• Le Tubwanya Namani Kwikala Batōka ku Meso a Leza?
    Ikala Mūmi Nyeke!—Na Kwifunda Bible

    • Fwatakanya’po bidi lolo wa buswe uteakanya wandi mwana wa kwenda ku masomo. Wamoija biyampe ne kumuvwika bisandi bitōka senene. Bino bisandi bisa kumukinga ku kubela, ino kadi bilombola’mba bambutwile bandi bamukwatakenye. Mo monka, ne Yehova, Tata wetu wa buswe, ukimba twikale batōka—ku ngitu ne mu mwikadilo. Shi tubalama butōki bwetu, nabya tukamwena’mo batwe bene kadi tukamuletela ntumbo.

      1. Le tukekala namani batōka ku ngitu?

      Yehova witunena’mba: “Mufwaninwe kwikala bajila.” (1 Petelo 1:16) Buujila bwendelanga pamo na butōki bwa ku ngitu ne bwa mu mwikadilo. Tubwanya kwikala batōka ku ngitu na koya kyaba ne kyaba, na kulama bisandi byetu, njibo, ne motoka bikele bitōka. Tubwanya kadi ne kukwasha ku kukundula Njibo yetu ya Bulopwe. Shi twikale nyeke batōka ku ngitu, nabya tubatumbija Yehova.​—2 Bene Kodinda 6:3, 4.

      2. Le i bibidiji’ka byotufwaninwe kwepuka pa kwikala batōka?

      Bible witusoñanya’mba: “Twitōkejei ku byonso bisubija ngitu ne mushipiditu.” (2 Bene Kodinda 7:1) O mwanda, twepukanga kintu kyonso kibwanya kona umbidi wetu ne ñeni yetu. Milangwe yetu ifwaninwe nyeke kusangaja Yehova. Nanshi tuloñanga biyampe kitatyi kyotwepuka kwikala na milangwe mibi. (Ñimbo ya Mitōto 104:34) Kadi twielelanga’ko kwikala na muneneno wampikwa disubi.​—Tangai Bene Kolose 3:8.

      Le i bika bikwabo bibwanya kwitusubija ku ngitu ne mu mwikadilo? Kudi bintu bimo bibwanya kona umbidi wetu. O mwanda tupelanga bintu pamo bwa mfwanka, nsunko, ne kwipwija mukose na dyamba. Shi twepuke bino bintu, tukekala bakomo ku ngitu kadi tukalombola’mba tulēmekele kyabuntu kya būmi. Mu mwikadilo namo, tulwanga bininge na bibidiji bya disubi, kimfwa kwikaila ku ngitu ya bumvu ne kutala porno. (Ñimbo ya Mitōto 119:37; Bene Efisesa 5:5) Bikokeja kwikala bikomo pa kunekenya bino bintu, inoko Yehova, ubwanya kukukwasha unekenye’byo.​—Tangai Isaya 41:13.

      LANGULUKA BININGE

      Tala kwikala utōka ku ngitu mokutumbijija Yehova, kadi umone ne muswelo wa kunekenya bibidiji bya disubi.

      3. Butōki bwa ku ngitu butumbijanga Yehova

      Tukokeja kumona muswelo umona Yehova butōki na kubandaula musoñanya waāpēle bene Isalela ba kala. Tangai Divilu 19:10 ne 30:17-19, ne kwisambila pa bino bipangujo:

      • Le ano mavese asokola bika pa muswelo umona Yehova butōki bwa ku ngitu?

      • Le i bibidiji’ka bikakukwasha ushale nyeke utōka ku ngitu?

      Kwikala batōka ku ngitu kulombanga bukomo ne kitatyi. Inoko batwe bonso tubwanya kwikala ba bukundwe, twikale ba kwepi, balanda nansha bampeta. Talai VIDEO, ne kwisambila pa kipangujo kilonda’kya.

      VIDEO: Leza Usenswe Bantu ba Bukundwe (4:10)

      • Lelo kulama bintu byetu bikele byampikwa busala kunengejanga namani mwingilo wetu wa busapudi?

      4. Nekenya bibidiji bibi

      Muntu umo wela mfwanka mu bityakuku.

      Yehova ubwanya kwitukwasha tunekenye kibidiji kyo-kyonso kibi

      Shi utomanga mfwanka nansha dyamba mwanda wa kwisangaja, padi ubamone mobikadilanga bikomo pa kunekenya kibidiji kampanda. I bika bibwanya kukukwasha? Tala bino bibidiji mobyonena būmi bobe. Tangai Mateo 22:37-39, ne kwisambila pa mukokejeja mfwanka ne dyamba kona . . .

      • kipwano kya muntu na Yehova.

      • kipwano kyandi na kisaka ne na bantu bakwabo.

      Kwata’ko mpangiko ya kunekenya bibidiji bibi.a Talai VIDEO.

