“Sanswa Yehova Leza Obe”

 1. Mwanda waka buswe bwādi bwiswele ba Leza ne wandi Mwana bwātamine?

YESU KIDISHITU Mwanā Yehova wānenene amba: “Nsenswe Tata.” (Yoa. 14:31) Yesu wānene monka amba: “Tata usenswe Mwana kisanso kikatampe.” (Yoa. 5:20) Kino kekifwaninwepo kwitutulumuna. Ne kadi bidi, myaka mivule kumeso kwa Yesu kwiya pano pa ntanda bu muntu, wādi “sendwe mwine mukata” wa Leza. (Nki. 8:30) Ba Yehova ne Yesu byobāingidile pamo, Mwana wēfundile bintu bivule pa ngikadilo ya Shandi kadi wādi na bubinga buvule bwa kumuswila. Bine, kipwano kya mpwaninine kyālengeje buswe bobādi beswele butame.

 2. (a) Lelo buswe i bika? (b) Le i bipangujo’ka byotusa kwisambila’po?

² Buswe i kusanswa muntu bininge. Davida kaimba wa mitōto wāimbile amba: “Nkuswele, abe Yehova bukomo bwami.” (Ñim. 18:1) Uno o muswelo otufwaninwe kusanswa Leza, mwanda witusenswe bininge. Shi tukōkela Yehova, nandi uketulombola buswe. (Tanga Kupituluka 7:12, 13.) Ino, le tubwanya kusanswa Leza, nansha byoketukokejapo kumumona? Lelo kusanswa Yehova kushintulula bika? Mwanda waka tufwaninwe kumusanswa? Ne i muswelo’ka otukokeja kulombola’mba tuswele Leza?

3, 4. Mwanda waka tukokeja kusanswa Yehova?

³ “Leza i Mushipiditu,” o mwanda ketukokejapo kumumona.(Yoa. 4:24) Inoko, tubwanya kusanswa Yehova, kadi Bisonekwa bitusoñanya tulombole buno buswe. Kimfwa, Mosesa wālombwele bene Isalela amba: “Ukasanswa Yehova Leza obe ne mutyima obe onso, ne muya obe onso, ne bukomokomo bobe bonso.”—Kup. 6:5.

⁴ Mwanda waka tukokeja kusanswa Leza bininge? Mwanda wetupangile na mutyima wa kwifunda yandi myanda ne kwitupa bukomo bwa kulombola buswe. Shi twifunda myanda ya Yehova biyampe, buswe botumuswele bukatama kadi tukekala na bubinga bwinebwine bwa kwikadila na nsangaji. Yesu wānene amba: “Ba katōkwe i boba bayukile amba bafwaninwe kwifunda myanda ya Leza, mwanda Bulopwe bwa mūlu i bwabo.” (Mat. 5:3) Dibuku dimo (Man Does Not Stand Alone) dya Abraham Cressy Morrison dinena pa mwanda utala mutyima wa kibutwila wa kutōta udi na bantu amba: “Tufwaninwe kwivwana nzuba, kutulumuka ne kutendela pa kumona bantu bakimba mūlu ne pano panshi muntu wa peulu ne kukulupila mwadi.”

 5. Le twayukile namani amba kukimba Leza ke kwa bitupupo?

⁵ Lelo kukimba Leza i kwa bitupu? Mhm, mwanda usakanga tumusokole. Mutumibwa Polo wālombwele’kyo patōkelela kitatyi kyaādi usapwila bantu badi bebungile mu Aleopakusa. Kino kyālongekele mu Tempelo Mikatampe —tempelo mine yādi itōtelwa’mo Athena, kilezaleza kya bene Atene ba kala. Langa’po bidi shi wādi’po kitatyi kyesambīle Polo padi “Leza mwine wālongele ino ntanda ne bintu byonso bidi’mo,” ne kushintulula’mba, “kashikatangapo mu matempelo alongelwe na makasa.” Mutumibwa ubweja’ko amba, Leza “wālupwile ku muntu umo mizo yonso ya bantu, ba kushikata pa ntanda yonso, wātūla ne bitatyi bitungwe ne mikalo ya mwa kushikatyila bantu, amba bakimbe Leza, shi babwanya kumubabata ne kumusokola binebine, nansha byakadipo bine kulampe na batwe bonso.” (Bil. 17:24-27) Bine, bantu babwanya kusokola Leza. Batumoni ba Yehova midiyo isamba-ibidi ne kupita ‘i bamusokole bya binebine’—kadi bamusenswe bya binebine.

