Lelo Wiipangulanga Difuku ne Difuku Amba “Yehova Udi Kwepi?”

1, 2. (a) I ngikadilo’ka ya ku mushipiditu yādi’mo Bayuda ba mu mafuku a Yelemia? (b) Le Bayuda bādi basakilwa kulonga bika pa ngikadilo yabo?

YELEMIA wādi’nka udila. Wātengelwe na ngikadilo yādi’mo bantu bandi ne na byobya byālaile Leza byādi bya kwibafikila kumeso. Wāmwene amba mutwe wandi wādi pamo bwa nsulo ya mema ne meso andi’nka bwa mushimwa mwanda wādi udila kwampikwa kutalala. Yelemia wādi na bubinga bwa kwivwanina bulanda pangala pa ngikadilo yādi’mo muzo. (Yel. 9:1-3; tanga Yelemia 8:20, 21.) Bayuda bādi bapela divule bijila bya Leza ne kuleka kukōkela diwi dya Yehova, o mwanda byamalwa byēbafikile.​—Yel. 6:19; 9:13.

² Inoko, bantu ba Yuda bādi baswele kwivwana byādi binena bendeji babo ba bipwilo amba ‘byonso i biyampe,’ kebādipo batele mutyima bya binebine ku milangwe ya Leza pa mwiendelejo wabo. (Yel. 5:31; 6:14) Bādi pamo bwa babela bakimba muñanga wa kwibalombola bintu bisangaja aye’ko usūdile misanshi yabo ibakambakanya. Shi wādi amba i abe ubela bininge, le kwadipo wa kusaka kuyuka misongo mine yobela mwanda wa bakundape enka mu kitatyi’kya? Mu muswelo wa ku mushipiditu, Bayuda ba mu mafuku a Yelemia bādi basakilwa kwibandaula kwampikwa budimbidimbi ngikadilo yabo ya ku mushipiditu. Bādi bafwaninwe kwiipangula amba: “Yehova udi kwepi?”​—Yel. 2:6, 8.

 3. (a) Lelo Bayuda bādi ba kulondolola namani ku kipangujo kya amba, “Yehova udi kwepi?” (b) Lelo i muswelo’ka umo wādi ukokeja Bayuda kukimba Yehova?

³ Ku Bayuda, kwiipangula amba “Yehova udi kwepi?” kwādi na nshintulwilo ya kukimba buludiki bwa Leza kitatyi kyobakwata butyibi bukatampe nansha butyetye. Bayuda ba mu kitatyi’kya kēbakimbile’bopo. Ino pa kupwa konakanibwa kwa Yelusalema ne kujokela mu Babiloni, bādi ke ‘bakimbe Yehova’ ne ‘kumukimbidila.’ Pa kulonga namino, bādi ba kumutana ne kuyuka mashinda andi. (Tanga Yelemia 29:13, 14.) Le bādi ba kulonga kino namani? Muswelo umo i kufwena kudi Leza mu milombelo ya na mutyima umo, balomba buludiki bwandi. Mo mwādi mwikadile Mulopwe Davida. Wālombele Leza amba: “Bandaīje mashinda obe, abe Yehova; ne kumfundija makoka obe.” (Mit. 25:4) Teja lwito lwa Mwine wivwananga milombelo lwaāityile bantu kupityila kudi Yelemia mu mwaka wa dikumi wa Mulopwe Zedekia. “Ngite bidi nami nkakwitaba, ne kukakulaija bintu bikatakata ne bifibwe byo kuyukilepo.” (Yel. 33:3) Shi mulopwe ne muzo mutomboke bāityile Leza, longa wēbasokwedile bintu “bifibwe,” konakanibwa kwa Yelusalema ne kūbakululwa’ye myaka 70 pa kupwa.

4, 5. Lelo i miswelo’ka mikwabo yādi ikokeja bantu ba Leza kukimba Yehova?

⁴ Muswelo mukwabo wādi ukokeja Bayuda kukimba Yehova i na kukimbidila mānga ne kuyuka mwaādi wikadile na bantu bandi. Nabya bādi ba kujingulula bintu byālengeje kwitabijibwa na Leza ne byādi bikolomona bukalabale bwandi. Bādi na bilembwa bya Mosesa ne mānga mivule misonekwe ku bukomo bwa mushipiditu ne bilembwa bya balopwe ba Isalela ne ba Yuda. Shi Bayuda ba mu mafuku a Yelemia bālangulukile pa bino ne kuteja bapolofeto ba bine ba Leza, longa bāivwanije malondololo ku kipangujo kya amba “Yehova udi kwepi?”

