Mukokeja Kunekenya Makambakano Onakanyanga Bisaka

 1. I myanda’ka mifyame idi mu bisaka bimo-bimo?

MOTOKA wakala shi i mukendwe ne kukululwa senene, bapityeshinda bakokeja kwiumona ukelema pamo’nka bwa mupya. Ino papo munshi, ao mudibwe na ndyabilonda. Ye mwikadile ne bisaka bimo-bimo. Nansha shi byonso bimweka bu bilumbuluke panja, ino mapala abo a mimungomungo afīle moyo ne byaso. Munda mwa njibo, ndyabilonda ya kyelekejo yendanga idya ndoe mu kyabo kisaka. Kudi bintu bibidi bikokeja kuleta ano makambakano mu kisaka, i butondwe ne bukalabale.

 2. (a) I kika kinena Bible pamwanda utala mutomeno wa malwa? (b) Butondwe i kika?

² Bible katopekangapo kutoma malwa pa ntomeno, utopekanga bunkolwankolwa. (Nkindi 23:20, 21; 1 Kodinda 6:9, 10; 1 Temote 5:23; Tetusa 2:2, 3) Inoko butondwe i bupite ne kukolwa kwine; i kwitobwa malwa bininge, kujimijanga muntu ñeni kakiyukapo ne pa ntomeno. Bantondwe bamo-bamo i bantu batame. Bakwabo nabo i banuke, bine i kyabulanda.

3, 4. Shintulula muswelo ususukanga mukaja ntondwe ne bandi bana na butondwe.

³ Myaka mivule kunyuma, Bible wālombwele’mba kutomatoma malwa mu muswelo umbi, kukokeja kuvutakanya ndoe mu kisaka. (Kupituluka 21:18-21) Bipa bibi bilupukanga ku butondwe bitenekanga bantu bonso mu kisaka. Mukaji ukokeja kulonga bukomo mwanda wa wandi mulume aleke malwa nansha kuleka kino kibidiji kibi.a Ukokeja kupima kumufya malwa, kwiamwanga, kufya lupeto lwa wandi mulume, ne kumuzenza asanswe kisaka, būmi, ne Leza​—ino uno ntondwe papo kutupu kuleka’byo kutoma. Shi watompa misunsa mivule kumulekeja’o wakankalwa, ushalanga na mutyima kanyonga, amba nakomenwa. Washilula kwivwana moyo, bukalabale, nsungu, mutyima kūlu, kwitopeka ne kwimona bu muntu wakubulwa bulēmantu.

⁴ Butondwe bwa bambutwile bususulanga ne bana. Bamo-bamo basusulwanga kungitu. Bakwabo bonwa na busekese. Bakokeja kushilula ne kwitopeka abo bene pamwanda wa butondwe bwa mbutwile wabo. Pavule bajimijanga kikulupiji mu bakwabo pamwanda wa mwiendelejo umbi wa ntondwe. Benyeñanga na milangwe, bevwana bumvu pa kusapula bintu bipita mu yabo njibo, pavule kibaletelanga ne misongo. (Nkindi 17:22) Bana ba uno muswelo batamanga kufika ne ku butame na mutyima wa kubulwa kwikulupila ne kwimona bu bakubulwa bulēmantu.

 5. I muswelo’ka ukokeja kupwijibwa butondwe, ne mwanda waka kekipēlangapo?

⁵ Nansha shi bayuki bavule banena’mba butondwe kebupwangapo, ino bavule betabijanga’mba muswelo wa kwibuleka i kwitūdila’ko mpangiko ya kwijidika malwa lonso. (Enzankanya na Mateo 5:29.) Kudingila ntondwe aleke malwa kupēlanga, ino kumulekeja’o kekupēlangapo, mwanda utunanga’mba kadipo na kikoleja. Inoko shi kisaka kishilule kumulombola patōka muswelo okisusuka pamwanda wa butondwe bwandi, ukokeja kushilula kujingulula kilubo kyandi. Muñanga umo ukwashanga bantondwe ne bisaka byabo unena’mba: “Monangila, kyamvubu nakampata ku ba mu kisaka, i kwendelela na kwingila mingilo ya kamweno kobadi. Ntondwe ukashilula bityebitye kumona kwishila kukatampe kudi pabukata bwa aye ne bakwabo ba mu kisaka.”

