“Yehova Walonga Kyokya Kyālangile”

 1. Lelo Yelemia wānene bika pangala pa bupolofeto bwa Yehova kitatyi kyāonakanibwe Yelusalema fututu?

YELUSALEMA udi mu masala. Mwishi kashā ufituka wa mudilo wa bushindañani wasokwa na Bene Babiloni. Yelemia wāvulukile kudila kulenga moyo kwa boba bepaibwe. Wāsapwidilwe bintu byādi bya kufika, ne kadi binkumenkume byāfikidile monka mwānenene’byo Leza. Mupolofeto udila’mba: “Yehova wālonga kyokya kyālangile.” Bine kino shakyo kyo kinkumbulu kya kupona kwa Yelusalema!​—Tanga Madilo 2:17.

 2. Yelemia wēmwenine kufikidila kwa byānenene bupolofeto myaka tutwa kunyuma?

² Bine, Yelemia wēmwenine kufikidila kwa bupolofeto buvule butala pa bantu ba Leza, kubadila’mo ne bupolofeto bwa kala. Myaka tutwa kunyuma, Mosesa wālombwele Isalela bipa bilupula ku kukōkela ne ku kubulwa kukōkela Leza​—“dyese” nansha “mafingo.” Yehova wādi usakila bantu bandi biyampe, ke dyese kadi. Ku mutamba mukwabo, mafingo ādi alupuka ku kubulwa kukōkela, ādi olula masenda. Mosesa wādyumwine​—Yelemia nandi wāpituluka’mo mwenda mafuku​—amba boba bapela Yehova ne kulwa nandi bādi ba ‘kudya ngitu ya babo bana bana-balume, kabidi ne ngitu ya babo bana bana-bakaji.’ (Kup. 30:19, 20; Yel. 19:9; Lev. 26:29) Bantu bamo babwanya kwiipangula’mba, ‘Lelo kino kintu kibi mpata kibwanya kulongeka dyalelo?’ Eyo, mu bula bwa kutekelwa kasāla na Bene Babiloni, bidibwa byākomene, ne kino kyālongekele. Yelemia wānene amba: “Makasa a bana-bakaji ba lusalusa batēka bāna babo; badi ke mwita wabo mu musala wa mwana bantu bami, mwana-mukaji.” (Mad. 4:10) Yō bulanda!

 3. Lelo Leza pa kutuma bapolofeto ku bantu bandi wādi usaka bika?

³ Na bubine, Yehova pa kupa bapolofeto pamo bwa Yelemia mwingilo kādipo usaka basapule musala bitupu. Leza wādi usaka bantu bandi bajokeje mwiendelejo wabo wa kikōkeji. Wādi usakila babipya-mambo besāse. Ezela wālombwele kino patōkelela amba: “Yehova Leza wa bashabo’wa watuma ko badi pa mikendi yandi kukēlela lubanga’tu bwē ne kutuma; ke-muntu wasokwele lusa pa bantu bandi, ne pa kikalo kyandi.”​—2 Bil. 36:15; Tanga Yelemia 26:3, 12, 13.

 4. Lelo Yelemia wēivwene namani pangala pa musapu waādi usapula?

⁴ Pamo bwa Yehova, Yelemia nandi wākwatyilwe muzo wabo lusa. Ukamona lusa lwandi mu binenwa byaānene kumeso kwa Yelusalema kupona. Ñeni yāmuvutakene mpata pa kino kimpengele kya kimpampamukila. Kino i kinzengele kekyādipo kya kulongeka shi bantu bātejeje ne kukōkela musapu wāsapwilwe na Yelemia! Langa’po mwaēivwanine pa kusapula musapu wa Leza. Wādidile amba: “Munda mwami! yo, munda mwami! nasanshijibwa pa mutyima wami, mutyima wami untwa munda mwami; nkikōkeja’po kutalala nyā, ke-wi-muntu ubaivwana a muya wami; kuvumija kwa kimpungidi, kidyumu kya bulwi.” (Yel. 4:19) Kādipo ubwanya kutalala nyā pa kufwena kwa kyamalwa.

