Ukokeja Kumwena mu Kipwano Kipya

 1. Lelo i mwingilo’ka wa bipindi bibidi wāingile Yelemia?

YEHOVA wāpele Yelemia mwingilo wa bipindi bibidi. Kipindi kibajinji i kya “kutukuna ne kutūta, ne kōnakanya ne kufulamika.” Kipindi kya bubidi i kya “kūbaka ne kukuna.” Mupolofeto wāfikidije kipindi kibajinji na kusokwela patōka bubi bwa Bayuda ba mitatulo, ne kusapula butyibi bwa Leza pobadi ne pa Babiloni mwine. Inoko, mu bupolofeto bwa Yelemia mubadilwa ne lukulupilo lwa būmi bwa kumeso. Wālaile kūbakwa kwa byobya byādi bisaka Leza kūbaka ne kukuna byobya byādi bisaka Leza kukuna. Kimfwa, Yelemia wāvuile kipindi kya mwingilo wandi kitatyi kyāesambile pa kujokejibwa kwa Bayuda mu yabo ntanda.​—Yel. 1:10; 30:17, 18.

 2. Mwanda waka Yehova wāletele butyibi pa bantu bandi, kufika ne pa ludingo’ka?

² Shi Yelemia wāsapwile kūjokejibwa, kino kekishintululapo amba Leza wādi wa kufukula bantu bandi nansha kutyumuna misoñanya yandi ya boloke, mhm. Wādi wa kufikidija butyibi pa Bayuda bantomboki. (Tanga Yelemia 16:17, 18.) Mu mafuku a Yelemia, i bantu batyetye kete mu Yelusalema badi balonga “bya buluji” nansha kukimba “bubinebine,” ne kitūkijetyima kya Yehova kyāfikile ku mfulo. Wānene amba: “Ne mukōke mwanda wa kwalamuka.” (Yel. 5:1; 15:6, 7) Bayuda “bajokele ku bukondame bwa bankambo wabo bapelele kūmvwana binenwa” bya Yehova. Kadi, bākolomwene bulobo bwa Leza na kulonga makoji na baleza ba bubela. (Yel. 11:10; 34:18) Yehova “wādingile” bantu bandi pa ndingidilo, wēbapa’nka ne mfuto. Mfulo mfulō, bamo bēalwije ne kujokela kwadi.​—Yel. 30:11; 46:28.

 3. Mwanda waka ufwaninwe kubandaula bupolofeto butala pa kipwano kipya?

³ Leza wāingidije Yelemia pa kulaya kintu kyādi kya kulongeka kumeso bininge ne kuleta byabuyabuya byaendaenda​—ke kipwano kipya kadi. Shi tutale bilembwa bya Yelemia bya bupolofeto, tukamona amba tudi na buluji bukatampe bwa kutela mutyima pa kino kipindi kya kutendelwa: kipwano kipya. Kyādi kya kupingakena pa kipwano kyāsambile Isalela pa kupwa kwa Divilu, kyādi’mo Mosesa bu nsenga. (Tanga Yelemia 31:31, 32.) Yesu pa kutūla’ko Bidibwa bya ku Kyolwa bya Mfumwetu, wēsambīle pa kipwano kipya, kine kya kamweno kotudi. (Luka 22:20) Mutumibwa Polo wātelele kino kipwano paāsonekele Bahebelu mukanda. Wāpitulukile mu bupolofeto bwa Yelemia ne kukoma mvubu ya kipwano kipya. (Bah. 8:7-9) Ino le kipwano kipya kine i kika? Mwanda waka kidi na mvubu? I bāni batalwa nakyo, ne i muswelo’ka obwanya kumwena’mo nobe? Tutalei.