⁵ Muswelo wa busatu wādi ukokeja Bayuda kukimba Yehova i na kuboila ñeni ku bintu byēbatene abo bene ne ku byātene bakwabo. Ke kunenapo amba bādi ba kutompa kintu kyonso ne enka shi kyakoma kebaboila’ko ñeni, ino bādi ba kumwena mu kubandaula byobādi balonga pa kala ne muswelo wēbimwene Yehova. Shi bādi batele’ko mutyima, longa bāivwanije mwādi mumwena Leza mwiendelejo wabo.​—Nk. 17:10.

 6. Lelo kimfwa kya Yoba kikukankamika namani?

⁶ Ino twibikokelei mu ano etu mafuku. Lelo wiipangulanga difuku ne difuku amba, “Yehova udi kwepi?” kitatyi kyokwata butyibi ne kutonga mwa kwiendeleja? Bamo bakamona amba kebekalangapo beipangula’kyo divule. Shi nobe ye momwena kyaba kimo, kokatyumuka mutyima. Nansha ke Yoba mukulutuba wa kikōkeji mwine wādi ulwa na uno mwanda. Paādi mu masusu, wādi wilangalanga munda mwandi. Edihu wāmuvulwije milangwe ikalanga na bantu amba: “Ino nansha umo unena’mba: Lelo Leza Umpangi wami udi kwepi le?” (Yoba 35:10) Edihu wākankamikile Yoba amba: “Imana talala, ulange mingilo ya kwana ya Leza.” (Yoba 37:14) Yoba byādi bimusakila kubandila mingilo mikatakata ya Yehova mu bupangi bumujokolokele ayuke muswelo wādi wikele Leza na bantu. Yoba wājingulwile mashinda a Yehova kupityila ku byāmutene. Pa kupwa kūminina masusu andi ne kumona muswelo wāpwijije Yehova myanda, wānene amba: “Nanshi nanenene kyokya kyo nkivwanijepo, bintu bitabukile kwanwa ko ndi, byo nkyayukilepo. Nadi nkwivwana na kutwi bitupu; ino pano namino dīso dyami dibakumone.”​—Yoba 42:3, 5.

 7. Mungya bilombwelwe pa paje 116, lelo i bika byotusa kwisambila’po?

⁷ Mupolofeto Yelemia wāendelele kukimba Yehova ne kumutana wāmutana. Wādi mwishile na bantu ba mu yabo ntanda, ke pantu wāendelele kwingila na kikōkeji mu makumi a myaka, ne kwipangula nyeke amba: “Lelo Yehova udi kwepi?” Mu bilonda’ko mu uno shapita, kimfwa kya Yelemia kisa kwitukwasha tumone muswelo otubwanya kukimba Yehova ne kumutana kupityila ku milombelo, kifundwa, ne ku byotwimwena.​—1 Bil. 28:9.

 8. Le Yelemia wāfwenene kudi Leza mu milombelo paādi mu ngikadilo’ka?

⁸ Yelemia paādi wingidila Leza umbula bwa myaka bu musedi wa myanda ku muzo wa Yuda, wākimbile Yehova kupityila ku milombelo itamba ku mutyima. Kitatyi kyaāmwene amba kakibwanyapo kwendelela kusapula, ne paādi na bipangujo bilomba kuyuka buluji bwa bintu byādi bilongeka, wālombele Leza bukwashi mwa kusapwila misapu mishikibwe na bavule. Leza wāmulondolwele ne kumulombola mwa kulongela. Tubandaule’ko bimfwa bityetye.

 9. (a) Lelo Yelemia mwine unene namani mu Yelemia 15:15, 16, ino Yehova wālondolwele namani? (b) Molangila, mwanda waka kulombola milangwe yobe mu milombelo kudi na kamweno?