 5. Mwanda waka Yelemia wādi ukulupile musapu waādi usapula?

⁵ Mwanda waka Yelemia wādi ubwanya kukulupila amba bupolofeto bwasapula bukafikidila? (Yel. 1:17; 7:30; 9:22) Yelemia wādi muntu wa lwitabijo wēfundile Bisonekwa kadi wādi uyukile amba Yehova i Leza wa bupolofeto bwa binebine. Mānga ilombola bukomo bwa Yehova bwa kulaya binkumenkume bimweka ku bantu bu bikomo kulongeka, kimfwa kunyongololwa kwa Isalela mu bupika bwa Edipito. Yelemia wādi uyukile biyampe nsekununi idi mu mukanda wa Divilu ne binenwa bya kamoni kēmwenine na meso. Yoshua wāvulwije banababo Bene Isalela amba: “Muyukile umityima yenu yonso ne mu myuya yenu yonso, amba nansha kintu kimo kine kyabulwa ku byonso bintu bilumbuluke byesambile Yehova Leza wenu pa mwanda wenu, mhm; byonsololo’tu byemufikidile, kadi nansha kimo kine kya byobya kyabudilwepo, mhm.”​—Yos. 23:14.

6, 7. (a) Mwanda waka ufwaninwe kusangela bupolofeto bwāsapwilwe na Yelemia? (b) I bika bikakukwasha ukulupile mu musapu osapula?

⁶ Mwanda waka ufwaninwe kwendelela kuta mutyima ku bupolofeto bwāsapwilwe na Yelemia? Dibajinji, mwanda wādi ukulupile bya binebine mu bukomo bwa binenwa bya Yehova. Dya bubidi, mwanda binenwa bimo byānene Leza kupityila kudi Yelemia bifikidilanga dyalelo, kadi bikwabo bisa kufikidila kumeso. Dya busatu, misapu mivule kadi mipotoloke yāsapwile Yelemia mu dijina dya Leza, ne kininga kyaāsapwile’yo, byāmuyukenye bu mwingidi wa Leza mukankamane. Mufundi umo unena’mba: “Nansha shi tudingakanye na bapolofeto bavule, Yelemia i mutabuke’mo.” Yelemia wāyukilwe bu kyelekejo kya bukomo bwa muswelo wikele Leza na bantu Bandi, enka ne kitatyi kyādi kisamba Yesu, bantu bamo bādi bamuteja bālangile amba i Yelemia.​—Mat. 16:13, 14.

⁷ Pamo enka bwa Yelemia, nobe udi mu kitatyi kya kanshinyenshinye kifikidila bupolofeto bwa Bible. Kadi enka bwa Yelemia, usakilwa kulama kikulupiji kyobe mu bubinebine bwa milao ya Leza. (2 Pet. 3:9-14) Le ukalonga’byo namani? Na kwendelela kutamija kikulupiji kyobe mu Kinenwa kya Leza kya bupolofeto kadi kikulupilwa. O mwanda, mu uno shapita tusa kwisambila pa bupolofeto kampanda bwāsapwile Yelemia ne bobwa bwaādi umona bufikidila. Kadi bukwabo botusa kubandaula bwāfikidile mwenda mafuku. Kadi bukwabo nabo butalanga būmi bobe bwa dyalelo ne bwa mafuku āya kumeso. Leka buno bubandaudi buningije kikulupiji kyobe mu Kinenwa kya Yehova kya bupolofeto mwanda wa kunena’mba witabije na kusumininwa amba ‘ukalonga kyokya kyālangile.’​—Mad. 2:17.

8, 9. Le i muswelo’ka umo wikele Bible bu dibuku dya kutendelwa?

⁸ Kudi bantu bavule bapima kulaya bintu bya kumeso. Langa bansunga, bantu ba politike, ba majende, nansha batela bya kumeso. Ne kutatana mpika, i bikukomene kunena’tu na bubine bonso nansha kanda katyetye ka kumeso​—ka kintu kisa kulongeka mu mafuku nansha mu mayenga matyetye. Ino bupolofeto bwa binebine bo buyukilwa’po Bible. (Is. 41:26; 42:9) Bupolofeto bonso bwa Yelemia, bwikale bwa kulongeka mu mafuku matyetye nansha mavule, i bwampikwa kwitupa. Kadi buvule bwādi butala bantu umo ne umo nansha mizo. Tubandulei bidi bupolofeto butyetye’tu bwāfikidile mu mafuku a Yelemia.