      VIDEO: Tamija Kwīfula (2:47)

      Tangai Bene Fidipai 4:13, ne kwisambila pa kino kipangujo:

      • Lelo bibidiji biyampe bya kulombela, kwifunda Bible, ne kupwila bibwanya kupa muntu bukomo namani bwa kunekenya kibidiji kibi?

      5. Lwá na milangwe ne na bibidiji bya disubi

      Tangai Bene Kolose 3:5, ne kwisambila pa bino bipangujo:

      • Le tubayuka namani amba kutala bifwatulo bya bantu badi mutaka, kwitumina misapu ya bya bulādi, ne kwikaila ku ngitu ya bumvu i bintu bya disubi ku meso a Yehova?

      • Le ulanga Yehova udi na bubinga bwa kwitunena twikale batōka mu mwikadilo? Mwanda waka?

      Tala muswelo obwanya kulwa na milangwe ya disubi. Talai VIDEO.

      VIDEO: Longa’po Kintu Ushale Utōka (1:51)

      Yesu wāingidije kyelekejo mwanda wa kulombola’mba tufwaninwe kusumininwa pa kushala batōka mu mwikadilo. Tangai Mateo 5:29, 30, ne kwisambila pa kino kipangujo:

      • Nansha Yesu byakādipo usaka kunena’mba tufwaninwe kwisanshija ku ngitu, ino wālombwele amba bitulomba kulonga’po kintu. Le i bilongwa bya muswelo’ka bilombola kusumininwa bifwaninwe kulonga muntu amba epuke milangwe ya disubi?b

      Shi ulwanga pa kunekenya milangwe mibi, Yehova umwene na bulēme bukomo bolonga. Tangai Ñimbo ya Mitōto 103:13, 14, ne kwisambila pa kino kipangujo:

      • Shi ulwanga na kibidiji kibi, le kino kisonekwa kibwanya kukukwasha namani wendelele kulwa?

      Kushetemuka ke kukomenwapo, endelela!

      I bipēla kulanga’mba, ‘Napone, kubapu nakomenwa.’ Inoko langulukila pa kino: muntu unyema lubilo shi wakukala ne kupona, kino kekishintululapo amba wajimija, mhm, nansha’mba ufwaninwe akajoke akanze monka lubilo, mhm. Mo monka shi ubapone polwa na kunekenya kibidiji kibi, kekishintululapo amba kubapu ubakomenwa bulwi. Kadi kekishintululapo amba bukomo bonso bokodi mulonge bubaenda mu mema. Kukukala kubadilwanga nyeke mu lwendo lutwala ku kunekenya. Kokazoza! Na bukwashi bwa Yehova, ubwanya kunekenya bibidiji bibi.

      Munyemi umo welangula paadi uponēne.

      BANTU BAMO BANENANGA’MBA: “Kendi mumunwe. Nkikibwanyapo kuleka’byo.”

      • Le i kisonekwa’ka kyobwanya kwingidija mwanda wa kulombola uno muntu amba na bukwashi bwa Yehova ubwanya kuleka kibidiji kibi?

      MU KĪPI

      Tusangajanga Yehova potulama ngitu yetu, ñeni yetu, ne mwiendelejo wetu bikele byampikwa disubi.

      Pitulukai’mo

      • Mwanda wa bika i kya mvubu twikale batōka?

      • I muswelo’ka obwanya kwikala utōka ku ngitu?

      • I muswelo’ka obwanya kwikala utōka mu milangwe ne mu mwikadilo?

      Witungile Kitungo

      KIMBA

      I bintu’ka bipēla byobwanya kulonga mwa kwikadila utōka nansha shi kudipo na lupeto luvule?

      Bukomo bwa Ngitu ne Bukundwe​—Koya ku Makasa (3:01)

      Tala matabula a kamweno obwanya kutabula pa kuleka mfwanka.

      “Mwa Kulekela Mfwanka” (Langukai!, Kweji 5, 2010)

      Tala bintu bibi bitamba ku kutala bifwatulo bya bantu badi mutaka.

      “Bifwatulo bya Bantu Badi Mutaka I Biyampe’ni Nansha I Bibi?” (Kiteba kya Mulami, 1 Kweji 8, 2013)

      Wimwene muswelo wanekenye muntu umo kibidiji kyandi kya kutala porno.

      “Nakomenwe Misunsa Mivule pa Kunekenya” (Kiteba kya Mulami No. 4 2016)

      a Kishinte “Mwa Kulekela Mfwanka” kitelelwe mu kipindi Kimba mu kino kifundwa, kilombola matabula abwanya kutabula muntu pa kunekenya bibidiji bimunañana.

      b Pa kukukwasha unekenye kibidiji kya kwikaila ku ngitu ya bumvu, tala kishinte kinena’mba, “Le Nkanekenya Namani Kibidiji kya Kwikaila ku Mutaka?” kidi mu kitabo Bipangujo bya Bankasampe ne Bilondololwa Bibakwasha, Volime 1, shapita 25.