⁹ Difuku dimo, Yelemia paānenwe kusapula musapu wa butyibi, wāmwene amba muntu ne muntu wādi umunenena bibibibi. O mwanda mupolofeto waābije Leza amuvuluke. Tubandaulei milombelo yandi, isonekelwe mu Yelemia 15:15, 16, ilombola muswelo waēivwene pāmulondolwele Leza. (Tanga.) Mu ino milombelo, Yelemia wālombwele byādi bimusansa. Ino, kitatyi kyaātene binenwa bya Leza ne kwela’byo mu kyakanwa kyandi, wāsangala! Yehova wāmukweshe asangele dyese dya kusapula, kusela dijina dyandi ne kusapula musapu wa Leza. Pa kino, Yelemia wāmwene biyampe mulangwe wa Leza pa uno mwanda. Le i ñeni’ka yotuboila’ko?

10. Le kitatyi kyānene mupolofeto amba nkikisapulapo monka mu dijina dya Yehova, Leza walondolwele namani?

¹⁰ Musunsa mukwabo, pāmukupile Pashula kitobo, mwanā Imele, Yelemia wānena amba nkikanenapo monka mu dijina dya Yehova. Le Yehova wālondolwele namani ku milombelo ya Yelemia? (Tanga Yelemia 20:8, 9.) Bible ketulombolapo amba Yelemia wāivwene diwi dya Leza mūlu dimulondolola. Inoko kinenwa kya Leza kyāikala pamo bwa mudilo utēma washityilwa mu bikupa byandi, ne kādipo na muswelo mukwabo wa kulonga, poso’nka kwikisapula. Bine, Yelemia pa kulombola Leza kwampikwa budimbidimbi ne kwitabija kuludikwa na byaāyukile pa kiswa-mutyima Kyandi, wākunkwa mutyima ne kulonda byonso byādi bimusakila Leza kulonga.

11, 12. Lelo Yelemia wātene namani malondololo ku kipangujo kyandi kitala muswelo umweka babi bu bekele biyampe?

¹¹ Yelemia wādi na kipangujo kimuvutakanya ñeni pa kutala babi bamona’ko biyampe. (Tanga Yelemia 12:1, 3.) Nansha mupolofeto byakādipo utatana boloke bwa Yehova, wādi ukimba malondololo ku ‘kīmu’ kyandi. Boloke bwandi bulombola patōkelela’mba wādi mu kipwano kikatampe na Leza, pamo bwa mwana ne shandi wasenswe. Yelemia kāivwanijepo kyādi kikadile Bayuda bavule mu būmi buyampe abo’ko babi. Lelo Yelemia wātene malondololo mafike’po? Yehova wāmukulupije amba nkatukuna babi. (Yel. 12:14) Yelemia pa kumona kufikidila kwa myanda yaālombwele Leza mu milombelo, kikulupiji kyandi mu boloke bwa Leza i kino kyāningile’ko. Ku mfulo, Yelemia wātakamene kuvundamukila kudi Leza mu milombelo, kaesambe na Shandi.

¹² Ku mfulo kwa umbikalo wa Zedekia, Bene Babiloni pa kutekela Yelusalema kasala, Yelemia wānene padi Yehova amba “meso andi i mapūtuke pa mashinda onsololo a bāna ba bantu bāna balume, kupana kudi enselele mwendele mashinda andi, ne mwendele bipa bya bilongwa byandi.” (Yel. 32:19) Yelemia wāmwene mwikadile boloke bwa Yehova, amba Leza umonanga bilonga muntu ne muntu kadi wivwananga milombelo ya kininga ya bengidi bandi. Kadi, bakamona bukamoni buvule bulombola’mba Leza upanga “enselele mwendele mashinda andi, ne mwendele bipa bya bilongwa byandi.”

13. I kika kitukulupija amba kiswa-mutyima kya Leza kekikankalwangapo kulongeka?

¹³ Padi ketutatanangapo boloke ne tunangu twa Leza pa muswelo wafikidija kiswa-mutyima kyandi ne wakafikidija’kyo. Ino, tukokeja kumwena mu kulangulukila pa byātene Yelemia ne kulombola Leza mu milombelo byotudi nabyo ku mutyima. Kulombela uno muswelo kukokeja kuningija kikulupiji kyetu mudi Yehova, amba kiswa-mutyima kyandi bine kisa kulongeka. Nansha shi pano ketwivwanijepo mwanda waka bintu bilongeka uno muswelo, nansha kine kilongekela kiswa-mutyima kya Leza mu ano matabula, tukokeja kumulombola mu milombelo kikulupiji kyetu amba kadipo kyaidilwe. Kiswa-mutyima kyandi kikalongeka mu muswelo wasaka ne mu matabula amona’mba o mayampe. Kino kyo kitukulupija; ketudipo na bubinga bwa kutatena. Tukendelela kwipangula amba, “Yehova udi kwepi?” na buluji bwa kukimba ne milombelo ponka amba twivwanije kiswa-mutyima kyandi ne kumona mokilongekela.​—Yoba 36:5-7, 26.