⁹ Lelo i ani dyalelo ubwanya kulaya musa kwikadila ntanda mu mwaka umo nansha ibidi? Kimfwa, i bubandaudi’ka bwa myanda ya ntanda bubwanya kulaya pambulwa kwitupa amba bulopwe kampanda busa kubikulwa? Inoko, Yelemia wālaile ku bukomo bwa mushipiditu wa Leza kutandabuka kwa bulopwe bwa Babiloni. Wānene amba Babiloni, i “lutuo lwa nsahabu” lusa kwingidijibwa na Yehova mwanda wa kupungulula bukalabale bwandi pa Yuda, pa bantu ne mizo mikwabo yādi ibajokolokele, amba bende mu bupika. (Yel. 51:7) Bino byo byēmwenine Yelemia ne bantu ba mu andi mafuku.​—Dingakanya na Yelemia 25:15-29; 27:3-6; 46:13.

10. Lelo Yehova wālaile bika bitala balopwe baná ba Yudea?

¹⁰ Kadi Yehova wāingidije Yelemia kulombola mfulo ikafikila balopwe baná ba Yudea. Yehova wālaile pangala pa Yehoahaza, nansha Shalumu, mwanā Mulopwe Yoshia amba ukaselwa bu musungi ne kakalukilapo mu Yuda nansha dimo. (Yel. 22:11, 12) Ne ye mokyālongekēle. (2 Bal. 23:31-34) Leza wānene amba Yehoyakimi, mpingakani wa Yehoahaza ukajikwa “mu mujīkilo wa kimbulu.” (Yel. 22:18, 19; 36:30) Bible kalombwelepo patokelela muswelo waāfwile nansha ne byālongelwe na ngitu yandi, ino ulombola’mba Yehoyakini wandi mwana wāmupingakene pa lupona. Yelema wālaile amba Yehoyakini (witwa ne bu Konia nansha Yekonia) ukaselelwa ku Babiloni bu musungi ne kufwila konka. (Yel. 22:24-27; 24:1) Ye mobyāpityile. Lelo Zedekia, mulopwe wa mfulo nandi? Yelemia wālaile amba Zedekia ukapānwa mu makasa a balwana, kebakamufwilapo lusa. (Yel. 21:1-10) Le byāpita namani? Balwana nandi bamwanuna. Baipaya bandi bana bana-balume ku meso andi, ebiya bamusaba meso, ne kumuselela ku Babiloni, kwine kwaākafwidile. (Yel. 52:8-11) Bine, buno bupolofeto bonso bwāfikidile.

11. Le Hanania wādi ani, ne Yehova wālaile bika pādi?

¹¹ Tutanga mu Yelemia shapita 28 amba mu umbikalo wa Zedekia, Hanania mupolofeto wa bubela wāpatenye binenwa byānene Yehova kupityila kudi Yelemia bitala kubikalwa kwa Yelusalema na Bene Babiloni. Hanania pa kupumpunya kinenwa kya Leza, wānene amba lupungu lwa bupika lwa Nebukaneza pa Yuda ne pa mizo mikwabo lukatyumuka. Inoko, Yelemia kupityila ku bwendeji bwa Yehova, wāsokwedile patōka bubela bwa Hanania, kadi wāpituluka monka amba mizo mivule ikengidila Babiloni, wāsapwila ne mupolofeto wa bubela amba usa kufwa uno mwaka. Ne ye mobyāikadile.​—Tanga Yelemia 28:10-17.

12. Lelo bantu bavule ba mu mafuku a Yelemia bālongele namani pa musapu wandi mwinemwine wa bupolofeto?

¹² Na bubine, musapu mwinemwine wa bupolofeto wāpelwe Yelemia na Leza wādi utala kupona kwa Yelusalema. Yelemia wādyumwine kitatyi ne kitatyi amba kibundi kekikaponejibwapo, enka shi Bayuda abesāsa ku butōtyi bwabo bwa bilezaleza, ku bukondame, ne ku bupolapola bwabo. (Yel. 4:1; 16:18; 19:3-5, 15) Bantu bavule ba mu mafuku a Yelemia bālangile amba Yehova kakalongapo kino kintu nansha dimo. Tempelo ya Leza yādi imene mu Yelusalema. Le ukaleka namani kifuko kino kikola kyonakanibwe? Bādi balanga’mba kebibwanikapo. Ino monka moyukile, Yehova kabepangapo. Wālongele kyokya kyālangile.—Yel. 52:12-14.