 6. I nsulo’ka milumbuluke ya madingi ifwaninwe kunyemena’ko boba badi na bantondwe mu bisaka?

⁶ Shi mu kyenu kisaka mudi ntondwe, nankyo londai madingi a mu Bible a ku bukomo bwa mushipiditu, akemukwasha mwikale na būmi bulumbuluke. (Isaya 48:17; 2 Temote 3:​16, 17) Tubandaulei misoñanya imo-imo yākweshe bisaka bya bantondwe.

 7. Shi umo wa mu kyenu kisaka i ntondwe, i ani ukatwikwa kino kiselwa?

⁷ Lekai kwitopeka. Bible unena’mba: “Muntu ne muntu ufwanyinwe kwiselela aye mwine” kiselwa kyandi, amba kadi “batwe bonsololo, . . . tukēshintulwila kudi Leza, muntu pandi, muntu pandi.” (Ngalatea 6:​5, MB; Loma 14:12) Ntondwe ukokeja kulambika ba mu kyandi kisaka butondwe bwandi. Kimfwa, ukokeja kunena’mba: “Shi mwadi amba mundelele biyampe, longa nkitomangapo.” Kwitabija byanena i kumukankamika endelele na kutoma. Bintu byotuloñanga batwe bonso​—ne bantondwe bene​—bidi pa wetu mutwe, bikale bya kutononwa na bantu, nansha pamwanda wa ngikadilo yotudi’mo.​—Enzankanya na Fidipai 2:12.

 8. I miswelo’ka imo-imo yotukokeja kwingidija, mwanda wa kukwasha ntondwe alanguluke pa bipa bibi bya butondwe bwandi?

⁸ Kemufwaninwepo nyeke kukinga ntondwe ku bibi byonso bitamba ku butondwe bwandi. Lukindi lumo lwa mu Bible lwisambila pa muntu ufuna bulobo lukokeja kwingidijibwa ne mu mwanda utala ntondwe, lunena’mba: “Shi umunyongolola, usa kwikilonga monka.” (Nkindi 19:19) Leka ntondwe ealakanye mu butondwe bwandi. Muleke apampule bilashe byalashile, nansha kusapwila mukulumpe wandi wa kaji shi buwaki lubanga.

9, 10. Mwanda waka bisaka bidi na bantondwe bifwaninwe kwitabija bukwashi, ne nakampata i bukwashi bwa ani bobafwaninwe kulomba?

⁹ Itabija madingi akupa bakwabo. Nkindi 17:17 unena’mba: ‘Mulunda wabine usanswanga kitatyi kyonso, ino mwanenu ye mubutwilwe kitatyi kya byamalwa.’ Shi mu kyenu kisaka mudi ntondwe, bine mudi mu malwa. Mufwaninwe kukwashibwa. Kokileka kwabija ‘balunda nobe babinebine’ bakukwashe. (Nkindi 18:24) Wisambe na bantu bakwabo bayukile kwivwanija uno mwanda, nansha boba bāpityile’mo kala, bakupe’po milangwe mifwaninwe, uyuke kyofwaninwe kulonga ne kyokufwaninwe kulonga. Inoko, ikala’po na ndiñamano. Wisambe na bantu bokulupile, kebakokeja ‘kusokola myanda mifyame.’​—Nkindi 11:13.

¹⁰ Wifunde kutūla kikulupiji mu bakulumpe bakristu. Bakulumpe badi mu kipwilo kya bwine-kristu i nsulo ya bukwashi. Bano bana-balume bapye i bafundijibwe Kinenwa kya Leza, kadi i bapotolole mwa kwingidijija misoñanya yakyo. Bakōkeja kwikala “bwa kinyemeno kya luvula, ne mpakala ku kintenshi; pamo’nka bwa minonga ya mema muntu mūmu, bwa mwemba wa dibwe dikatakata muntanda myumu.” (Isaya 32:2) Mwanda kebakiñangapo’nka kipwilo kyonso kituntulu ku lupusa lubi kete, ino bakwatakanyanga muntu ne muntu ufikilwe na makambakano, bamutūkija mutyima, ne kumukengelela pabula. Mwena mu bukwashi bwabo.

11, 12. I āni upānanga bukwashi bukatampe ku bisaka bidi na bantondwe, ne wibupānanga mu muswelo’ka?