 4. Lelo kipwano kya Mukanda wa Bijila kyāfikidije bika?

⁴ Pa kwimvwanija myanda itala kipwano kipya, i biyampe bidi tuyukidile kyātūdilwe’ko kipwano kibajinji, kipwano kya Mukanda wa Bijila. Kyātūdilwe’ko mwanda wa kufikidija mpango miyampe itala muzo wādi wilaije Lukunwa lwālailwe lwine lwādi lwa kweselwa’mo bavule. (Ngal. 22:17, 18) Kitatyi kyāitabije Bene Isalela kipwano kya Mukanda wa bijila, bāikele ke “kilēme” kya Leza. Mu kino kipwano, kisaka kya Levi kyādi kya kulupula bapidishitu ba muzo. Yehova pa kusamba kipwano kya muzo padi aye ne Bene Isalela ku Lūlu lwa Shinai, wānene amba bakamwikadilanga ke “bulopwe bwa bapidishitu, muzo wa bu-ujila” inoko kālombwelepo kitatyi ne muswelo o bikafikidila. (Div. 19:5-8) Kufika ne pokyāfikidile, kino kipwano kyālombwele patōkelela amba Bene Isalela kebakalamapo Mukanda wa Bijila kamo ne kamo. O mwanda wāsokwele bubi bwabo patōka. Nanshi Bene Isalela bādi banenwe mu Mukanda wa Bijila kwela bitapwa kitatyi ne kitatyi mwanda wa kuputa bubi bwabo. Ino i kimweke patōka amba bādi basakilwa kintu kikwabo, kitapwa kibwaninine kya kwela’tu dimo kupwididile. Bine, bādi basakilwa kintu kikatampe pa kulekelwa bubi bwabo lonso.​—Ngat. 3:19-22.

 5. Mwanda waka Yehova wālaile kwikala’ko kwa kipwano kipya?

⁵ Pano tukokeja kumona mwanda waka nansha kipwano kya Mukanda Bijila byokyādi kikingila, Leza wānene Yelemia alaye kusambwa kwa kipwano kikwabo, kipwano kipya. Pangala pa buswe ne kanye kandi, Yehova wāsakile kwikale bukwashi bwa nyeke ku mizo mivule. Leza wānene kupityila kudi Yelemia pangala pa boba bakabadilwa mu kipwano kipya amba: “Nkalekēla bukondame bwabo, ne bubi bwabo ami nkikavuluka’bopo nyeke, ne nyeke nansha batyetye.” (Yel. 31:34) Nansha uno mulao byo wālailwe mu mafuku a Yelemia, ino uselele lukulupilo lwa kutendelwa ku bantu bonso. Muswelo’ka?

6, 7. (a) Lelo bamo beimvwananga namani pangala pa bubi bwabo? (b) Mwanda waka kwifunda myanda ya kipwano kipya kwitukankamika mpata?

⁶ Tukidi bakubulwa kubwaninina ne divule dine twiyukile amba twi bakubulwa kubwaninina. Kino kyamwekele kudi tutu umo wadi ulwa na makambakano makatampe mu būmi. Wanene amba: “Ponaponene monka mu bukōkekōke, neivwene bibi. Nalangile amba nkikibwanyapo monka kwimana pa bino byonalongele. Nadi nkomenwa ne kulombela. Nadi nshilula na kunena’mba, ‘A Yehova, nkiyukilepo shi usa kwimvwana ino milombelo, ino . . .’” Bamo badi na bukōkekōke bwa muswelo umo nansha boba balongele bubi baikele kwiivwana pamo’nka bwa “dikumbi” dyaputa milombelo yabo keikifika kudi Leza. (Mad. 3:44) Bakwabo bavutakanibwanga ñeni pa kuvuluka bilongwa byabo bibi byobalongele myaka kunyuma. Nansha ke Bene Kidishitu ba kimfwa kiyampe bakokeja kunena bintu byobakealakanya mwenda mafuku.​—Yak. 3:5-10.

⁷ I kutupu nansha umo motudi unena’mba kabwanyapo kushetemukila mu mwiendelejo umbi. (1 Kod. 10:12) Nansha ke mutumibwa Polo mwine wāyukile bilubo byandi. (Tanga Loma 7:21-25.) Pa uno mwanda, i biyampe kuvuluka kipwano kipya. Leza wālaile amba kitungo kikatampe kya kipwano kipya i kya kuleka kuvuluka nansha dimo bubi. Bine, kano i kamweno kekadingakanibwapo! Uno mulao wa kipwano kipya kewabudilwepo kutonona Yelemia pamo ne batwe bene twendelele kwifunda bivule bitala kino kipwano ne kuyuka muswelo otubwanya kumwena’mo.

8, 9. Lelo kulekelwa kwa bubi bwa bantu kwālombele Yehova bika?

