1:8-11.

 8. Le Satana wātambile’dyo Yoba namani?

⁸ Satana i mubi, kadi ntapani. Wātambile’dyo Yoba pa bintu byandi, wāmujimijija bupeta, bengidi bandi, ne kona bumuntu bwandi. Kupwa wātamba’dyo kisaka kya Yoba na kumujimijija bana dikumi basenswe. Ebiya wātamba’dyo Yoba ku umbidi, wāmujimijija bukomo bwa ngitu na kumumeneja bipote bisansa tamba ku mutwe kutūla ku kinyantyilo. Mukaja Yoba nandi wātyumukwa mutyima ne kulēmenenwa na njia; kamuningila atune bululame, afinge Leza ne kufwa. Yoba nandi wādi kaabila ne lufu, ino nansha nankyo wādi ukilamine nyeke bululame bwandi. Penepo Satana wāingidija manwa makwabo. Wāingidije bantu basatu bādi bapwene na Yoba. Bano bantu bāile kupempula Yoba mu mafuku kampanda, ino kebāmusengelepo. Pa kyaba kya kumusenga, abo bāmushinika bishima ne kumufutulula. Bānenene amba i Leza uletela Yoba byamalwa, ne amba katelepo mutyima ku bululame bwandi. Bānenene’nka ne kunena’mba Yoba i muntu mubi o mwanda wafikilwa na bino byamalwa!—Yoba 1:13-22; 2:7-11; 15:4, 5; 22:3-6; 25:4-6.

 9. Lelo Yoba wāpelele kulonga bika kitatyi kyaādi mu matompo?

⁹ Le Yoba wālongele namani pa bino byamalwa byonso’bi? Kādipo mubwaninine. Wāfunine na bulobo bano basengi babi, ne kunena bintu kupwa wēalakanya’byo. Wābingije boloke bwandi bininge kupita bwa Leza. (Yoba 6:3; 13:4, 5; 32:2; 34:5) Inoko nansha Yoba byaādi mu ano matompo makomo, wāpelele kutombokela Yehova Leza. Wāpelele kwitabija bubela bwa bano balunda babi. Wānena’mba: “Kebibwanikapo ami kwimutela banwe’bo bu boloke! Enka ne byomfwa, nkikalekapo bululame bwami!” (Yoba 27:5) Bino i binenwa bya mvubu mikatampe’po kashā! Yoba wāpelele kutuna bululame bwandi; netu tubwanya kulonga uno muswelo.

10. Le nobe utalwanga namani na mwanda wākolomwene Satana padi Yoba?

¹⁰ Satana uletanga matope amo onka pa batwe bonso. Le nobe utalwanga namani na uno mwanda? Na bubine Satana unenanga’mba kusenswepo Yehova Leza bya binebine, kadi ukaleka’byo kumwingidila mwanda wa kwipandija, ne amba bululame bobe i bwa bubela! (Yoba 2:4, 5; Kus. 12:10) Le kino kibakulengeja wiivwane namani? Le bibakusansa’ni kebikusensepo? Inoko, langulukila pa uno mwanda: Yehova ukukulupile bininge pa kukupa mukenga wa kutendelwa. Yehova i muleke Satana atompe bululame bobe. Yehova ukulupile amba ubwanya kulama nyeke bululame bobe ne kulombola’mba Satana i mbepai. Kadi i mulae kukukwasha ulonge namino. (Bah. 13:6) Dino i dyese’po kashā kukulupilwa na Mubikadi wa diulu ne ntanda! Le ubamone kikadile bululame na mvubu? Bwitukwashanga tupele bubela bwa Satana, tulame dijina diyampe dya Tata wetu, ne kukwatakanya muludikilo wandi. Le i muswelo’ka otubwanya kulama ino ngikadila ya mvubu?

11. Le i ñeni’ka yotubwanya kuboila kudi Yoba?

¹¹ Satana i muvudijije’ko bulwi bwandi mu ano “mafuku a mfulo.” (2 Tm. 3:1) Mu bino bitatyi bya makambakano, le i muswelo’ka otubwanya kusumininwa kulama bululame bwetu? Tubwanya monka kuboila ñeni mivule kudi Yoba. Kitatyi kilampe kumeso kwa aye kutompibwa, Yoba wādi kala ulamine bululame bwandi. Tala ñeni isatu yotubwanya kuboila kwadi pa mwanda utala kusumininwa kotusumininwe kulama nyeke bululame bwetu.

12. (a) Mungya Yoba 26:7, 8, 14, le Yoba wātamije namani kityino ne bulēme bwaādi ulēmekele Yehova? (b) Le i muswelo’ka otubwanya kuyuja mu mutyima wetu kityino kya kutyina Leza?