¹¹ Kutabukidila, kimba bukomo kudi Yehova. Bible witukulupija na kyanga’mba: “Yehova udi pa bwipi na boba ba mutyima mutyumuke, kadi upandijanga bano namino ba mushipiditu wa kwisasapo.” (Mitōto 34:18) Shi mutyima obe i mutyumuke nansha shi ukupēpanga pamwanda wa bintu bilonga ntondwe mu kyenu kisaka, yuka’mba “Yehova udi pa bwipi.” Uyukile mukomene ngikadilo yomudi nayo mu kyenu kisaka.​—1 Petelo 5:​6, 7.

¹² Kwitabija binena Yehova mu Kinenwa kyandi kukokeja kwimutūkija mityima. (Mitōto 130:​3, 4; Mateo 6:​25-34; 1 Yoano 3:​19, 20) Kwifunda Kinenwa kya Leza ne kukwatañanya būmi bwenu na misoñanya idi’mo kukemushitwila dishinda dya kutambula bukwashi bwa mushipiditu sandu wa Leza, wa kwimupa ‘bukomo butabukile pa bwa bantu.’​—2 Kodinda 4:7.b

13. I kintu’ka kyabubidi kyonakanyanga bisaka bivule?

¹³ Bunkolwankolwa bukokeja kufikija ku kintu kikwabo kyonakanyanga bisaka bivule​—bukalabale bwa mu kisaka.

14. Bukalabale bwa mu kisaka bwāshilwile kitatyi’ka, ne ngikadilo idi muswelo’ka dyalelo?

¹⁴ Kilongwa kya bukalabale kibajinji mu mānga ya muntu kyādi kya bana ba mu kisaka kimo, ba Kena ne Abele. (Ngalwilo 4:8) Tamba’nka penepa, muzo wa muntu ususulwanga na bukalabale bwa mu kisaka bwa miswelo ne miswelo. Kudi balume bakupila babo bakaji, bakaji bakolomona babo balume, bambutwile bakupidila babo bana ku nshikani, bana batame basusula babo bambutwile ke banunu.

15. I muswelo’ka witenekanga ba mu kisaka ku milangwe ibashilanga bukalabale bwa mu kisaka?

¹⁵ Masusu atambanga ku bukalabale bwa mu kisaka ke mikovupo bitupu, ashilanga bantu milangwe mivule. Mukaji umo wādi ukupilwa wānene’mba: “Mudi kwitopeka kuvule ne bumvu. Lubanga ne lubanga, ukasaka kushala ulēle’nka umbutanda, wabila’mba kyaikalapo nansha kilotwa bitupu.” Bana bamona bukalabale mu kyabo kisaka nansha basusulwa, pobakatama kebadi na byabo bisaka, bakokeja kukekala bakalabale.

16, 17. Kususulwa mu milangwe i kika, ne kushiyanga ba mu kisaka mu ngikadilo’ka?

¹⁶ Bukalabale mu kisaka ke’nkapo bikupilwa. Pavule i kusholwa mutonko. Nkindi 12:18 unena’mba: “Kudi wa kampeja-bukidi ka kunenena pamo’nka bwa kusaba [k]wa kipete.” Kuno ‘kusabwa’ mutyima mu kisaka, kutalanga ne pa kwitwa na diwi dya bukalabale, kufuninwa, ne kafutululwa kitatyi kyonso, kufwijibwa bumvu na mutonko, ne kufunkwa minwe na bulobo. Pavule, bilonda bya ku mutyima bitamba ku bukalabale, kebimwekangapo nansha kuyukwa na bakwabo.

¹⁷ Kintu kiletelanga mwana bulanda nakampata i kwiteneka ku milangwe​—ya kufutululwa, kutukwatukwa bu muntu wakubulwa ñeni, lūku, nansha wakubulwa mvubu. Mutonko wa uno muswelo okokeja konakanya mwikadilo wa mwana. Eyo, bana bonso bafwaninwe kulemununwa. Ino Bible usoñanya bashabana’mba: “Bānwe bashabo nenu, kemukisomba bāna benu, mwanda wa kunena’mba, bakanyoñama pa mutyima.”​—Kolose 3:21.