⁸ Poenda uyukila’ko Yehova senene, ukajingulula amba i wa lusa ne kanye ku bantu bakubulwa kubwaninina. (Mit. 103:13, 14) Yelemia pa kulaya kipwano kipya, wālombwele patōka amba Yehova ukalekela “bukondame bwabo” ne kakavulukapo bubi nansha dimo. (Yel. 31:34) Ukokeja kulangidija Yelemia wiipangula muswelo ukalekela Leza buno bubi. Dibajinji wādi wa kuyuka’o pa mīsambo itala kipwano kipya, mwanda Leza wādi usaka kunena’mba kukekalanga kumvwañana, nansha kusamba bulunda pa bukata bwandi na bantu. Nanshi, kupityila ku kino kipwano, Yehova wādi wa kufikidija byobya byaāpele Yelemia kusapula, kubadila’mo ne lulekelo. Nshintulwilo mikwabo kamo ne kamo yādi ya kuyukana pādi pa kusokola Leza mpango yandi, kubadila’mo ne yoya itala bintu byādi bya kulonga Meshiasa.

⁹ Padi kodi mumone bambutwile bona bana, kwibadingila mpika. Le ulanga usaka Yehova ekale pamo bwa abo? Mhm, nansha dimo! Kino kyo kyāmwekele patōka kupityila ku kipwano kipya. Pa kyaba kya kutala bubi kilomonyeka, Leza wālondele misoñanya yandi ya boloke na kuleta mungya bijila kyalwilo kya kulekela bubi, nansha byo kyāmulombele bivule. Ukokeja kujingulula bivule pa uno mwanda na kutala byobya byālembele Polo pa kwisambila pa kipwano kipya. (Tanga Bahebelu 9:15, 22, 28.) Polo pa kwisambila pa “kukūla mambo,” wānene amba “kwakubulwa kumwangika kwa mashi, nankyo kutupu kulekelwa kwa myanda.” Mu kipwano kipya, kino kekyādipo kilomba mashi a bitapwa bya bañombe nansha bambuji byādi byelwa mu Mukanda wa Bijila. Ino, kipwano kipya kyāshilwile kwingila kupityila ku mashi a Yesu. Yehova wādi pano wa ‘kulekela bubi ne bilubo’ bya bantu, mwanda kipwano kipya kyāimanine pa kitapwa kibwaninine. (Bil. 2:38; 3:19) Ino le i bāni babadilwa mu kino kipwano kipya ne kumwena mu luno lulekelo? Ke muzopo wa Bayuda. Yesu wānene amba Leza ukela Bayuda, boba bādi bela bitapwa bya mu Mukanda wa Bijila, ne kuvundamukila ku muzo mukwabo. (Mat. 21:43; Bil. 3:13-15) Uno muzo wāyukene amba i “bene Isalela ba Leza,” babundilwe na Bene Kidishitu bashingwe māni a mushipiditu sandu. Kunena na bubine, kipwano kya Mukanda wa Bijila kyādi pa bukata bwa Leza ne Isalela wa ku ngitu, ino kipwano kipya kidi pa bukata bwa Yehova Leza ne Isalela wa ku mushipiditu, kidi’mo Yesu bu Nsenga.​—Ngal. 6:16; Loma 9:6.

10. (a) Lelo “musambo” utambile kudi Davida i ani? (b) Lelo bantu babwanya kumwena ku uno “musambo” namani?

¹⁰ Yelemia wāelekeje Meshiasa wādi wa kwiya, bu “musambo” utamba kudi Davida. Kino kyādi kifwaninwe binebine. Nansha byādi bingila Yelemia bu mupolofeto, mu kine kitatyi’kya, mutyi wa kisaka kya bulopwe bwa Davida wātetelwe. Inoko kitako kyāshele. Mwenda mafuku, Yesu wābutulwa ku musuku wa Mulopwe Davida. Wādi na bubinga bwa kwityilwa amba “Yehova wi boloke bwetu,” mwanda wa kulombola muswelo usenswe Leza ino ngikadilo. (Tanga Yelemia 23:5, 6.) Yehova wālekele wandi Mwana wa bunka asusuke pano pa ntanda ne kufwa. Penepa Yehova​—mungya boloke bwandi​—wābwenye kwingidija bulēme bwa kitapwa kya kikūlwa kya “musambo” ushipukile kudi Davida ke kyalwilo kya kulekelwa. (Yel. 33:15) Kino kyāshitwidile bantu bamo dishinda dya “kubingijibwa bubinga bwa būmi” ne kwibashinga māni a mushipiditu sandu, mwanda wa babadilwe mu kipwano kipya. Bukamoni bukwabo bwa muswelo usenswe Leza boloke, i bumweke ku boba bampikwa shabo kubadilwa mu kino kipwano, inoko babwanya kumwena’mo, enka na motusa kwikimwena.​—Loma. 5:18.