13. (a) Lelo ano etu mafuku adingakene namani na a Yelemia? (b) Mwanda waka milao yālaile Leza ku bantu bamobamo ba mu mafuku a Yelemia ikusangajanga?

¹³ Bantu ba Leza dyalelo badi mu ngikadilo idingakene na yoya yādi’mo bantu ba Yehova ba kikōkeji ba mu mafuku a Yelemia. Tuyukile amba panopano ponka Yehova usa kuleta kyamalwa pa boba bapela kwimvwana bidyumu byandi. Tubwanya kukankamikwa na milao ya bupolofeto, pamo na mwākankamikilwe Bayuda bādi bakwatakanya mutōtelo utōka mu kitatyi kyāikele’ko Yelemia. Leza wāsapwidile Bene Lekaba amba bakapanda ku kupona kwa Yelusalema mwanda wa kikōkeji kyabo kwadi ne ku misoñanya ya shabo. Bine bāpandile. Mwenda mafuku bubinebine bwa uno mwanda i bumweka mu kutelwa kutelelwe “Malekiya mwana Lekaba mwana-mulume,” wākweshe pa kūbakululwa kwa Yelusalema mu bwendeji bwa Nehemia. (Neh. 3:14; Yel. 35:18, 19) Yehova wākulupije Ebede-meleke amba nandi ukapanda mwanda wādi ukulupile mwadi ne wādi ukwatakenye Yelemia. (Yel. 38:11-13; 39:15-18) Mo monka kadi, Leza wālaile amba Baluki, mukwashi wa Yelemia ukatambula ‘būmi bwandi ke kya kukwatwa.’ (Yel. 45:1, 5) Penepo le unena namani pa kufikidila kwāfikidile buno bupolofeto? Le ulanga Yehova ukakulongela bika shi wikale wa kikōkeji?​—Tanga 2 Petelo 2:9.

14. Mwanda waka bupolofeto bwa Leza butala Babiloni i butulumukwa?

¹⁴ Leza wālaile amba Nebukaneza ukanekenya Yuda ne Edipito. (Yel. 25:17-19) Kino kyādi kimweka bu kyeni, mwanda Edipito wādi nkomonkomo, wātādile’nka ne Yuda. (2 Bal. 23:29-35) Yelusama pa kupwa kupona, Bayuda bāsheleshele’ko bātongele kushiya ntanda yabo ne kukakimba mutyima-ntenke ku Edipito. Nansha byēbakandile Yehova ne kwibalombola’mba ukebesela shi bashikate enka mu Yuda, ino abo bāsakile’tu’nka kwenda. Shi kadi, nansha bānyemēne mu Edipito, kipete kyobādi batyina kyādi kya kwibapeta kwine’kwa. (Yel. 42:10-16; 44:30) Mu bilembwa bya Yelemia kemudipo mulangwe wa amba Yelemia wāmwene Babiloni ukatamba Edipito. Kyotuyukile i kino amba kufikidila kwa bupolofeto bwa Yehova kwāsadile Bene Isalela bākafyeme mu Edipito kitatyi kyātambilwe Edipito na Bene Babiloni ku ngalwilo kwa myaka katwa ka busamba K.K.K.​—Yel. 43:8-13.

15, 16. Lelo kinenwa kya Leza kitala pa kunyongololwa kwa bantu bandi kyāfikidile muswelo’ka?