14. Lelo i bika bituyukija amba Yelemia wākimbile bidi mu mānga ya bantu ba Leza?

¹⁴ Pa bitala kipangujo kya amba, “Yehova udi kwepi?” Yelemia wādi uyukile biyampe amba bimusakila ‘kuyuka Yehova.’ (Yel. 9:24) Bimweka’mba wēfundile mānga ya bantu ba Leza kitatyi kyaādi usoneka mikanda iyukene dyalelo bu 1 Balopwe ne 2 Balopwe. Wātelele ino mikanda namino, “mukanda wa bilongwa bya Solomone,” “mukanda wa bilongwa-byamafuku wa balopwe ba Isalela,” ne bu “mukanda wa bilongwa-byamafuku wa balopwe ba Yuda.” (1 Bal. 11:41; 14:19; 15:7) Ne kadi, wāivwanije mulongelo wa Yehova mu ngikadilo mishileshile. Yelemia wāyukile byobya bisangaja Yehova ne muswelo wamona butongi bwa bantu. Kadi wādi ukokeja kutanga bilembwa bya ku bukomo bwa mushipiditu byādi’ko mene mafuku’a, kimfwa bilembwa bya Mosesa, Yoshua, Samwele, Davida, ne bya Solomone. Ne kutatana kwine mpika, wādi uyukile senene myanda ya bapolofeto bāmubadikidile ne ba mu abo mafuku. Le Yelemia wāmwenine namani mu kifundwa kyandi?

15. Le i kamweno’ka kāmwenine Yelemia mu kukimba bidi mu bupolofeto bwa Ediya?

¹⁵ Yelemia wāsonekele nsekununi itala Yezebele, mukaji mubi wa Ahaba, Mulopwe wa Samadia. Mu ino nsekununi, mudi ne binenwa bya Ediya bisambila Yezebele amba, bambwa bakadyanga Yezebele kumeso kwa nsakwa ya Yezelele. (1 Bal. 21:23) Kadi kukwatañana na byāsonekele Yelemia, ubamone amba kintu kya myaka 14 pa kupita’po, Yezebele wāelelwe munshi ku dididisha, kabalwe ka Yehu kāmutyimpila panshi, ne kudibwa na bambwa. (2 Bal. 9:31-37) Kukimba bidi mu bupolofeto bwa Ediya ne kufikidila kwabo mu kamo ne kamo, i bino byākomeje lwitabijo lwa Yelemia mu kinenwa kya Leza. Bine, kūminina kwandi mu mwingilo wa bupolofeto kulombola lwitabijo lwandi lwādi lwimanine pa kwifunda kwāefundile mingilo ya Yehova.

16, 17. Le ulanga’mba i kika kyālengeje Yelemia ōminine mu kudyumuna balopwe babi ba mu andi mafuku?

¹⁶ Twisambilei pa kimfwa kikwabo. Molangila, i bika byākweshe Yelemia​—nansha byaādi upangwapangwa​—endelele kudyumuna balopwe babi pamo bwa Yehoyakimi ne Zedekia? Bubinga bukatampe i buno, Yehova wālongele Yelemia kadi “bu-kibundi kya nsakwa, ne bu-kipanda kya kilonda, ne bu-masakwa a mukuba” pa balopwe ba Yuda. (Yel. 1:18, 19) Ino ketwakilwai amba Yelemia wālongele bukimbi bukatampe mu myanda ya umbikalo wa balopwe babajinjibajinji ba Yuda ne ba Isalela. Wāsonekele mwāshimikile Manase “madabahu a kibumbo kyonsololo kya diulu mu bipango bibidi bya njibo ya Yehova,” wāpityije wandi mwana mu mudilo, ne kumwanga mashi mavule a bantu bampikwa mambo. (2 Bal. 21:1-7, 16; tanga Yelemia 15:4.) Ino, Yelemia wāyukile amba kitatyi kyētyepeje Manase ne kwendelela kulombela kudi Yehova, ‘nandi wamwitabija,’ penepo Yehova wāmujokeja monka pa kifuko kyandi.​—Tanga 2 Bilongwa 33:12, 13.