18. Bukalabale bwa mu kisaka bushilwilanga kwepi, ne i muswelo’ka witulombola Bible wa kwibwimika?

¹⁸ Bukalabale bwa mu kisaka bushilulanga mu mutyima ne mu ñeni; byonso byotulonga bitambanga ku bintu byotulanga. (Yakoba 1:14, 15) Muntu ukimba kuleka bukalabale, ufwaninwe kwalamuna mulangilo wandi. (Loma 12:2) Lelo kikokejika? Eyo. Kinenwa kya Leza kidi na bukomo bwa kwalamuna bantu. Kikokeja kutukuna ne “bishimikwa bīne bya bukomo,” ke milangwe imbi kadi. (2 Kodinda 10:4; Bahebelu 4:12) Buyuki bwabinebine bwa mu Bible bwalamunanga bantu umbyonsololo, baikala ke bantu bavwale bumuntu bupya.​—Efisesa 4:22-24; Kolose 3:8-10.

19. I muswelo’ka ufwaninwe mukristu kumona mwine-pandi?

¹⁹ Muswelo otufwaninwe kumona mwine-petu. Kinenwa kya Leza kikankamika “balume nabo kusanswa bakaji babo abo bene pamo bwa ngitu ya abo bene. Wakusanswa mukaji wisanshilwe aye mwine.” (Efisesa 5:​28) Bible unena kadi amba balume bafwaninwe “kwibalemeka buleme bakaji, byo badi bwa kintu kya bukomo butyetye.” (1 Petelo 3:7) Bakaji bapelwe musoñanya wa “kusanswa balume babo” ne ‘kwibalēmeka pakatampe.’ (Tetusa 2:4; Efisesa 5:33) Bine, mulume wakaminwe Leza kakokejapo kunena’mba ndēmekele wami mukaji, aye koku umususula na mutonko nansha na bikupilwa. Mukaji nandi shi ufuninanga wandi mulume, umuzawila, nansha umupotomeja kitatyi kyonso, kakokejapo kunena’mba musenswe, nansha’mba mulēmekele.

20. Bambutwile badi na kiselwa kumeso a ani kya kulela babo bana, ne mwanda waka kebafwaninwepo kulomba babo bana bintu bibatabukile kipimo?

²⁰ Kumona bana mu muswelo mwendelemo. Eyo, bambutwile bafwaninwe kusanswa babo bana ne kwibata mutyima. Kinenwa kya Leza kitelanga bana bu “bipyanwa bya Yehova” ne bu “mpalo.” (Mitōto 127:3) Bambutwile badi na kiselwa kumeso a Yehova kya kulela bino bipyanwa. Bible wisambila pa ‘bya bwanuke’ ne pa “bulembakane” bwa bwanuke. (1 Kodinda 13:11; Nkindi 22:15) Bambutwile kebafwaninwepo kubezemuka shi bana balonga bya bulembakane. Bankasampe ke bakulumpepo. Bambutwile kebafwaninwepo kwibalomba bintu bitabukile pa myaka yabo, nansha pa bukomo bwabo.​—Tala Ngalwilo 33:​12-14.

21. I muswelo’ka wa bwine-Leza ufwaninwe kumonwa bambutwile ke banunu ne mwa kwibakwatakenya?

²¹ Muswelo otufwaninwe kumona bambutwile ke banunu. Levi 19:32 unena’mba: “Ukamutalukila wa mvwi ku mutwe ne kukafwa kipala mpala ya mununu.” Bijila bya Leza bitulomba kukwata banunu na bulēme ne na mutyika mukatampe. Kulela mbutwile mununu udi na manye, ubēlabēla, kakyenda nansha kakilanga biyampe, kikalanga kikoleja. Inoko bana i bavulujibwe “kulōka bakwibabutula.” (1 Temote 5:4) Kino kishintulula kwibalela na bulēmantu ne na bulēme, pakwabo na kwibapa lupeto. Kususula bambutwile banunu kungitu nansha mu muswelo o-onso i kīnyuma na bitulomba Bible twibalongele.

