Kokaleka Bilubo bya Bakwabo Bikukukaje

1, 2. Lelo Bible wālaile namani kwilundila’ko kwa bantu ba Yehova?

KUJOKOLOKA ntanda yonso, kudi bulongolodi bumo bubundilwe na bantu basenswe Yehova ne basaka kumwingidila. Bano bantu i Batumoni ba Yehova. Nansha byobadi na bilubo ne kutupatupa, Yehova wibaludikanga na mushipiditu wandi ujila. Tutalei pano miswelo yeebesele’mo.

² Mu 1914, kwadi bantu batyetye kete badi batōta Yehova. Ino Yehova waesele mwingilo wa busapudi. Pano bantu midiyo ne midiyo i befunde bubine bwa mu Bible ne kwikala Batumoni bandi. Yehova wālombwele kuno kwilundila’ko kutulumukwa paānene amba: “Katyetye kakālamuka kanunu, kadi katyutyu’ka ke muzo mukomo; ami Yehova nkapelakanya’byo mu bitatyi byabyo.” (Isaya 60:22) Twi bemwene dyalelo kufikidila kwa buno bupolofeto. Bantu ba Yehova badi pamo bwa muzo mukatampe. Pano kudi mizo mivule ntanda yonso idi na bantu batyetye mpata shi twibadingakanye na kibalwa kyonso kya bantu ba Yehova.

 3. Le bengidi ba Leza balombwele namani buswe?

³ Mu ano mafuku a mfulo, Yehova ukwashanga bantu bandi batamije buswe bwa kwiswa abo bene na bene. “Leza i buswe,” kadi bantu bandi bamwiulanga. (1 Yoano 4:8) Yesu wāsoñenye balondi bandi amba, “mwisanswe banwe bene na bene.” Kadi wēbasapwidile amba: “Pa kino e pakayukila bonso amba mwi bami bana ba bwanga, shi mudi na buswe umbukata mwenu.” (Yoano 13:34, 35) Panopano ponka, bengidi ba Yehova balombwele buno buswe umbukata mwabo nansha mizo byoyadi ilwa mavita. Kimfwa, mu divita dya bubidi dya ntanda, mwafwile kintu kya bantu midiyo 55. Ino bantu ba Yehova kebaipailepo muntu nansha umo mu dino divita. (Tanga Mika 4:1, 3.) Ne kino kyebakweshe bashale batōka “ku mashi a bantu bonso.”​—Bilongwa 20:26.

 4. Mwanda waka kuvula kwa bantu ba Yehova i kutulumukwa?

⁴ Kibalwa kya bantu ba Leza kyendanga kivudila’ko nansha byokudi Satana, walwana nabo mukomokomo. Satana i “leza wa ino ngikadilo ya bintu.” (2 Kodinda 4:4) Wendejanga malongolodi a kipolitike a ino ntanda, ne myanda ya ku bisanji, kadi wingidijanga bino bintu mwanda wa kwimika mwingilo wa busapudi bwa myanda miyampe. Ino kabwenye’byopo kwimika uno mwingilo. Kyayukile’ko i kino amba kubamushadila kakitatyi katyetye, o mwanda utompanga kwitukankaja tuleke kwingidila Yehova.—Kusokwelwa 12:12.

 5. Mwanda waka kyaba kimo bakwabo babwanya kwitusanshija? (Tala kifwatulo ku ngalwilo.)

⁵ Bengidi ba Leza i befunde amba kuswa Leza ne bakwabo kudi na kamweno kakatampe. Yesu wānene amba: “‘Sanswa Yehova Leza obe na mutyima obe onso ne na muya obe onso ne na ñeni yobe yonso.’ Ino’i yo mbila itabukile bukatampe kadi yo imbajinji. Ya bubidi, iifwene nayo, i ino: ‘Sanswa mukwenu mowisanshilwe abe mwine.’” (Mateo 22:35-39) Bible ulombola’mba pa mwanda wa bubi bwa Adama, bantu bonso babutulwanga bampikwa kubwaninina. (Tanga Loma 5:12, 19.) O mwanda kyaba kimo bantu mu kipwilo bakokeja kunena nansha kulonga bintu bitusanshija. Shi abetusanshija, le i bika byotukalonga? Le tukendelela kuswa nyeke Yehova bininge? Le tukalama lulamato lwetu kwadi ne ku bantu bandi? Bible witusapwila bengidi bamo ba Leza bānene ne kulonga bintu bisanshija bakwabo. Tutalei muswelo otubwanya kuboila ñeni ku byēbatene.

