Bankasampe, Vulukai Umpangi Wenu

“Vuluka Umpangi obe mu mafuku obe pokidi nkasampe.”—MUS. 12:1.

 1. Yehova ulombolanga muswelo’ka amba ukulupile batōtyi bandi bankasampe?

YEHOVA umonanga bankasampe Bene Kidishitu na bulēme pamo’nka bwa lume lutalaja. Kadi, wālaile amba mu difuku dya “bukomo,” bwa wandi Mwana, bansongwalume ne bansongwakaji ‘bakepānanga abo bene ku mityima tō,’ mu mwingilo wa Kidishitu. (Mit. 110:3) Buno bupolofeto bwādi bwa kufikidila mu kitatyi kibudilwe bantu bavule bwine Leza, bakwisanswa abo bene ne lupeto lwabo kumo, ne bampikwa kukōkela. Ino, Yehova wādi uyukile amba bankasampe bamutōta bakekalanga beshile na bakwabo. Bine, Leza wimukulupile mpata banwe batutu ne bakaka bankasampe!

 2. Lelo kuvuluka Yehova kulomba bika ne bika?

² Langa’po mukokeja kusangela Leza pamona bankasampe bamuvuluka bu Umpangi wabo. (Mus. 12:1) Mungya buluji, kuvuluka Yehova ke’nkapo’tu kumulanga mu ñeni bitupu. Ino, i kulonga’po kintu—kulonga bimusangaja, ne kulonda bijila ne misoñanya yandi mu būmi bwetu bwa difuku ne difuku. Bilomba kadi ne kukulupila mudi Yehova, na kuyuka amba utele mutyima ku bitusakilwa. (Mit. 37:3; Is. 48:17, 18) Lelo nobe ye momwenanga Umpangi obe?

“Kulupila Mudi Yehova ne Mutyima Obe Onsololo”

3, 4. Yesu wālombwele namani amba wādi ukulupile mudi Yehova, ne mwanda waka i kya mvubu netu tukulupile mudi Yehova dyalelo?

³ Yesu Kidishitu kyo kimfwa kilumbuluke kya muntu wādi ukulupile mudi Leza. Wādi na būmi bukwatañene na binenwa bidi mu Nkindi 3:5, 6 binena’mba: “Kulupila mudi Yehova ne mutyima obe onsololo, kadi kokalemēnenapo pa kwivwanija kwa abe mwine; mu mashinda obe onso muyuke, kadi aye ukōlolanga tushinda tobe.” Yesu pa kupwa’tu kubatyijibwa, Satana wāmufwenene kamutompa amba etabije kupebwa ntumbo ne bulopwe bya ino ntanda. (Luka 4:3-13) Inoko Yesu kāongwelwepo. Mwanda wādi uyukile amba “bupeta ne bulēme ne būmi” bilupukanga ku “kwityepeja ne kwakamwa Yehova.”—Nk. 22:4.

⁴ Dyalelo, ntanda i mitadilwe na lwiso ne kwisakila. Mu ino ngikadilo, tukekala bantu bañeni shi tulonda kimfwa kya Yesu. Kadi vuluka amba, Satana uloñanga bukomo bwandi bonso mwanda wa kutalula bengidi ba Yehova mu kashinda katwala ku būmi. Usakanga bantu bonso banangile mu dishinda dikatakata ditwala ku bonakani. Ino abe kokongolwa na aye! Inoko, sumininwa mu kuvuluka Umpangi obe. Mukulupile mu byonso, kadi kwatyija ku “būmi bulumbuluke,” ke-pantu i bwa binebine ne ke budi pabwipi.—1 Tem. 6:19.

Bankasampe, Ikalai na Ñeni!