¹⁵ Kadi Yelemia wālaile bupolofeto butala pa mfulo ya Babiloni, mwine wātambile Edipito. Yelemia wālombwele myaka katwa kumeso, mukaponena Babiloni mu kitulumukila. Namani? Mupolofeto wa Leza wānene amba mema ebakingile “akomijibwa,” kadi ne bantu ba bulwi kebakalupo. (Yel. 50:38; 51:30) Buno bupolofeto bwāfikidile kamo ne kamo kitatyi kyākupwidile kufula Bene Mede ne Bene Peleshia munonga wa Ufalete, bātoba mu kyālo kya munonga, bātwela mu kibundi, ne kukwata Bene Babiloni mu kitulumukila. Padi ubaela milafwe ku binenwa bikwabo bilombola’mba kino kibundi kyādi kya kushala masala, mutuputupu. (Yel. 50:39; 51:26) Kufika ne dyalelo, masala a Babiloni, kyādi kibundi kikatakata i bukamoni bulombola bubinebine bwa bupolofeto bwa Leza.

¹⁶ Yehova wāsapwile kupityila kudi Yelemia amba Bayuda bakengidilanga Bene Babiloni mu bula bwa myaka 70. Kupwa Leza wādi wa kujokeja bantu bandi mu yabo ntanda. (Tanga Yelemia 25:8-11; 29:10.) Danyele wādi ukulupile buno bupolofeto, kadi wāingidije’bo mwanda wa kulombwedidila kitatyi kya kufula “misala ya Yelusalema.” (Dan. 9:2) Ezela wānene amba: “Kinenwa kya Yehova ku kyakwana kya Yelemia kifikijibwe, Yehova watununa mushipiditu wa Kilusa mulopwe wa Peleshia,” mwine wāsadile Babiloni, ajokeje Bayuda mu yabo ntanda. (Eza. 1:1-4) Boba bājokele bāikele na ndoe kwabo ne kujokeja mutōtelo utōka enka na mwālaile’kyo Yelemia.—Yel. 30:8-10; 31:3, 11, 12; 32:37.

17. Lombola binenwa bya Yelemia bitala pa ‘madilo’ mu Lama mobikokeja kufunkila pa binkumenkume palapala bibidi.

¹⁷ Kadi Yelemia wāsonekele bupolofeto bwāfikidile mwenda mafuku. Wānene amba: “E mwanenena Yehova namino amba: diwi i divwanike mu lama, madilo a ku mutyima, kudila impolo bya mwiko; Letyela udila bandi bāna upela kusengibwa pa bāna bandi mwanda i patupu’bo.” (Yel. 31:15) I kimweke amba kupwa kwa kusalwa kwa Yelusalema mu 607 K.K.K., Bayuda bamisungi bābungakanibwe mu kibundi kya Lama, kidi ku makilometele 8, kungala kwa Yelusalema. Padi bakutwa bamo bāipailwe ku Lama. Kino kyālengeje kufikidila kubajinji, kudi pamo bwa Letyela udila bandi “bāna” bajimina. Myaka tutwa tusamba ne musubu pa kupita’po, Mulopwe Heloda wāipaije twana mu Betelema. Mateo, mulembi wa Evanjile ushintulula amba, binenwa bya Yelemia byālaile buno butapani bukatampe.​—Mat. 2:16-18.

18. Lelo bupolofeto bwa Leza butala Edoma bwāfikidile namani?

¹⁸ Bupolofeto bukwabo bwāfikidile mu myaka katwa kabajinji K.K. Leza wālaile kupityila kudi Yelemia amba Edoma ubadilwa mu mizo yādi ya kususulwa na butambañani bwa Babiloni. (Yel. 25:15-17, 21; 27:1-7) Inoko kinenwa kya Leza kyānene bipite ne bino. Edoma wādi wa kwikala pamo bwa Sodoma ne Ngomola. Ubayuka kala mobishintulwila—masala a lonso, kubulwa kwikala’ko. (Yel. 49:7-10, 17, 18) Kino kyāfikidile binebine. Lelo ulanga i kwepi kukokeja kutanwa majina Edoma ne Bene Edoma dyalelo? Le i pa tulata to-tonso twa dyalelo? Kijila. Atanwanga nakampata mu mabuku a kala ne mu mānga ya mu Bible nansha pa tulata twisambila pa kitatyi’kya. Flavius Josephus usekununa amba Bene Edoma bātwejibwe ku bukomo mu Buyuda mu myaka katwa ka bubidi K.K.K. Ebiya Yelusalema pa kupwa konakanibwa mu 70 K.K., bājimankana.