 6. Edi wākomenwe kudingila bandi bana mu buluji’ka?

⁶ Kimfwa, Edi wādi kitobo mukatampe mu Isalela, ino bandi bana babidi kebādipo bakōkele bijila bya Yehova. Bible unena’mba: “Bāna ba Edi bana-balume badi bāna ba Bediale, kebayūkilepo Yehova.” (1 Samwele 2:12) Edi wādi uyukile amba bandi bana baloñanga bintu bibi. Nansha nabya, kebādingilepo mobifwaninwe. Mwenda mafuku, Yehova wāpele Edi ne bandi bana babidi mfuto. Kākilekelepo kadi bana ba Edi bengile bu babitobo bakatampe. (1 Samwele 3:10-14) Le shi wādi’ko mu mafuku a Edi, ne kuyuka’mba i muleke bana bandi balonga bibi nakatampata, le kino kyādi kya kukukukaja? Le ino ngikadilo yādi ya kuzozeja lwitabijo lobe mudi Yehova, mfulo mfulō waleka’byo ne kumwingidila?

 7. Bubi bwa Davida bwādi bukatampe namani, ne Leza wālongele’po namani?

⁷ Davida wādi na ngikadilo ya kutendelwa, o mwanda Yehova wādi umusenswe bininge. (1 Samwele 13:13, 14; Bilongwa 13:22) Inoko Davida nandi wālongele kintu kimo kibi mpata. Pādi Udia ku divita, Davida wālēle na Bafesheba, mukaja Udia, ne kwimita wāimita. Davida kādipo usaka muntu nansha umo ayuke byaalonga. Ko kutuma musoñanya amba Udia āye bemone, kadi wāmutonona ende akalāle kwandi. Davida wādi ulanga’mba Udia usa kukalāla na Bafesheba mwanda wa bantu balange amba ye shandya mwana. Inoko Udia wāpelele kwenda kwandi. Pene’pa Davida wākwata nkuku ya kwipaija Udia ku divita. Davida ne kisaka kyandi bāsusukile bininge pa buno bubi bukatampe. (2 Samwele 12:9-12) Inoko Yehova wāmufwidile lusa. Wādi uyukile amba Davida usaka kulonga byoloke. (1 Balopwe 9:4) Shi wādi’ko, wādi wa kwimvwana namani pa byālongele Davida? Le wādi wa kuleka’byo kwingidila Yehova?

 8. (a) Le Petelo wākomenwe namani kufikidija byaānene? (b) Petelo pa kupwa kuluba, mwanda waka Yehova wāmwingidije monka?

⁸ Kimfwa kikwabo kya mu Bible i kya mutumibwa Petelo. Yesu wāmutongele ekale mutumibwa. Nansha nankyo, Petelo wādi ulonga ne kunena kyaba kimo bintu byampikwa kwendela’mo. Kimfwa, Petelo wānene amba ukalamata Yesu nansha shi bakwabo abamunyema. (Mako 14:27-31, 50) Ino pākwetwe Yesu, batumibwa bonso’nka ne Petelo bāmunyemene. Kupwa, misunsa isatu mituntulu, Petelo wātuna’mba kamuyukilepo Yesu. (Mako 14:53, 54, 66-72) Inoko Petelo wēalakenye bininge pa byaālongele’bya. O mwanda Yehova wāmufwidile lusa ne kumwingidija monka. Shi mu kitatyi’kya nobe wādi mwana wa bwanga, ne uyukile bilongele Petelo, le wādi wa kwendelela kukulupila Yehova?