¹⁷ Yelemia kesambilepo mu bilembwa byandi pa lusa lwa Yehova lwaāfwidile Manase. Inoko Manase wāfwile myaka 15 kumeso kwa Yelemia kushilula mwingilo wandi wa bupolofeto. O mwanda, mupolofeto wādi ukokeja kwivwana byobya byālongekele kitatyi kyēsāshile mulopwe bubi bwaālongele. Kukimba kuyuka mwiendelejo mubimubi wa Manase ne byālupukile’ko ko kwākweshe Yelemia amone mvubu ya kudyumuna balopwe, kimfwa Zedekia, amba akimbe lusa lwa Yehova ne kanye kandi ka buswe. Nansha ke yewa mulopwe utumbile kutōta bakishi ne kumwanga mashi wādi ukokeja kwisāsa ne kulekelwa. Le shi nobe wadi mu ngikadilo yādi’mo Yelemia, lelo myanda ya Manase yadi ikokeja kukukankamika, ne kukulengeja ūminine mu umbikalo wa balopwe bakwabo babi?

18. Le i ñeni’ka yāboile Yelemia ku kimfwa kya Udia, ne mwanda waka ubalondolola namino?

¹⁸ Yelemia, mu bula bwa mwingilo wandi wa bupolofeto, wādi uboila ñeni ku bilonga bantu ba mu andi mafuku byaādi umona. Kimfwa kimo i kya mupolofeto Udia, wānene bupolofeto bwa butyibi pa Yelusalema ne Yuda mu umbikalo wa Yehoyakimi. Inoko, Udia pa kutyina Mulopwe Yehoyakimi, wānyemene ku Edipito. Kupwa, mulopwe wātuma bantu kukasela Udia mu Edipito, ebiya wāmwipaya. (Yel. 26:20-23) Lelo ulanga Yelemia wāboile ñeni ku byātene Udia? Kudyumuna kwādyumwine Yelemia Bayuda ku kyamalwa kyadi kya kwibafikila bukidibukidi​—enka ne mu tempelo mwine​—kulombola’mba wāboile’ko ñeni. Yelemia wālamine bukankamane bwandi, Yehova nandi kāmulekelelepo. Leza wākunkile mutyima wa Ahikama, mwanā Shafana, kulama būmi bwa uno muntu mukankamane, Yelemia.​—Yel. 26:24.

19. Le Yelemia wājingulwile bika pa kutuma kwādi kutuma Yehova bapolofeto kudi bantu bandi misunsa ne misunsa?

¹⁹ Kadi Yelemia wāboile ñeni ku byāmutene aye mwine pāmutumine Yehova kudyumuna bantu bandi. Mu mwaka wa buná wa Mulopwe Yehoyakimi, Yehova wānene Yelemia asoneke byonso byaānene tamba mu mafuku a Yoshia kufika ne mu kine kitatyi’kya. Le wāmupele buno buludiki pa mwanda waka? I pa mwanda wa kukankamika bantu baleke kulonga bibi ne kulekelwa. (Tanga Yelemia 36:1-3.) Yelemia, wādi ukēlela lubanga bwē mwanda wa kusapula bidyumu bya Leza, wisāshila ne kwisāshila bantu baleke bilongwa byabo bya munyanji. (Yel. 44:4) Mwene bibamweka patōka’mba Yelemia wēmwenine amba Leza wādi utumina bantu bandi bapolofeto mwanda’tu wa lusa? Ne kadi, mwene kino kyalengeje Yelemia nandi evwanine bantu lusa? (2 Bil. 36:15) O mwanda, ukokeja kwivwanija kyānenene Yelemia pa kupanda ku bonakani bwa Yelusalema, amba: “I byakanye bya Yehova byo ketukubijibwepo, mwanda byalusa byandi kupwa mpikila. I bipya mafuku onso nyeke lubanga mo bukila mo bukila.”​—Mad. 3:22, 23.