 5. Lelo ulanga amba ntanda ikekala namani kumeso’ku?

⁵ Bankasampe bavuluka Umpangi wabo bekalanga na ñeni kutabuka bakwabo ba lwabo lukongo. (Tanga Mitōto 119:99, 100.) Byobetabije milangwe ya Leza, bayukile biyampe amba ino ntanda isa kupita. Nansha byomukidi bankasampe, mumonanga mwikadile bantu na moyo ne kuzumbija mutyima. Dyalelo ku masomo, mwivwananga divule myanda itala busala, mulanga, kutukija kwa mato, ne myanda mikwabo pamo bwa ino. Bantu bazumbijanga mutyima mpata pa mwanda wa kwendelela kwa bino bintu, inoko enka Batumoni ba Yehova bo bevwanije amba i kiyukeno kilombola’mba ino ntanda ya Satana ke yenda ku mfulo.—Kus. 11:18.

 6. Lelo i muswelo’ka ongolwanga bankasampe bamobamo?

⁶ Ino i kya bulanda, mwanda bankasampe bamo badi bengidila Leza kebakidipo badyumuke, mwanda i bavulaminwe’ko amba kitatyi kyashadila’ko ino ntanda kibatyepa. (2 Pet. 3:3, 4) Bakwabo i bongolwe ne kuponena mu bubi bukatampe pa mwanda wa kisense kibi ne kutala bantu badi mutaka. (Nk. 13:20) Bine, i kya bulanda pa kujimija kwitabijibwa na Leza mu kino kitatyi kya mfulo! O mwanda, boilai ñeni ku byobya byāfikile Bene Isalela mu 1473 K.K.K. pobādi mu Dilungu dya Moabu, kubwipi na kutwela mu Ntanda ya Mulao. Le byāpityile namani?

Bāponene’tu ke ku Mfulo

7, 8. (a) Lelo i manwa’ka āingidije Satana mu Dilungu dya Moabu? (b) Le i manwa’ka engidija Satana dyalelo?

⁷ Pa kala, Satana wādi usaka Bene Isalela baleke kutwela mu ntanda ya mulao. Satana pa kukomenwa kwibafinga mafingo kupityila ku mupolofeto Balame, wāingidije manwa makwabo a munshimunshi; wāsakile kwibabudija madyese a Yehova. Dyabola wāingidije bana-bakaji ba bwitwa Bene Moabu mwanda wa kwibongola, ne wānekenye’ko bamobamo. Bantu bāshilula kulonga busekese na bana-bakaji Bene Moabu ne kufukatyila Bala wa Peole! Nansha byobādi kebadi kubwipi na kupyana Ntanda ya Mulao ya dyangi, Bene Isalela 24 000 bājimije būmi bwabo. Bine, ādi malwa mabi! —Umb. 25:1-3, 9.

⁸ Netu dyalelo, ketudi pabwipi mpata na kutwela mu ntanda ya mulao ya buya—ke milongelo impya ya bintu kadi. Monka mwāalongele pa kala, Satana wendelelanga kongola bantu ba Leza kupityila ku busekese. Ngikadilo miyampe pano kemyoneke, mwanda busekese ke bumonwanga bu bwendele’mo, ne buladi bwa bantu ba ngitu imo bu butongi bwa muntu mwine. Kaka umo Mwine Kidishitu wanene amba: “Pano ke enka’tu ku njibo ne ku Njibo ya Bulopwe kufunda bana amba buladi bwa bantu ba ngitu imo ne buladi panja pa busongi i bubi ku meso a Leza.”

 9. I bika bibwanya kufikila muntu “kitatyi kitoyanga buluba bwa bunkasampe,” ne bankasampe babwanya kulwa na kino kitatyi muswelo’ka?