11. (a) Lelo bijila bya kipwano kipya i bilembwe kwepi? (b) Mwanda waka “mikōko mikwabo” isangedile bijila bya kipwano kipya?

¹¹ Lelo usakanga kuyukila’ko myanda mikwabo mishileshile itala kipwano kipya? Kwishila kukatampe kudi pa bukata bwa kipwano kya Mukanda wa Bijila na kipwano kipya i pantu pene po kisonekelwe. (Tanga Yelemia 31:33.) Mbila Dikumi ya kipwano kya Mukanda wa Bijila yādi isonekelwe pa mabwe, ājimine mwenda mafuku. Ino, Yelemia wāletele bupolofeto amba bijila bya mu kipwano kipya bikalembwa umityima ya bantu, ne bikekala’mo nyeke. Bene Kidishitu bashingwe māni, bene babadilwa mu kipwano kipya basangedile bino bijila. Le bidi namani ku “mikōko mikwabo” keitalwepo patōkelela na kino kipwano kipya, ino idi na lukulupilo lwa kwikala na būmi bwa nyeke pano pa ntanda? (Yoa. 10:16) Nabo basangedile bijila bya Leza. Mu muswelo kampanda, badi pamo bwa beni bēlungile ku Bene Isalela, bāitabije ne kumwena mu Mukanda wa Bijila wa Mosesa.​—Levi. 24:22; Umb. 15:15.

12, 13. (a) Lelo mukanda wa bijila wa kipwano kipya i mukanda’ka? (b) Mwanda waka mu “mukanda-wabijila wa Kidishitu,” i mutupu uningilwanga kwingidila Leza?

¹² Lelo ukalondolola namani shi abakwipangula amba, ‘Lelo bijila bilembelwe mu mityima ya Bene Kidishitu bashingwe māni i bijila’ka?’ Eyo, bino bijila bitwanga ne bu “mukanda-wabijila wa Kidishitu.” Wāpelwe dibajinji ku Bene Isalela ba ku mushipiditu, boba badi mu kipwano kipya. (Ngal. 6:2; Loma. 2:28, 29) Ubwanya ne kutela mu kishima kimo “mukanda-wabijila wa Kidishitu” amba i: buswe. (Mat. 22:36-39) Lelo uno mukanda wa bijila ulembwanga namani mu mutyima wa mushingwe māni? Muswelo umo mukatampe i kupityila ku kwifunda Kinenwa kya Leza ne ku kufwena Yehova mu milombelo. I amo, bino bipindi bya mu mutōtelo wa bine bifwaninwe kumweka nyeke mu būmi bwa Bene Kidishitu ba bine, enka ne bwa boba kebadipo mu kipwano kipya ino basaka kumwena’mo.

¹³ “Mukanda-wabijila wa Kidishitu” utelwanga ne bu “kijila kibwane kya bu-mwana-pabo” nansha bu “kijila kya bu-mwana-pabo.” (Yak. 1:25; 2:12) Bantu bavule bādi babutwilwa mu Mukanda wa Bijila wa Mosesa, ino i kekudipo nansha umo ubutwidilwe mu kipwano kipya nansha mu mukanda wa bijila wa Kidishitu. I kutupu muntu ukōkele mukanda wa bijila wa Kidishitu ukaningilwa kwingidila Leza. Ino, i basangale pa kuyuka’mba bijila bya Leza bikokeja kulembwa mu mityima ne amba bantu bonso dyalelo babwanya kumona byabuyabuya bya nyeke bya kino kipwano byālaile Yelemia.

14. Lelo i bāni na bubine bakamwena mu kipwano kipya?

¹⁴ Bamo pa kwifunda enka bantu 144 000 bo badi mu kipwano kipya, bakokeja padi kulanga amba i abo kete bamwena’mo. Padi balañanga namani mwanda i enka bashingwe māni kete badyanga ku byelekejo bya ku Kivulukilo kya lufu lwa Kidishitu, kutūlwanga vinyu yelekeja ‘mashi a kipwanino kipya.’ (Mako 14:24) Inoko, vuluka’mba, boba badi mu kipwano kipya bakelunga na Yesu bu “lukunwa” lwa Abalahama, lwine lukeselwa’mo mizo. (Ngat. 3:8, 9, 29; Ngal. 12:3) Nanshi Yehova, kupityila ku kipwano kipya, ukafikidija mpango yandi ya kwesela bantu bonso mu “lukunwa” lwa Abalahama.