 9. Lelo ukulupile amba Leza uloñanga nyeke byoloke?

⁹ Tubamone na bino bimfwa amba bengidi bamo ba Yehova bālongele bintu bibi ne kusanshija bakwabo bininge. Shi kino kibalongeka dyalelo, ukalonga’po namani? Le ukaleka kwenda ku kupwila ne kunyema lonso Yehova ne bandi bantu? Nansha le ukavuluka amba Yehova i wa lusa ne ubwanya kwilaija muntu’wa esāse? Shako kudi kyaba kimo kikalanga muntu ulongele bubi bukatampe wakomenwa kulomba lusa pa byalongele. Le ukavuluka amba Yehova uyukile uno mwanda ne amba ukalonga’po kintu pa kitatyi kifwaninwe? Ukokeja ne kupanga muntu’wa mu kipwilo. Le ukulupile amba Yehova uloñanga nyeke biyampe ne byoloke?

10. Lelo Yesu wālongele namani pa bilubo bya ba Yudasa Isakadiota ne Petelo?

¹⁰ Tutanga mu Bible myanda ya bantu bavule bālamine lulamato lwabo kudi Yehova ne ku bandi bantu nansha bakwabo byobālongele bilubo bikatampe. Kimfwa kiyampe kutabuka i kya Yesu. Pa kupwa kulomba bufuku bonso Shandi amukwashe, wātongele batumibwa 12. Ino mutumibwa umo, ke Yudasa Isakadiota kadi, wāmwabile mwenda mafuku. Kadi, mutumibwa Petelo nandi wātunine amba kamuyukilepo Yesu. (Luka 6:12-16; 22:2-6, 31, 32) Yesu kākalabedilepo Yehova nansha bana ba bwanga bakwabo pa kulubilwa na bamo. Ino, Yesu wāshele pabwipi na Shandi ne kwendelela na kumwingidila na kikōkeji. Ku mfulo, Yehova wāmupala mpalo ya kumusangula ne kumubikika bu Mulopwe wa Bulopwe bwa mūlu.​—Mateo 28:7, 18-20.

11. I bika byālaile Bible bitala bengidi ba Yehova mu ano mafuku?

¹¹ Kimfwa kya Yesu kitufundija twikale na lulamato kudi Yehova ne ku bantu bandi. Ne tudi na bubinga bwendele’mo bwa kwibalamatyila. Tumwene muswelo wendeja Yehova bantu bandi mu kino kitatyi kya mfulo. Wibakwashanga basapule bubine ntanda yonso, enka abo kete bo bengila uno mwingilo. I bekute umbumo bya binebine kadi bonso badi mu nsangaji mwanda bafundijibwanga na Yehova. Yehova wālombwele kino pa kunena’mba: “Talapo bidi, bengidi bami bakemba ne tusepo ku mutyima.”​—Isaya 65:14.

12. Le tufwaninwe kumona namani bilubo bya bakwabo?

¹² Bine tudi na nsangaji mwanda Yehova wituludikanga ne kwitukwasha tulonge bintu bivule biyampe. Ino, bantu ba mu ntanda ya Satana kebadipo na nsangaji ne na lukulupilo lwa bine lwa kumeso. Bine kushiya Yehova ne bantu bandi mwanda’tu wa muntu umo mu kipwilo wanena nansha kulonga kintu kibi i kubulwa ñeni! Pa kyaba kya kunyema Yehova, tufwaninwe kumulamata ne kulonda buludiki bwandi. Kadi tufwaninwe kwifunda muswelo otumona bilubo bya bakwetu ne mwa kulongela’po.

13, 14. (a) Mwanda waka ufwaninwe kutūkijija bakwabo mutyima? (b) I mulao’ka otufwaninwe kuvuluka?

¹³ I bika byofwaninwe kulonga shi mwanenu wakunena nansha kukulonga bintu bikusansa? Bible udingila amba: “Kokapelakanya bukidi mu mushipiditu obe kufuna bulobo; mwanda bulobo bwikalanga mu kyadi kya bivila.” (Musapudi 7:9) Batwe bonso twi ba kubulwa kubwaninina kadi tulubanga. Nanshi ketwakilanga’mba banabetu bakanena ne kulonga enka bintu biyampe. Kadi ke biyampepo kwendelela kulangulukila pa bilubo byabo. Mwanda shi tulangulukilapo, ketukekalapo na nsangaji ya kwingidila Yehova. Kibi nakampata, lwitabijo lwetu lukazoza, twaleka bulongolodi bwa Yehova. Papo, ketukikengidilapo Yehova kadi tukabulwa lukulupilo lwa kukekala mu ntanda yandi mipya.