22. I ngikadilo’ka mikatampe ikokeja kwitupa muswelo wa kupwija bukalabale bwa mu kisaka, ne tukeilombola namani?

²² Tamija kwīfula. Nkindi 29:11 unena’mba: “Kivila kinena ne bulobo bwakyo bonsololo; ino muntu wañeni ukankaja’bo ne kutalaja’bo.” I muswelo’ka okokeja kwīfula? Pwija mwanda bukidi-bukidi, kupita’ko kubidila munda. (Efisesa 4:​26, 27) Shi uwakomenwa kwīfula, nankyo taluka’po. Lomba Leza mushipiditu sandu ukupe kwīfula. (Ngalatea 5:​22, 23) Lunango nansha makayo a kwitāmuna ngitu bikokeja kukukwasha, wikale kwīfula mu milangwe. (Nkindi 17:​14, 27) Wielele’ko, wikale muntu “wija pa kufuna bulobo.”​—Nkindi 14:29.

23. I kika kikokeja kulongwa shi muntu umo pa kipwilo ulonga bintu bya bukalabale mu kisaka misunsa mivule pakubulwa kwisāsa, kimfwa ukupila ba mu kyandi kisaka?

²³ Mu myanda ishikilwe Leza, Bible utela’mo “nshikani, ne lupata, . . . ne bukalabale,” kadi unena’mba boba “bakulongalonga’byo kebakapyanapo bulopwe bwa Leza.” (Ngalatea 5:​19-21) Nanshi, muntu yense witela bu mukristu, ino aye ulonga bilongwa bya bukalabale kitatyi ne kitatyi pampikwa kwisāsa, kimfwa ukupila mwine-pandi nansha bana, ukokeja kupangwa mu kipwilo kya bwine-kristu. (Enzankanya na 2 Yoano 9, 10.) Mu uno muswelo, kipwilo kikekala kitōka, kyakubulwa’mo bantu basusujana.​—1 Kodinda 5:​6, 7; Ngalatea 5:9.

24. (a) I kika kikokeja kutonga bakaji nansha balume basusulwa? (b) I muswelo’ka ukokeja balunda babinebine ne bakulumpe kukwasha mukaji nansha mulume ususulwa, ino i kika kyokebafwaninwe kulonga?

²⁴ I kika kikalonga mukristu ukupilwa nyeke na mwine-pandi upela kwalamuka? Bamo-bamo batoñanga kushikata nandi pamwanda wa buluji kampanda. Bakwabo nabo, pa kumona’mba ngitu, ñeni, ngikadilo yabo ya kumushipiditu​—pakwabo ne būmi bwabo—bidi mu kyaka, batoñanga kusansana nandi. Kushikata nansha kwisansanya nandi i mwanda utala muntu ususulwa aye mwine kasuku kandi, kumeso a Yehova. (1 Kodinda 7:​10, 11) Balunda babinebine, boba bobutulwa nabo, nansha bakulumpe bakristu bakokeja kukwasha na madingi, ino kebafwaninwepo kuningila ususulwa amba longa nenki. Uno i mwanda umutala aye mwine.​—Loma 14:4; Ngalatea 6:5.

25. I mpango’ka yākwete Yehova pa mwanda utala kisaka?

²⁵ Pātundaije Yehova ba Adama ne Eva mu busongi, kādipo usaka’mba bisaka bikadibwe na ndyabilonda ya bintu bileta kavutakanya, kimfwa butondwe ne bukalabale. (Efisesa 3:14, 15) Mu kisaka mwādi mwa kubikala buswe ne ndoe; muntu yense wādi wa kupebwa bisakibwa byandi bya kumusangaja mu ñeni, mu milangwe ne kumushipiditu. Ino bubi pa kutwela, būmi bwāshilula koneka.​—Enzankanya na Musapudi 8:9.

26. I būmi’ka butengele boba bakwatañenye mwiendelejo wabo na misoñanya ya Yehova?

²⁶ I kyadyese, mwanda Yehova kālekelepo kitungo kyandi kitala pa kisaka. Ulaile kutūla’ko ntanda impya ya ndoe, mukekala bantu na “mutyima-ntenke, kabidi nansha umo ukeilengeja moyo.” (Ezekyele 34:28) Mu kine kitatyi’kya, butondwe, bukalabale bwa mu kisaka, ne bikambija bikwabo byonso bivutakanya bisaka dyalelo, bikekala kutupu’byo. Mimungomungo ya bantu keikafipo moyo nansha byaso, mhm, ino “bakēsangaja mu bungi bwa ndoe.”​—Mitōto 37:11.