15. Lelo bashingwe māni bālailwe kwingila mingilo’ka?

¹⁵ Yesu Kidishitu, kipindi kibajinji kya lukunwa lwa Abalahama, wingilanga bu Kitobo Mukatampe kadi wāelele kitapwa kibwaninine kine kyālengeje kwikale kulekelwa kwa bilubo ne bubi. (Tanga Bahebelu 2:17, 18.) Leza wātelele tamba kala kwikala’ko kwa “bulopwe bwa bapidishitu, muzo wa bu-ujila.” (Div. 19:6) Mu Isalela wa ku ngitu, bapidishitu bādi batamba mu kisaka kimo, balopwe nabo mu bisaka bishileshile. Ino le uno mulao wa muzo wālailwe wa balopwe ne bapidishitu wādi wa kufikidila namani? Mutumibwa Petelo wātumine mukanda wandi umbajinji ku bapandulwe’mo na mushipiditu. (1 Pet. 1:1, 2) Wēbatelele bu “bupidishitu bwa bulopwe, muzo wa bu-ujila, bantu bakumunwa na Leza enka.” (1 Pet. 2:9) Nanshi Bene Kidishitu bashingwe māni badi mu kipwano kipya bakengila bu bapidishitu batyebatye. Langa’po bidi mokishintulwila! Tulwanga difuku ne difuku na lupusa lwa bubi ‘lwitubikele bulopwe.’ Boba bakengila bu bapidishitu batyebatye nabo badi balwa nalo. (Loma. 5:21) O mwanda bakekala bayuke mwiivwaninanga bantu pobaluba ne pobalwa na milangwe ya kwitopeka. Po pa mwanda, pobakengila na Kidishitu, bakabwanya kwitwivwanina lusa kitatyi kyotunekenya mutyima wetu wa kulonga bubi.

16. Lelo “kibumbo kikatampe” i kikankamikwe namani na binenwa bidi mu Kusokwelwa 7:9, 14?

¹⁶ “Kibumbo kikatampe” kyāmwenwe kinenwe mu Kusokwelwa 7:9, 14, kivwele “bivwalwa bitōka,” bishintulula mwimanino wabo utōka kumeso a Leza. Pa kubadilwa mu boba bakapanda ku “malwa makatakata,” kibumbo kikatampe kiteakanibwanga kala. Nanshi tamba’nka pano, bamo ke badi kala mu mwimanino mufwaninwe ku meso a Leza. Batelwanga pano bu boloke ne bu balunda na Yehova. (Loma 4:2, 3; Yak. 2:23) Kuno shako ko kumwena’mo bine! Shi nobe ubadilwa mu kibumbo kikatampe, kulupila’mba Leza udi na mutyima wa kwingila nobe ponso polonga bukomo bwa kwikala nyeke utōka ku meso andi.

17. Lelo Yehova ‘kavulukangapo’ bubi monka mu buluji’ka?

¹⁷ Lelo bubi bwa boba betabijibwe na Leza bukekala namani? Enka na motwekimwenanga ku ngalwilo, Yehova wānene kupityila kudi Yelemia amba: “Nkalekēla bukondame bwabo, ne bubi bwabo ami nkikavuluka’bopo nyeke.” (Yel. 31:34) Leza ulekelanga bashingwe māni ponka pa kitapwa kya Yesu. Muswelo umo onka, Leza ubwanya kulekela bubi bwa kibumbo kikatampe ponka pa ano “mashi a kipwano.” Kunena kwānene Yelemia amba Leza ‘kakavulukapo’ monka bubi ke kulombolapo amba kakidipo na luté nansha’tu amba kakidipo na bukomo bwa kuvuluka bubi. Ino, kulombola’mba, shi Yehova wapu’tu kudingila ne kulekela kipya-mambo wesāsa, Leza waela bubi bwa muntu’wa kunyuma. Vuluka bubi bwa Mulopwe Davida bwa na Bafesheba ne Udia. Davida wādingilwe ne kwangula bipa bilula bya bubi bwandi. (2 Sam. 11:4, 15, 27; 12:9-14; Is. 38:17) Leza kākilaminepo kadi monka Davida mambo a bubi bwandi. (Tanga 2 Bilongwa 7:17, 18.) Enka na mokilombwedilwe mu kipwano kipya, shi Yehova walekela bubi pa kitapwa kya Yesu, kakavuluka’bopo monka.​—Ezek. 18:21, 22.