 6. Le Yesu wātelele amba ‘mbila itabukile bukatampe kadi imbajinji’ i mbila’ka?

⁶ Buswe botusenswe Yehova bufwaninwe kutamba ku mutyima. Yesu wālombwele kino patōkelela kitatyi kyāmwipangwile Mufadiseo umo amba: “A Mufundiji, lelo i mbila’ka itabukile bukatampe mu Bijila?” Yesu wāmulondolola amba: “‘Sanswa Yehova Leza obe na mutyima obe onso ne na muya obe onso ne na ñeni yobe yonso.’ Ino’i yo mbila itabukile bukatampe kadi yo imbajinji.”—Mat. 22:34-38.

 7. Le kusanswa Leza (a) “na mutyima [wetu] onso” kushintulula bika? (b) “na muya [wetu] onso” kushintulula bika? (c) “na ñeni [yetu] yonso” kushintulula bika?

⁷ Le Yesu pa kunena’mba, tufwaninwe kusanswa Leza “na mutyima [wetu] onso,” wādi ukimba kunena bika? Wadi ukimba kunena’mba, tufwaninwe kusanswa Yehova na mutyima wetu onso wa kyelekejo, mwine udi na lupusa pa kusakasaka kwetu, malango etu ne milangwe yetu. Kadi tufwaninwe kumusanswa “na muya [wetu] onso,” nansha būmi bwetu ne bumuntu bwetu. Kadi, tufwaninwe kusanswa Leza “na ñeni [yetu] yonso,” nansha nangu yetu yonso. Kya mvubu i kino, tufwaninwe kusanswa Yehova ne pa mfulo pampikwa kwilea.

 8. Le kusanswa Leza ne pa mfulo kuketutonona tulonge bika?

⁸ Shi tusenswe Leza na mutyima wetu onso, muya wetu onso ne na ñeni yetu yonso, tukefunda Kinenwa kyandi na kininga, tukengidila mpango yandi na mutyima umo, kadi tukasapula na bupyasakane myanda miyampe ya Bulopwe. (Mat. 24:14; Loma 12:1, 2) Buswe bwa bine botuswele Yehova, buketufwenya bininge kwadi. (Yak. 4:8) Na bubine, ketubwanyapo kutela bubinga bonso botufwaninwe kuswila Leza. Inoko, tubandaule’ko bidi bumobumo.

 9. Mwanda waka usenswe Yehova Umpangi ne Mulami wetu?

⁹ Yehova i Umpangi wetu kadi Mukwatakani wetu. Polo wānene amba: “I pa mwanda wa aye potwikele na būmi, tujina ne kwikala’ko.” (Bil. 17:28) Yehova i mwitupe kīkalo kyetu kiyampe kya pano pa ntanda. (Ñim. 115:16) Kadi witupanga bidibwa ne bintu bikwabo byotusakilwa mwanda wa kukwatakanya būmi bwetu. O mwanda Polo wādi na bubinga bwa kulombwela bekadi ba mu Lesetala bādi batōta bilezaleza amba, “Leza mūmi, . . . byakashelepo aye mwine pampikwa bukamoni mwanda walongele biyampe na kwimupa mvula wa mūlu ne byaba bya kupa bipa, wayuja bā mityima yenu na byakudya ne tusepo.” (Bil. 14:15-17) Lelo buno ke bubingapo bwa kuswila Umpangi wetu Mukatampe kadi Mukwatakani wetu wa buswe?—Mus. 12:1.