20. Lelo ukeula namani Yelemia mu kukimba Yehova?

²⁰ Kitatyi kyokwata butyibi difuku ne difuku, lelo ukimbanga kuyuka kiswa-mutyima kya Leza, na kwipangula amba le “Yehova udi kwepi?” (Yel. 2:6-8) Yelemia wādi mwishile na Bayuda ba mu abo mafuku, aye wādi ulomba nyeke bukwashi kudi Mwine Bukomo Bonso mwa kujingulwila dishinda dya kwenda. Kwiula Yelemia na kukimba difuku ne difuku mumweno wa Yehova, bine dyo dishinda dya ñeni ku umo ne umo kitatyi kya kukwata butyibi.

21. Lelo i milombelo ya muswelo’ka ikakukwasha kukwatañana na busapudi, kimfwa shi muntu wakudyubulula?

²¹ Ketwisambilangapo enka pa butyibi bwa myanda mikata nansha itala kushinta būmi bwetu. Kimfwa, le butyibi nabo bwa kutambila mu busapudi difuku dyotungile kala? Padi abe pa kubūka ubamone’mba kūlu i kubi, bikomo mwa kwendela. Mwaba wa kukasapwila’mo ku njibo ne njibo mu difuku’dyo usapulwanga’mo divule. Ubavuluka’mba bantu bamo bapelele na bulēme nansha na kibengo kwisamba nobe. Enka polukidi lubanga’pa, ubulwepo kulombela ne kwipangula’mba “Yehova udi kwepi?” Kulonga namino kukakukwasha ulangile pa buya bwa musapu odi nao ne kwivwana na mushike amba Leza usakanga ukasapule’o. Penepa ukamona’mba kinenwa kya Yehova kibaikala ke nsulo ya tusepo ne kusepelela kodi, mokyādi kikadile kudi Yelemia. (Yel. 15:16, 20) Shi mu busapudi ubatana muntu wa midyubululo nansha wa lūma, ukokeja kulombola monka Leza milangwe yobe. Le nobe ye mokalongela? Kokavulaminwa’mba Leza ukokeja kukupa mushipiditu sandu mwa kulondolwela mobyendele, ne kadi kusaka kosaka kusapula musapu wa Leza kukakomeja mutyima obe wanyoñama.​—Luka 12:11, 12.

22. Mwanda waka milombelo imo ibwanya kujikakanibwa?

²² I biyampe kuyuka’mba milombelo imo ibwanya kujikakanibwa nansha kupūtwa. (Tanga Madilo 3:44.) Yehova kātejejepo milombelo ya Bayuda bantomboki mwanda bādi ‘bapumpunya kutwi kwabo’ ne kwendelela kujilula bijila. (Nk. 28:9) Ñeni yāboile’ko Yelemia yādi tu patōka, enka na moikadile ne kotudi: Shi muntu aleke kulonga mungya milombelo yandi, kikafityija mutyima wa Leza ne kumulengeja aleke kwivwana milombelo yandi. Bine, tufwaninwe kulonga bukomo bonso bwa kwepuka kino kintu.

23, 24. (a) Lelo i bika bitusakila pa kusokola kiswa-mutyima kya Yehova? (b) Le ukalonga namani pa kusaka amba kifundwa kyobe kya kasuku kikale na kamweno kutabuka?

²³ Kutentekela pa milombelo ya mutyima umo ya kulomba bwendeji bwa Yehova, ketwakilekai kifundwa kyetu kya kasuku, kintu kikatampe kitukwasha kutana kiswa-mutyima kya Yehova. Pa kino, tudi na dyese kupita dyādi na Yelemia. Batwe tudi na Bible mutuntulu. Pamo bwa Yelemia, wālongele bukimbi bwa mushike pa kulemba nsekununi ya ku bukomo bwa mushipiditu, nobe ukokeja kusantaula mu Kinenwa kya Leza ne kukimba buludiki bwandi, wipangula’mba, “Yehova udi kwepi?” Shi ukimba kuyuka kiswa-mutyima kyandi, ukakulupila mwadi, ne kadi “ukekalanga’nka bwa mutyi mukunwe pabwipi na mema, wakwala miji yao pa munonga’pa.”​—Tanga Yelemia 17:5-8.

