3. (a) Lelo kipindi kya mutyi “kya Yuda” kyelekeja bika? (b) Mwanda waka “kipindi kya mutyi kya Efelaimi” kyādi kyelekeja bulopwe bwa bisaka dikumi?

³ Yehova wāsoñenye Ezekyele asele bipindi bibidi bya mutyi, alembe pa kimo amba “kya Yuda” ne pa kikwabo napo amba “kya Yosefa, kipindi kya mutyi kya Efelaimi.” (Tanga Ezekyele 37:15, 16.) Le bino bipindi bibidi bya mutyi byādi byelekeja bika? Kipindi kya mutyi “kya Yuda” kyādi kyelekeja bulopwe bwa bisaka bibidi, kya Yuda ne kya Benjemani. Balopwe ba ku musuku wa Yuda bādi baludika bisaka bibidi; ne kadi butobo bwādi ku wabo mutamba, mwanda babitobo bādi bengila ku tempelo mu Yelusalema. (2 Bi. 11:13, 14; 34:30) Nanshi, bulopwe bwa Yuda bwādi na balopwe ba ku musuku wa Davida ne na butobo bwa bene Levi. “Kipindi kya mutyi kya Efelaimi” kyādi kyelekeja bulopwe bwa bisaka dikumi bwa Isalela. Lelo kino kipindi kya mutyi kyādi kikwatañene namani na Efelaimi? Mulopwe mubajinji wa ku bulopwe bwa bisaka dikumi i Yeloboame, wa ku kisaka kya Efelaimi. Mwenda mafuku, Efelaimi wāikele ke kisaka kikatampe mu Isalela. (Kup. 33:17; 1 Ba. 11:26) Yuka’mba mu bulopwe bwa Isalela bwa bisaka dikumi kemwādipo balopwe ba ku musuku wa Davida nansha babitobo bene Levi.

Yehova wasoñanya Ezekyele alembe pa kipindi kimo kya mutyi amba “kya Yuda” ne pa kikwabo napo amba “kya Yosefa, kipindi kya mutyi kya Efelaimi.”

PA KALA

Bulopwe bwa Yuda bwa bisaka bibidi

ANO ETU MAFUKU

Bashingwe māni

PA KALA

Bulopwe bwa Isalela bwa bisaka dikumi

ANO ETU MAFUKU

Mikōko mikwabo