¹⁴ Penepo, i bika bikakukwasha ulame nsangaji ya kwingidila Yehova palonga bakwabo bintu bikusanshija mutyima? Vuluka nyeke uno mulao ukankamika: “Talapo bidi, byo mpanga madiulu mapya ne ntanda mipya, kabidi bintu bya kala kebikavulukwapo, nansha kwikalapo ku-mutyima kwine mpika.” (Isaya 65:17; 2 Petelo 3:13) Yehova ukakwesela shi ulame lulamato lobe kwadi.

15. Le Yesu wānene amba tufwaninwe kulonga bika shi bakwetu abaluba?

¹⁵ Shako, ketwatwelele mu ntanda mipya. Penepo shi muntu wetusanshija, tulangulukilei pa bitusakila Yehova kulonga’po. Kimfwa, Yesu wānene amba: “Shi mulekela bantu bilubo byabo, Shenu wa mūlu nandi ukemulekela; ino shi kemulekelapo bantu bilubo byabo, ne Shenu nandi kakemulekelapo bilubo byenu.” Kadi Petelo paāipangwile Yesu shi bidi biyampe kulekela muntu “misunsa isamba-ibidi,” Yesu wāmulondolwele amba: “Nakulombola’mba, ke enkapo kufika ne pa misunsa isamba-ibidi kete, aa, ino i kufika ne pa misunsa makumi asamba-abidi ne isamba-ibidi.” Yesu witufundija pano amba tufwaninwe nyeke kwikala na mutyima wa kulekela bakwetu.​—Mateo 6:14, 15; 18:21, 22.

16. Le i kimfwa’ka kiyampe kitushidile Yosefa?

¹⁶ Kimfwa kya Yosefa kitufundija mwa kulongela shi bakwabo abetulubila. Aye ne nkasandi bo bādi’tu bana babidi ba Yakoba ne Letyela. Yakoba wādi na bana bakwabo dikumi, ino wādi usenswe Yosefa bininge kupita bonso. Kino kyālengeje bakwatyilwe Yosefa mukao bininge. Na bubine, bāmushikilwe bininge, bāfula ne ku kumupoteja bu umpika, wāselelwa ku Edipito. Myaka mivule pa kupita’po, mulopwe wa Edipito wātūla Yosefa ke muntu wa bubidi ku lupusa mu ntanda’ya, mwanda wākokelwe na bilongwa biyampe bya Yosefa. Kupwa, banababo na Yosefa bāiya mu Edipito kupota bidibwa mwanda kwādi kipupo kya nzala. Abo pa kumona Yosefa, kebāmujiudilepo, ino aye wēbayukile. Nansha byobāmushikenye, kebāpelepo mfuto. Ino wēbatompele mwa kuyukila shi ke bashinte bya binebine. Yosefa pa kumona amba ke bashinte, wēbasapwila’mba i nkasabo. Kupwa, wēbasenga ne kwibanena’mba: “Kemukikwatwa moyo, nkemudishanga ne twana twenu tutyetye.”​—Ngalwilo 50:21.

17. Le pano ukalonga bika shi bakwabo abaluba?

¹⁷ Vuluka’mba muntu ne muntu byalubanga, nanshi nobe ubwanya kulubila bakwabo. Pene’po shi ubamone amba ubalubila muntu, londa madingi a mu Bible. Mulombe lusa, ne kulonga nandi ndoe. (Tanga Mateo 5:23, 24.) Tusangalanga shi muntu wetulekela. Netu nanshi tufwaninwe kulekela bakwetu. Kolose 3:13 witusoñanya amba: “Endelelai kwitūkijija mityima banwe bene na bene ne kwilekela na mutyima umo nansha shi kudi udi na mwanda na mukwabo. Monka mwemulekēle Yehova na mutyima umo, nenu mufwaninwe kulongela monka.” Shi tusenswe bine banabetu, ketukendelelapo kwibalobela pa bibi byobalongele pa kala. (1 Kodinda 13:5) Kadi shi tulekele bakwetu, Yehova nandi uketulekela. Nanshi shi bakwabo baluba, twibafwilei lusa mwitufwidilanga’lo Tata wetu, Yehova.​—Tanga Ñimbo ya Mitōto 103:12-14.