⁹ Bankasampe bavuluka Umpangi wabo bayukile amba kusambakena pamo i kyabuntu kikola kiletelwe mwanda wa kubutula ne kwivudija. O mwanda, bayukile amba kusambakena pamo kufwaninwe kukwatañana enka na mpango ya Leza—ya busongi. (Bah. 13:4) Inoko, mu “kitatyi kitoyanga buluba bwa bunkasampe”—pekalanga kilokoloko kya bulādi kikomo mpata, ne kikokeja kufikija muntu ku butyibi bwakubulwa kwendela’mo—bibwanya kwikala bikomo kwilama ku busekese. (1 Kod. 7:36, NW) Lelo i kika kyokokeja kulonga shi ubaikala na milangwe mibi mu ñeni? Nabya lomba Yehova na kininga akukwashe kulangulukila pa bintu biyampe. Yehova wivwananga nyeke boba banyemena kwadi na mutyima wampikwa budimbidimbi. (Tanga Luka 11:9-13.) Misambo yūbaka nayo ibwanya kukwasha kujadika milangwe.

Tonga Bitungo Byobe na Ñeni!

10. I milangwe’ka mifwe yotufwaninwe kwepuka, ne i bipangujo’ka byotukokeja kwiipangula?

¹⁰ Bubinga bumo bulongelanga bankasampe bavule ba ino ntanda bibi kwampikwa kwikaka ne kulondalonda bya kwisangaja bya ngitu, i pa mwanda i babulwe “kimonwa”—bwendeji bwa Leza nansha lukulupilo lwa būmi bwa kumeso. (Nk. 29:18) Badi pamo bwa Bene Isalela bampikwa bwine Leza ba mu mafuku a Isaya bādi bekadile enka “tusepo ne nsangaji, . . . kudya mwita ne kutoma vinyu.” (Is. 22:13) Pa kyaba kya kwabila bantu ba uno muswelo, mwene i biyampe kulangulukila pa lukulupilo lwa kutendelwa lulaile Yehova bantu ba kikōkeji? Shi wi nkasampe mwingidi wa Leza, lelo nobe wabilanga ntanda impya īya kumeso? Lelo uloñanga buninge bwa ‘kwikala wakwilemeka senene ne kutengela kwa kukulupila’ kwa nsangaji kukutūdile Yehova kumeso? (Tet. 2:12, 13) Bitungo byobe ne bintu byotangidija kumeso bifwaninwe kukwañana na malondololo obe.

11. Mwanda waka bankasampe Bene Kidishitu bakidi ku masomo bafundanga na kusumininwa?

¹¹ Banwe bankasampe, ntanda imusakilanga kwela bukomo bwenu bonso mu kulondalonda bitungo bya ku ngitu. Pavule pene, boba bakidi ku masomo umbukata mwenu bafwaninwe kulonga bukomo bwa kufunda masomo a kyalwilo. Kupwa, kitungo kyobe kekifwaninwepo’tu enka kya kumona kaji kayampe, ino i ne kwikala bu kipanda mu kipwilo ne bu musapudi wa Bulopwe upa bipa. Pa kino, bikusakila kwikala muntu muyuke kwisamba, wa milangwe mijalale, ulanga na kitukije-tyima ne kulēmeka bakwabo. Nansha nabya, bankasampe befunda Bible ne bekankila’ko kulonda misoñanya yandi mu būmi bwabo, bafundijibwanga bufundiji bulumbuluke ne kwiadila kyalwilo kiyampe kikebakwasha kunekenya ne kumona būmi bwa nyeke.—Tanga Mitōto 1:1-3.a

12. Lelo i kimfwa’ka kifwaninwe kwiula bisaka bya Bene Kidishitu?

¹² Mu Isalela, kufundija bana wādi dibajinji mwingilo wa bambutwile. Buno bufundiji bwādi butala bintu byonso bya mu būmi, nakampata bintu bya ku mushipiditu. (Kup. 6:6, 7) O mwanda, bankasampe Bene Isalela bādi bateja bambutwile babo ne batame bakwabo bādi bakaminwe Leza kebādipo bamwena enka mu buyuki kete, ino ne mu tunangu, ñeni, kwivwanija, ne bukomo bwa kulanga—ngikadilo imwenwanga pavule enka ku bufundiji bwitufundija Leza. (Nk. 1:2-4; 2:1-5, 11-15) Dyalelo nadyo, bisaka bya Bene Kidishitu bifwaninwe kuta mutyima ku buno bufundiji.