19. Lelo mukanda wa Yelemia usokola bika bitala pa bukomo bwa Leza bwa kufikidija bupolofeto?

¹⁹ Monka mowekimwena, shapita ne shapita wa mukanda wa Yelemia udi na bupolofeto butala pa muntu umo umo ne pa muzo mutuntulu. Bupolofeto buvule ke bupwe kala kufikidila. Kufikidila kwa bupolofeto budi’mo kukulengeja ute mutyima ne kwifunda uno mukanda ukulombola kintu kampanda kitala padi Leza obe mukatakata. Yehova wālongele kyokya kyālangile, kadi usa kwikilonga monka. (Tanga Isaya 46:9-11.) Kino kikomeja kikulupiji kyobe mu byobya bilaile Bible. Na bubine, kufikidila kwa bupolofeto bumobumo bwa Yelemia kutalanga būmi bobe dyalelo ne mu mafuku āya kumeso. Leka bidi tubandaule’ko bupolofeto bumobumo mu kino kipindi kya shapita kyashala’ko.

20-22. Mwanda waka tukokeja kunena’mba bupolofeto bwa Bible, kubadila’mo ne bumobumo bwa mu mukanda wa Yelemia budi na kufikidila kuvule? Leta kimfwa.

²⁰ Bupolofeto bwa Bible bubwanya kwikala na kufikidila kumo nansha kuvule. Kino i kimweke mu byālondolwele Yesu bandi bana ba bwanga bāmwipangwile kiyukeno kya “kwikala’po [kwandi] ne kya kuvuika kwa ngikadilo ya bintu.” (Mat. 24:3, NW) Buno bupolofeto bwāfikidile tamba mu 66 kutūla mu 70 K.K. Ino i kimweke patōka’mba mu muswelo mukwabo, buno bupolofeto busa kufikidila pa “kyamalwa kibūke” kisa kufikila ngikadilo yonso imbi ya bintu. Kino kikekala kyamalwa “kya kubulwa, nansha kingi kikwabo kidingakene nakyo, kushilwila konka kungalwilo kwāpangile mwine Leza, ne kutūla ku dyalelo kuno’ku, nansha kumeso kwine.” (Mat. 24:21) Kino i kikwatañane na bupolofeto bwāsonekelwe na Yelemia. Bumo bwāshilwile kufikidila mu 607 K.K.K. ino kufikidila kwa bubidi kwadi kwa kwikala’ko mwenda mafuku, monka motwekimwenanga mu mwanda utala “Letyela udila bandi bāna.” (Yel. 31:15) Na bubine, bintu bimo byālaile Yelemia bifunkila pa kino kitatyi kyodi’mo, kadi kufikidila kwabyo kukutala ne abe.

²¹ Ukokeja kwikumona mu mukanda wa Kusokwelwa. Mutumibwa Yoano pa kuludikwa na mushipiditu sandu wātelele bupolofeto bwa Yelemia butala pa mfulo ya Babiloni mu mwaka wa 539 K.K.K. tutana mu Kusokwelwa kukwatañana kudi pa kinkumenkume kibajinji ne kyokya kinenenwe kufika mu ludingo lukatampe. Mu bupolofeto bwānenwe na Yelemia bufikidila mu ano etu mafuku mubadilwa ne bobwa butala pa kupona kwa umbikalo mukatampe​—“Babiloni Mukatampe,” umbikalo wa ntanda wa mutōtelo wa bubela. (Kus. 14:8; 17:1, 2, 5; Yel. 50:2; 51:8) Bantu ba Leza bafwaninwe ‘kulupuka’mo’ kutyina kutambula ku mpupo yandi. (Kus. 18:2, 4; Yel. 51:6) Mema a kino kibundi elekeja bantu bandi, nansha bamulamete ‘akōma.’​—Yel. 51:36; Kus. 16:12.

²² Mulao mukwabo usa kufikidila kumeso i wa amba Leza usa kwalwija mutōtelo wa bubela kinongo mwanda wa kususula koususula bantu bandi. Yehova usa “[kumulubwila] mungya . . . byonso byālongele.” (Yel. 50:29; 51:9; Kus. 18:6) Kadi ntanda ya kyelekejo ya mutōtelo wa bubela isa kushala masala.​—Yel. 50:39, 40.