10. Le i bika byotufwaninwe kulonga pangala pa mpangiko ya Leza ya kutalula’ko bubi ne lufu?

¹⁰ Leza i mulete’ko muswelo wa kutalula bubi ne lufu byotwāpyene kudi Adama. (Loma 5:12) Na bubine, “Leza wetulombola buswe bwandi mu uno muswelo amba, potwadi tukidi babipya-mambo, Kidishitu wetufwidile.” (Loma 5:8) Ne kutatana kwine mpika, mutyima wetu i muyule buswe botuswele Yehova mwanda i mwitupe muswelo wa kulekelwa bubi bwetu, shi twisāsa ne kulombola lwitabijo mu kitapwa kya kinkūlwa kya Yesu.—Yoa. 3:16.

11, 12. Le Yehova i mwitupe lukulupilo mu miswelo’ka?

¹¹ Yehova ‘i mwitupe lukulupilo lwituyuja nsangaji ne ndoe.’ (Loma 15:13) Lukulupilo lwitupele Leza lwitukwashanga tuminine matompo a mu lwitabijo. Bashingwe māni ‘bakakōkela kufika ne ku lufu bakapebwa kilukwa kya būmi bwa momwa mūlu.’ (Kus. 2:10) Boba balamine bululame badi na lukulupilo lwa kwikala pano pa ntanda, bakapebwa madyese a nyeke mu Paladisa ya ntanda yonso yālailwe. (Luka 23:43) Le tukalonga namani pa ano madyese? Lelo ketuyudilwepo nsangaji, ndoe ne buswe bwa kuswa Yewa Upānanga “kyabuntu kyonso kiyampe ne kya kupānwa kyonso”?—Yak. 1:17.

¹² Leza i mwitupe lukulupilo lwa lusangukilo lukunka mutyima. (Bil. 24:15) Na bubine, lufu lwa muntu otusenswe lwituletelanga bulanda bukatampe, inoko pa mwanda wa kyepelo kya lusangukilo, ‘ketudipo na bulanda pamo bwa boba kebadipo na kyobakulupile.’ (1 Te. 4:13) Yehova Leza usakanga na buswe kusangula boba bafwile, nakampata bantu ba kikōkeji pamo bwa Yoba muntu moloke. (Yoba 14:15) Fwatakanya’po bidi kwitana kwa nsangaji kuketana bantu bakasangulwa pano pa ntanda. Bine, mityima yetu i miyule buswe botuswele Tata wetu wa mūlu, mwine witupele lukulupilo lwa kutendelwa lwa lusangukilo!

13. Le i bika bilombola’mba Leza witutele mutyima bya binebine?

¹³ Yehova witutele mutyima bya binebine. (Tanga Mitōto 34:6, 18, 19; 1 Petelo 5:6, 7) Byotubadilwa mu ‘mikōko ya mu madyo andi,’ tudi na mutyima-ntenke mwanda tuyukile’mba, Leza wetu wa buswe utengele kala kukwasha boba bamukōkele. (Ñim. 79:13) Kadi, buswe bwituswele Leza bukamweka mu bintu byāketulongela mu Bulopwe bwa Meshiasa. Yesu Kidishitu Mulopwe wandi mutongwe pa kupwa kutalula bupolapola, kasusu ne bubi pano pa ntanda, bantu ba kikōkeji bakapebwa ndoe ne ntundubuko ya nyeke. (Ñim. 72:7, 12-14, 16) Lelo kwitabijepo amba ano madyese etupa bubinga bwa kuswila Leza wetu wa kilelo na mutyima wetu onso, na muya wetu onso, na bukomo bwetu bonso ne na ñeni yetu yonso?—Luka 10:27.