Ivwana Boba Bakuswele

13. I madingi a muswelo’ka adingilwanga bankasampe divule, ne mwanda waka bafwaninwe kwikala badyumuke?

¹³ Bankasampe batambulanga madingi ku bantu beshileshile—kubadila’mo ne badingidi ba ku masomo, balangilanga divule enka pa būmi buyampe mu ino ntanda. I biyampe, kubandaula na katentekeji, na bukwashi bwa milombelo, madingi onso shi i makwatañane na Kinenwa kya Leza ne na bidibwa bitambija kabumbo ka umpika wa binebine, udi na manwa. Powafundile Bible wajingulwile amba Satana ukwatanga nakampata bankasampe ne boba badi na buyuki butyetye. Kimfwa, mu budimi bwa Edena, Eva wādi ukidi na buyuki butyetye, wāivwene bya Satana, mweni wampikwa buswe kwadi. Bine, byādi bya kwikala biyampe shi wāivwene Yehova, mwine wādi umuswele mu byonso!—Ngal. 3:1-6.

14. Mwanda waka tufwaninwe kwivwana Yehova ne bambutwile betu betabije?

¹⁴ Umpangi obe ukuswele mpata, ne ukuswele mu muswelo muyampe. Ukusakilanga wikale na nsangaji nyeke, ke’nkapo dyalelo kete! O mwanda, pamo enka bwa mbutwile wa kanye, ukulombolanga pamo ne bonso bamutōta, amba: “Dine dino’di dyo dishinda, nangaimo.” (Is. 30:21) Shi udi na bambutwile betabije baswele Yehova binebine, i dyese dikwabo kodi. Ivwana na bulēme madingi obakupa pa kwitungila bitungo ne byobya byofwaninwe kutangidija mu būmi. (Nk. 1:8, 9) Ne kadi, basenswe ukamone būmi, kintu kya mvubu kutabuka bupeta nansha ke ntumbo mine mu ino ntanda.—Mat. 16:26.

15, 16. (a) I kikulupiji’ka kitupa Yehova? (b) I bufundiji’ka bwa mvubu botwifundila ku byāfikile Baluki?

¹⁵ Boba bavuluka Umpangi wabo bekalanga na būmi bupela, na kukulupila amba bine Yehova kakebazobololapo “nansha patyetye pene,” nansha kwibalekelela kwine “mpika.” (Tanga Bahebelu 13:5.) Tufwaninwe kudyumuka kutyina kuludikwa na mushipiditu wa ino ntanda, mwanda wipatanyanga na ngikadilo miyampe itusakilwa. (Ef. 2:2) Pa kino, tubandaule kimfwa kya Baluki, mulembi wa Yelemia, wāikele’ko mu mafuku a makambakano kumeso kwa konakanibwa kwa Yelusalema mu 607 K.K.K.

¹⁶ Mobimwekela, Baluki wādi ukimba bintu bya ku ngitu mwanda wa kwikala na būmi buyampe. Yehova pa kumona nabya, wādyumwine Baluki aleke kukimba “bintu bikatakata” bya aye mwine. Baluki wādi mwityepeje kadi wa ñeni, mwanda wāivwene Yehova ne kupanda wāpanda pa konakanibwa kwa Yelusalema. (Yel. 45:2-5) Pakwabo napo, kepāijijepo, bantu ba mu mafuku a Baluki bādi na “bintu bikatakata” bya ku ngitu, bādi bavundamine Yehova, bājimije byonso, byātutwa na Bene Kaladea (Bene Babiloni). Kadi bavule bājimije ne būmi bwabo bwine. (2 Bil. 36:15-18) Bintu byāfikile Baluki bitukwasha tuyuke amba kwikala mu kipwano kiyampe na Leza kyo kintu kya mvubu kutabuka bupeta ne ntumbo mu ino ntanda.