23. I kujokejibwa’ka kwa ku mushipiditu kwālailwe na Yelemia, kufikidile mu myaka ya katwa ka 20?

²³ Monka padi mowekimwena kala, bupolofeto bwāletele Yelemia budi kadi na mwanda muyampe. Ke-pantu, bwālaile ne kujokejibwa kwa mutōtelo wa bine mu ino ntanda ya dyalelo. Kulekelelwa kwa Bayuda bāselēlwe bu misungi mu kibundi kya Babiloni wa kala kudingakene na kulekelelwa kwa bantu ba Leza dyalelo batambile mu Babiloni Mukatakata kupwa kwa Bulopwe kushimikwa mūlu. Mu buluji bwa ku mushipiditu, Yehova waalwije bantu bandi ku mutōtelo utōka, ne kino i kilengeje bekale na nsangaji ne kufwija’ko. I mwesele bukomo bwabo bwa kukwasha bakwabo nabo bamutōte ne kudishibwa biyampe ku mushipiditu. (Tanga Yelemia 30:18, 19.) Nobe wi mwimwene muswelo ufikidija Yehova mulao wandi mu ano mafuku wa kupa bantu bandi bakumbi​—bana-balume batame ku mushipiditu batala ne kulama luombe.​—Yel. 3:15; 23:3, 4.

24. Lelo i binenwa’ka bya bukomo bya Yelemia bisa kufikidila?

²⁴ Mu binenwa bya Yelemia ku bantu ba Leza ba pa kala mudi bujalale bwa kulaya bintu bilumbuluke ku bantu ba kikōkeji ne kidyumu kya konakanibwa ku boba batyiba kipwano kyabo na Yehova. Ye mobikadile ne dyalelo. I bikomo kotudi kukankalwa kumona kidyumu kya kampeja-bukidi kidi mu bino binenwa bya amba: “Kabidi bepaibwe na Yehova bakekala pa dyodya difuku’dya kushilwila ku mfulo imo ya panshi kutūla ne ku mfulo mikwabo ya panshi, ino kebakadilwapo nansha kuboibwapo, nansha kujikwapo kasha; bakekala bu bityani pa mpala ya panshi’ya.”​—Yel. 25:33.

25. Lelo bantu ba Leza dyalelo badi na kiselwa’ka?

²⁵ Bine, tudi mu kitatyi kibi pamo na kyādi’mo Yelemia. Pamo na mu andi mafuku, muswelo witaba bantu ku musapu wa Yehova, i būmi nansha lufu kobadi. Dyalelo bantu ba Leza ke bapolofetopo. Ketupungulwidilwepo mushipiditu wa kubweja mu binenwa bya Yehova byambulwa kwitupa kadi bya binebine bidi mu Bible. Inoko, twi bapebwe mwingilo wa kusapula myanda miyampe ya Bulopwe mafuku onso kufika ne ku mfulo kwa ngikadilo ya bintu. (Mat. 28:19, 20) Na bubine ketusakangapo ‘kwiba binenwa bya Yehova’ na kufya ku bantu byobya bisa kufika. (Tanga Yelemia 23:30.) Twi basumininwe kuleka kutalula mu binenwa bya Leza bukomo ne lupusa lwabyo. Bupolofeto buvule bwāpelwe Yelemia na Leza kusapula bwāfikidile kala. Kino kitukulupija amba, ne bobwa bushele kebwafikidile nabo busa kufikidila bya binebine. Tufwaninwe kulombola bantu amba Leza kasapo kutunya ‘kulonga kyokya kyaālangile, kadi usa kufikidija byobya byaāsoñenye mu mafuku a kala.’​—Mad. 2:17.

26. Lelo i bupolofeto’ka bukwabo bushele’ko botusa kubandaula?

²⁶ Mwingilo ne musapu wa bupolofeto wa Yelemia keubwanyapo kufula pampikwa kwisambila pa mulao mukatampe wālaile Yehova wa “kipwano kipya” na bantu bandi, mukanda wa bijila waānene kulemba mu mityima yabo. (Yel. 31:31-33) Buno bupolofeto ne kufikidila kwabo, bikutala mpata abe, ne o mwanda ukesambilwa’po mu shapita ulonda’ko.