18, 19. Lelo kipwano kipya kidi na bufundiji’ka butala pa kulekela?

¹⁸ Eyo, kipwano kipya kilombola patōka mwanda wa mbuvu mikatampe utala pa muswelo wikele Yehova na bantu ba bubi, bashingwe māni ba mu kipwano ne boba badi na lukulupilo lwa kwikala pano pa ntanda. Nanshi ubwanya kukulupila amba shi Yehova wakulekela bubi, kakebuvulukapo monka. O mwanda mulao wa Leza utala kipwano kipya udi na bufundiji ku batwe bonso. Wiipangule bidi amba, ‘Lelo ntompanga kwiula Yehova na kuleka kuvuluka bilubo bya bakwetu byonanenene kala amba nebalekela?’ (Mat. 6:14, 15) Kino kitalanga tubilubo tutyetutye ne bikatampe bine, kimfwa bubi bwa mwinē petu Mwine Kidishitu walonga makoji. Shi ulubilwe waitabija kulekela wa makoji wesāsa, lelo i biyampe ‘kuvuluka bubi’bwa monka’? Shako, kwela bubi kunyuma ke kupelangapo, inoko o muswelo otubwanya kwiula Yehova.a

¹⁹ Tubwanya kwingidija bufundiji budi mu mwanda utala kipwano kipya na muntu wapangilwe mu kipwilo, ino wesāsa ne kujokejibwa. Lelo bikekala namani shi uno muntu wakujimijije bintu nansha kukupēlula mu muswelo kampanda? Pano waitabijibwa kujokela mu kipwilo. Lelo byotutanga mu Yelemia 31:34 bikakwasha namani milangwe yetu ne muswelo otukamumona? Le tukalekela uno muntu wetulubile ne kuleka kuvuluka bubi’bwa monka? (2 Kod. 2:6-8) Bine, kino kyo kintu kifwaninwe kulonda umbūmi boba bonso basangedile kipwano kipya.

20. Lelo mulangilo obe i mwishile namani na wa bantu bavule ba mu mafuku a Yelemia?

²⁰ Mu mafuku a Yelemia, Bayuda bavule bādi banena ne kunena’mba: “Yehova kakalongapo biyampe, ehe, nansha kulonga bibi kwine.” (Zef. 1:12) Nansha byobādi bayukile Yehova i ani ne mwaikadile, bālangile amba kakalongapo kintu; nansha kwibasomanya kwine amba balonde misoñanya yandi. Ino, abe uyukile amba kekudipo kintu kifyeme ku meso a Leza. Wakaminwe Leza na bulēme ne usaka nyeke kuleka kulonga bibi. (Yel. 16:17) Kadi uyukile amba Yehova i Shabana wa buntu. Aye uyukile bilongwa byetu biyampe, ekale bantu bakwabo bebimone nansha kebebimwene.​—2 Bil. 16:9.

21, 22. Mwanda waka kusakilwapo kulombolwa amba: “Yuka Yehova”?

²¹ Kintu kikatampe kidi mu kipwano kipya i kino amba: “Nkatūla mukanda wa bijila wami munda mwabo; kabidi nkalemba’o umutyima wabo; penepo nkekalanga Leza wabo, . . . Penepa kala kebakalombolapo monka kadi, muntu ense ku mwikadi nandi kadi, nansha muntu ense ku mwanabo, amba: yuka Yehova mwanda bonso bakandyuka.” (Yel. 31:33, 34) Bashingwe māni badi pa ntanda dyalelo i balombole amba badi na mukanda wa bijila wa Leza munda mwabo. Basenswe bubinebine budi’mo, pa kyaba kya kukulupila bufundiji bwa muntu shi ani, shi ani. Kadi bapanga bantu babundile kibumbo kikatampe buyuki bwa mu Bible na nsangaji. Mu uno muswelo, boba badi na lukulupilo lwa kwikala pano panshi nabo abayuka Yehova ne kumuswa. Bakōkelanga na mutyima tō ku bwendeji bwandi ne kukulupila mu milao yandi. Padi nobe ye moikadile. Umuyukile amba udi’ko kadi upwene nandi. Bine, ubamwena’mo!