Londa Bimfwa Biyampe

17. I kika kinenenwa amba Yesu, Polo, ne Temote i bashile bengidi ba Yehova ba dyalelo bimfwa biyampe?

¹⁷ Kinenwa kya Leza kisambila pa bantu bavule bāshile bimfwa biyampe bya kulonda. Kimfwa Yesu, i muntu wa tunangu kupita bonso bāikele’ko, inoko wādi ubambile enka pa kyokya kibwanya kukwasha bantu nyeke—“myanda-miyampe ya bulopwe.” (Luka 4:43) Mutumibwa Polo nandi, wālekele mwingilo wandi muyampe ne kwingidija bukomo bwandi mu kusapula myanda miyampe, mwanda wa kupāna kudi Yehova kyokya kitabuke kunengela. Temote, ‘mwana wa mu lwitabijo’ wa Polo, wāiwile kimfwa kyandi kiyampe. (1 Tem. 1:2) Le ulanga’mba Yesu, Polo, ne Temote, bēalakenye pangala pa būmi bwabo? Mhm, nansha dimo! Na bubine, Polo wānene amba wādi umona byonso bipāna ino ntanda pamo “bu-bintya” pa kwibidingakanya na madyese aādi nao a kwingidila Leza.—Fid. 3:8-11.

18. I kushinta’ka kukatampe kwashintyile tutu umo nkasampe, ne mwanda waka kadipo wialakanya?

¹⁸ Dyalelo, bankasampe bavule Bene Kidishitu beulanga kimfwa kya Yesu, kya Polo ne kya Temote. Kimfwa, tutu umo nkasampe wadi na kaji kafutwa biyampe walembele amba: “Badi bankandija bitenta mwanda nondanga misoñanya ya mu Bible. Nansha byonadi na kamweno kakatampe, namwene amba nadi mpanga luvula bitupu. Ponafikile ku bakatampe ba ku kaji ka mu kompani yetu ne kwibalombola amba nsaka pano kushilula mwingilo wa kitatyi kyonso, bantandila kumbwejeja’ko mfuto, mwanda wa nshale ku kaji. Inoko, nadi musumininwe kuleka’byo. Bantu bavule kebadipo bevwana mwanda waka naleka kaji kayampe mwanda wa kwingila mwingilo wa kitatyi kyonso. Nadi nebalondolola amba nsakanga kufikidija mpiko yami kudi Leza. Pano pokendi na būmi bwimanine pa bintu bya ku mushipiditu, ngidi na nsangaji mikatampe ne kuloelelwa konkyadipo mbwanya kumwena ku lupeto nansha ku ntumbo.”

19. I butongi’ka bwa ñeni bufwaninwe kutonga bankasampe?

¹⁹ Tununu ne tununu twa bankasampe kujokoloka ntanda yonso i batonge butongi bwa ñeni pamo na buno. Shi ke pano, banwe bankasampe, kitatyi kyomulangulukila pa būmi bwenu bwa kumeso, kemukilwai amba difuku dya Yehova kedidi pabwipi. (2 Pet. 3:11, 12) Kemukyabilai boba bakimba bintu bikatakata mu ino ntanda. Inoko, ivwanai boba bemusenswe bya binebine. Kwibikila “lupeto luleme momwa mūlu” bo bupeta bwa mvubu kutabuka bomubwanya kwibikila, ne bukemuletela tumweno twa nyeke ne nyekeke. (Mat. 6:19, 20; tanga 1 Yoano 2:15-17.) Bine, vulukai Umpangi wenu. Ponso pomukendelela kuvuluka Yehova, nandi kakabulwepo kwimwesela.

[Kunshi kwa Dyani]

Le Ukokeja Kuvuluka?

• Le tukalombola namani amba tukulupile mudi Leza?

• Lelo bufundiji butabuke buya i bufundiji’ka?

• I ñeni’ka yotwaboila kudi Baluki?

• I bāni betushidile bimfwa biyampe, ne mwanda waka?

[Kifwatulo pa paje 21]

Yehova upānanga bufundiji buyampe kutabuka