14. Lelo Leza i mwitupe dyese’ka dya ku bitupu?

¹⁴ Yehova i mwitulēmeke pa kwitupa dyese dya ku bitupu dya kumwingidila bu Batumoni bandi. (Isa. 43:10-12) Tusenswe Leza mwanda wa kwitupa uno mukenga wa kukwatakanya bubikadi bwandi ne wa kupa bantu lukulupilo lwa bine mu ino ntanda ya kavutakanya. Kadi, tubwanya kwisamba na lwitabijo ne kikulupiji kyonso mwanda tusapulanga myanda miyampe imanine pa Kinenwa kya Leza wa bine, mwine ulaile milao ileta lukulupilo keikatunyapo kufikidila. (Tanga Yoshua 21:45; 23:14.) Na bubine, madyese i mavule mene kadi bubinga botudi nabo bwa kuswila Yehova kebubadikapo. Ino, le tukalombola namani’mba tumuswele?

15. Lelo kwifunda ne kwingidija Kinenwa kya Leza bibwanya kwitukwasha namani?

¹⁵ Kwifunda Kinenwa kya Leza na kininga ne kwikingidija. Kulonga namino kulombola’mba, tusenswe Yehova ne amba tusakanga bine kinenwa kyandi kikale bu ‘kitōkeji kya mu dishinda dyetu.’ (Ñim. 119:105) Shi tudi na njia, tukokeja kusengibwa na bino bikulupiji bya buswe bya amba: “Mutyima mutyumuke munekenibwe, abe Leza, kukafutulula’opo, mhm.” “Lusa lobe, abe Yehova, lwankwatyije. Mu bungi bwa mifwatakanyo munda mwami kusengibwa kobe kubantōkeja ku mutyima wami, tō!” (Ñim. 51:17; 94:18, 19) Yehova ulombolanga boba basusuka lusa, kadi Yesu nandi wivwaninanga bantu lusa. (Isa. 49:13; Mat. 15:32) Kwifunda Bible kubwanya kwitukwasha tuyuke biyampe kwituta kwitutele Yehova mutyima na buswe, amba netu tumusanswe bininge.

16. Le kulombela kitatyi ne kitatyi kubwanya kutamija buswe botuswele Leza namani?

¹⁶ Kulombela kudi Leza kitatyi ne kitatyi. Milombelo yetu itufwenyanga pabwipi na “Wivwananga kulombela.” (Ñim. 65:2) Shi tubajingulula’mba Leza ulondololanga milombelo yetu, buswe botumuswele bukatama. Kimfwa, ketudi padi bamone amba kalekangapo tutompibwe na byobya bitabukile bukomo bwetu. (1 Ko. 10:13) Shi tuzumbijanga mutyima ne kuvundamukila kudi Yehova mu milombelo, tubwanya kwimwena “ndoe ya Leza” keidi yoidingakene nayo. (Fid. 4:6, 7) Kyaba kimo, tubwanya kulombela milombelo ya mu mutyima—na mwālongele Nehemia—ne kufula ku kuyuka’mba ibalondololwa. (Neh. 2:1-6) Kitatyi ‘kyotutakamana mu milombelo’ ne kufula ku kuyuka’mba, Yehova ulondololanga kulomba kwetu, buswe botumuswele bukatama, pamo ne kikulupiji kyotukulupile’mba uketukwasha tukomene matompo makwabo a mu lwitabijo.—Loma 12:12.

17. Shi tuswele Leza, le tukamona kwenda ku kupwila namani?

¹⁷ Ikala na kibidiji kya kwenda ku kupwila kwa bwine Kidishitu ne ku bitango. (Bah. 10:24, 25) Bene Isalela bādi bebunga mwanda wa kwivwana ne kwifunda myanda ya Yehova amba, bamutumbije ne kulonda Mukanda wandi wa Bijila. (Kup. 31:12) Kulonda kiswa-mutyima kya Leza ke kiselwapo kilēma shi tumuswele bya binebine. (Tanga 1 Yoano 5:3.) Nanshi, ketwakalekai kintu nansha kimo kitulengeje tumone bu kwenda ku kupwila kekudipo na mvubu. Na bubine, ketusakangapo kintu nansha kimo kitujimijije buswe bwetu bubajinji botwaswele Yehova.—Kus. 2:4.