²² Lelo wi mubwanye namani kuningija kipwano kyobe na Yehova? Ubavuluka ne kutatana mpika bitatyi byowamwene amba walondolola milombelo yobe. Pa kwimwena kino, wasangele mpata pa kuyukidila mwikadile Leza. Wemwenine bukwashi bwandi powavulukile kisonekwa kampanda kyakukwashe unekenye lwana. Sangela ino myanda yonso yowemwenine. Buyuki bobe bwa kumuyuka bukavula, shi wendelele kwifunda Kinenwa kyandi​—ke ko kamweno kaendaenda kadi.

23. Kuyuka Yehova kwitukwashanga namani tuleke kukambakanibwa na milangwe mibi?

²³ Kudi dyese dikwabo didi mu kipwano kipya dyotukokeja kwimwena tamba’nka pano. Kuyuka Yehova bu mwine ulekela kupityila ku kino kipwano kubwanya kwitukwasha tukomene milangwe ya kwitopeka. Kimfwa, bamo bapulumwine memi kumeso kwa kuyuka misoñanya ya Leza, bakokeja kwitopeka ne kutenekwa ku mutyima mwanda baipaile ku kusaka muntu wadi wenda uvunguluka munda. Bamo bekalanga na ino milangwe mwanda baipaile bantu ku divita. Kitapwa kya kikūlwa kya Yesu​—kyalwilo kine kya kipwano kipya​—kilengejanga bantu besāse bya binebine balekelwe. Byo bidi namino, tubulwe’po kwitabija na mutyima umo amba shi Yehova wetulekela bubi, myanda ibapu? Ketufwaninwepo kadi kwendelela kulanga pa bubi bwapwa kwitulekela Yehova ku buntu bitupu.

24. Lelo ubakankamikwa namani na nsekununi idi mu Yelemia 31:20?

²⁴ Tutana bukamoni bumwekelele bwa kulekela kwa Leza mu Yelemia 31:20. (Tanga.) Makumi a myaka kumeso kwa Yelemia kwikala’ko, Yehova wāpēle mfuto bulopwe bwa kungala bwa bisaka dikumi bya Isalela (bwimaninwe na Efelaimi, kisaka kitumbe) mwanda wa butōtyi bwabo bwa bilezaleza. Baselelwe bu misungi. Ino, Leza wādi usenswe bininge bantu ba mu uno muzo ne wēbafwidile lusa. Wāendelele kwibasanswa pamo bwa “mwana mwana-mulume muswedibwe.” Shi webalanga, ne munda mwandi ke “mujina,” ko kunena’mba byādi bimutenga bininge. Ino nsekununi ya myanda idi mu kipwanino kipya ilombola mubaile lusa lwa Yehova ku boba besāsa bubi bwabo bwa pa kala.

25. Mwanda waka ubwanya kufwija’ko Yehova pangala pa kipwano kipya?

²⁵ Mulao wa Yehova wa kulekela bubi kupityila ku kipwano kipya ukafikidila ne pa mfulo ku mfulo kwa Umbikalo wa Kidishitu wa Myaka Kanunu. Yesu Kidishitu, pamo ne bapidishitu batyebatye 144 000, bakalwīja bantu ba kikōkeji ku bubwaninine. Kupwa kwa matompo a mfulo, muzo wa muntu ukekala ke kisaka kya Yehova kya ntanda yonso kiyule bantu. (Tanga Loma 8:19-22.) Pano ke tutwa na tutwa twa myaka, bantu bonso kashā babinza na biselwa bya bubi. Inoko, bantu ba Yehova bakekala “ke byana bya bene bya ntumbo bwa bāna ba Leza,” bakūlwe ku bubi ne ku lufu. Nanshi, kulupila amba, kupityila ku mpangiko ya buswe ya kipwano kipya, ubwanya kumona byabuyabuya bivule. Ukamwena byabuyabuya tamba’nka pano ne nyeke ne nyeke kupityila ku “musambo” wa Davida ne kukemwena “boloke mu ntanda’ya.”​—Yel. 33:15.