¹² Yoba wātamije buswe bwaādi uswele Yehova Leza na kumutyina. Yoba wābandile bininge bintu bya kutendelwa bya mu bupangi bwa Yehova. (Tanga Yoba 26:7, 8, 14.) Wādi utulumuka bininge kitatyi kyaādi ulangulukila pa ntanda, diulu, makumbi, ne mikungulo, wājingulula’mba uyukile’tu bityetye pa mwanda utala bupangi. Kadi wātengelwe ne na binenwa bya Yehova. Wānena pa mwanda utala binenwa bya Leza amba: “Nebīkila binenwa byandi.” (Yoba 23:12) Kityino kya Yoba ne bulēme bwaādi ulēmekele Yehova byāmukweshe. Wādi usenswe Shandi wa mūlu ne kusaka kumusangaja. Yoba wāsumininwe bininge kulama bululame bwandi nyeke. Netu tufwaninwe kulonga na mwālongele Yoba. Tuyukile bintu bivule bya kutendelwa bitala bupangi kupita bantu ba mu mafuku a Yoba. Kadi tudi na Bible mutuntulu musonekwe na mushipiditu, witukwasha tuyuke mwine mwikadile Yehova. Bino byonso byotwifunda bibwanya kwitukwasha twikale na kityino. Kityino kyetu ne bulēme botulēmekele Yehova, biketukwasha tumusanswe, tumukōkele, ne kusumininwa bininge kulama bululame bwetu nyeke.—Yoba 28:28.

13, 14. (a) Mungya Yoba 31:1, le Yoba wālombwele kikōkeji muswelo’ka? (b) Le netu tubwanya namani kulonda kimfwa kya Yoba?

¹³ Yoba wāsumininwe kulama nyeke bululame bwandi na bilongwa bya kikōkeji. Yoba wādi uyukile amba bululame bulombanga kikōkeji. Na bubine kilongwa kyonso kya kikōkeji kitukwashanga tusumininwe nyeke kulama bululame bwetu. Yoba wādi ulonga bukomo bwa kukōkela Leza difuku ne difuku. Kimfwa, wādi utele mutyima bininge ku mwiendelejo wandi na bantu ba ngitu ingi. (Tanga Yoba 31:1.) Byaādi na mukaji, wādi uyukile amba i bibi kuta mutyima bya bukena mwana-mukaji ungi ye-yense. Dyalelo tudi mu ntanda motutanwa na matompo a kulonga busekese. Pamo bwa Yoba, le tukapela kuta mutyima byampikwa kwendela’mo muntu ense oketwisongelepo nandi? Le tukapela kutala bintu bya kiboja nansha porno ya miswelo yo-yonso? (Mat. 5:28) Shi tulonge bukomo difuku ne difuku bwa kwikala na kuno kwīfula, tukasumininwa kulama nyeke bululame bwetu.

¹⁴ Kadi Yoba wākōkele Yehova pa muswelo waādi umona bintu bya ku ngitu. Yoba wājingulwile amba shi akulupile mu bituntwa byandi, nabya ukalonga kilubo kikatampe kyafwaninwe kupelwa mfuto. (Yoba 31:24, 25, 28) Dyalelo tudi mu ntanda mudi bantu basenswe bintu bya ku ngitu. Shi twikale na mumweno muyampe pa lupeto ne bituntwa, na mwitusoñaninye Bible, tukasumininwa bininge kulama nyeke bululame bwetu.—Nki. 30:8, 9; Mat. 6:19-21.

15. (a) Le i lukulupilo’ka lwākweshe Yoba alame nyeke bululame bwandi? (b) Mwanda waka i biyampe tulame nyeke lukulupilo lwitupele Yehova?

¹⁵ Yoba wālamine bululame bwandi na kukulupila’mba Leza ukamupala mpalo. Wādi ukulupile amba Leza utele mutyima ku bululame bwandi. (Yoba 31:6) Nansha Yoba byaātenwe na matompo, wādi ukulupile amba Yehova ukamupala mpalo ku mfulo. Kino kikulupiji kyāmukweshe bininge alame bululame bwandi. Yehova wāsangedile bininge bululame bwa Yoba, wāmupala mpalo mikatampe aye papo ukidi muntu wampikwa kubwaninina! (Yoba 42:12-17; Yak. 5:11) Kadi Yoba ukapalwa mpalo mikatampe bininge mu mafuku a kumeso. Le ukulupile bya binebine amba Yehova ukakupala mpalo pa mwanda wa bululame bobe? Leza wetu kashintyilepo. (Mal. 3:6) Shi tuvuluka’mba umwene bululame bwetu na mvubu, nabya tukalama nyeke lukulupilo lwetu lwa mu mafuku a kumeso.—1 Ts. 5:8, 9.

16. Le tubasumininwa kulonga bika?

¹⁶ Shi ke pano, sumininwa bininge kulama nyeke bululame bobe! Kyaba kimo ubwanya padi kwimona bu udi bunka, inoko kukekalapo bunka nansha dimo. Ukekala nyeke mu bukata bwa midiyo ne midiyo ya bantu ba kikōkeji balamine bululame bwabo kujokoloka ntanda yonso. Kadi ukabadilwa mu mulongo wa bana-balume ne bana-bakaji ba lwitabijo bālamine bululame bwabo pa kala, nansha ke mu kyaka kya lufu. (Bah. 11:36-38; 12:1) Nanshi batwe bonso tusumininwei kulonda binenwa bya Yoba bya amba: “Nkikalekapo bululame bwami!” Kadi tutumbijei nyeke Yehova kupityila ku bululame bwetu!