²⁴ Kitatyi kyotanga ne kulangulukila pa Bisonekwa Bikola, tompa kujingulula byobya bikusakila Yehova kulonga mu myanda pala pala. Kimba misoñanya yosaka kuvuluka ne kulonda mu būmi bobe. Kitatyi kyotanga mānga, mbila ya Leza, misoñanya yandi, ne binenwa bya tunangu bya mu kinenwa kya Leza, bandaula muswelo ukokeja kukukwasha bino bisonekwa pokwata butyibi bobe bwa mobukila mobukila. Pa kukulondolola ku kipangujo kyobe kya amba, “Yehova udi kwepi?” ukokeja kukusokwela kupityila ku Kinenwa kyandi muswelo okokeja kupwija nansha ke makambakano makomo akutana. Bine, ukamona mu Bible “bintu bikatakata ne bifibwe byo kuyukilepo” nansha kwivwanija kitōkeji kampanda!​—Yel. 33:3.

25, 26. Le i kika kinenenwa amba tubwanya kumwena mu myanda itutana?

²⁵ Kutentekela’po, ukokeja kubandaula myanda ikutana ne yoya ifikila bakwenu. Kimfwa, padi ukamona amba bantu bamo balekanga’byo kukulupila mudi Yehova, pamo bwa Udia. (2 Tem. 4:10) Ukokeja kuboila ñeni ku būmi bwabo ne kwiepeja ku byamalwa bilupuka’ko. Vuluka pavule bya kanye bya Yehova mu byakulongela, ne kuvuluka amba Yelemia nandi wātendele kanye ne lusa lwa Leza. Nansha shi ubaikala mu ngikadilo’ka, kokilanga amba Mwine Mukatakata Mwine kakutelepo mutyima. Ukutele mutyima, monka mwaādi utelele’o Yelemia.

²⁶ Polangulukila pa muswelo wikele Yehova na bantu dyalelo, ukamona amba witulamanga mu miswelo pala pala difuku ne difuku. Aki, kaka umo nkasampe wa mu Jampani, wadi wimona amba Bwine Kidishitu kebumufwaninwepo. Difuku dimo dyaakasapwile pamo na mukaja mutadi wa kipindi, Aki wanene amba: “Namone amba Yehova usa kundasa mu kyakanwa kyandi, ino ami nkendelela kuyela ku milomo yandi, ne kumulomba andekele’ko bidi kakitatyi.” Mukaja mutadi wa kipindi wamutala mu meso sō kanena’mba: “Ino ami nkyakumwene nansha dimo bu Mwine Kidishitu wa lufufumya!” Mwenda mafuku, Aki waendelele kuvuluka bino binenwa bikankamika. Na bubine, i kutupu kilombola amba Yehova wadi umumonanga nansha dimo bu muntu wa lufufumya. Kupwa, Aki walombela Yehova amba: “Ntume konso kosaka, shi kwepi, shi kwepi. Nkalonga kyonso kyounsakila kulonga.” Enka kine kitatyi’kya, waenda mu ntanda ya bweni mwadi bantu batyetye besamba ludimi lwa Kijampani badi basakilwa muntu wisamba lwabo ludimi ne ukokeja kushikata nabo pamo ne kwibakwasha. Aki nandi byaadi muntu wa mu ntanda’ya, kino kyamupēlejije kiselwa mwa kuvilukila’ko ne kwibakwasha. Ino le wadi wa kwikala kwepi? Mwanā kaka umo mwana-mukaji wavilukile’ko enka mene mafuku’a wamupele njibo. Aki ufudija amba: “Byadi bikutakene pamo’nka bwa bukonde; ino Yehova waunshitwidile dishinda.”

27. Mwanda waka kwiipangula amba “Yehova udi kwepi?” kubwanya kukukankamika?

²⁷ Batutu ne bakaka bavule babwanya kulombola miswelo kampanda yebaludikile’mo Leza, padi pobadi batanga Bible nansha mu kifundwa kyabo kya kasuku. Ke pabulwe padi nobe waludikilwe uno muswelo. Kino kikokeja kuningija kijimba kyobe na Yehova ne kukutonona ufwene kwadi mu milombelo kyaba ne kyaba kadi ne na kininga kyonso. Tukulupilei amba, shi twendelele kwiipangula difuku ne difuku amba, “Yehova udi kwepi?” nandi uketulombola dishinda dyandi.​—Is. 30:21.