18. Lelo buswe botuswele Leza bwitutononanga tulonge bika mu mwanda utala myanda miyampe?

¹⁸ Kusapwila bakwetu “bubine bwa myanda miyampe” na bupyasakane. (Ngt. 2:5) Buswe botuswele Leza bwitutononanga twisambile pa Bulopwe bwa Meshiasa bwa wandi Mwana muswe, mwine ‘ukatentama mwanda wa bubinebine’ pa Amakedona. (Ñim. 45:4; Kus. 16:14, 16) Bine, i kya nsangaji’po kashā kwingila mwingilo wa kulonga bana ba bwanga, na kukwasha bantu befunde myanda itala buswe bwa Leza ne ntanda yandi mipya yalaile!—Mat. 28:19, 20.

19. Mwanda waka tufwaninwe kusangela mpangiko ya Yehova ya kukumba luombe lwandi?

¹⁹ Kulombola kusangela mpangiko ya Leza ya kukumba luombe lwandi. (Bil. 20:28) Bakulumpe bene Kidishitu batūdilwe’ko na Yehova, baloñanga nyeke bintu mwanda wa kamweno ketu. Bakulumpe badi pamo “bwa kinyemeno kya luvula, ne mpakala ku kintenshi; pamo’nka bwa minonga ya mema muntu mūmu, bwa mwemba wa dibwe dikatakata muntanda myumu.” (Isa. 32:1, 2) Bine, tusangedile kukingwa ku kivula kikomo nansha ku kintenshi kilenga moyo! Kitatyi kitusōkanga dyuba kapubwe, tufwijanga’ko pangala pa mutalela utamba ku mwala udi pa lūlu. Uno muneneno wa kyelekejo witukwasha tuyuke’mba, bakulumpe betukwashanga ne kwitutūkija mutyima ku mushipiditu. Shi tukokela boba betwendeja, tukalombola muswelo otusangedile “bantu bu byabuntu” ne kulombola’mba tuswele Leza ne Kidishitu, Mutwe wa kipwilo.—Ef. 4:8; 5:23; Bah. 13:17.

20. Shi usenswe Leza, le ukalonga namani pa binenwa bidi mu Yakoba 1:22-25?

²⁰ Shi udi mu kipwano kya buswe na Yehova, ukekala wa “kulonga kinenwa, ke [wa] kwivwanapo bitupu.” (Tanga Yakoba 1:22-25.) ‘Wa kulonga’ udi na lwitabijo lumutwala ku mingilo, kimfwa kusapula na bupyasakane ne kutanwa ku kupwila kwa bwine Kidishitu. Byosenswe Leza bya binebine, ukakōkela ‘mukanda-wabijila mubwaninine’ wa Yehova, mwine mutanwa bintu byonso byasaka kodi.—Ñim. 19:7-11.

21. Lelo milombelo yobe itamba ku mutyima ifwaninwe kwikala pamo bwa bika?

²¹ Buswe boswele Yehova Leza bukakutonona uvundamukile nyeke kwadi mu milombelo itamba ku mutyima. Pa kwisambila pa kusōkwa kwādi kusōkwa ensense difuku ne difuku munshi mwa kipwano kya Mukanda wa Bijila, Davida kaimba wa mitōto wāimbile amba: “Lulombelo lwami lubīkwe mu kifuko kyobe bwa binunkabiyampe; kadi kutulula kwa maboko ami bwa kitapwa kya kyolwa.” (Ñim. 141:2; Div. 30:7, 8) Nanshi milombelo yobe ya kwityepeja, milombelo yobe ya kwisāshila, binenwa byobe bya butōtyi bitamba ku mutyima ne milombelo yobe ya kufwija’ko Leza, ikale pamo bwa ensense inunka biyampe yelekeja kwitabijibwa kwa milombelo.—Kus. 5:8.

22. Le i buswe bwa muswelo’ka botukesambila’po mu kishinte kilonda’ko?

²² Yesu wānene amba tufwaninwe kusanswa Leza ne mukwetu. (Mat. 22:37-39) Monka motusa kwikimwena potusa kwisambila bininge pa ino ngikadilo, buswe botuswele Yehova ne misoñanya yandi biketukwasha twingidile pamo na bantu-netu ne kulombola bakwetu buswe.