Kuzumbija Mutyima Pangala Pa Kyaka

Alona unena amba, “Ponaivwene ñunga, mutyima munda keuntu, naenda lubilo kukafyama. Inoko nansha byonafyeme mutyima wadi’nka uzumbanzumba. Byadi bibi mpata shi nalupuka panja pa kubulwa kifuko kya kufyama. Kyaba kimo, nalongele ami’tu ndupuka mwishinda, nashilula kudila kadi nakomenwa’nka ne kufoma biyampe. Byanombele mansá mavule pa kwitūkija. Kupwa ñunga keidila monka.”

Divita i kimo’tu kya mu bintu bileta kyaka. Kimfwa, kuyuka amba abe nansha muntu osenswe ususukanga na misongo mikomo kubwanya kukulengeja wiivwane’nka na abe waponenwa na nzaji. Kadi ku bantu bakwabo, kutyina pangala pa mafuku a kumeso kubwanya kwibalengeja bazumbije mutyima. Beipangula amba, ‘Lelo betu bana, nansha betu bankana, bakekala’ko mu ntanda ya divita, bupolapola, konwa kwa luvula, kushintashinta kwa bitatyi ne bipupo?’ Lelo i muswelo’ka otubwanya kulwa na kuno kuzumbija mutyima?

Pa kuyuka amba bintu bibi bilongeka, “muntu mukosoke umonanga kibi ne kwifya.” (Nkindi 27:12) Kadi monka motulongelanga bukomo bwa kwikinga ku ngitu, tubwanya ne kutabula matabula a kwikinga mu ñeni ne mu malango. Mu kwipwija mukose kubi ne mu misapu ivwanwa mwikalanga bifwatulo bibi bibwejanga kuzumbija mutyima kotudi ne ku betu bana. Kwepuka bino bintu ke kushintululapo kuvulaminwa bubine bwa myanda. Leza ketupangilepo na milangwe ya kulangulukila pa bintu bibi. Ino, tufwaninwe kuyuja mu ñeni yetu “bintu byonso bya bine shi bika shi bika, . . . byoloke, . . . byampikwa disubi, . . . bya kusanshibwa.” Shi tulonga namino, “Leza wa ndoe” uketupa ndoe ya mu ñeni ne mu mutyima.​—Fidipai 4:8, 9.

Lwitabijo lwa bine lwitukwashanga tulwe na kuzumbija mutyima. Bible witusoñanya ‘tute’ko mutyima pa mwanda wa milombelo.’ (1 Petelo 4:7) Tukokeja kulomba bukwashi kudi Leza, tunangu ne bukankamane bwa kulumbulula ngikadilo yetu, na kikulupiji kya amba “witwivwananga mu byonso byotumulomba.”​—1 Yoano 5:15.

Bible unena’mba Satana ye “mulopwe wa ino ntanda” ke Lezapo, kadi “ntanda yonsololo idi mu makasa a yewa umbi.” (Yoano 12:31; 1 Yoano 5:19) O mwanda, Yesu kānenepo’tu binenwa bya kyelekejo bitupu paetunena tulombele amba: “Witunyongolole kudi yewa umbi.” (Mateo 6:13) Alona unena amba, “Kitatyi kyonso kyadi kidila ñunga, nadi nomba Yehova ankwashe ndeke kuzumbija mutyima. Kadi wami mulume muswe wadi ungita ne kulombela nami pamo. Bine, milombelo yetukweshe.” Enka munenena Bible amba: “Yehova udi pabwipi na boba bonso bamwitanga, na bonso bamwitanga mu binebine.”​—Ñimbo 145:18.

Mu busapudi bwandi bwa ku Lūlu, Yesu wāfundije balondi bandi balomebele amba: “Bulopwe bobe bwiye.” (Mateo 6:10) Bulopwe bwa Leza bukatalula’ko kuzumbija konso kubi kwa mutyima. Kupityila padi Yesu, “Mwana-mulopwe wa ndoe,” Leza ukatukija “mavita ne ku mfulo ya ntanda.” (Isaya 9:6; Ñimbo 46:9) “Ukatyiba [Leza] umbukala mwa bantu bangibangi, . . . Muzo keukatalulapo kipete pa muzo mukwabo; ehe, nansha kulombola bulwi monka nyeke, ehe . . . Nansha umo ukebalengejapo moyo.” (Mika 4:3, 4) Bantu ba mu bisaka bya nsangaji “bakōbaka mobo ne kwikala monka; kadi bakadima madimi a mañanza ne kudya bipa byayo.” (Isaya 65:21) “Kadi mwikadi kakanenapo’mba: Nabela.”​—Isaya 33:24.

Dyalelo, nansha shi tubalonga namani bukomo bwa kwikinga, ketubwanyapo kukankaja “kyaba ne mwikadilo” wampikwa kulaya nansha kwepuka kifuko kibi mu kitatyi kibi. (Musapudi 9:11) Pano ke padi myaka tutwa na tutwa, mavita, bupolapola ne mbá byendelelanga na kwipaya bantu bayampe. Lelo i lukulupilo’ka ludi na bano bantu bampikwa mwanda?

Bantu midiyo ne midiyo, bayukenwe’nka na Leza kete, bakekala bōmi monka. Pano’ko bidi bakilēle, balaminwe mu lute lubwaninine lwa Leza, kufikija ne ku difuku dya “boba bonso badi mu bibundu . . . ne kutamba bakatamba’mo.” (Yoano 5:28, 29) Pa mwanda utala lusangukilo, Bible witukulupija amba: “Tudi na luno lukulupilo pamo bwa ñanga wa muya wetu, lwa binebine kadi lushimate.” (Bahebelu 6:19) Kadi Leza “i mupe bantu bonso kikulupiji pa kumusangula [Yesu] mu bafwe.”​—Bilongwa 17:31.

Pano’ko bidi, enka ne boba balonga bukomo bwa kusangaja mutyima wa Leza bakizumbija mutyima. Na kutabula matabula mayampe, kufwena kudi Leza kupityila ku milombelo ne kutamija lwitabijo mu lukulupilo lwa mu Bible pa mafuku āya kumeso, ba Paul, Janet, ne Alona babwenye kūminina kuzumbija kwabo kwa mutyima. Pamo’nka na mobyaikadile kobadi, “Leza uleta lukulupilo emuyuje nsangaji yonso ne ndoe pa kikulupiji kyomumukulupile.”​—Loma 15:13.